1 PAKI TEA NI KORINTHO 13
13
1A pe vasa ki namena ni naatam̃oli maga go ni agelo maga, go a pe tika nadodomiana, a pe vei brass sikai waina e saruru, kite simbal sikai waina e dap̃arap̃ara. 2Go a pe veani navituam̃olikiana ni naveanoasaiana, po atae p̃aia maga mamau puti go naataeana mamau; go a pe veani nasaralomauana mamau, dapala waina a pe risua ki tava maga, ma a pe tika nadodomiana, a pe ta pei te navatuna mau. 3Go a pe vitua ki naleo maga mamau puti waina a peani a naga aga vagani tea tika maga asa, go a pe vitua ki nap̃atokogu naga ega vei tea tap̃arakiana, ma a pe tika nadodomiana, a pe ta pei tea silaeana te navatuna asa mau. 4Nadodomiana e pei maritasoki parau, go e pakale; nadodomiana e da doitoi mau; nadodomiana e da dum̃ana pakavakae a mau, 5e da pei tea p̃op̃o vuka mau, e da mari dapala e pei tea leosakiana mau, e da laaga tea aneana mau, e da pei tea mariana e maeto mau, e da midoaki dip̃a tea sa mau; 6e da laelaea nalakena namarinaleotageleana mau, 7ma e do laelaea sikoti nalomauana; e do dap̃augoro naleo maga mamau puti, e do saralomau naleo maga mamau puti, e do leogoro naleo maga mamau puti, e do soki naleo maga mamau puti. 8Nadodomiana e da dowo te ragi mau: ma naveanoasaiana maga eu pe toko eu pe wo pei tea maripuolikiana; namena maga eu pe toko, eu pe wo makoto; naataeana e pe toko, e pe wo pei tea maripuolikiana. 9Nalakena tu atae magovai go tu pea noa sai magovai: 10ma ragi waina tea waina e matua ega wo umai, tea waina e pei namagovai ega wo pei tea maripuolikiana. 11Ragi waina a pei piakiki, a pasa dapala piakiki, a midodoa dapala piakiki, a midoakip̃otae dapala piakiki: ragi waina a po pei tea matua, a mari puoli ki naleo maga ki piakiki. 12Nalakena ragi waia tu punusi pae ditiro sikai, maligoligo; ma ragi wanogoe narae ega wo paki narae: ragi waia a atae magovai; ma ragi wanogoe aga wo atae m̃ataki ega tapala waina a pei tea ataem̃atakisua‐ana. 13Ma ragi waia nasaralomauana e doko, go naleogoroana, go nadodomiana, nara eu dolu; ma tea warua liu ni tea maga wanogoe e pei nadodomiana.
Currently Selected:
1 PAKI TEA NI KORINTHO 13: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
