1 PAKI TEA NI KORINTHO 12
12
1Ma nalo ni navituam̃olikiana maga ni naatana, tai maga, a da masauna naga nimu kuga vei sap̃o mau. 2Ku atae naga ragi waina ku pei tea ni nalauna maligo maga ku pei tea viragiluaana paki nasup̃e maga waina eu pei pusa, dapala waina ku pe vei tea viragiana; 3Nalakena tea wanogoe a mari mu kuga atae, naga te naata sikai waina e pasa pae Naata ni Sup̃e e da naga, Yesu e pei anathema; go te naata sikai e pe ta pasa pae Naatana Tapu mau, e pe ta mari atae naga, Yesu e pei Yehovah.
4Ma navituam̃olikiana visarasara maga eu doko, ma Naatana sikai maau. 5Go nasuasuaana visarasara maga eu doko, go Nawota sikai maau. 6Go nawosiana visarasara maga eu doko, ma Sup̃e sikai maau, waina e do p̃osiwosi ki naleo maga mamau puti doko tea maga mamau puti. 7Ma namaridokolinaana ki Naatana e pei tea vituakiana paki sara naata sikasikai, naga euga mari m̃ataki asa. 8Nalakena navasaana ni namanumatuaana e pei tea vituakiana paki tea sikai pae Naatana; go navasaana ni naataeana paki tea p̃ota sikai pae Naatana sikai maau. 9Nasaralomauana paki tea p̃ota sikai pae Naatana sikai maau; go navituam̃olikiana maga ni namaripauriana maga paki tea p̃ota sikai pae Naatana sikai maau wanogoe; 10go nawosiana maga ni nakasuaana maga paki tea p̃ota sikai; go naveanoasaiana paki tea p̃ota sikai; go namidoakip̃otaeana ni naatana maga paki tea p̃ota sikai: namena p̃ota maga paki tea p̃ota sikai; go navasadoaana ni namena maga paki tea p̃ota sikai. 11Ma tea maga mamau puti wanogoe Naatana sikai maau wanogoe e do p̃osiwosi ki da, po do magi sara naata sikasikai dap̃otawotae dapala waina e masauna.
12Nalakena dakiusi waina nap̃atoko e sikai maau, po pilake naleo laapa, go naleo maga mamau puti ni nap̃atoko, waina eu laapa, eu pei nap̃atoko sikai maau: Kristo ma e dapala nogoe. 13Nalakena nigida maga mamau puti tu pei tea bapetisoana doko Naatana sikai maau paki nap̃atoko sikai maau, tu pe vei tea ni Yudea maga kite tea ni Hellas maga, tu pe vei naviti maga kite tea veresiana maga dum̃agida doko; go tu mamau puti pei tea mariana tu munu Naatana sikai maau. 14Nalakena nap̃atoko e da pei naleo sikai maau mau, ma e pei naleo laapa. 15Natua e pe naga, Nalakena a da pei nam̃elearu mau, a da pei tea ni nap̃atoko mau; e da pei tea ni nap̃atoko mau nalakena tea wanogoe kite? 16Go nadaliga e pe naga, Nalakena a da pei namata mau, a da pei tea ni nap̃atoko mau; e da pei tea ni nap̃atoko mau nalakena tea wanogoe kite? 17Nap̃atoko mamau e pe vei namata sikai, narogoana e pe toko esava? Tea mamau e pe vei narogoana, nasidogoana e pe toko esava? 18Ma ragi waia Sup̃e e lawo ki naleo maga eu sikasikai puti doko nap̃atoko, dapala waina e masauna. 19Go eu pe mamau puti pei naleo sikai maau, nap̃atoko e pe toko esava? 20Ma ragi waia eu pei naleo laapa, ma nap̃atoko sikai maau. 21Go namata e mari sa noa ki nam̃elearu, Aga kasa ki‐go? Go nap̃au e mari sa noa ki natua maga, Aga kasa ki mu? 22Ma e panop̃ota ki nia, naleo maga ni nap̃atoko waina eu dapala eu manainai sa eu pei tea lomau ni nap̃atoko: 23go natawotu maga ni nap̃atoko, waina tu midoa ki da naga eu da pei tea dodomadaganiana mau, tu doropusi nadodomadaganiana warua liu e doko natawotu maga wanogoe; go natawotu kakagida maga waina eu da pei tea leom̃atakiana mau eu peani naleom̃atakiana warua liu; 24ma natawotu leom̃atakiana kakagida maga eu da peani natikaana mau: ma Sup̃e e mari sarisari nap̃atoko, po pitua ki nadodomadaganiana warua liu paki natawotu waina e dika; 25naga te natap̃otaeana ega ta doko nap̃atoko mau: ma naga naleo maga euga veani namidoakiparatikiana sikai maau dum̃ada paki da. 26Go naleo sikai e pe rogo kite sa, naleo maga mamau puti eu pe rogo kite sa sikoti a; kite naleo sikai e pe vei tea dodomadaganiana; naleo maga mamau puti eu pe laelaea sikoti a. 27Ma nimu ku pei nap̃atoko ni Kristo, go ku sikasikai pei naleo maga kakana. 28Go Sup̃e e lawo ki te seara doko ekalesia, tea vea apostolo maga, kerua profeta maga, ketolu tea vasapiseiki maga, edaku ki tea wanogoe nawosiana kasua maga, edaku ki tea wanogoe navituam̃olikiana maga ni namaripauriana maga, tea silae maga, tea maraki maga, namena visarasara maga. 29Eu mamau puti pei apostolo maga kite? Eu mamau puti pei profeta maga kite? Eu mamau puti pei tea vasa piseiki maga kite? Eu mamau puti pei tea mari nawosiana kasua maga kite? 30Eu mamau puti peani navituam̃olikiana maga ni namaripauriana maga kite? Eu mamau puti pasa ki namena maga kite? Eu mamau puti pasa doa kite? 31Ma kuga masau p̃arua ki navituam̃olikiana warua liu maga. Go aga moro piseiki mu napua sikai waina e p̃ia liu.
Currently Selected:
1 PAKI TEA NI KORINTHO 12: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
