1 PAKI TEA NI KORINTHO 14
14
1Kuga sava dausi nadodomiana; ma kuga masau p̃arua ki navituam̃olikiana maga ni naatana, ma p̃arua liu naga kuga vea noa sai. 2Nalakena tea waina e pasa ki namena sikai e da pasa ki naatam̃oli maga mau, ma e pasa ki Sup̃e; nalakena te naata sikai e da dogo atae mau; ma e pasa p̃aia maga ki naatana. 3Ma tea waina e pea noa sai e pasa ki naatam̃oli maga natavagiana, go navasaparatikiana, go navasapakavakaleana. 4Tea waina e pasa ki namena sikai e dum̃ana davagi a; ma tea waina e pea noa sai e davagi ekalesia. 5Ma a masauna naga kuga mamau puti pasa ki namena maga, ma a masau p̃arua ki nia naga kuga vea noa sai: go tea waina e pea noa sai e p̃arua liu tea waina e pasa ki namena maga, e pe ta pasa doa mau, naga ekalesia ega tape natavagiana. 6Ma ragi, waia, tai maga, a pe valoti punusi mu po pasa ki namena maga, ma a pe ta pasa ki mu pae nanoapakasakiana, kite pae naataeana kite pae naveanoasaiana, kite pae navasapiseikiana mau, a pe silae mu nasava asa? Go naleo maga waina eu da mauri mau, 7waina eu pitua ki nadaleo, e pe vei lokore kite harp, eu pe ta pitua ki namawota ni nasaruruana maga mau, tea waina e pei tea noaana lokore kite harp ega wo pei tea ataeana dapale sava? 8Nalakena paiga e pe vitua ki nadaleo waina e da noa p̃otae mau, sei ega wo dum̃ana mari m̃ata ki nia raki navakalo? 9Dapala nogoe nimu ma, ku pe ta pitua pae namenamu ki navasaana rogo atae m̃atakiana mau, tea waina e pei tea noaana ega wo pei tea ataeana dapale sava? Nalakena ku pe wo pei tea vasa paki namalopa. 10Nadaleo laapa visarasara eu alagoro doko maramana, go te navatuna e da pei tea daleo tika mau. 11Nalakena tea wanogoe a pe ta atae namidoakip̃otaeana ni nadaleo mau, a pe vei tea ni navanua p̃ota sikai paki tea waina e do pasa, go tea waina e do pasa e pe vei tea ni navanua p̃ota sikai nalo kakagu. 12Dapala nogoe nimu ma, nalakena ku pei tea masau p̃arua ki navituam̃olikiana maga ni naatana, kuga laaga naga kuga mari p̃arua ki nia paki natavagiana ni ekalesia. 13Nalakena tea wanogoe naata waina e pasa ki namena sikai ega tapasavasa naga ega vasa doa. 14Nalakena a pe tapasavasa ki namena sikai, naatagu e pe tapasavasa, ma namidoakiataeana aginau e pe vei tea oro: 15Nalakena tea wanogoe e pei nasava? Aga wo dapasavasa ki naatagu, go aga wo dapasavasa ki namidoakiataeana aginau: aga wo lega ki naatagu, go aga wo lega ki namidoakiataeana aginau. 16Nalakena ku pe vasa p̃ia ki naatam̃a, tea ni nasaisaiana waina e pei naatam̃oli veisap̃o ega wo noa Amen sokari navasadodom̃atakiana anigo dapale sava, ragi waina e da atae tea waina ku noa e mau? 17Nalakena nigo ku pasadodom̃ataki p̃ia lomau, ma tea p̃ota e da pei tea tavagiana asa mau. 18A pasadodom̃ataki Sup̃e, nalakena a pasa ki namena maga p̃arua liu puti mu: 19ma a masauna naga aga vasa navasaana lima ki namidoakiataeana aginau doko nasaisaiana, naga aga vasapisei ki tea p̃ota maga, p̃arua liu naga aga vasa navasaana tivilia sikai pae namena sikai.
20Tai maga, kuga ta pei piakiki maga nalo ni namidodoana mau, ma kuga vei pipia maga nalo ni navilosiana, ma kuga vei tea matua maga nalo ni namidodoana. 21E pei tea midiriana doko nawotaeana, naga Aga wo pasa ki narei waia pae naatam̃oli maga ni namena p̃ota maga go pae nagole ni naatam̃oli p̃ota maga; ma euga wo da dogo paratiki nau dapala nogoe mau, Yehovah e noa e. 22Nalakena tea wanogoe namena maga eu pei navaivaiana, eu da magi tea saralomau maga pei navaivaiana mau, ma eu magi tea ta saralomau maga pei navaivaiana: ma naveanoasaiana e da magi tea ta saralomau maga pei navaivaiana mau, ma e magi tea saralomau maga pei navaivaiana. 23Nalakena tea wanogoe ekalesia mamau eu pe vei tea saisaikiana paki tokora sikai, go tea maga mamau puti eu pe vasa ki namena maga, go naatam̃oli veisap̃o maga kite tea waina eu da saralomau mau eu pe umai paki ekopu, eu pe wo da noa naga ku daratara kite? 24Ma tea maga mamau puti eu pe vea noa sai, go tea sikai waina e da saralomau mau kite naatam̃oli veisap̃o sikai e pe umai paki ekopu, e pe vei tea vasap̃aiana pae tea maga mamau puti, e pe vei tea vasap̃otaeana pae tea maga mamau puti; 25tea surukiana maga ni nap̃op̃ona eu pe vei tea mariana eu pe toko lina; go dapala nogoe e pe wo dowo dap̃olosiwo po lotu ki Sup̃e, po dogorogo naga Sup̃e e doko m̃aleoputo kakamu lomau.
26Nalakena tea wanogoe e pei nasava, tai maga? Ragi waina ku saisai, sara naata eu sikasikai peani salamo sikai, eu peani navasapiseikiana sikai, eu peani nanoapakasakiana sikai, eu peani namena sikai, eu peani navasadoaana sikai. Naleo maga mamau puti euga vei tea mariana raki natavagiana. 27Te naata e pe vasa ki namena sikai, tea ruarua eroga vasa, kite euga ta liu dolutolu mau, go euga tum̃ada dua olioli ra; go sikai ega vasa doa: 28ma tea vasa doa e pe tika, ega vunuta doko nasaisaiana; go ega tum̃ana pasa ki nia, go paki Sup̃e. 29Go profeta maga edua kite edolu euga vasa, go tea p̃ota maga euga midoaki p̃otae. 30Ma te navatuna e pe vei tea noapakasakiana paki tea p̃ota sikai waina e doko, tea vea ega vunuta. 31Nalakena ku mamau puti mari atae sikasikai pea noa sai, naga tea maga mamau puti euga ataedogo, go naga tea maga mamau puti euga vei tea vasapakavakaleana; 32go naatana maga ni profeta maga eu doko etano paki profeta maga; 33nalakena Sup̃e e da pei Sup̃e ni navariana mau, ma e pei Sup̃e ni natam̃ateana; dapala waina e doko ekalesia maga mamau puti ni tea tautau maga.
34Nagoroi maga euga vunuta doko nasaisaiana maga; nalakena e da pei tea suasuakiana paki da mau naga euga vasa; ma euga toko etano, ega tapala waina nawotaeana ma e noa e. 35Go eu pe masauna naga euga ataedogo te navatuna, euga vusuusu paki adawota maga sum̃a ni kiada: nalakena e pei tea malierekiana ki nagoroi naga ega vasa nasaisaiana. 36Kite nasava? Navasaana ki Sup̃e e m̃elu mu pano? Kite e umai paki mu sikimu?
37Te naata e pe tum̃ana midoaki nia naga e pei profeta, kite tea ni Naatana, ega atae m̃ata ki tea maga waina a midiri paki mu ara, naga eu pei natip̃akiana maga ki Nawota. 38Ma te naata e pe vei sap̃o ega vei sap̃o.
39Nalakena tea wanogoe, taigu maga, kuga masau p̃arua ki naga kuga vea noa sai, go kuga ta dip̃agoro mau naga euga ta pasa ki namena maga. 40Ma naleo maga namau puti euga vei tea mariana pae naleom̃atakiana go pae namarimatanakiana.
Currently Selected:
1 PAKI TEA NI KORINTHO 14: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
