1 PAKI TEA NI KORINTHO 11
11
1Kuga vei tea mari oli au, ega tapala waina kinau ma a mari oli Kristo.
2Ma a pasa samasamani mu nalakena ku midoa ki nau nalo ni naleo maga mamau puti, po dape soki navasaana vituakiana maga, dapala waina a pitua ki da paki mu. 3Ma a masauna naga kuga atae naga Kristo e pei nap̃au ni sara naatam̃oli; go naga naanoai e pei nap̃au ni nagoroi; go naga Sup̃e e pei nap̃au ni Kristo. 4Sara naanoai waina eu suni kalup̃au, ragi waina eu dapasavasa kite ragi waina eu pea noa sai, eu dododao nap̃auda. 5Ma sara nagoroi waina nap̃auda eu da pei tea kovagoroana mau ragi waina eu dapasavasa kite ragi waina eu pea noasai eu dododao nap̃auda: nalakena e pei tea sikai maau ma e pei tea karoana. 6Nalakena nagoroi sikai e pe ta pei tea kovagoroana mau, ega moro pei tea alatiana: ma e pe vei tea malierekiana ki nagoroi sikai naga ega vei tea alatiana kite tea karoana, ega vei tea kovagoroana. 7Nalakena e one naanoai sikai one lomau naga nap̃auna ega ta pei tea kovagoroana mau, nalakena e pei nunu go nasamasamaana ni Sup̃e, ma nagoroi e pei nasamasamaana ni naanoai. 8Nalakena naanoai e da m̃elu nagoroi mau; ma nagoroi e m̃elu naanoai. 9Go nalakena naanoai e da pei tea tawonakiana nalakena nagoroi mau; ma nagoroi e pei tea tawonakiana nalakena naanoai. 10Nalakena tea wanogoe e one nagoroi one naga ega veani naveinawotaana doko nap̃auna, nalakena agelo maga. 11Ma nagoroi e da doko masale ki naanoai mau, go naanoai e da doko masale ki nagoroi mau, doko Nawota. 12Nalakena dakiusi waina nagoroi e m̃elu naanoai, dapala nogoe naanoai ma e pae nagoroi; ma naleo maga mamau puti eu m̃elu Sup̃e. 13Kuga midoaki p̃otae nap̃alaumu: e pataka ni nagoroi sikai naga ega ta pei tea kovagoroana dapasavasa paki Sup̃e kite? 14Navakilinaana e da pasa piseiki mu, naga, naanoai sikai e pe vilake naloluna varau, e pe maneana pei namaliereana kite? 15Ma nagoroi sikai e pe vilake naloluna varau, e pe maneana pei nasamasamaana: nalakena naloluna e pei tea vituakiana paki nia naga ega vei tea kovagoro sikai. 16Ma te naata e pe alagoro pei tea masau navululuana, kinami au da dape natomariana tapala nogoe mau, go ekalesia maga ki Sup̃e eu da dape a mau.
17Ma ragi waina a dip̃aki mu tea wanogoe, a da pasa samasamani mu mau, nalakena ragi waina ku saisai ku da p̃ia asa mau, ma ku sa asa. 18Nalakena pea mau, ragi waina ku saisai doko ekalesia, a dogo naga natap̃otaeana maga eu doko m̃aleoputo kakamu; go a saralomau magovai asa. 19Nalakena e one asa one naga tagona p̃ota maga euga toko m̃aleoputo kakamu, naga tea maridogopiragiana maga euga vei tea mariana euga toko lina m̃aleoputo kakamu. 20Nalakena tea wanogoe ragi waina ku saisai paki tokora sikai maau, e da pei naga kuga kani nakaniana ki Nawota mau: 21nalakena ragi waina ku ganikani sara naatam̃oli eu sikasikai dape nakaniana adeada pea ki tea p̃ota, go sikai e pitolo, go tea p̃ota e matamaloku. 22Nasava? Ku da peani nasum̃a maga waina kuga kanikani po munu ara? Kite ku midoaki p̃alo ki ekalesia ki Sup̃e, po mari tea maga waina eu da peani mau eu maliere? Aga noa ki mu nasava? Aga vasa samasamani mu tea wanogoe kite? A da pasa samasamani mu mau. 23Nalakena kinau a dape ki Nawota tea waina a moro pitua ki nia paki mu, naga Nawota Yesu, nap̃ogiana waina e pei tea vituakiana asa, e dape bred; 24go ragi waina e pasadodom̃ataki sua, e dova p̃orae a, po naga, Tea waia e pei nap̃atokogu, waina e manimu pei tea marip̃oraeana: kuga mari tea waia naga kuga midoaki nau asa. 25Dapala nogoe lasa munu, edaku ki nakaniana, po naga, Lasa munu waia e pei navasasokiana vau ni nadagu: kuga mari tea waia, ragi maga waina ku pe munugi a, naga kuga midoaki nau asa. 26Nalakena ragi maga waina ku pe kani bred waia, po munu lasa munu, ku do dogorogo ki namateana ki Nawota asa pa pa ega wo umai. 27Nalakena tea wanogoe naata waina e pe kani sa ki bred wanogoe kite munu sa ki lasa munu ki Nawota, sogi ni nap̃atoko ni Nawota go ni nadana e pe wo liko asa. 28Ma naatam̃oli ega tum̃ana midoaki usiusi a, go dapala nogoe ega kani bred wanogoe, po munu lasa munu wanogoe. 29Nalakena tea waina e ganikani po munu, e pe ta midoaki p̃otae nap̃atoko ni Nawota mau, e pe kani po munu navasap̃otaeana dum̃ana paki nia. 30Nalakena tea wanogoe tea laapa m̃aleoputo kakamu eu manainai go eu sasana, go tea laapa eu maturu. 31Ma tu pe tum̃agida midoaki p̃otae gida, tu pe ta pei tea vasap̃otaeana mau. 32Ma ragi waina tu pei tea vasap̃otaeana, tu pei tea varatiana pae Nawota, naga tuga ta pei tea tip̃akotoviana sikoti maramana mau. 33Nalakena tea wanogoe, taigu maga, ragi waina ku saisai naga kuga kanikani kuga tum̃amu leogoro mu. 34Go te naata e pe vitolo, ega kanikani sum̃a ni kiana; naga kuga ta saisai paki navasap̃otaeana mau. Ma naleo p̃ota maga ragi waina aga valoti aga wo pasa dawona ki da.
Currently Selected:
1 PAKI TEA NI KORINTHO 11: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
