1 PAKI TEA NI KORINTHO 10
10
1Nalakena a da masauna naga nimu kuga vei sap̃o, tai maga, naga tamagida maga eu mamau puti doko etano ki napopouru, po mamau puti surata duagoto duaduru natasi, 2po mamau puti pei tea bapetisoana paki Moses napopouru go natasi, 3po mamau puti gani navinaga sikai maau ni naatana; po mamau puti munu noai munuana sikai maau ni naatana: 4nalakena eu munu m̃elu vatu laketoko sikai waina e dausi ra: go vatu laketoko wanogoe e pei Kristo. 5Ma Sup̃e e da midoaki m̃ata ki tea laapa kakada mau, nalakena eu pei tea atugiana masop̃alo. 6Ma tea maga wanogoe eu pei tea mariana eu manigida pei naatulakeana maga, naga nigida tuga ta pei tea masau naleo sa maga mau, dapala waina nara ma eu masauna. 7Go kuga ta pei tea lotu ki nasup̃e maga mau, dapala nara seara kakada; dakiusi waina e pei tea midiriana, Narei eu do natano naga euga kanikani po munu, go eu duleana naga euga p̃aro. 8Go tuga ta maripele mau, dapala waina nara seara kakada eu maripele, po dowo naaleatia sikai tivilia dua go manu dolu. 9Go tuga ta maridogo Nawota mau, dapala waina nara seara kakada eu maridogo e, po pei tea maripunueana pae m̃aata maga. 10Go kuga ta dauruuru mau, dapala waina nara seara kakada eu dauruuru, po pei tea maripunueana pae tea mari‐sa‐ki. 11Ma tea maga wanogoe eu pakilina ki da pae naviseikiana; go eu pei tea midiriana raki natapavanau‐gida‐ana, waina namatap̃ago edaku maga ni ragi varau maga eu po umai pa paratiki gida. 12Nalakena tea wanogoe naata waina e midoa ki nia naga e lawodu ega vunusi naga ega ta dowo mau. 13Te namaridogoana e da puati mu mau waina e da pataka ni naatam̃oli mau: ma Sup̃e e pei lomau, waina ega wo da suasua ki mu mau naga kuga vei tea maridogoana p̃arua liu tea waina ku mari atae; ma ega wo mari napua ni nam̃eluana ega vilake namaridogoana, naga kuga mari atae soki a.
14Nalakena tea wanogoe, tea dodomiana aginau maga, kuga sava dua ki nalotu‐ki‐nasup̃e‐ana. 15A pasa ki mu dapala ku pei tea manumatua maga; nimu kuga midoakip̃otae tea waina a noa e. 16Lasa munu ni navasap̃iakiana waina tu pasap̃ia ki nia, e da pei nasaisaipeaniana sikai ni nada ni Kristo kite? Bred waina tu dovap̃orae a, e da pei nasaisaipeaniana sikai ni nap̃atoko ni Kristo kite? 17Nalakena nigida, waina tu laapa, tu pei bred sikai maau, nap̃atoko sikai maau: nalakena tu mamau puti dape p̃otae bred sikai maau. 18Kuga vunusi Israel pae nap̃okasi: tea maga waina eu gani naviriana maga eu da pei tea saisaipeani ma tagura ni naviriana kite? 19Nalakena tea wanogoe a noa nasava? Naga tea waina e pei tea mariana e pei naviriana paki nasup̃e maga e pei te navatuna, kite naga nasup̃e sikai e pei te navatuna kite? 20Ma a noa naga naleo maga waina tea ni nalauna maga eu mari ra eu pei naviriana, eu mari ra eu pei naviriana paki dimon maga, go eu da mari ra paki Sup̃e mau: go a da masauna mau naga nimu kuga vei tea saisaipeani ma dimon maga. 21Ku mari sa munu lasa munu ki Nawota, go lasa munu ki dimon maga: ku mari sa dape p̃otae pae wede ki Nawota, go wede ki dimon maga. 22Kite tu mari Nawota e dotowo kasua? Tu kasua liu sa kite?
23Naleo maga mamau puti eu pae nawotaeana; ma naleo maga mamau puti eu da marim̃ataki mau. Naleo maga mamau puti eu pae nawotaeana; ma naleo maga mamau puti eu da davagi mau. 24Te naata ega ta laaga tea aneana mau, ma sara naata euga sikasikai laaga nawiaana ki tea p̃ota. 25Sara naleo waina eu pei tea soriana malo ni navakokotoana ni nap̃okasi, kuga kani ra, po da pusuusup̃otae mau nalakena natum̃amu‐atae‐ana; 26nalakena maramana e pei tea ki Yehovah, go navakavuroana kakana. 27Te naata sikai ni tea maga waina eu da saralomau mau e pe vitautau mu, go ku pe masauna naga kuga vano; kuga kani sara naleo waina e pei tea toropusiana naraemu, doko da pusuusup̃otae mau nalakena natum̃amuatae‐ana. 28Ma te naata e pe noa ki mu, e pe naga, Tea waia e pei tea mariana e pei naviriana, kuga ta gani a mau, nalakena nae waina e noa ki sai ko asa, go nalakena natum̃ana‐atae‐ana: 29a naga, Natum̃ana‐atae‐ana, a da noa tea anigo mau, ma tea ni tea p̃ota; nalakena ekasana naveresi‐au‐ana e pei tea midoakip̃otaeana pae natum̃ana‐atae‐ana p̃ota sikai? 30Kinau a pe tape p̃otae, ki nasaup̃iaana, ekasana a pei tea vasasakiana nalakena tea waina kinau a pasadodom̃ataki asa? 31Nalakena tea wanogoe ku pe kanikani, kite ku pe munu, kite ku pe mari te navatuna, kuga mari naleo maga mamau puti paki nasamasamaana ki Sup̃e. 32Kuga ta pei nalakena ni natap̃ilagonaana mau, paki tea ni Yudea maga, kite paki tea ni Hellas maga, kite paki ekalesia ki Sup̃e; 33ega tapala waina kinau ma nalo ni naleo maga mamau puti a do mari dapala waina naatam̃oli maga mamau puti eu midoa ki m̃ata ki nia, doko da laaga namarim̃ataki‐nau‐ana mau, ma a do laaga namarim̃atakiana ni tea laapa, naga euga vei tea mautipauriana.
Currently Selected:
1 PAKI TEA NI KORINTHO 10: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
