1 PAKI TEA NI KORINTHO 9
9
1A da pei tea veresiana dum̃agu doko kite? A da pei apostolo sikai kite? A da punusi Yesu Nawota anigida kite? Nimu ku da pei nawosiana aginau doko Nawota kite? 2A pe ta magi tea p̃ota maga pei apostolo sikai mau, ma a pe manimu pei sikai lomau; nalakena nimu ku pei navulusokiana ni navei‐apostolo‐ana aginau doko Nawota. 3Navasakorokoroana aginau paki tea maga waina eu punusi au e pei tea wanogoe. 4Au da peani naveinawotaana naga auga kanikani po munu kite? 5Au da peani naveinawotaana naga auga maraki pasara nagoroi sikai waina e saralomau, dapala apostolo p̃ota maga, go Nawota taina maga, go Kefa kite? 6Kite kinau a masikigu go Barnaba aro da peani naveinawotaana naga aroga ta p̃osiwosi mau kite? 7Sei e pano seve ragi naga ega vei naatam̃oli ni navakalo po dum̃ana mori a? Sei e lawo roara ni vaine sikai, po da gani nawa kakana mau? Kite sei e leo paratiki pakale navata ni shiip sikai, po da gani tea ni milk ni navata mau? 8A pasa tea maga wanogoe pae naatam̃oli kite? Kite nawotaeana ma e noa tea maga wanogoe? 9Nalakena e pei tea midiriana doko nawotaeana ki Moses, e naga, P̃a ta p̃auasi oks mau ragi waina e do pasilesue korn. Sup̃e e midoaki paratiki oks maga kite, kite e noa e pae tea mamau nalakena kinami? 10Ioro, e pei tea midiriana nalakena kinami: nalakena e one tea waina e do sisi natano one naga ega sisi natano doko naleogoroana, go e one tea waina e do p̃okalesue naga ega wokalesue doko naleogoroana ni naveanip̃otaeana. 11Kinami au pe manimu sapuraki naleo maga ni Naatana, e pe vei tea warua naga auga tagaukotovi naleo animu maga ni nap̃okasi kite? 12Tea p̃ota maga eu pe veanip̃otae naveinawotaana wanogoe dap̃au mu, kinami au pe ta peani p̃arua ki nia kite? Ma au da marimaari naveinawotaana wanogoe mau; ma au do soki naleo maga mamau puti, naga auga ta dugoro narogorogoana wia ki Kristo mau. 13Ku da atae naga tea maga waina eu do p̃osiwosi ki tea tapu maga eu gani naleo maga ni nasum̃a tapu, go naga tea maga waina eu doko raki tagura ni naviriana eu peani p̃otae naviriana maga ma tagura kite? 14Dapala nogoe ma Nawota e pitip̃aki naga tea maga waina eu do dogorogo ki narogorogoana wia euga mauri m̃elu narogorogoana wia. 15Ma kinau a da marimaari tea sikai ni tea maga wanogoe mau: go a da midiri tea maga wanogoe naga ega vei tea mariana dapala nogoe nalo kakagu mau: nalakena a pe mate e pe wia ki nau, liu waina te naata e pe mari tea vakavakaeana aginau e pe vei tea p̃alo. 16Nalakena a pe rogorogo ki narogorogoana wia, a pe ta peani tea waina a pakavakae asa mau; nalakena namaridieana e pei tea toropusiana one au; nalakena a pe ta dogorogo ki narogorogoana wia mau, awi e pe vei aginau. 17Nalakena a pe tum̃agu mari tea wanogoe, a pe veani namoriana sikai, ma a pe ta dum̃agu mau, a pe vei tea vavatuana ki naveitasigaleo‐parati‐kiana sikai. 18Go namoriana aginau e pei nasava? Naga, ragi waina a dogorogo ki narogorogoana wia, aga mari narogorogoana wia ega vei naulu tika, naga aga ta marimaari p̃arua ki naveinawotaana aginau doko narogorogoana wia mau. 19Nalakena ragi waina a pei tea veresiana dum̃agu doko m̃elu dua ki tea maga mamau puti, a dum̃agu mari au a pei naviti ki tea maga mamau puti, naga aga talua tea laapa liu. 20Go a magi tea ni Yudea maga pei tea tapala tea ni Yudea sikai, naga aga talua tea ni Yudea maga; a magi tea maga waina eu doko etano ki nawotaeana, pei tea tapala tea toko etano ki nawotaeana, waina kinau a da pei tea toko etano ki nawotaeana mau, naga aga talua tea maga waina eu doko etano ki nawotaeana; 21a magi tea maga waina eu dika nawotaeana, pei tea tapala tea tika nawotaeana, waina a da pei tea tika nawotaeana paki Sup̃e mau, ma a pei tea toko etano ki nawotaeana paki Kristo, naga aga talua tea maga waina eu dika nawotaeana. 22A magi tea manainai maga pei tea manainai sikai, naga aga talua tea manainai maga: a magi naatam̃oli maga mamau puti pei naleo maga mamau puti, naga aga mautipauri pae sara vatuna te seara. 23Go a do mari naleo maga mamau puti nalakena narogorogoana wia, naga aga mamau pei tea saisai peani a. 24Ku da atae naga tea maga waina eu sava malo ni nasavaana eu mamau puti sava, ma tea sikai maau e dape praise. Kuga sava ega tapala nogoe, naga kuga vua soki. 25Go sara naata waina eu do pilele eu dum̃ada soki ra nalo ni naleo maga mamau puti. Go nara eu mari a naga euga tape vauvau sikai waina ega wo madada, ma nigida naga tuga tape tea waina ega wo da madada mau. 26Nalakena tea wanogoe kinau a do sava, dapala waina a da sava p̃arop̃aro mau; a do dip̃a dapala waina a da dip̃a namalopa mau: 27ma a dip̃a nap̃atokogu e loa, po mari a e pei naviti aginau: naga, ragi waina a dogorogo ki sua paki tea p̃ota maga, kinau aga ta pei tea tip̃adoaana mau.
Currently Selected:
1 PAKI TEA NI KORINTHO 9: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
