NAMBABA 33
33
Iziral tɩŋŋaa sɩ lɩɩ Ijipiti tinteeŋ lɛ a vɛnɛ hɔŋ lere-la aŋ-na mʋ yi Mʋab
1Iziral tɩŋŋaa doho kala sɩ lɩɩ Ijipiti tinteeŋ lɛ, Mosis arɩ Arɔŋ ŋaa ba sɩpaalaaraa, ba vɛŋ doho doho a hɔŋ lere-la nɛ ŋ-la. 2La TƖƖNA dagɛ Mosis nɛ ʋ ŋmʋnsɛ lere-la ba sɩ vɛnɛ hɔŋ hɔŋ yɩraa a bil. 3Ŋɩɩ nɛ Iziral tɩŋŋaa sii Ramesis lɛ, jɩna tʋɔŋ chɛŋ-bumbuŋ tapʋlaa fii arɩ banɔŋ chɛɛŋ. La TƖƖNA dɩɩsɩŋ kiele bal gbiele-la sɩ bala, taŋ sii pʋl nɛ ŋɩɩ. Ba sɩɩ viiru, Ijipiti tɩŋŋaa ka bemba nɛ ka ba vɩvɛŋ arɩ bɔɩ-duoŋ. 4Bʋa-la lɛ dɩ Ijipiti tɩmma-la ka hugi ba hambolibii bumbumba-la La TƖƖNA sɩ kpʋa. La TƖƖNA sɩ ŋaa ŋɩɩ, ʋ leŋe Ijipiti tɩŋŋaa vesiŋ kala jɩŋ arɩ ʋ nɛ kɛŋ doluŋ a kɩɩba. 5Iziral tɩŋŋaa sɩ sii Ramesis lɛ, ba kʋ hɔŋ Sʋkɔf lɛ nɛ. 6Ba bɩra lɩɩ Sʋkɔf lɛ a kʋ hɔŋ Ɛtam lɛ, tintee-hɩlɩɩ-la niiŋ. 7Ba bɩra sii Ɛtam lɛ a mɩɩra mʋ Pi-Hahɩrɔf, Baal-Zefoŋ wɩɩpɔsʋŋ dɩɩrɩŋ a hɔŋ a kpagɛ Mɩgɩdɔl. 8Ba bɩra sii Pi-Hahɩrɔf lɛ a to Mʋgʋ-fɩaŋ tʋɔŋ a mʋ jʋʋ Ɛtam tintee-hɩlɩɩ-la. Ba vɛŋ ʋ tʋɔŋ tapʋlaa batori nɛ a mʋ hɔŋ Mara lɛ. 9Ba bɩra sii Mara lɛ a mʋ hɔŋ Elim lɛ. Nɩmɛ nɛ lɩɩ-bul-sɩaa fii arɩ balɩa arɩ Abɛ tɩɩsɩŋ mahɩŋ batori arɩ fii fa hɛ ŋɩɩ. 10Ba bɩra sii Elim lɛ, a mʋ hɔŋ Mʋgʋ-fɩaŋ niiŋ. 11Ba bɩra sii Mʋgʋ-fɩaŋ niiŋ a mʋ hɔŋ Sɩŋ tintee-hɩlɩɩ-la lɛ. 12Ba bɩra sii Sɩŋ tintee-hɩlɩɩ-la lɛ a mʋ hɔŋ Dofika lɛ. 13Ba bɩra sii Dofika lɛ a mʋ hɔŋ Alusi lɛ. 14Ba bɩra sii Alusi lɛ a mʋ hɔŋ Refidim lɛ. Nɩmɛ nɛ nɩalɩŋ fa bɩ lɩɩŋ na dɩ ba nyʋa. 15Ba bɩra sii Refidim lɛ a mʋ hɔŋ Sɩnaɩ tintee-hɩlɩɩ-la lɛ. 16Ba bɩra sii Sɩnaɩ tintee-hɩlɩɩ-la lɛ a mʋ hɔŋ Kɩbʋrɔf-Hataava lɛ. 17Ba bɩra sii Kɩbʋrɔf-Hataava lɛ a mʋ hɔŋ Hazɛrɔf lɛ. 18Ba bɩra sii Hazɛrɔf lɛ a mʋ hɔŋ Rɩfɩma lɛ. 19Ba bɩra sii Rɩfɩma lɛ a mʋ hɔŋ Rimoŋ-Pɛrɛs lɛ. 20Ba bɩra sii Rimoŋ-Pɛrɛs lɛ a mʋ hɔŋ Libina lɛ. 21Ba bɩra sii Libina lɛ a mʋ hɔŋ Rɩsa lɛ. 22Ba bɩra sii Rɩsa lɛ a mʋ hɔŋ Kehelata lɛ. 23Ba bɩra sii Kehelata lɛ a mʋ hɔŋ peel-la ba sɩɩ yɩrɛ Seefa lɛ. 24Ba bɩra sii Seefa peel-la lɛ a mʋ hɔŋ Harada lɛ. 25Ba bɩra sii Harada lɛ a mʋ hɔŋ Makɩhɛlɔf lɛ. 26Ba bɩra sii Makɩhɛlɔf lɛ, a mʋ hɔŋ, Tahaf lɛ. 27Ba bɩra sii Tahaf lɛ a mʋ hɔŋ Tɛra lɛ. 28Ba bɩra sii Tɛra lɛ a mʋ hɔŋ Mɩfɩka lɛ. 29Ba bɩra sii Mɩfɩka lɛ a mʋ hɔŋ Hasimona lɛ. 30Ba bɩra sii Hasimona lɛ a mʋ hɔŋ Mɔsɛrɔf lɛ. 31Ba bɩra sii Mɔsɛrɔf lɛ a mʋ hɔŋ Bene-Jaakaŋ lɛ. 32Ba bɩra sii Bene-Jaakaŋ lɛ a mʋ hɔŋ Hɔɔ-Hagidiga lɛ. 33Ba bɩra sii Hɔɔ-Hagidiga lɛ a mʋ hɔŋ Jotibata lɛ. 34Ba bɩra sii Jotibata lɛ a mʋ hɔŋ Aburona lɛ. 35Ba bɩra sii Aburona lɛ a mʋ hɔŋ Ɛzɩɔŋ-Geba lɛ. 36Ba bɩra sii Ɛzɩɔŋ-Geba lɛ a mʋ hɔŋ Ziŋ tintee-hɩlɩŋ lɛ, Kadɛs nɛ ŋɩɩ.
37Ba bɩra sii Kadɛs lɛ a mʋ hɔŋ peel-la ba sɩɩ yɩrɛ Hɔɔ bʋbʋɔŋ a hɛ Ɛdɔm tinteeŋ niiŋ. 38La TƖƖNA leŋ Wɩɩsʋllɩ sɩpaalaara Arɔŋ jɩl peel-la nyuŋ, nɩmɛ nɛ ʋ sʋʋ. Iziral tɩŋŋaa sɩ lɩɩ Ijipiti tinteeŋ lɛ jɩsɩŋ mahɩŋ balɩa tʋɔŋ chɛŋ-nɔŋ tapʋl bumbuŋ nɛ ŋɩɩ. 39Arɔŋ fa ŋaa jɩsɩŋ zɔlɔ arɩ mara arɩ batori nɛ aŋ sʋʋ Hɔɔ peel-la nyuŋ. 40Ŋɩɩ nɛ Arad kuoro sɩ ŋaa Kɛnaŋ tɩɩna a hɔŋ Nɛgɛf tintee-hɩlɩɩ-la lɛ, nɩɩ arɩ Iziral tɩŋŋaa ka kɔ nɛ. 41Ŋɩɩ nɛ Iziral tɩŋŋaa lɩɩ Hɔɔ peel-la lɛ a mʋ hɔŋ Zalimona lɛ. 42Ba bɩra sii Zalimona lɛ a mʋ hɔŋ Pʋnɔŋ lɛ. 43Ba bɩra sii Pʋnɔŋ ma lɛ a mʋ hɔŋ Ɔbɔf lɛ, 44a bɩra sii Ɔbɔf ma lɛ a mʋ hɔŋ Ɩyɛ Abarɩm lɛ, Mʋab tinteeŋ niiŋ. 45Ba bɩra sii Ɩyɛ Abarɩm lɛ a mʋ hɔŋ Dɩbɔŋ Gad lɛ, 46a bɩra lɩɩ Dɩbɔŋ Gad ma lɛ a mʋ hɔŋ Alɩmɔŋ Dibilatem lɛ. 47Ba bɩra sii Alɩmɔŋ Dibilatem lɛ, a mʋ hɔŋ Abarɩm peelee leriŋ a kpagɛ Nebo. 48Ba bɩra lɩɩ Abarɩm peelee leriŋ a mʋ hɔŋ Mʋab tintee-taalɩsɩ-la lɛ a kpagɛ Jɔdaŋ fuo-la, Jeriko cholo. 49Mʋab tintee-taalɩsɩ-la lɛ, ba hɔnɔ a kpagɛ Jɔdaŋ fuo-la nɛ a chɩŋ Bɛf Jɛsɩmɔf lɛ a kaa mʋ yi Abɛl Sɩtɩm. 50Ba sɩ hɔŋ lee-la, ŋɩɩ nɛ La TƖƖNA bʋla pɩ Mosis, 51“Bʋla pɩ Iziral tɩŋŋaa, dɩ ba nɛ chol Jɔdaŋ fuo-la a mʋ Kɛnaŋ tinteeŋ, 52ba kiri nɩalɩŋ kala sɩ hɛ lee-la a chei ba vesiŋ kala, kɩalɩŋ ba sɩ saa arɩ kɩalɩŋ ba sɩ libe aŋ chei lere-la kala ba sɩɩ kpaarɛ ba vʋɩyaa, 53aŋ laa tintee-la tɩɩ a hɔŋ nɩmɛ. Mɩ nɛ joŋo pɩma. 54Ma jaŋ tɔnsɛ a kɛŋ tintee-la kpaa doho doho. Nɩalɩŋ sɩ yʋga, ba leriŋ jaŋ yʋgɛ, doho-la nɩaa sɩ muuro, ba leriŋ ma jaŋ muuri. Lee na-kala ba sɩ tɔnsɔ a joŋo pɩ doho na-kala, ba kʋa nɛ ŋɩɩ.
55Dɩ ma nɛ bɩ nɩalɩŋ sɩ hɔŋ tintee-la lɛ kala kire, ba jaŋ walɩmɛma tintee-la lɛ a nagɛ kʋa sɩ jʋʋ ŋ sɩɩŋ koo sɔɔŋ sɩ hɛ ŋ nampɩlɩŋ lɛ. 56Dɩ ma nɛ bɩ nɩalɩŋ kala kire tintee-la lɛ, mɩ jaŋ joŋ wɩalɩŋ mɩ fa sɩ jaŋ joŋo ŋaa ba lɛ a ŋaa ma lɛ.”
Currently Selected:
NAMBABA 33: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
