NAMBABA 34
34
Kɛnaŋ tinteeŋ bʋa
1La TƖƖNA bʋla pɩ Mosis, 2“Bʋla pɩ Iziral tɩŋŋaa, ‘Dɩ ma nɛ jʋʋ Kɛnaŋ tintee-la mɩ sɩ jaŋ joŋo pɩma, ʋ jaŋ kɛŋ bʋa. 3Tintee-la wɩɩpɔsʋŋ nadiiŋ bʋa jaŋ chɩŋ Mʋgʋ-sʋʋ-la niiŋ wɩɩjʋʋlʋŋ a mʋ to Ziŋ tintee-hɩlɩɩ-la sɛmɛ dɔŋɔ a mʋ yi Ɛdɔm tɩŋŋaa tinteeŋ bʋa, 4a bɩra chɩŋ wɩɩpɔsʋŋ na-dii-la a chaasɛ lee-la ba sɩɩ yɩrɛ Akɩrabɩm a to ŋɩɩ mʋ Ziŋ a mʋ yi Kadɛs Banɩa wɩɩpɔsʋŋ nadiiŋ, a lɩɩ nɩmɛ a to ŋɩɩ mʋ Haza Ada, a kaa mʋ yi Azɩmɔŋ. 5Bʋa-la jaŋ bɩra chɩŋ Azɩmɔŋ lɛ a to ŋɩɩ mʋ fuonaa-la sɩ hɛ Ijipiti tinteeŋ niiŋ a mʋ dɛrɛ mʋgʋ-bal-la ba sɩɩ yɩrɛ Mediterenia lɛ.
6Mʋgʋ-bal-la ba sɩɩ yɩrɛ Mediterenia nɛ jaŋ ŋaa tintee-la wɩɩjʋʋlʋŋ bʋa. 7Ma tintee-la wɩɩpɔsʋŋ nagʋa bʋa jaŋ chɩŋ mʋgʋ-bal-la niiŋ a mʋ yi peel-la ba sɩɩ yɩrɛ Hɔɔ, 8a chɩŋ peel-la ba sɩɩ yɩrɛ Hɔɔ lɛ a to Lebo-Hamaf a mʋ yi Zɛdad, 9a bɩra chɩŋ Zɛdad lɛ a mʋ to Zɩfʋrɔŋ a mʋ dɛrɛ Haza-Enaŋ lɛ. Ma wɩɩpɔsʋŋ nagʋa bʋa nɛ ŋɩɩ.
10Wɩɩpɔsʋŋ bʋa ma jaŋ chɩŋ Hɛzaa-Ɛna lɛ a mʋ to Sɛfam. 11Bʋa-la bɩra jaŋ chɩŋ Sɛfam lɛ a mʋ to Rɩbɩla sɩ hɛ Aɩŋ wɩɩpɔsʋŋ a to peele-la sɛmɛ ŋɩɩ a mʋ jʋʋ mʋga-la ba sɩɩ yɩrɛ Galilii sɩ hɛ wɩɩpɔsʋŋ, 12a lɩɩ nɩmɛ a mʋ to Jɔdaŋ fuo-la a mʋ dɛrɛ mʋga-la ba sɩɩ yɩrɛ Mʋgʋ-sʋʋŋ lɛ. Ma tintee-la mɩ sɩ jaŋ joŋo pɩma bʋa nɛ ŋɩɩ.’ ” 13Ŋɩɩ nɛ Mosis bʋla pɩ Iziral tɩŋŋaa, “Tintee-la ma sɩ jaŋ tɔnsɛ a kaa kpaa nɛ ŋɩɩ. Ʋ nɛ La TƖƖNA sɩ dɩ ma kaa kpaa Iziral tɩŋŋaa doho doho nibi arɩ kpaa magɛ dɔŋɔ ŋɩɩ, 14bɛɛ wɩaa Rubiŋ doho nɩaa arɩ Gad doho nɩaa arɩ Manasɛ doho nɩaa kpaa magɛ dɔŋɔ-na laa ba kpaalɩŋ nɛ. 15Dosunuŋ deemba balɩa arɩ kpaa magɛ dɔŋɔ-la nɛ laa ba kpaalɩŋ Jɔdaŋ fuo-la wɩɩpɔsʋŋ dɩɩrɩŋ a chaasɛ Jeriko.”
16Ŋɩɩ nɛ La TƖƖNA bʋla pɩ Mosis, 17“Nɩaa deemba nɛ jaŋ kɛŋ tintee-la kpaama dɩ ʋ ŋaa ma kʋŋ: Wɩɩsʋllɩ sɩpaalaara Elieza arɩ Nuŋ nanʋala Josua. 18Má lɩɩsɛ sɩpaalaarʋ doho kala tʋɔŋ dɩ ʋ pɛ ba lɛ dɩ ma kpaa tintee-la.” 19Nɩalɩŋ La TƖƖNA sɩ lɩɩsa yɩraa nɛ ŋ-la: Juda doho nɩaa tʋɔŋ Jefuni nanʋala Kalɩb nɛ ʋ lɩɩsɛ. 20Simioŋ doho nɩaa tʋɔŋ, Amihud nanʋala Sɛmʋɛl nɛ ʋ lɩɩsɛ. 21Bɛnjamɩŋ doho nɩaa tʋɔŋ Kɩsɩlɔŋ nanʋala Ɛlɩdad nɛ ʋ lɩɩsɛ. 22Daŋ doho nɩaa tʋɔŋ, Jogili nanʋala Buki nɛ ʋ lɩɩsɛ. 23Josɛf nanʋala Manasɛ doho nɩaa tʋɔŋ, Ɛfɔd nanʋala Hanɩɛl nɛ ʋ lɩɩsɛ. 24Josɛf nanʋala Efirem doho nɩaa tʋɔŋ, Sɩfɩtaŋ nanʋala Kɛmʋɛl nɛ ʋ lɩɩsɛ. 25Zebuluŋ doho nɩaa tʋɔŋ, Panakɩ nanʋala Ɛlɩzafaŋ nɛ ʋ lɩɩsɛ. 26Ɩsaka doho nɩaa tʋɔŋ, Azaŋ nanʋala Palɩtɩɛl nɛ ʋ lɩɩsɛ. 27Asa doho nɩaa tʋɔŋ, Selomi nanʋala Ahihud nɛ ʋ lɩɩsɛ. 28Nafɩtalɩ doho nɩaa tʋɔŋ, Amihud nanʋala Pɛdahɛl nɛ ʋ lɩɩsɛ. 29Nɩaa deemba nɛ La TƖƖNA lɩɩsɛ dɩ ba kɛŋ Kɛnaŋ tinteeŋ kpaa Iziral tɩŋŋaa.
Currently Selected:
NAMBABA 34: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
