NAMBABA 32

Iziral doho doho-la sɩ hɔŋ Jɔdaŋ fuo-la cholo

1Rubiŋ doho nɩaa arɩ Gad doho nɩaa fa kɛŋ pʋsʋŋ nɛ woruŋ. Ŋɩɩ nɛ ba na arɩ Jaza tinteeŋ arɩ Gɩlɩad tinteeŋ zɔmɔ arɩ pʋsʋŋ dɩɛsɩŋ. 2Ba sii mʋ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa sɩpaalaaraa teeŋ a bʋl, 3-4“Tasɩŋ deemba nɛ La TƖƖNA pɛ la lɛ la yuo laa: Atarɔf, Dɩbɔŋ, Jaza, Nɩmɩra, Hɛsɩbɔŋ, Ɛlɩalɩ, Sɛbam, Nebo arɩ Bioŋ, tasɩ-la saa zɔmɔ nɛ woruŋ arɩ pʋsʋŋ dɩɛsɩŋ, ka la ma kɛŋ pʋsʋŋ. 5Dɩ ma tʋɔŋ nɛ tɔrɛ la nyuŋ, má joŋ tasɩ-la tinteeŋ pɩla dɩ ʋ ŋaa la kʋŋ, dɩ la bɩra sɩ́ Jɔdaŋ fuo-la chol.”

6Ŋɩɩ nɛ Mosis pɩɛsɛ Gad doho nɩalɩŋ arɩ Rubiŋ doho nɩalɩŋ, “Maa chɛ dɩ ma hɔŋ daha nɛ ka dɩ ma naambiiriŋ mʋ laalɩŋ? 7Bɛɛ nɛ tɩɩ maa chɛ dɩ ma leŋ dɩ Iziral tɩŋŋaa nandaasɩŋ yʋɔrɛ dɩ ba sɩ́ wuo chol a jʋʋ tintee-la La TƖƖNA sɩ joŋo pɩba? 8Ma nyɩmmaba ma fa ŋaa ŋɩɩ tɩtɩa nɛ, bʋa-la lɛ la fa sɩ hɛ Kadɛs Banɩa tintee-hɩlɩɩ-la lɛ, ka mɩ tɩmba dɩ ba mʋ beŋ tintee-la La TƖƖNA sɩɩ chɛ ʋ joŋo pɩla. 9Ba sɩ mʋ yi Ɛsɩkɔl fuonaa-la a na tintee-la aŋ mɩɩra kɔ, ba bʋl wɩaa a yʋɔrɛ Iziral tɩŋŋaa kala nandaasɩŋ nɛ, dɩ ba sɩ́ wuo mʋ tintee-la La TƖƖNA sɩ sɩ ʋ jaŋ joŋo pɩba. 10Tapʋlɩɩ-la, La TƖƖNA baanɩŋ sie nɛ ba nyuŋ, ʋ ŋmɩɛsa hɛ ba lɛ. 11Ʋ sɩ, ‘A tɩŋ ba sɩ bɩ mɩ to arɩ ba tʋɔŋ kala, baala-la kala sɩ lɩɩ Ijipiti tinteeŋ lɛ a yi jɩsɩŋ mara koo a kɩɩ ŋɩɩ bɩ jaŋ na tintee-la mɩ sɩ hɛ niiŋ pɩ Abɩraham, Aɩzɩk arɩ Jekɔb arɩ mɩ jaŋ joŋo pɩba, 12see Jefuni sɩ ŋaa Keni tɩɩna nanʋala Kalɩb arɩ Nuŋ nanʋala Josua. Ba dʋndʋŋa nɛ to wɩalɩŋ mɩ-na ma TƖƖNA sɩ daga arɩ ba tʋɔŋ kala.’ 13Ŋɩɩ nɛ La TƖƖNA na baanɩŋ Iziral tɩŋŋaa kala nyuŋ a leŋ ba baarɛ tintee-hɩlɩŋ lɛ ŋɩɩ jɩsɩŋ mahɩŋ balɩa, a mʋ yi bʋa-la lɛ nɩalɩŋ kala fa sɩ ŋaa wʋbɔŋ-la sɩ sʋʋ dɛrɛ.

14Ma nɩaa deemba, wʋbɔŋ ŋaaraa, ma ma bɩra sii chɩŋ ma nyɩmmaba wʋbɔmɔ-la tɩtɩa ba fa sɩɩ ŋaa lɛ nɛ, aa chɛ dɩ La TƖƖNA baanɩŋ faasa sii Iziral tɩŋŋaa nyuŋ. 15Dɩ ma nɛ mɩɩrɛ La TƖƖNA harɩŋ, ʋ jaŋ bɩra vɩa Iziral tɩŋŋaa deemba ta tintee-hɩlɩŋ deeŋ lɛ dɩ ba sʋʋ. Dɩ ʋ nɛ ŋaa ŋɩɩ, ma nɛ jaŋ laa cheeriŋ.”

16Ŋɩɩ nɛ Rubiŋ doho nɩalɩŋ arɩ Gad doho nɩalɩŋ mʋ Mosis teeŋ a bʋla pʋ, “Laa chɛ dɩ la saa la pʋsʋŋ dɩɩsɩŋ daha nɛ, aŋ saa tabalaa ma a pɩ la haalaa arɩ la biiriŋ. 17Ama la kɛŋ la tɩtɩa nɛ dɩ la laa Iziral tɩŋŋaa sɩpaaŋ a yuo laalɩŋ kɛmba mʋ lee-la ba sɩɩ chɛ, ka la biiriŋ arɩ la haalaa hɛ tabala-la la sɩ jaŋ saa kɛrɛ golli lɛ, dɩ nɩalɩŋ sɩ hɛ tintee-la lɛ sɩ́ wuo ŋaaba wɩɩkala. 18La bɩ jaŋ mɩɩrɛ Iziral tɩŋŋaa harɩŋ, see ba kʋŋkala sɩ na ʋ dɩhɔnʋŋ. 19Dɩ la nɛ kɛmba chol Jɔdaŋ fuo-la, la-na bɩra bɩ jaŋ laa tintee kala nɩmɛ, bɛɛ wɩaa la-na folo laa la toruŋ nɛ daha, wɩɩpɔsʋŋ dɩɩrɩŋ.”

20Ŋɩɩ nɛ Mosis bʋla pɩba, “Dɩ ma nɛ jaŋ ŋaa wɩɩ-la ma sɩ bʋla, má kɛŋ ma tɩtɩa La TƖƖNA sɩpaaŋ a mʋ laal-la. 21Dɩ ma kala nɛ jaŋ nyɩgɩlɛ a to La TƖƖNA niiŋ a chol Jɔdaŋ fuo-la, a yuo la dʋndɔŋŋɔɔ, dɩ La TƖƖNA pɛ la lɛ a yuo diiba, 22a laa ba tinteeŋ, ŋɩɩ harɩŋ ma laa ma tɩtɩa La TƖƖNA arɩ Iziral tɩŋŋaa nɩsɩŋ lɛ nɛ, ma jaŋ wuo mɩɩra mʋ lee-la. Ŋɩɩ nɛ La TƖƖNA jaŋ jɩŋ arɩ ma nɛ tɩɩ tintee-la.

23Ama dɩ ma nɛ bɩ ŋɩɩ ŋaa, La Tɩɩna teeŋ ma ŋaa wʋbɔŋ nɛ, ʋ jaŋ dɔgɩsɛma. 24Má saa jasɩŋ pɩ ma haalaa arɩ ma biiriŋ, a saa ma pʋsʋŋ dɩɩsɩŋ ma a hɛ ma pʋsʋŋ, a ŋaa wɩalɩŋ kala ma sɩ sɩ ma jaŋ ŋaa.” 25Ŋɩɩ nɛ Gad doho nɩaa arɩ Rubiŋ doho nɩaa bʋla pɩ Mosis, “La jaŋ ŋaa wɩalɩŋ kala ŋ sɩ daga. 26La biiriŋ arɩ la haalaa arɩ la pʋsʋŋ kala jaŋ ka Gɩlɩad tasɩ-la lɛ. 27Ama la baalaa kala nyɩgɩla nɛ dɩ la mʋ laal-la arɩ La TƖƖNA sɩ dagɛ ŋɩɩ. La jaŋ chol Jɔdaŋ fuo-la a yuo laal-la arɩ ŋ sɩ dagɛ ŋɩɩ.”

28Ŋɩɩ nɛ Mosis dagɛ wɩaa pɩ Wɩɩsʋllɩ sɩpaalaara Elieza arɩ Nuŋ nanʋala Josua arɩ Iziral tɩŋŋaa dɩa nɩhɩasɩŋ a mʋʋ tɩgɛ nɩalɩŋ lɛ. 29Ʋ sɩ, “Dɩ Gad doho nɩaa arɩ Rubiŋ doho nɩaa nɛ kɛŋ ba tɩtɩa hɛ dɔŋɔ a chol Jɔdaŋ fuo-la, a mʋ laalɩŋ arɩ La TƖƖNA sɩ dagɛ ŋɩɩ, a pɛ ma lɛ dɩ ma yuo laa tintee-la, má joŋ Gɩlɩad tinteeŋ pɩba dɩ ʋ ŋaa ba kʋŋ. 30Ama dɩ ba nɛ bɩ ma lɛ pɛ a chol Jɔdaŋ fuo-la a yuo laal-la, ba ma jaŋ laa ba kpaalɩŋ Kɛnaŋ tinteeŋ lɛ.”

31Ŋɩɩ nɛ Gad doho nɩaa arɩ Rubiŋ doho nɩalɩŋ bʋl, “La jaŋ ŋaa wɩalɩŋ kala La TƖƖNA sɩ bʋla. 32La jaŋ to La TƖƖNA niiŋ a chol Jɔdaŋ fuo-la a mʋ Kɛnaŋ tinteeŋ a yuo laalɩŋ, ka dɩ Jɔdaŋ wɩɩpɔsʋŋ dɩɩrɩŋ tinteeŋ deeŋ ŋaa la kʋa.”

33Ŋɩɩ nɛ Mosis joŋ Amɔrɩ tɩŋŋaa kuoro Sɩhɔŋ tinteeŋ arɩ Basaŋ tɩŋŋaa kuoro Ɔgɩ tinteeŋ arɩ tasɩ-la dɔnsʋŋ sɩ golliba a pɩ Gad doho nɩaa, Rubiŋ doho nɩaa arɩ Josɛf nanʋala Manasɛ doho nɩaa kpaa magɛ dɔŋɔ-la.

34Ŋɩɩ nɛ Gad doho nɩaa wasa saa Dɩbɔŋ, Atarɔf, Arʋa, 35Atɩrɔf Sɔfaŋ, Jaza, Jogbeha, 36Bɛf-Nɩmɩra arɩ Bɛf-Haraŋ, a saa kɛrɛ golli ba kala, aŋ saa ba pʋsʋŋ dɩɩsɩŋ ma. 37Rubiŋ doho nɩaa ma wasa saa Hɛsɩbɔŋ, Ɛlɩalɩ, Kɩrɩatam 38a pɛ Nebo, Baal Mɩɔŋ arɩ Sɩbɩma (ba kɛŋ Nebo arɩ Baal Mɩɔŋ yɩraa bɩrɩmɛ nɛ), aŋ pɩba yɩrɩ-falaa.

39Ŋɩɩ nɛ Manasɛ nanʋala Makɩɩ doho nɩaa ma mʋ yuo dii Gɩlɩad a kiri Amɔrɩ tɩmma-la fa sɩ hɔŋ nɩmɛ. 40Mosis joŋ Gɩlɩad tinteeŋ a pɩ Makɩɩ tɩŋŋaa, Manasɛ doho nɩaa, ba hɔŋ nɩmɛ. 41Jaa ma sɩ ŋaa Manasɛ doho nʋʋ, ʋ ma yuo dii tabiisi-la dɔnsʋŋ a hɛ lere-la yɩraa Havɔf Jaa. 42Noba ma yuo dii Kenaf arɩ tabiisi-la sɩ gollu, aŋ joŋ Noba, ʋ tɩtɩa yɩrɩŋ a hɛ pɩ lee-la.

Currently Selected:

NAMBABA 32: SIS

Highlight

Copy

Compare