NAMBABA 31
31
La TƖƖNA leŋe Iziral tɩŋŋaa yuo dii Midiaŋ tɩŋŋaa
1La TƖƖNA bʋla pɩ Mosis, 2“Midiaŋ tɩŋŋaa sɩ ŋaa wɩalɩŋ Iziral tɩŋŋaa lɛ, joŋ ba chɩmɩŋ a tiŋ ba lɛ, ʋ ŋɩɩ harɩŋ ŋ jaŋ sʋʋ.”
3Ŋɩɩ nɛ Mosis bʋla pɩ Iziral tɩŋŋaa, “Má chaarɛ nɩaa dɩ ba mʋ yuo Midiaŋ tɩŋŋaa a tiŋ chɩŋ-la arɩ La TƖƖNA sɩ dagɛ ŋɩɩ. 4Iziral doho doho fii arɩ balɩa-la kala tʋɔŋ, má lɩɩsɛ laalɩyuoroo bʋɩ doho kala lɛ dɩ ba mʋ laal-la.” 5Ŋɩɩ nɛ doho kala lɩɩsɛ laalɩyuoroo bʋɩ. Ba kala ŋaa nɩaa bʋɩ fii arɩ balɩa a kɛŋ ba tɩtɩa dɩ ba mʋ laal-la. 6Mosis leŋe Elieza nanʋala Finihas Wɩɩsʋllɩ sɩpaalaara nɛ kɛmba mʋ laal-la. Ŋɩɩ nɛ Finihas paa kɩalɩŋ ba sɩ kaa tɩtɩŋ Wɩa dɩa lɛ, a pɛ paa banyilliŋ ʋ sɩ jaŋ kaa ŋmʋʋ bʋl wɩaa pɩpɩba.
7Ba mʋ a yuo Midiaŋ tɩmma-la arɩ ŋɩɩ La TƖƖNA sɩ dagɛ Mosis a kpʋ ba baalaa kala. 8Nɩalɩŋ ba sɩ kpʋa dɔnsʋŋ nɛ ŋaa Midiaŋ kuoroo deemba banɔŋ: Evi, Rekim, Zuu, Huu, arɩ Reba. Ba fa pɛ kpʋ Bioo nanʋala Balam ma nɛ laal-la lɛ. 9Iziral tɩŋŋaa fa yuo dii Midiaŋ tɩŋŋaa kala nɛ a kɛsɛ ba haalaa, ba biiriŋ, ba nɛsɩŋ arɩ piesee, a paa ba dʋa kala. 10Ba nyɩgɛ Midiaŋ tɩŋŋaa sɩ hɔŋ tabala-la lɛ arɩ ba bugoo kala. 11Ŋɩɩ nɛ ba paa kɩalɩŋ kala ba sɩ yuo dii a pɛ pʋsʋŋ arɩ nuhuobiine lɛ, 12a kaa mʋ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa kala teeŋ. Bʋa-la lɛ dɩ ba hɔŋ Mʋab tintee-taalɩsɩ-la lɛ a kpagɛ Jɔdaŋ fuo-la, Jeriko cholo.
13Ŋɩɩ nɛ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa sɩpaalaara-la kala lɩɩ ba dɩhɔnʋŋ lɛ a chemba. 14Mosis na baanɩŋ laalɩyuori-hɩasɩ-la kala sɩ mɩɩra lɩɩ laalɩŋ kɔ nyuŋ. Nɩalɩŋ sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba.
15Ŋɩɩ nɛ Mosis pɩɛsɛba, “Bɛɛ nɛ tɩɩ ma bɩ haala-la ma kala kpʋa? 16Haala-la nɛ paala to Balam niiŋ wɩaa lɛ, a leŋ Iziral tɩŋŋaa mɩɩrɛ La TƖƖNA harɩŋ a kpaarɛ vʋɩyaa Pio lɛ, ŋɩɩ lɛrɛ nyanyal bɔŋŋɔɔ kʋ hɛ Iziral tɩŋŋaa lɛ. 17Lɛɛlɛ, má kpʋ hambolibiisi-la kala aŋ kpʋ haala-la kala sɩ jɩŋ baalaa. 18Ama má leŋ hantolibiisi-la ha sɩ bɩ baalaa jɩŋ. Ma nɛ tɩɩba.
19Ma Iziral tɩmma-la kala sɩ kpʋ nɩaa koo a digi sʋʋnʋŋ, ma sɩ kʋ jʋʋ ma dɩhɔnʋŋ a yi tapʋlaa balɩpɛ. Má hɛ ma dɩhɔnʋŋ harɩŋ tapʋlaa balɩpɛ. Tapʋl-tori arɩ tapʋl-pɛɩ chɛɛŋ maga dɩ ma pɩɩsɛ ma dɩ nɩalɩŋ kala ma sɩ yuo kɛsɛ disiniŋ ta. 20Má to pɩɩsɛ ma gɛnnɩŋ arɩ kɩalɩŋ kala ba sɩ kɛŋ tenniŋ koo bʋʋna pʋnaa koo daaŋ a ŋaa disiniŋ ta.”
21Ŋɩɩ nɛ Wɩɩsʋllɩ sɩpaalaara Elieza bʋla pɩ laalɩyuoro-la sɩ lɩɩ laalɩŋ kɔ, “Wombie-la La TƖƖNA sɩ to Mosis lɛ a bʋl dɩ ba tuto nɛ ŋ-la: 22Dɩ ma nɩɩ chɛ dɩ ma pɩɩsɛ sɛlɩmɛ, hɔpʋla, kɔlɩɩŋ, hɔɔ-bine, hɔɔ-la ba sɩ kaa ŋɩŋaa kɔŋkɔŋ arɩ fanɩ, 23koo kʋŋ na-kala sɩ jaŋ jʋʋ nyiniŋ aŋ bɩ dii, má joŋo hɛ nyiniŋ lɛ. Dɩ ma nɛ ŋaa ŋɩɩ, ʋ bɩra bɩ disiniŋ kɛnɛ. Ama ʋ maga dɩ ma ha kɛŋ lɩɩ-la ba sɩ kaa pɩpɩɩsɛ disiniŋ a pɩɩsɛba nɛ. Kʋŋ na-kala sɩ jaŋ jʋʋ nyiniŋ a dii, má kɛŋ lɩɩ-la ba sɩ kaa pɩɩsɛ disiniŋ dʋndʋŋa a chɛsɛ. 24Tapʋl-pɛɩ chɛɛŋ ma chɛsɛ ma gɛnnɩŋ, dɩ ma nɛ ŋaa ŋɩɩ ma bɩra bɩ disiniŋ kɛnɛ, ma jaŋ wuo kʋ jʋʋ ma dɩhɔnʋŋ.”
Ba kɛŋ dʋa-la ba sɩ yuo laa kpaa
25Ŋɩɩ nɛ La TƖƖNA bʋla pɩ Mosis, 26“Ŋ dɩ Wɩɩsʋllɩ sɩpaalaara Elieza arɩ Iziral tɩŋŋaa doho na-kala sɩpaalaara-la maga dɩ ma dɩɩsɛ nɩalɩŋ arɩ pʋsʋ-la ma sɩ yuo laalɩŋ a kɛsɛ. 27Kɛŋ kɩalɩŋ ba sɩ yuo laa a kpaa leree balɩa, a joŋ dɔŋɔ pɩ laalɩyuoro-la, aŋ joŋ dɔŋɔ ma pɩ Iziral tɩmma-la nɩkaanaa. 28Kpaal-la sɩ ŋaa laalɩyuoro-la kʋa nɛ: Nuhuobiinee, nɛsɩŋ, kakusuŋ, piesee arɩ bʋʋnaa, kɩaa deemba kʋŋkala zɔɔ-banɔŋ tʋɔŋ, lɩɩsɛ kʋbala dɩ ʋ ŋaa mɩ-na ma TƖƖNA kpaalɩŋ. 29Joŋo pɩ Wɩɩsʋllɩ sɩpaalaara Elieza, mɩ-na ma TƖƖNA toruŋ nɛ ŋɩɩ. 30Iziral tɩmma-la ma sɩ bɩ laalɩŋ mʋa kpaalɩŋ tʋɔŋ, nuhuobiinee, nɛsɩŋ, kakusuŋ, piesee arɩ bʋʋnaa arɩ pʋsʋŋ dɔnsʋŋ, mahɩŋ balɩa arɩ fii kala tʋɔŋ, lɩɩsɛ kʋbala a joŋo pɩ Levi doho nɩalɩŋ sɩɩ beŋ mɩ-na ma TƖƖNA dɩ-zɔŋ-la.” 31Ŋɩɩ nɛ Mosis arɩ Wɩɩsʋllɩ sɩpaalaara Elieza ŋaa wɩalɩŋ kala arɩ La TƖƖNA sɩ dagɛ Mosis ŋɩɩ.
32Laal-la sɩ dɛrɛ ka laalɩyuoro-la kɛŋ kɩalɩŋ kɔ nɛ ŋ-la: piesee bʋɩ zɔɔ-balɩdʋ mahɩŋ batori arɩ fii arɩ banɔŋ. 33Nɛsɩŋ ma bʋɩ mahɩŋ batori arɩ fii arɩ balɩa. 34Kakusuŋ ma bʋɩ mahɩŋ batori arɩ kʋbala. 35Haalaa ma sɩ bɩ baalaa jɩŋ bʋɩ mara arɩ fii arɩ balɩa.
36Laalɩyuoro-la kpaalɩŋ ba sɩ laa ŋaa piesee bʋɩ zɔɔ-batori mara arɩ fii arɩ balɩpɛ arɩ zɔɔ-banɔŋ nɛ. 37Ba tʋɔŋ kɩalɩŋ ba sɩ lɩɩsa a time pɩ La TƖƖNA ŋaa zɔɔ-balɩdʋ arɩ mahɩŋ batori arɩ fii arɩ banɔŋ nɛ. 38Nɛsɩŋ ŋaa bʋɩ mara arɩ fii arɩ balɩdʋ nɛ, ba joŋ kɩaa mahɩŋ batori arɩ fii arɩ balɩa a time pɩ La TƖƖNA. 39Kakusuŋ ma ŋaa bʋɩ mara arɩ fii arɩ zɔɔ-banɔŋ nɛ. Ba joŋ kɩaa mahɩŋ batori arɩ kʋbala a time pɩ La TƖƖNA. 40Haala-la ha sɩ bɩ baalaa jɩŋ ŋaa nɩaa bʋɩ fii arɩ balɩdʋ nɛ. Ba joŋ haala-la mara arɩ fii arɩ balɩa a pɩ La TƖƖNA. 41Kɩalɩŋ kala ba sɩ joŋo pɩ La TƖƖNA, Mosis joŋo pɩ Wɩɩsʋllɩ sɩpaalaara Elieza nɛ, arɩ La TƖƖNA sɩ dagʋ ŋɩɩ.
42Iziral tɩmma-la ma sɩ bɩ laalɩŋ mʋa kpaalɩŋ magɛ laalɩyuoro-la kʋa nɛ Mosis sɩ kaa kpaa. 43Piesee ŋaa bʋɩ zɔɔ-batori mara arɩ fii arɩ balɩpɛ arɩ zɔɔ-banɔŋ nɛ. 44Nɛsɩŋ ma ŋaa bʋɩ mara arɩ fii arɩ balɩdʋ. 45Kakusuŋ ma ŋaa bʋɩ mara arɩ fii arɩ zɔɔ-banɔŋ. 46Haala-la ma ha sɩ bɩ baalaa jɩŋ, ŋaa bʋɩ fii arɩ balɩdʋ nɛ. 47Iziral tɩmma-la sɩ bɩ laalɩŋ mʋa kpaal-la tʋɔŋ, nuhuobiinee mahɩŋ balɩa arɩ fii tʋɔŋ Mosis lɩɩsɛ nɩbala nɛ, pʋsʋŋ ma mahɩŋ balɩa arɩ fii tʋɔŋ, ʋ lɩɩsɛ ba ma kʋbala, arɩ La TƖƖNA sɩ dagʋ ŋɩɩ, a joŋo pɩ Levi doho nɩalɩŋ sɩɩ beŋ Wɩa dɩ-zɔŋ-la.
48Ŋɩɩ nɛ laalɩyuori-hɩasɩ-la kala, nɩalɩŋ sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba, kala sii mʋ Mosis teeŋ, 49a bʋla pʋ, “Ŋ tɩntɩnnaa dɩɩsɛ laalɩyuoro-la kala la sɩ kaa mʋ laalɩŋ nɛ, la kʋŋkala bɩ lɛlɛ. 50Ŋɩɩ nɛ la kɛŋ sɛlɩmɛ kpɩɛraa deemba la sɩ na kɔ dɩ la ŋaa Wɩɩsʋlʋŋ a pɩ La TƖƖNA a tɩŋ ʋ sɩ pɔla wɩaa: Kagunsuŋ, banzɔlɔba, kuori-nenii-pɩraa, dɩgɩlɩŋ-kpɛnsɩŋ arɩ naŋ-jɔlɔba.” 51Ŋɩɩ nɛ Mosis arɩ Wɩɩsʋllɩ sɩpaalaara Elieza sɛɩ a laa sɛlɩmɛ kɩalɩŋ kala ba sɩ kaa kɔ dɩ ba ŋaa Wɩɩsʋlʋŋ. 52Sɛlɩmɛ-la kala laalɩyuori-hɩasɩ-la sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba sɩ kaa kʋ ŋaa Wɩɩsʋlʋŋ pɩ La TƖƖNA yi kilo zɔɔ-balɩa nɛ. 53Laalɩyuoro-la kʋŋkala paa kɩalɩŋ dɔnsʋŋ ba sɩ yuo laa a kɛŋ nɛ. 54Ŋɩɩ nɛ Mosis arɩ Wɩɩsʋllɩ sɩpaalaara Elieza laa laalɩyuori-hɩasɩ-la sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba sɛlɩmɛ a kaa jʋʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ a bil la TƖƖNA sɩpaaŋ, dɩ ʋ liliisi Iziral tɩŋŋaa wɩaa bʋa na-kala.
Currently Selected:
NAMBABA 31: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
