NAMBABA 23
23
Balam sɩ bʋl wɩalɩŋ bumbuŋ a tɩgɛ Iziral tɩŋŋaa lɛ
1Ŋɩɩ nɛ Balam bʋla pɩ Balak, “Saa korunuŋ balɩpɛ a pɩmɛ, aŋ kɛŋ nɛ-belliŋ balɩpɛ arɩ pie-belliŋ balɩpɛ a kaa kɔ.” 2Ŋɩɩ nɛ Balak ŋaa wɩalɩŋ kala Balam sɩ daga. Ba balɩa kpʋ nɛ-bele arɩ pie-bele koru na-kala lɛ a ŋaa Wɩɩsʋlʋŋ. 3Balam bʋla pɩ Balak, “Chɩŋ ŋ Wɩɩsʋlʋŋ kɩalɩŋ sɛmɛ, ka dɩ mɩ sʋʋsɛ, kapo La TƖƖNA jaŋ kɛŋ ʋ tɩtɩa a kʋ dagɛmɛ. Wɩɩ-la kala ʋ sɩ bʋla pɩmɛ, mɩ jaŋ kʋ bʋla pɩŋ.” Ŋɩɩ nɛ Balam sʋʋsa mʋ chɩŋ dundol-kpɩlɩɩ kʋbala nyuŋ.
4Wɩa kɔ ʋ teeŋ, Balam bʋla pʋ, “Mɩ saa korunuŋ balɩpɛ nɛ a kpʋ nɛ-bele arɩ pie-bele koru na-kala lɛ a ŋaa Wɩɩsʋlʋŋ.”
5Ŋɩɩ nɛ La TƖƖNA bʋl wɩalɩŋ Balam sɩ jaŋ mʋ bʋla pɩ Balak a pʋ. 6Balam mɩɩra mʋ dɩ Balak ha chɩŋ ʋ Wɩɩsʋlʋŋ kɩalɩŋ bʋbʋɔŋ, ʋ dɩ Mʋab nɩhɩasɩŋ. 7Ŋɩɩ nɛ Balam bʋl wɩɩ-la Wɩa sɩ bʋla pʋ.
Ʋ sɩ, “Mʋab tɩŋŋaa kuoro Balak nɛ yɩrɛmɛ
mɩ lɩɩ Asiiria wɩɩpɔsʋŋ peele-la nyuŋ a kɔ
dɩ mɩ kʋ kalɩba hɛ Iziral tɩŋŋaa lɛ.
8Ɛɛ nɛ saa mɩ jaŋ wuo ŋaa a kalɩba hɛ nɩalɩŋ lɛ Wɩa sɩ bɩ kalɩba hɛ?
Koo a bʋl wɩaa chei nɩalɩŋ La TƖƖNA sɩ bɩ cheye?
9Mɩ chɩŋ bʋŋ nyuŋ nɛ aŋ na nɩalɩŋ,
a bɩra chɩŋ dundolo ma nyuŋ aŋ bibemba.
Ba ŋaa nɩaa sɩ chɩŋ ba dʋndʋŋ nɛ,
ba bɩ tinteye-la dɔnsʋŋ naga.
10Iziral tɩŋŋaa yʋga nɛ woruŋ a nagɛ hagɩlɩ-biee.
Kʋbɛɛ nɛ jaŋ wuo dɩɩsɛba?
Leŋ dɩ mɩ sʋʋ a nagɛ tʋɔpʋl tɩŋŋaa deemba sɩ jaŋ sʋʋ ŋɩɩ,
dɩ mɩ dɩdɛrɩŋ ma nagɛ ba dɩdɛrɩŋ.”
11Ŋɩɩ nɛ Balak pɩɛsɛ Balam, “Bɛɛ kʋŋ wɩɩ nɛ ŋ ŋaa mɩ lɛ ŋ-la? Mɩ kɛnɩŋ kɔ dɩ ŋ kalɩba hɛ mɩ dʋndɔŋŋɔɔ lɛ nɛ, ŋ vɩa aŋ mɩɩra sʋl Wɩa pɩba.”
12Ŋɩɩ nɛ Balam bʋl, “Wɩɩ-la La TƖƖNA sɩ bʋla pɩmɛ, ʋ nɛ mɩ bʋl ŋɩɩ.”
Balam sɩ bʋl wɩalɩŋ lɩa a tɩgɛ Iziral tɩŋŋaa lɛ
13Balak bɩra bʋla pɩ Balam, “Kɔ dɩ la mʋ sɛmɛ dɔŋɔ, ŋ jaŋ na Iziral tɩmma-la dɔnsʋŋ, ŋ bɩ jaŋ na ba kala. Chɩŋ nɩmɛ a kalɩba hɛ ba lɛ a pɩmɛ.” 14Ŋɩɩ nɛ ʋ kɛnʋ mʋ Zofim pɔkɔŋ, ba jɩl peel-la ba sɩɩ yɩrɛ Pɩsɩga nyuŋ. Nɩmɛ nɛ ʋ bɩra saa korunuŋ balɩpɛ a kpʋ nɛ-bele arɩ pie-bele koru na-kala nyuŋ a ŋaa Wɩɩsʋlʋŋ. 15Balam bɩra bʋla pɩ Balak, “Chɩŋ ŋ Wɩɩsʋlʋŋ kɩaa sɛmɛ, ka dɩ mɩ mʋ cheŋ Wɩa.”
16Ŋɩɩ nɛ La TƖƖNA kɔ Balam teeŋ a bʋl wɩalɩŋ ʋ sɩ jaŋ mʋ bʋla pɩ Balak a pʋ.
17Balam mɩɩraa mʋ dɩ Balak ha chɩŋ ʋ Wɩɩsʋlʋŋ kɩalɩŋ sɛmɛ, ʋ dɩ Mʋab tɩŋŋaa nɩhɩasɩŋ. Ŋɩɩ nɛ Balak pɩɛsɛ Balam, “La TƖƖNA sɩ bɛɛ nɛ?”
18Ŋɩɩ nɛ Balam bʋl wɩɩ-la La TƖƖNA sɩ bʋla. Ʋ sɩ,
“Balak Zipo nanʋala sii a nɩɩ,
19Wɩa bɩ nuhuobiinee naga a nyɩnyɩɛ wɩaa
koo a kɛŋ ʋ tʋɔbɩɩnaa a bɩbɩrɩmɛ.
Dɩ ʋ nɛ bʋl wɩɩ, ʋ yie sɛnɛ ŋaa wɩɩ-la nɛ,
dɩ ʋ nɛ hɛ niiŋ arɩ ʋ jaŋ ŋaa wɩɩ ma, ʋ yie sɛnɛ ŋaa nɛ.
20Wɩa dagɛmɛ dɩ mɩ sʋlʋ dɩ ʋ pɛ ʋ nɩalɩŋ lɛ nɛ.
Ʋ sɩ pɛ ba lɛ ŋɩɩ, mɩ saa bɩ jaŋ wuo kaa bɩrɩmɛ.
21Wʋbɔŋ koo hɛɛ-kala bɩ jaŋ jʋʋ Iziral tɩŋŋaa.
Ba Tɩɩna Wɩa chɩŋ ba harɩŋ nɛ.
Ba yɩyɩrɛ ʋ yɩrɩŋ a jʋjʋɔsɛ ʋ sɩ ŋaa ba kuoro.
22Wɩa nɛ kɛmba kaa kʋ lɩɩ Ijipiti tinteeŋ lɛ,
ba kɛŋ doluŋ a nagɛ baga nɛŋ nɛ.
23Hɩl koo vʋgʋrʋ kala bɩ doluŋ kɛnɛ Iziral tɩŋŋaa lɛ.
Nɩaa jaŋ naba a bʋl,
‘Na wɩalɩŋ Wɩa sɩ ŋaa pɩ Iziral tɩŋŋaa.’
24Iziral tɩŋŋaa nagɛ naachigiŋ nɛ.
Dɩ ba nɛ kiri ba dʋndɔŋŋɔɔ, dɩ ba nɛ bɩ ba kpʋa,
a chaŋ ba nammɩa a nyʋa ba chalɩŋ, ba bɩ wiesi.”
25Ŋɩɩ nɛ Balak bʋla pɩ Balam, “Ŋ folo bɩ kalɩba hɛ ba lɛ, saa sɩ́ bʋla wasɛba ma.”
26Ŋɩɩ nɛ Balam bʋla pʋ, “Mɩ bɩ bʋla pɩŋ arɩ La TƖƖNA sɩ sɩ mɩ ŋaa wɩɩ-la nɛ, mɩ jaŋ ŋaa?”
Balam sɩ bʋl wɩalɩŋ tori a tɩgɛ Iziral tɩŋŋaa lɛ
27Balak bɩra bʋla pɩ Balam “Leŋ dɩ mɩ kɛnɩŋ mʋ sɛmɛ dɔŋɔ, kapo Wɩa tʋɔŋ jaŋ tɔrɛ dɩ ʋ leŋ dɩ ŋ chɩŋ lee-la aŋ kalɩba hɛ ba lɛ pɩmɛ.” 28Ŋɩɩ nɛ ʋ kɛŋ Balam ba jɩl peel-la ba sɩɩ yɩrɛ Pio nyuŋ. Ba chɩŋ nɩmɛ aŋ bibeŋ tintee-hɩlɩɩ-la.
29Balam bʋla pʋ, “Saa korunuŋ balɩpɛ a kɛŋ nɛ-belliŋ balɩpɛ arɩ pie-belliŋ balɩpɛ kɔ.” 30Ŋɩɩ nɛ Balak ŋaa ŋɩɩ Balam sɩ daga. Ba kpʋ nɛ-bele arɩ pie-bele a ŋaa Wɩɩsʋlʋŋ, koru na-kala nyuŋ.
Currently Selected:
NAMBABA 23: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
