NAMBABA 24
24
1Balam sɩ kʋ jɩŋ dɩ La TƖƖNA ka chɛ dɩ ʋ bʋl wɩaa a wasɛ Iziral tɩŋŋaa nɛ, ʋ bɩra bɩ mʋa dɩ ʋ chɛ na wɩɩkala arɩ ʋ fa sɩ yie mʋ chɛ ŋɩɩ. Ŋɩɩ nɛ aŋ kɛŋ ʋ sɩaa chaasɛ tintee-hɩlɩɩ-la dɩɩrɩŋ, 2a bee mʋ na Iziral tɩŋŋaa, dɩ ba hɔŋ doho doho. Ŋɩɩ nɛ Wɩa Dɩma kʋ tuu hɛ Balam lɛ. 3Ʋ bʋl wɩaa deemba Wɩa sɩ joŋo dagʋ:
“Mɩ-na Bioo nanʋala Balam sɩ ŋaa nʋʋ,
a nɩna wɩaa woruŋ nɩɩ bʋl wɩaa deemba.
4Mɩ nɩɩ wɩalɩŋ Wɩa doluŋ kala Tɩɩna sɩ bʋla nɛ,
a na wɩalɩŋ ma ʋ sɩ daga arɩ duosoo tʋɔŋ.
Ŋɩɩ nɛ mɩ tuu tele chu, Wɩa suri mɩ sɩaa:
5Iziral tɩŋŋaa dɩjʋʋlʋŋ zɔmɔ nɛ woruŋ,
6a nagɛ fuonaa balaa sɩ jalla pɩpɛ,
a nagɛ fuoŋ niiŋ gaarɩŋ,
a nagɛ tɩɩ-pugu kʋbala ba sɩɩ yɩrɛ Alɔɩ,
La TƖƖNA tɩtɩa sɩ chɔnsɔ,
koo a nagɛ kuolu tɩɩsɩŋ sɩ chɩŋ fuoŋ niiŋ.
7Duonuŋ jaŋ nɩɩ woruŋ a pɩ Iziral tɩŋŋaa
dɩ ba duu ba kɩaa fɩɛlɩŋ lɛ.
Ba kuoro jaŋ kɛŋ doluŋ a kɩɩ
kuoru-la ba sɩɩ yɩrɛ Agag.
Ba tinteeŋ ma yɩrɩŋ jaŋ sisii.
8Wɩa nɛ kɛmba lɩɩ Ijipiti tinteeŋ lɛ kɔ.
Ba kɛŋ doluŋ a nagɛ baga nɛŋ nɛ.
Ba jaŋ yuo dii ba dʋndɔŋŋɔɔ a bori ba tosuŋ,
aŋ bori ba haŋgbelee ma muno muno.
9Iziral tɩŋŋaa nagɛ naachigi-balaa nɛ.
Dɩ ba nɛ pɩna, nʋʋkala tuo sɩ jaŋ wuo chɩsɛba.
Dɩ nʋʋ nɛ sʋl Wɩɩ-sʋl zɔmʋŋ a pɩba,
Wɩa jaŋ pɛ tɩɩna ma lɛ.
Dɩ nʋʋ nɛ kalɩba hɛ ba lɛ ma,
Wɩa ma jaŋ kalɩba hɛ tɩɩna lɛ.”
10Ŋɩɩ nɛ Balak na baanɩŋ woruŋ Balam nyuŋ a kɛŋ ʋ nɩsɩŋ ŋmoo dɔŋɔ, aŋ bʋla pɩ Balam, “Mɩ yɩrɩŋ dɩ ŋ kʋ kalɩba hɛ mɩ dʋndɔŋŋɔɔ lɛ nɛ, ŋ mɩɩra kʋ sʋl Wɩa pɩba naansɩɩŋ butori. 11Mɩ fa sɩ mɩ jaŋ timiŋ a yʋgɛ, ama La TƖƖNA bɩ sɛyɛ, sii viiri lɩma.”
12Ŋɩɩ nɛ Balam bʋla pɩ Balak, “Ŋ fa sɩ tɩŋ ŋ tɩndaaraa mɩ teeŋ, mɩ bʋla pɩba 13arɩ sɛlɩmɛ arɩ hɔpʋla nɛ paala su ŋ kuoru dɩa ŋ joŋo pɩmɛ ma, mɩ bɩ jaŋ wuo bʋl wʋzɔŋ koo wʋbɔŋ kala a lɩɩ wɩɩ-la La TƖƖNA sɩ bʋla harɩŋ. 14Mɩ-na mɩɩraa mʋ mɩ nɩaa teeŋ nɛ, ama mɩ jaŋ leŋ dɩ ŋ jɩŋ wɩɩ-la Iziral tɩŋŋaa maachie sɩ jaŋ ŋaa ŋ nɩaa lɛ.”
Balam sɩ bʋl wɩalɩŋ nɛsɛ a tɩgɛ Iziral tɩŋŋaa lɛ
15Wɩalɩŋ Wɩa sɩ joŋo dagʋ, ʋ bʋl nɛ ŋ-la:
“Mɩ-na Bioo nanʋala Balam, sɩ ŋaa nʋʋ,
a nɩna wɩaa woruŋ nɩɩ bʋl wɩaa deemba.
16Mɩ ŋaa nʋʋ sɩɩ nɩɩ wɩalɩŋ Wɩa sɩɩ bʋl nɛ,
a kɛŋ wʋjɩmɩɩ-la ma sɩ lɩɩ Wɩa sɩ kɩɩ kʋŋkala teeŋ,
a na wɩalɩŋ kala Wɩa doluŋ Tɩɩna sɩ joŋo dagɛmɛ arɩ duosoo tʋɔŋ.
Ŋɩɩ nɛ mɩ tuu tele chu, La TƖƖNA suri mɩ sɩaa.
17Mɩ na wɩɩ nɛ, ama lɛɛlɛ dee wɩɩ-la jaŋ ŋaa.
Mɩ na arɩ kuoro jaŋ lɩɩ Iziral tɩŋŋaa tʋɔŋ
a chaanɛ a nagɛ chɛnwʋlʋŋ, a kori kuoru dantɩga.
Ʋ jaŋ yuo dii Mʋab tɩŋŋaa arɩ Sɛf doho nɩaa kala.
18Iziral tɩŋŋaa jaŋ kɛŋ doluŋ
a yuo dii ba dʋndɔŋŋɔɔ Ɛdɔm tɩŋŋaa.
19Kuoro jaŋ lɩɩ Jekɔb doho nɩalɩŋ tʋɔŋ
a yuo dii nɩkaana-la sɩ hɛ ba tasɩŋ lɛ.”
Balam sɩ to harɩŋ a bʋl wɩalɩŋ tɩgɛ Iziral tɩŋŋaa lɛ
20Ŋɩɩ nɛ Balam na Amalɛk tɩŋŋaa arɩ duosoo tʋɔŋ, a bʋl wɩaa deemba Wɩa sɩ joŋo dagʋ a tɩgɛ ba lɛ:
Ʋ sɩ, “Tinteyee kala tʋɔŋ Amalɛk tɩŋŋaa nɛ fa dolie a kɩɩ ba kala,
ama ʋ dɩdɛrɩŋ kala ba tinteeŋ jaŋ pɩŋ jikpeeŋ.”
21Ʋ bɩra na Keni tɩŋŋaa arɩ duosoo tʋɔŋ,
a bʋl wɩaa deemba Wɩa sɩ joŋo dagʋ a tɩgɛ ba lɛ.
Ʋ sɩ, “Wʋwalɩmɩɩ kala tuo lee-la Keni tɩŋŋaa sɩ hɔnɔ.
Ba nagɛ nʋʋ sɩ saa ʋ dɩa bʋŋ nyuŋ nɛ.
22Ama Asiiria tɩŋŋaa ha jaŋ yuo dii Keni tɩŋŋaa
a chei ba tinteeŋ aŋ kɛsɛba viiri.”
23Ŋɩɩ nɛ Balam bɩra bʋl wɩɩŋ deeŋ Wɩa sɩ joŋo dagʋ.
Ʋ sɩ, “Kʋbɛɛ nɛ jaŋ hɛ ʋ mɩɩsɩŋ lɛ
dɩ Wɩa nɛ leŋe dɩ wɩaa deemba kʋ ŋaa?
24Lɩɩŋ daborusuŋ jaŋ lɩɩ Sapɩrɔs fuoŋ-niiŋ
a kʋ yuo dii Asiiria tɩŋŋaa arɩ Ɛbɛ tɩŋŋaa,
ama nɩalɩŋ sɩ kʋ yuo diiba ma kala jaŋ sʋʋ.”
25Ŋɩɩ nɛ Balam mɩɩra mʋ ʋ jaŋ, ka Balak ma viiri.
Currently Selected:
NAMBABA 24: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
