NAMBABA 22
22
Balak tɩma yɩrɛ Balam
1Iziral tɩŋŋaa bɩra sii a mʋ hɔŋ Mʋab tinteeŋ dɩ-taalɩsɩ-la sɩ hɛ Jɔdaŋ fuo-la wɩɩjʋʋlʋŋ dɩɩrɩŋ a chaasɛ Jeriko.
2Ŋɩɩ nɛ Zipo nanʋala Balak nɩɩ wɩalɩŋ kala Iziral tɩŋŋaa sɩ joŋo ŋaa Amɔrɩ tɩŋŋaa lɛ, 3fawʋllʋŋ faasa jʋʋ ʋ dɩ ʋ nɩaa kala, bɛɛ wɩaa Iziral tɩŋŋaa fa yʋga.
4Ŋɩɩ nɛ Mʋab tɩŋŋaa bʋla pɩ Midiaŋ tɩŋŋaa nɩhɩasɩŋ, “Nɩ-daŋ deeŋ jaŋ kɔ a dii la tinteeŋ kala a nagɛ nɛ-bele sɩ yie gbegisi yaŋ ŋɩɩ.” Bʋa-la lɛ dɩ Zipo nanʋala Balak nɛ fa ŋaa Mʋab tɩŋŋaa kuoro. 5Ŋɩɩ nɛ ʋ tɩŋ nɩaa dɩ ba mʋ yɩrɛ Bioo nanʋala Balam. Balam fa hɛ ʋ jaŋ Pɛtɔ lɛ nɛ, a kpagɛ fuo-la ba sɩɩ yɩrɛ Yufireti. Balak sɩ, “Nɩaa nɛ lɩɩ Ijipiti tinteeŋ a yʋgɛ woruŋ a kʋ hɔnɔ kpagɛmɛ. 6Mɩ saa chɛ dɩ ŋ kɔ a kalɩba hɛ nɩaa deemba lɛ, bɛɛ wɩaa ba dolie kɩɩmɛ nɛ. Ŋ bɩ pɔ dɩ ŋ nɛ kalɩba hɛ ba lɛ, mɩ jaŋ wuo yuo diiba, a kiriba dɩ ba lɩɩ mɩ tinteeŋ lɛ. Mɩ jɩma dɩ ŋ nɛ bʋl wʋzɔŋŋɔɔ pɩ nʋʋ, wɩalɩŋ yie sɛnɛ ŋaa nɛ. Dɩ ŋ nɛ bɩra ŋmɩɛsa hɛ nʋʋ lɛ ma, ŋmɩaŋ-la yie dii tɩɩna nɛ.”
7Ŋɩɩ nɛ kuoro Balak joŋ moribiiŋ a pɩ Mʋab tɩŋŋaa arɩ Midiaŋ tɩŋŋaa nɩhɩasɩŋ dɩ ba kaa mʋ a pɩ Balam, dɩ ʋ laa a pɛ tabɩɩŋ pɩba. Ŋɩɩ nɛ ba kɔ Balam teeŋ a bʋl wɩalɩŋ kala kuoro Balak sɩ bʋla a pʋ.
8Ŋɩɩ nɛ Balam bʋla pɩba, “Má pɩŋ dɩ taŋ pʋl, mɩ chie jaŋ bʋl wɩɩ-la La TƖƖNA sɩ bʋla pɩmɛ a pɩma.” Ŋɩɩ nɛ nɩalɩŋ chʋa.
9Wɩa kɔ Balam teeŋ tɩtaŋɩŋ a pɩɛsʋ, “Kʋbɛɛba nɛ nɩaa deemba sɩ hɛ ŋ teeŋ?” 10Ŋɩɩ nɛ Balam bʋla pɩ Wɩa, “Zipo nanʋala Balak sɩ ŋaa Mʋab tɩŋŋaa kuoro nɛ tɩmba mɩ teeŋ, dɩ ba bʋla pɩmɛ arɩ 11nɩaa nɛ lɩɩ Ijipiti tinteeŋ a yʋgɛ woruŋ a kʋ tɔ ʋ tinteeŋ kala. Ʋ saa chɛ dɩ mɩ kɔ a kalɩba hɛ ba lɛ, dɩ mɩ nɛ ŋaa ŋɩɩ, ŋ bɩ pɔ, ʋ jaŋ wuo yuo diiba a kiriba dɩ ba lɩɩ ʋ tinteeŋ lɛ.” 12Ŋɩɩ nɛ Wɩa bʋla pɩ Balam, “Sɩ́ nɩalɩŋ harɩŋ to mʋ. Ʋ bɩ maga dɩ ŋ ŋmɩɛsa hɛ nɩalɩŋ lɛ, bɛɛ wɩaa ba ŋaa nɩa lɛ mɩ sɩ pɛ nɛ.” 13Taŋ sɩ pʋla, Balam sii a bʋla pɩ kuoro Balak tɩndaara-la, “Má mɩɩra mʋ ma tinteeŋ, bɛɛ wɩaa La TƖƖNA bɩ mɩ wombiiŋ pa dɩ mɩ to ma harɩŋ mʋ.”
14Ŋɩɩ nɛ Mʋab tɩŋŋaa sɩpaalaaraa mʋ Balak teeŋ a bʋla pʋ, “Balam vɩa dɩ ʋ to la harɩŋ kɔ nɛ.”
15Balak bɩra wasa tɩŋ sɩpaalaaraa ba yʋga kɩɩ bumbuŋ nɩalɩŋ a kɛŋ yɩrɩŋ ma a kɩɩba. 16Ba mʋ Balam teeŋ, a bʋla pʋ, “Ŋ-la nɛ Zipo nanʋala Balak bʋl: Mɩɩ sʋlʋŋ, hɛ doluŋ aŋ kɔ mɩ teeŋ, sɩ́ leŋe dɩ wɩɩkala kɛrɩŋ. 17Mɩ jaŋ timiŋ a yʋgɛ, aŋ pɛ ŋaa wɩɩ-la ma kala ŋ sɩɩ chɛ. Ŋ-na kʋ kalɩba hɛ nɩaa deemba lɛ a pɩmɛ.”
18Ŋɩɩ nɛ Balam bʋla pɩ Balak tɩndaara-la, “Dɩ Balak nɛ paala joŋ sɛlɩmɛ arɩ hɔpʋla-la kala sɩ hɛ ʋ kuori dɩa lɛ pɩmɛ ma, mɩ bɩ jaŋ wuo vɩa La TƖƖNA niiŋ aŋ ŋaa wɩɩkala pʋ. 19Ma jaŋ wuo pɩŋ arɩ bumbuŋ nɩalɩŋ sɩ pɩŋ ŋɩɩ, dɩ taŋ pʋl, dɩ mɩ na wɩɩ-la La TƖƖNA sɩ jaŋ bʋla pɩmɛ.”
20Ŋɩɩ nɛ Wɩa kɔ Balam teeŋ tɩtaŋɩŋ a bʋla pʋ, “Nɩaa deemba bɩra sɩ kɔ dɩ ba yɩrɩŋ, sii to ba harɩŋ mʋ, ama ŋaa wɩɩ-la mɩ sɩ dagɩŋ dʋndʋŋa. Sɩ́ wʋwogo kala ŋaa.”
Balam arɩ ʋ kakumo
21Taŋ sɩ pʋla, Balam sii a kpɩɛrɛ ʋ kakumo a to Mʋab tɩŋŋaa nɩhɩasɩ-la harɩŋ. 22Balam sɩɩ mʋ ŋɩɩ, Wɩa na baanɩŋ woruŋ ʋ nyuŋ, a leŋ ʋ-na La TƖƖNA tɩndaara lɩɩ kɛrʋ wombiiŋ lɛ. Balam fa jɩl kakumo nɛ, ʋ tɩntɩnnaa balɩa ma faa to ʋ harɩŋ. 23Kakumo-la sɩ na La TƖƖNA tɩndaarʋ-la dɩ ʋ chɩŋ wombiiŋ lɛ a kori tokobiiŋ, ʋ gɛbɛ to gɩrɩŋ. Balam ŋmoo kakumo-la dɩ ʋ kʋ lɩɩ wombiiŋ.
24La TƖƖNA tɩndaarʋ-la fa chɩŋ wombii-fʋgʋgʋ-bie lɛ nɛ girep tɩɩsɩŋ bagɩsɩŋ balɩa pɛgɛ, jebiiŋ hɛ sɛmɛ dɔŋɔ a hɛ sɛmɛ dɔŋɔ ma. 25Kakumo-la sɩ na La TƖƖNA tɩndaarʋ-la ŋɩɩ, ʋ kɛŋ ʋ tɩtɩa mʋ tɩɩgɛ jebii-la dɔŋɔ, a pɛ kɛŋ Balam naaŋ kaa tɩɩgɛ jee-la. Ŋɩɩ nɛ Balam bɩra ŋmoo kakumo-la.
26Ŋɩɩ nɛ La TƖƖNA tɩndaarʋ-la bɩra mʋ chɩŋ wombii-la, lee sɩ faasa fʋgɛ, lee-la kakumo-la sɩ bɩ jaŋ wuo pɩɛga bal. 27Kakumo-la bɩra sɩ na La TƖƖNA tɩndaarʋ-la ʋ tuu tel, Balam hɔŋ ʋ nyuŋ. Balam baanɩŋ sii, ʋ ŋmoo kakumo-la arɩ ʋ daaŋ. 28Ŋɩɩ nɛ La TƖƖNA pɩ kakumo-la doluŋ ʋ wuo bʋl wɩaa. Ʋ pɩɛsɛ Balam, “Bɛɛ nɛ mɩ ŋaa cheyiŋ, ŋ ŋmoomi naansɩɩŋ butori kala?”
29Ŋɩɩ nɛ Balam bʋl, “Ŋ jommi arɩ mɩ ŋaa nɩyaarɩ nɛ. Dɩ mɩ nɛ fa kori tokobiiŋ, mɩ fa jaŋ kpʋŋ lɛɛlɛ.”
30Ŋɩɩ nɛ kakumo-la pɩɛsɛ Balam, “Mɩ dee kakumo-la ŋ sɩ vɛnɛɛ jɩl? Mɩ ha ŋaa wɩɩŋ deeŋ doho ŋ lɛɛ?” Ŋɩɩ nɛ Balam bʋl, “Aɩ.”
31La TƖƖNA leŋ Balam sɩaa suri ʋ na Wɩa tɩndaarʋ-la sɩ chɩŋ wombiiŋ lɛ a kori tokobiiŋ. Ŋɩɩ nɛ ʋ tuu tele chu.
32La TƖƖNA tɩndaarʋ-la pɩɛsɛ Balam, “Bɛɛ nɛ tɩɩ ŋ ŋmoo ŋ kakumo naansɩɩŋ butori-la? Mɩ kɔ dɩ mɩ kɛrɩŋ nɛ, mɩ bɩ cho dɩ ŋ mʋ lee-la. 33Kakumo-la na mɩ nɛ, ŋɩɩ nɛ tɩɩ ʋ gɛbɛ naansɩɩŋ butori-la kala. Dɩ ʋ nɛ fa bɩ gɛbɛ, mɩ fa jaŋ kpʋŋ aŋ leŋu.”
34Ŋɩɩ nɛ Balam bʋla pɩ La TƖƖNA tɩndaarʋ-la, “Mɩ ŋaa wʋbɔŋ nɛ, mɩ bɩ jɩŋ arɩ ŋ kɛrɛ mɩ wombiiŋ nɛ a bɩ chɛ dɩ mɩ mʋ lee-la. Dɩ ŋ tʋɔŋ nɛ bɩ tɔrɔ, mɩ jaŋ mɩɩrɛ.”
35La TƖƖNA tɩndaarʋ-la bɩra bʋla pɩ Balam, “Kɛŋ nɩalɩŋ dɩ ma mʋ, ama wɩɩ-la mɩ sɩ bʋla pɩŋ dʋndʋŋa nɛ maga dɩ ŋ bʋl.” Ŋɩɩ nɛ Balam to nɩhɩasɩ-la harɩŋ ba mʋ.
36Balak sɩ nɩa arɩ Balam ka kɔ, ʋ sii mʋ chemu taŋ-la ba sɩɩ yɩrɛ Aa lɛ, Anɔŋ fuo-la leriŋ, Mʋab tɩŋŋaa arɩ Amɔrɩ tɩŋŋaa bʋa nɛ ŋɩɩ. 37Ŋɩɩ nɛ Balak pɩɛsɛ Balam, “Mɩ sɩ tɩma yɩrɩŋ, bɛɛ nɛ tɩɩ ŋ vɩa? Koo ŋ bɩɩna mɩ bɩŋ wuo tiŋ nɛ?”
38Balam sɩ, “Lɛɛlɛ mɩ kɔ nɛ, ama mɩ bɩ jaŋ wuo bʋl wɩɩkala, see wɩɩ-la Wɩa sɩ daga.”
39Ŋɩɩ nɛ Balam to Balak harɩŋ ba mʋ taŋ kʋbala ba sɩɩ yɩrɛ Kɩrɩaf Hʋzɔf. 40Nɩmɛ nɛ Balak kpʋ nɛsɩŋ arɩ piesee a ŋaa Wɩɩsʋlʋŋ a chɔgɛ ba nammɩa a pɩ Balam arɩ nɩhɩasɩ-la sɩ hɛ ʋ teeŋ. 41Taŋ sɩ pʋla, Balak kɛŋ Balam ba jɩl lee-la ba sɩɩ yɩrɛ Bamɔf Baal. Nɩmɛ nɛ ʋ chɩŋ aŋ bee mʋ na Iziral tɩmma-la dɔnsʋŋ.
Currently Selected:
NAMBABA 22: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
