NAMBABA 21
21
Iziral tɩŋŋaa yuo dii Kɛnaŋ tɩŋŋaa
1Kɛnaŋ tɩŋŋaa baal kʋbala nɛ fa hɛ nɩmɛ, a ŋaa Arad kuoro. Ʋ fa hɛ Nɛgɛf lɛ nɛ. Ʋ sɩ nɩa dɩ Iziral tɩŋŋaa joŋ wombiiŋ a kʋkɔ taŋ-la ba sɩɩ yɩrɛ Atarɩm, ŋɩɩ nɛ ʋ kʋ lɩɩ a yuo kɛsɛ Iziral tɩŋŋaa dɔnsʋŋ. 2Ŋɩɩ nɛ Iziral tɩŋŋaa ta niiŋ La TƖƖNA teeŋ a bʋl, “Dɩ ŋ nɛ leŋe dɩ la yuo dii nɩaa deemba, la jaŋ chei ba tabalaa kala gbelem gbelem.” 3Ŋɩɩ nɛ La TƖƖNA jegile nɩɩ Iziral tɩŋŋaa teeŋ, a leŋ ba yuo dii Kɛnaŋ tɩŋŋaa, a cheiba arɩ ba tabalaa kala gbelem gbelem. Ba hɛ lee-la yɩrɩŋ Hɔma.
Ba kɛŋ kɔlɩɩŋ libi dɩmɩŋ
4Ŋɩɩ nɛ Iziral tɩŋŋaa sii peel-la ba sɩɩ yɩrɛ Hɔɔ lɛ, a to wombii-la sɩɩ mʋ mʋga-la ba sɩɩ yɩrɛ Mʋgʋ-fɩaŋ dɩɩrɩŋ, dɩ ba golli Ɛdɔm tinteeŋ a mʋ. Ba sɩ mʋ magɛ ŋɩɩ, ba kenyiri kala dɛrɛ. 5Ba ŋaa goŋ Wɩa arɩ Mosis nyuŋ, a bʋl, “Bɛɛ nɛ tɩɩ ma kɛnla lɩɩ Ijipiti tinteeŋ lɛ kɔ tintee-hɩlɩŋ deeŋ dɩ la sʋʋ? Kʋdiilii dɔŋ tuo daha, lɩɩŋ ma tuo, la mɩɩsɩŋ fɩɩ kʋdii-tɔɔŋ deeŋ nɛ.”
6Ŋɩɩ nɛ La TƖƖNA leŋ dɩma kʋbalaba sɩ kɛŋ huoŋ woruŋ kʋ dɩŋ Iziral tɩŋŋaa, ba nɩ-daŋ sʋʋ. 7Nɩalɩŋ sɩ ka kɔ Mosis teeŋ a bʋl, “La ŋaa wʋbɔŋ nɛ la sɩ ŋaa goŋ ŋ dɩ La TƖƖNA nyuŋ. Sʋl La TƖƖNA dɩ ʋ leŋ dɩ dɩma-la lɛl la tʋɔŋ.” Ŋɩɩ nɛ Mosis sʋl La TƖƖNA a pɩba.
8La TƖƖNA bʋla pɩ Mosis, “Kɛŋ kɔlɩɩŋ libi dɩmɩŋ a joŋo mɛrɛ daaterige lɛ a joŋo pɛ. Dɩ dɩma-la kʋŋ nɛ dɩŋ nʋʋkala, dɩ ʋ wʋla beŋ kɔlɩɩŋ dɩŋ-la sɩ mɛrɛ daa-la lɛ, ʋ bɩ jaŋ sʋʋ, ʋ jaŋ kɛŋ mɩɩsɩŋ.” 9Ŋɩɩ nɛ Mosis kɛŋ kɔlɩɩŋ libi dɩmɩŋ a joŋo mɛrɛ daaterige lɛ a joŋo pɛ. Dɩ dɩma-la kʋŋ nɛ dɩŋ nɩalɩŋ dɔŋɔ, ʋ yie wʋla beŋ kɔlɩɩŋ dɩŋ-la nɛ a duori.
Iziral tɩŋŋaa sɩɩ mʋ Mʋab
10Ŋɩɩ nɛ Iziral tɩŋŋaa vɛŋ ŋɩɩ a mʋ hɔŋ lee-kʋbala ba sɩɩ yɩrɛ Ɔbɔf. 11Ŋɩɩ nɛ ba bɩra sii Ɔbɔf lɛ a mʋ hɔŋ lee-kʋbala ma ba sɩɩ yɩrɛ Ɩyɛ-Abarɩm, tintee-hɩlɩɩ-la sɩ chaasɛ taŋ-la ba sɩɩ yɩrɛ Mʋab wɩɩpɔsʋŋ dɩɩrɩŋ. 12Ba bɩra sii nɩmɛ a mʋ hɔŋ fuonaa-kʋbala lɛ ba sɩɩ yɩrɛ Zɛrɛd. 13Ba bɩra sii nɩmɛ ma, a mʋ hɔŋ fuo-kʋbala niiŋ ba sɩɩ yɩrɛ Anɔŋ. Ʋ ma hɛ tintee-hɩlɩɩ-la tʋɔŋ nɛ. Fuo-la fa pɩŋ ŋɩɩ nɛ a mʋ jʋʋ Amɔrɩ tɩŋŋaa tinteeŋ. Anɔŋ fuo-la nɛ ŋaa Mʋab tɩŋŋaa arɩ Amɔrɩ tɩŋŋaa tinteeŋ bʋa. 14Ŋɩɩ nɛ tɩɩ ba bʋl wɩaa La TƖƖNA laalɩŋ teniŋ tʋɔŋ a mʋʋ tɩgɛ taŋ-la ba sɩɩ yɩrɛ Wahɛb sɩ hɛ lee-la ba sɩɩ yɩrɛ Sufa arɩ fuonaasɩ-la arɩ fuo-la ba sɩɩ yɩrɛ Anɔŋ wɩaa, 15arɩ fuonaa-luŋii-la sɩ pɩŋ ŋɩɩ a mʋ yi taŋ-la ba sɩɩ yɩrɛ Aa, a mʋmʋ Mʋab tɩŋŋaa tinteeŋ bʋa. 16Ŋɩɩ nɛ ba bɩra sii Anɔŋ lɛ a mʋ vil-la ba sɩɩ yɩrɛ Bɛɛ. Vil-la leriŋ nɛ La TƖƖNA bʋla pɩ Mosis, “Kɛŋ Iziral tɩŋŋaa kala kʋ hɛ dɔŋɔ dɩ mɩ pɩba lɩɩŋ.”
17Ŋɩɩ nɛ Iziral tɩŋŋaa yɩɩ yɩɩlɩŋ a bʋl,
“Viliŋ bul lɩɩŋ
dɩ la yɩɩ yɩɩlɩŋ a dɛnnʋ,
18vil-la kuori-biiriŋ sɩ kɛŋ ba kuori-dantɩgɩsɩŋ lu,
arɩ Iziral tɩŋŋaa sɩpaalaaraa sɩ kɛŋ ba dantɩgɩsɩŋ lu.”
Ŋɩɩ nɛ ba sii tintee-hɩlɩɩ-la lɛ a mʋ lee-la ba sɩɩ yɩrɛ Matana. 19Ba bɩra sii Matana lɛ a mʋ Nahalɩɛl, a sii Nahalɩɛl lɛ a mʋ Bamɔf. 20Ba sii Bamɔf lɛ a mʋ fuonaa-la sɩ hɛ Mʋab lɛ, lee-la ŋ sɩ jaŋ chɩŋ peel-la ba sɩɩ yɩrɛ Pɩsɩga bʋbʋɔŋ aŋ bibeŋ tintee-hɩlɩɩ-la.
Iziral tɩŋŋaa yuo dii Amɔrɩ tɩŋŋaa kuoro Sɩhɔŋ arɩ Basaŋ tɩŋŋaa kuoro Ɔgɩ
21Iziral tɩŋŋaa tɩŋ nɩaa dɩ ba mʋ bʋla pɩ Amɔrɩ tɩŋŋaa kuoro Sɩhɔŋ,
22“Leŋ dɩ la kʋ to ŋ tinteeŋ a bal. La bɩ jaŋ gɛbɛ jʋʋ ma bagɩsɩŋ kʋŋ, koo a nyʋa ma vilee kʋŋkala lɩɩŋ. La jaŋ to womporuŋ ŋɩɩ a mʋ lɩɩ ma tinteeŋ lɛ.”
23Ama Sɩhɔŋ bɩ sɛyɛ dɩ Iziral tɩŋŋaa kʋ to ʋ tinteeŋ a bal. Ʋ kɛŋ ʋ laalɩyuoroo kala ba lɩɩ dɩ ba yuo Iziral tɩŋŋaa tintee-hɩlɩɩ-la lɛ. Ba sɩ mʋ yi lee-la ba sɩɩ yɩrɛ Jahas, ba dɩ Iziral tɩŋŋaa yuo laalɩŋ nɩmɛ. 24Ŋɩɩ nɛ Iziral tɩŋŋaa yuo diiba a laa ba tinteeŋ, a chɩŋ fuo-la ba sɩɩ yɩrɛ Anɔŋ lɛ a kaa mʋ yi fuo-la ba sɩɩ yɩrɛ Jabɔk. Ama ba fa bɩ wuo mʋ jʋʋ Amɔŋ tɩŋŋaa tinteeŋ, bɛɛ wɩaa ba-na gɩba fa dolie nɛ woruŋ. 25Ŋɩɩ nɛ Iziral tɩŋŋaa yuo dii Amɔrɩ tɩŋŋaa tabalaa kala, a pɛ Hɛsɩbɔŋ arɩ tabiisi-la kala sɩ gollu, a hɔŋ ba lɛ. 26Amɔrɩ tɩŋŋaa kuoro Sɩhɔŋ tabalɩŋ nɛ fa ŋaa Hɛsɩbɔŋ. Sɩhɔŋ nɛ fa yuo dii Mʋab tɩŋŋaa kuoru-bɩnɩŋ a laa ʋ tinteeŋ kala a mʋ yi Anɔŋ fuo-la.
27Ŋɩɩ nɛ tɩɩ gɔgʋ-dɩndɛnnɛɛ bʋl,
“Má kɔ kuoro Sɩhɔŋ tabalɩŋ Hɛsɩbɔŋ,
dɩ la wasa saaʋ.
28Amɔrɩ tɩŋŋaa kuoro Sɩhɔŋ laalɩyuoroo
sii ʋ tabalɩŋ Hɛsɩbɔŋ lɛ a nagɛ nyiniŋ a mʋ dii Aa.
Mʋab tinteeŋ tabalɩŋ nɛ ŋɩɩ,
a dii fuo-la ba sɩɩ yɩrɛ Anɔŋ dundolluŋ kala.
29Wɩɩŋ puuma, ma-na Mʋab tɩŋŋaa,
ma nɩalɩŋ sɩ laa vene-la ba sɩɩ yɩrɛ Chɛmɔs dii a kpʋkpaarʋ,
ma dɛrɛ nɛ ŋɩɩ. Ma hambolibiisiŋ kala fá nɛ,
aŋ ka ba kɛsɛ ma toloo a kaa mʋ pɩ Amɔrɩ tɩŋŋaa kuoro.
30Ama la-na yuo diiba nɛ,
a chɩŋ Hɛsɩbɔŋ lɛ a kaa mʋ yi taŋ-la ba sɩɩ yɩrɛ Dɩbɔŋ,
a bɩra lɩɩ taŋ-la ba sɩɩ yɩrɛ Nasɩm lɛ a mʋ yi taŋ-la ba sɩɩ yɩrɛ Nofa,
a kaa mʋ taŋ-la ba sɩɩ yɩrɛ Mediba.”
31Ŋɩɩ nɛ Iziral tɩŋŋaa hɔŋ Amɔrɩ tɩŋŋaa tinteeŋ lɛ.
32Mosis tɩŋ baalaa ba mʋ lʋara beŋ ŋɩɩ ba sɩ jaŋ to a yuo dii tabal-la ba sɩɩ yɩrɛ Jaza. Ŋɩɩ harɩŋ nɛ Iziral tɩŋŋaa mʋ yuo dii taŋ-la arɩ tabiisi-la kala sɩ gollu, a kiri Amɔrɩ tɩmma-la kala fa sɩ hɔŋ nɩmɛ. 33Iziral tɩŋŋaa bɩra lɩɩ nɩmɛ a joŋ wombiiŋ a chaasɛ Basaŋ tinteeŋ dɩɩrɩŋ. Ŋɩɩ nɛ Basaŋ kuoro ba sɩɩ yɩrɛ Ɔgɩ, ʋ dɩ ʋ laalɩyuoroo kala kʋ lɩɩ dɩ ba chemba Ɛdɩrɛ lɛ a yuoba.
34Ŋɩɩ nɛ La TƖƖNA bʋla pɩ Mosis, “Sɩ́ leŋe dɩ ŋ bɔyɛ joŋ, mɩ joŋ Basaŋ kuoro Ɔgɩ arɩ ʋ laalɩyuoroo arɩ ʋ tinteeŋ kala hɛ ŋ nɩsɩŋ lɛ nɛ. Ŋɩɩ ŋ sɩ joŋo ŋaa Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ, joŋ ŋɩɩ tɩtɩa ŋaa ba ma lɛ.” 35Ŋɩɩ nɛ Iziral tɩŋŋaa kpʋ kuoro Ɔgɩ arɩ ʋ hambolibiisiŋ arɩ ʋ nɩaa kala, ba kʋbala ma bɩ ka, aŋ laa tintee-la kala a tɩɩ.
Currently Selected:
NAMBABA 21: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
