NAMBABA 20
20
Lɩɩŋ lɩɩ bʋŋ lɛ
1Jɩna tʋɔŋ chɛŋ-bumbuŋ lɛ, Iziral tɩŋŋaa kala mʋ yi tintee-hɩlɩɩ-la ba sɩɩ yɩrɛ Zɩŋ, ŋɩɩ nɛ ba hɔŋ taŋ-la ba sɩɩ yɩrɛ Kadɛs lɛ. Nɩmɛ nɛ Mɩrɩam sʋʋ ba hugu.
2Lɩɩŋ fa tuo lee-la dɩ Iziral tɩŋŋaa nyʋa. Ŋɩɩ nɛ ba kala sii a golli Mosis arɩ Arɔŋ a ŋɩŋaa goŋ ba nyuŋ. 3Ŋɩɩ nɛ ba ŋaa goŋ Mosis nyuŋ a bʋl, “Dɩ la nɛ fa yaara sʋʋ, arɩ la naambiiri-la sɩ sʋʋ ŋɩɩ La TƖƖNA sɩpaaŋ, ʋ nɛ kpɩa. 4La ŋaa la TƖƖNA nɩaa nɛ, bɛɛ nɛ tɩɩ ŋ kɛŋ la dɩ la pʋsʋŋ kʋ lɩɩ tintee-hɩlɩŋ deeŋ lɛ dɩ la sʋʋ? 5Bɛɛ nɛ tɩɩ ŋ kɛnla kaa lɩɩ Ijipiti tinteeŋ lɛ a kɔ dɩ-kpuŋkpere deeŋ. Ʋ bɩ mɩaa koo tutogi-nambɩlaa kɛnɛ. Ʋ bɩ girep arɩ tɩɩnɛnɛ-la sɩ nagɛ kampoi nɛnɛɛ kɛnɛ. Lɩɩŋ ma paala tuo dɩ la nyʋa.”
6Ŋɩɩ nɛ Mosis arɩ Arɔŋ leŋ nɩalɩŋ aŋ mʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ a tuu tele chu. La TƖƖNA tʋla kʋ chaana hɛ ba lɛ. 7Ŋɩɩ nɛ La TƖƖNA bʋla pɩ Mosis, 8“Joŋ dantɩga-la, ka ŋ dɩ ŋ naambie Arɔŋ yɩrɛ nɩalɩŋ kala kʋ hɛ dɔŋɔ. Chɩŋ ba sɩpaaŋ aŋ bʋl wɩaa bʋŋ-la teeŋ, dɩ lɩɩŋ kʋ lɩɩ ʋ lɛ dɩ Iziral tɩŋŋaa arɩ ba pʋsʋŋ kala nyʋa.”
9Ŋɩɩ nɛ Mosis joŋ dantɩga-la sɩ pɩŋ La TƖƖNA sɩpaaŋ arɩ ʋ sɩ dagʋ ŋɩɩ. 10Ʋ dɩ Arɔŋ yɩrɛ Iziral tɩŋŋaa kala kʋ hɛ dɔŋɔ bʋŋ-la sɩpaaŋ. Ŋɩɩ nɛ Mosis bʋla pɩba, “Má jegile nɩɩ, ma nɩaa deemba sɩ bɩ dagɩŋ ka nɩɩ. Maa chɛ dɩ la leŋ dɩ lɩɩŋ lɩɩ bʋŋ deeŋ lɛ pɩma, dɩ ma nyʋa nɛɛ?” 11Ŋɩɩ nɛ Mosis kɛŋ ʋ nɩsɩŋ je a ŋmoo bʋŋ-la naansɩɩŋ bʋlɩa arɩ ʋ dantɩga-la. Lɩɩŋ gbu lɩɩ, Iziral tɩŋŋaa arɩ ba pʋsʋŋ kala nyʋa.
12Ama La TƖƖNA bʋla pɩ Mosis arɩ Arɔŋ, “A tɩŋ ma sɩ bɩ mɩ laa dii woruŋ, a bɩ mɩ zile Iziral tɩŋŋaa sɩpaaŋ arɩ mɩ nɛ kɛŋ doluŋ, ma dee bɩ jaŋ kɛŋ Iziral tɩŋŋaa mʋ tintee-la mɩ sɩ sɩ mɩ jaŋ joŋo pɩba.”
13Wɩaa deemba kala ŋaa Mɛrɩba lɛ nɛ, lee-la Iziral tɩŋŋaa sɩ gʋrɩmɛ wɩaa La TƖƖNA teeŋ. Nɩmɛ nɛ La TƖƖNA dagɛ ʋ doluŋ pɩba. Ba sɩ gʋrɩmɛ wɩaa nɛ tɩɩ ba hɛ lee-la yɩrɩŋ Mɛrɩba ŋɩɩ.
Ɛdɔm tɩŋŋaa vɩa dɩ ba pɩ Iziral tɩŋŋaa wombiiŋ
14Ŋɩɩ nɛ Mosis tɩŋ nɩaa Kadɛs lɛ, dɩ ba kɛŋ tɩndaarɩŋ deeŋ mʋ pɩ Ɛdɔm tinteeŋ kuoro. Ʋ sɩ, “Ŋ naambiiriŋ Iziral tɩŋŋaa nɛ tɩŋ tɩndaarɩŋ deeŋ aa pɩŋ. Ŋ jɩŋ hɛɛ-la kala sɩ jʋʋla nɛ. 15La naabalɩmaba mʋ Ijipiti tinteeŋ nɛ, la hɔŋ nɩmɛ jɩ-daŋ, Ijipiti tɩŋŋaa wʋrɩgɛ la dɩ la naabalɩmaba woruŋ. 16Ama la sɩ yele pɩ La TƖƖNA, ʋ nɩɩ la yele nɛ a leŋ ʋ tɩndaara kʋ kɛnla kaa lɩɩ Ijipiti tinteeŋ lɛ. Lɛɛlɛ la kʋ hɔŋ taŋ-la ba sɩ yɩrɛ Kadɛs lɛ nɛ, ŋ tinteeŋ niiŋ. 17La saa sʋlʋŋ dɩ ŋ leŋ dɩ la to ŋ tinteeŋ a bal. La jaŋ to womporuŋ a bal, la bɩ jaŋ gɛbɛ jʋʋ ma bagɩsɩŋ, la bɩ jaŋ nyʋa ma vilee lɩɩŋ ma.” 18Ŋɩɩ nɛ Ɛdɔm tɩŋŋaa bʋl, “La bɩ jaŋ sɛɩ dɩ ma kʋ to la tinteeŋ bal. Dɩ ma nɛ vɩa aŋ to, la jaŋ sii a yuoma.” 19Ŋɩɩ nɛ Iziral tɩŋŋaa ma bʋl, “Laa chɛ dɩ la to womporuŋ nɛ a bal, dɩ la kʋŋ koo dɩ la pʋna nɛ nyʋa ma lɩɩŋ, la jaŋ time pɩma. Wombiiŋ dʋndʋŋa nɛ laa chɛ dɩ la to bal. La bɩ ma kʋŋkala ka chɛ.”
20Ŋɩɩ nɛ Ɛdɔm tɩmma-la bɩra bʋl, “La bɩ jaŋ sɛɩ dɩ ma to la tinteeŋ a bal.” Ŋɩɩ nɛ Ɛdɔm tɩŋŋaa arɩ ba laalɩyuoroo sɩ yʋga aŋ kɛŋ doluŋ ma woruŋ, kʋ lɩɩ dɩ ba yuoba. 21Ɛdɔm tɩŋŋaa sɩ bɩ sɛyɛ dɩ Iziral tɩŋŋaa to ba tinteeŋ bal ŋɩɩ, ŋɩɩ nɛ Iziral tɩŋŋaa mɩɩrɛ.
Arɔŋ sʋba
22Ŋɩɩ nɛ Iziral tɩŋŋaa kala sii Kadɛs lɛ a mʋ peel-la ba sɩɩ yɩrɛ Hɔɔ leriŋ. 23Hɔɔ fa kpagɛ Ɛdɔm tɩŋŋaa tinteeŋ bʋa nɛ. Nɩmɛ nɛ la TƖƖNA bʋl wɩaa pɩ Mosis arɩ Arɔŋ. 24Ʋ sɩ, “Arɔŋ jaŋ sʋʋ, ʋ bɩ jaŋ jʋʋ tintee-la mɩ sɩ jaŋ joŋo pɩ Iziral tɩŋŋaa, bɛɛ wɩaa ma kala balɩa vɩa dɩ ma to ŋɩɩ mɩ sɩ dagɛma nɛ Mɛrɩba lɛ. 25Kɛŋ Arɔŋ arɩ ʋ nanʋala Elieza kaa jɩl peel-la ba sɩɩ yɩrɛ Hɔɔ nyuŋ, 26a wuri Arɔŋ tɩntɩnnɩ gɛnnɩŋ a laalɛ ʋ nanʋala Elieza. Arɔŋ jaŋ sʋʋ daha peeliŋ deeŋ nyuŋ.”
27Ŋɩɩ nɛ Mosis ŋaa wɩalɩŋ kala La TƖƖNA sɩ dagʋ, a kɛŋ Arɔŋ arɩ ʋ nanʋala Elieza a jɩl peel-la nyuŋ, ka Iziral tɩŋŋaa kala bibeŋ. 28Ŋɩɩ nɛ Mosis wuri Arɔŋ gɛnnɩ-la a joŋo laalɛ ʋ nanʋala Elieza, ka Arɔŋ sʋʋ peel-la nyuŋ. Ŋɩɩ nɛ Mosis arɩ Arɔŋ nanʋala Elieza mɩɩra kʋ tuu. 29Iziral tɩŋŋaa sɩ nɩa dɩ Arɔŋ sʋba, ba yel ʋ yoho tapʋlaa mara arɩ fii.
Currently Selected:
NAMBABA 20: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
