NAMBABA 19
19
Lɩɩ-la ba sɩ kaa pɩɩsɛ disiniŋ tɩta
1La TƖƖNA bʋla pɩ Mosis arɩ Arɔŋ, 2“Wɩɩ-la mɩ-na ma TƖƖNA sɩ bʋla dɩ ma ŋaa nɛ ŋ-la: Bʋla pɩ Iziral tɩŋŋaa dɩ ba kɛŋ nɛ-pa-fɩaŋ sɩ bɩ nyɔɔ kala kɛnɛ kɔ, kʋ-la ba ha sɩ bɩ kaa tɩŋ aŋ ka. 3Ma joŋo pɩ Wɩɩsʋllɩ sɩpaalaara Elieza, dɩ ʋ kaa lɩɩ ma dɩhɔnʋŋ lɛ a leŋ dɩ nʋʋ kpʋʋ ʋ sɩɩŋ lɛ. 4Wɩɩsʋllɩ sɩpaalaara Elieza jaŋ kɛŋ ʋ neniiŋ, a tagɛ nɛŋ-la chalɩŋ a mɩsɛ lɛbɩ-la lɛ mɩ sɩ yie kɔ Iziral tɩŋŋaa teeŋ sɩpaaŋ naansɩɩŋ bʋlɩpɛ. 5Elieza jaŋ bibeŋ, ka dɩ ba nyɩgɛ nɛ-paha-la teniŋ, ʋ nammɩa, ʋ chalɩŋ arɩ ʋ tʋɔŋ kɩaa kala. 6Wɩɩsʋllɩ sɩpaalaara jaŋ joŋ kuolu daaŋ arɩ kaku-dɩgɩlɩŋ arɩ ŋmɛŋ-fɩaŋ a yuo hɛ nyiŋ-la lɛ ba sɩ nyɩgɛ nɛ-paha-la. 7Ŋɩɩ harɩŋ lɛ, Wɩɩsʋllɩ sɩpaalaara jaŋ chɛsɛ ʋ gɛnnɩŋ a fo lɩɩŋ, aŋ-na mɩɩra jʋʋ ma dɩhɔnʋŋ. Ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ. 8Baal-la ma sɩ nyɩgɛ nɛ-paha-la jaŋ chɛsɛ ʋ gɛnnɩŋ a fo lɩɩŋ, ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ.
9Baala sɩ bɩ disiniŋ kɛnɛ nɛ jaŋ paa nɛ-paha-la tʋɔrʋŋ a hɛ dɔŋɔ lɛ, a joŋo bil lee sɩ bɩ disiniŋ kɛnɛ mɩ teeŋ ma dɩhɔnʋŋ harɩŋ. Tʋɔrʋ-la nɛ ba jaŋ ŋaa a hɛ lɩɩŋ lɛ a kaa pɩɩsɛ ba wʋbɔŋŋɔɔ tɩta. 10Baal-la ma sɩ paa tʋɔrʋ-la hɛ dɔŋɔ lɛ, ʋ jaŋ chɛsɛ ʋ gɛnnɩŋ aŋ fo lɩɩŋ, arɩ ŋɩɩ kala ʋ ha jaŋ kɛŋ disiniŋ tapʋlɩɩ-la na-kala dɩ wɩa tuu jʋʋ. Wɩɩŋ deeŋ jaŋ chɩŋ a pɩ Iziral tɩŋŋaa arɩ nʋhʋɔra-la kala sɩ hɛ ba tʋɔŋ a kaa mʋ wuu.
11Dɩ nʋʋ nɛ digi sʋʋŋ, tɩɩna jaŋ kɛŋ disiniŋ tapʋlaa balɩpɛ. 12Tɩɩna maga dɩ ʋ kɛŋ lɩɩ-la ba sɩ kaa pɩɩsɛ disiniŋ a chɛsɛ ʋ tɩtɩa tapʋl-tori arɩ tapʋl-pɛɩ chɛɛŋ. Dɩ ʋ nɛ ŋaa ŋɩɩ, ʋ disiniŋ dɛrɛ nɛ. Ama dɩ ʋ nɛ bɩ ʋ tɩtɩa pɩɩsa tapʋl-tori arɩ tapʋl-pɛɩ-la chɛɛŋ, ʋ disiŋ-la bɩ jaŋ dɛrɛ. 13Dɩ nʋʋ nɛ digi sʋʋŋ aŋ bɩ ʋ disiniŋ pɩɩsa ta, tɩɩna ŋaa disiniŋ hɛ mɩ-na ma TƖƖNA dɩ-zɔŋ-la lɛ nɛ. Tɩɩna maga dɩ ba keru ta Iziral tɩŋŋaa tʋɔŋ, bɛɛ wɩaa ba ha bɩ lɩɩ-la ba sɩ kaa pɩɩsɛ disiniŋ tɩta mɩsa hɛ ʋ lɛ, ʋ disiniŋ ha bɩ dɛrɛ.
14Wombii-la sɩ hɛ nɩmɛ a mʋ tɩgɛ nʋʋ sɩ sʋʋ lɛbɩŋ tʋɔŋ nɛ ŋ-la: Dɩ nʋʋ nɛ hɛ lɛbɩŋ tʋɔŋ ka dɩ nʋʋ sʋʋ, tɩɩna jaŋ kɛŋ disiniŋ tapʋlaa balɩpɛ. Dɩ nʋʋ ma nɛ jʋʋ lɛbɩ-la, ʋ ma jaŋ kɛŋ disiniŋ tapʋlaa balɩpɛ. 15Dɩ pupoiŋ koo taga nɛ hɛ lɛbɩ-la lɛ, ka ba bɩ ʋ nii-tɔlɔ joŋo tɔ, ʋ ma jaŋ kɛŋ disiniŋ.
16Dɩ nʋʋ nɛ ba kpʋ dɩ-jalɩŋ koo dɩ ʋ paala sʋʋ ʋ Wɩa sʋʋŋ nɛ, dɩ nʋʋ mʋ digi, tɩɩna jaŋ kɛŋ disiniŋ tapʋlaa balɩpɛ. Koo dɩ nʋʋ nɛ digi nuhuobiine haŋgbeliŋ koo vaamɩŋ, tɩɩna jaŋ kɛŋ disiniŋ tapʋlaa balɩpɛ.
17Dɩ ma nɩɩ chɛ dɩ ma pɩɩsɛ nɩdosunuŋ deemba disiniŋ ta, ma jaŋ ŋaa nɛ-paha-la ba fa sɩ kaa ŋaa Wɩɩsʋlʋŋ a nyɩgɛ ʋ tʋɔrʋŋ a hɛ taga lɛ a ŋaa lɩɩŋ sɩ zɔmɔ a hɛ. 18Baal sɩ bɩ disiniŋ kɛnɛ mɩ teeŋ jaŋ joŋ kaku-dɩgɩlɩŋ, a yʋ lɩɩ-la a mɩsa hɛ lɛbɩ-la arɩ ʋ tʋɔŋ kɩaa arɩ nɩalɩŋ kala sɩ hɛ ʋ tʋɔŋ lɛ. Ʋ jaŋ bɩra ŋaa mɩsa hɛ nɩalɩŋ ma sɩ digi nuhuobiine haŋgbeliŋ koo vaamɩŋ koo nʋʋ ba sɩ kpʋa koo nʋʋ sɩ digi nʋʋ sɩ sʋʋ ʋ Wɩa sʋʋŋ lɛ. 19Baal-la sɩ bɩ disiniŋ kɛnɛ mɩ teeŋ, jaŋ mɩsɛ lɩɩ-la hɛ nɩɩ-la sɩ kɛŋ disiniŋ lɛ tapʋl-tori arɩ tapʋl-pɛɩ chɛɛŋ. Tapʋl-pɛɩ-la chɛɛŋ, ʋ jaŋ pɩɩsɛ ʋ disiniŋ ta. Nɩɩ-la disiniŋ ʋ sɩ pɩɩsa ta jaŋ chɛsɛ ʋ gɛnnɩŋ a fo lɩɩŋ, dɩ wɩa nɛ jʋa, ʋ disiniŋ dɛrɛ nɛ. 20Ama dɩ nɩɩ-la sɩ kɛŋ disiniŋ nɛ bɩ ʋ disiniŋ pɩɩsa ta, ʋ maga dɩ ba keru ta Iziral tɩŋŋaa tʋɔŋ, bɛɛ wɩaa ʋ ŋaa disiniŋ hɛ mɩ-na ma TƖƖNA dɩ-zɔŋ-la lɛ nɛ a tɩŋ ba sɩ bɩ lɩɩ-la ba sɩ kaa pɩɩsɛ disiniŋ joŋo mɩsa hɛ ʋ lɛ, ʋ disiniŋ bɩ dɛrɛ. 21Wɩɩŋ deeŋ jaŋ chɩŋ a pɩma a kaa mʋ wuu. Nɩɩ-la sɩ kɛŋ lɩɩ-la pɩɩsɛ nɩaa disiniŋ ta maga dɩ ʋ chɛsɛ ʋ gɛnnɩŋ. Dɩ nʋʋ ma nɛ digi lɩɩ-la, tɩɩna jaŋ kɛŋ disiniŋ dɩ wɩa tuu jʋʋ. 22Kʋŋ na-kala nʋʋ sɩ kɛŋ disiniŋ sɩ dige, kʋ-la kɛŋ disiniŋ nɛ. Dɩ nʋʋkala nɛ digi kʋ-la, tɩɩna ma jaŋ kɛŋ disiniŋ dɩ wɩa tuu jʋʋ.”
Currently Selected:
NAMBABA 19: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
