NAMBABA 16
16
Kora, Dataŋ arɩ Abɩram ŋaa goŋ Mosis nyuŋ
1Tapʋlɩɩ kʋbala, Kora sɩ ŋaa Iza nanʋala a ŋaa Kohaf ma nihiŋ a ŋaa Levi doho nʋʋ, a pɛ Rubiŋ doho nɩaa deemba lɛ: Ɛlɩab hambolibiisiŋ Dataŋ arɩ Abɩram, a pɛ Pɛlɛf nanʋala Ɔŋ lɛ, ba sɩɩ a bɩrɩmɛ kʋhaa, 2a nyɛsɛ Mosis nyuŋ. Iziral tɩŋŋaa sɩpaalaaraa zɔɔ-balɩa arɩ mahɩŋ balɩa arɩ fii-la ba sɩ lɩɩsa, nʋʋkala jɩmba woruŋ, ma sii chɩŋ ba harɩŋ. 3Ŋɩɩ nɛ ba kala sii kʋ nyɛsɛ Mosis arɩ Arɔŋ nyuŋ, a bʋla pɩba, “Ma ŋaa wɩalɩŋ kieli nɛ, la Iziral tɩŋŋaa kala ŋaa nɩa sɩ bɩ disiniŋ kɛnɛ nɛ La TƖƖNA teeŋ. La TƖƖNA hɛ la kʋŋkala teeŋ nɛ. Bɛɛ nɛ saa tɩɩ ma joŋ ma tɩtɩa arɩ ma nɛ kɩɩ la Iziral tɩŋŋaa kala?”
4Mosis sɩ nɩɩ wɩɩŋ deeŋ, ʋ tuu tele chu. 5Ŋɩɩ nɛ aŋ bʋla pɩ Kora arɩ ʋ harɩ-tooroo, “Chie chʋchʋɔŋ La TƖƖNA jaŋ dagɛ nɩɩ-la sɩ ŋaa ʋ nʋʋ arɩ nɩɩ-la sɩ bɩ disiniŋ kɛnɛ ʋ teeŋ. Nɩɩ-la ʋ sɩ lɩɩsa, ʋ jaŋ kɛnʋ mʋ kpagɛ ʋ tɩtɩa. 6Ŋ-na Kora, ŋ dɩ ŋ harɩ-tooroo, má paa kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ. 7Chie ma chaanɛ nyiniŋ hɛ a hɛ kʋsʋɔrʋsʋŋ, a kaa mʋ La TƖƖNA sɩpaaŋ. Nɩɩ-la La TƖƖNA sɩ lɩɩsa nɛ jaŋ ŋaa nɩɩ-la sɩ bɩ disiniŋ kɛnɛ ʋ teeŋ. Ma-na Levi doho nɩaa, ma nɛ ŋaa kieli.”
8Ŋɩɩ nɛ Mosis bɩra bʋla pɩ Kora, “Lɛɛlɛ ma Levi doho nɩaa, má jegile nɩɩ, 9ma bɩɩna wʋbie nɛ Iziral tɩŋŋaa Wɩa sɩ lɩɩsɛma ʋ nɩaa tʋɔŋ, a leŋ ma nɛ kpagʋ a tɩtɩŋ ʋ dɩ-zɔŋ-la lɛ, aŋ laa ba sɩpaaŋ a tɩma pɩpɩ baa? 10Ʋ sɩ joŋ wɩɩŋ magɛ ŋ-la a pɩ ma Levi doho nɩaa, aŋ ka ma ha bɩra chɩchɛ dɩ ma laa Wɩɩsʋllɩ sɩpaalaaraa tɩntɩŋŋaa ma, 11La TƖƖNA nyuŋ nɛ ŋ dɩ ŋ harɩ-tooroo kala nyɛsɛ ŋɩɩ, Arɔŋ nyuŋ dee. Arɔŋ ma nɛ kʋbɛɛ?”
12Ŋɩɩ nɛ Mosis tɩma yɩrɛ Ɛlɩab hambolibiisiŋ Dataŋ arɩ Abɩram. Ba sɩ, “La bɩ kɔ. 13Ŋ bɩɩna wʋbie nɛ ŋ ŋaa la lɛ ŋɩɩ, ŋ sɩ kɛnla lɩɩ tintee-la sɩ kɛŋ kɩaa woruŋ, a kɛnla kɔ tintee-hɩlɩŋ deeŋ lɛ dɩ la sʋʋ, aŋ ha chɩchɛ dɩ ŋ fʋfʋgɛla? 14Ŋ sɩ sɩ ŋ jaŋ kɛnla mʋ tintee-la sɩ kɛŋ kɩaa woruŋ dɩ la kɛŋ la tɩtɩa tɩɩnɛnɛɛ bagɩsɩŋ arɩ ŋmaŋkaanɩŋ, ŋ kɛŋ la mʋ nɛ aŋ chɩchɛ dɩ ŋ nyɩnyɩsɛ laa? La bɩ kɔ.”
15Ŋɩɩ nɛ Mosis chaasa na baanɩŋ, a bʋla pɩ La TƖƖNA, “Sɩ́ ba Wɩɩsʋlʋŋ laa, mɩ ha bɩ ba kʋŋkala kakumo kaa laa, mɩ ha bɩ ba kʋŋkala wɩɩ ma cheye.”
16Ŋɩɩ nɛ aŋ bʋla pɩ Kora, “Ŋ dɩ ŋ harɩ-tooro-la arɩ Arɔŋ chie kɔ La TƖƖNA sɩpaaŋ. 17Ŋ dɩ ŋ harɩ-tooroo zɔɔ-balɩa arɩ mahɩŋ balɩa arɩ fii-la kʋŋkala joŋ kʋ-la lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ, a chaanɛ nyiniŋ hɛ, a hɛ kʋsʋɔrʋsʋŋ a kaa kɔ La TƖƖNA sɩpaaŋ.” 18Ŋɩɩ nɛ ba kʋŋkala joŋ ʋ kʋa a hɛ nyiniŋ arɩ kʋsʋɔrʋsʋ-la. Ba dɩ Mosis arɩ Arɔŋ kala mʋ chɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ. 19Kora sɩ kɛŋ ʋ dɩ ʋ harɩ-tooro-la ba chɩna chaasɛ Mosis arɩ Arɔŋ lɛbɩ-la lɛ La TƖƖNA sɩ yie kɔ Iziral teeŋ boiŋ niiŋ ŋɩɩ, La TƖƖNA tʋla guu chaanɛ a hɛ Iziral tɩŋŋaa kala lɛ. 20Ŋɩɩ nɛ La TƖƖNA bʋla pɩ Mosis arɩ Arɔŋ, 21“Má lɩɩ nɩalɩŋ tʋɔŋ ka dɩ mɩ dɛrɛba lɛɛlɛ.”
22Ŋɩɩ nɛ Mosis arɩ Arɔŋ tuu tele chu aŋ ŋmoo niiŋ, “Ou Wɩa, ŋ nɛ ŋaa nuhuobiine mɩɩsɩŋ, nɩbala wʋbɔmʋŋ jaŋ leŋ dɩ ŋ na baanɩŋ ŋ nɩaa kala nyuŋ?”
23Ŋɩɩ nɛ La TƖƖNA bɩra bʋla pɩ Mosis, 24“Bʋla pɩ nɩalɩŋ kala dɩ ba sʋrɩsa lɩɩ, aŋ ka Dataŋ, Abɩram arɩ Kora arɩ ba lɛŋŋɛɛ.”
25Ŋɩɩ nɛ Mosis sii, Iziral tɩŋŋaa nɩhɩasɩŋ to ʋ harɩŋ ba mʋ Dataŋ arɩ Abɩram teeŋ. 26Ŋɩɩ nɛ Mosis chaasa bʋla pɩ nɩalɩŋ kala, “Má sʋrɩsa lɩɩ nɩbɔŋŋɔɔ deemba lɛŋŋɛɛ bʋbʋɔŋ. Má sɩ́ ba kʋŋkala digu. Dɩ ma nɛ ŋaa ŋɩɩ, ba wʋbɔŋ-la jaŋ pɛ diima.” 27Ŋɩɩ nɛ ba sʋrɩsa lɩɩ Kora, Dataŋ arɩ Abɩram lɛŋŋɛɛ bʋbʋɔŋ. Bʋa-la lɛ dɩ Dataŋ arɩ Abɩram kʋ lɩɩ chɩŋ ba lɛŋŋɛɛ boiŋ niiŋ arɩ ba haalaa arɩ ba biiriŋ. 28Mosis bɩra bʋla pɩ nɩalɩŋ, “Ŋ-la lɛ nɛ ma jaŋ to a jɩŋ arɩ La TƖƖNA nɛ tɩmmɛ dɩ mɩ ŋaa wɩaa deemba, mɩ tɩtɩa wʋchɛɛlɛɛ dee mɩɩ ŋaa: 29Dɩ nɩaa deemba sʋʋŋ nɛ yie dɩ ba sʋʋ, ka Wɩa bɩ ba dɔgɩsɔ, ŋɩɩ-na La TƖƖNA dee bɩ mɩ tɩma. 30Ama dɩ La TƖƖNA nɛ ŋaa wɩɩ nɩaa ha sɩ bɩ na aŋ ka, a leŋ dɩ tinteeŋ suri a paa ba dɩ ba kɩaa kala liŋ kʋweyee, ŋɩɩ nɛ ma jaŋ jɩŋ arɩ nɩaa deemba fa vɩa La TƖƖNA wɩaa nɛ.”
31Mosis sɩ bʋl wɩaa deemba aa dɛrɛ, dɩ lee-la Dataŋ arɩ Abɩram sɩ chɩna suro, 32a paa ba dɩ ba dɩa nɩaa arɩ ba kʋŋkala a liŋ, a kɛŋ Kora arɩ ʋ nɩaa ma arɩ ba kʋŋkala a pɛ. 33Tinteeŋ suro a paaba liŋ kʋweyee nɛ, ba dɩ ba kɩaa kala nyɩɩgɛ ba nɩaa tʋɔŋ. 34Iziral tɩmma-la kala fa sɩ hɛ lee-la a nɩɩ ba yele, ba fá aŋ bʋl, “Tinteeŋ ka chɛ ʋ paa la ma liŋ nɛ.”
35Ŋɩɩ nɛ La TƖƖNA leŋ nyiniŋ kʋ dii sɩpaalaara-la zɔɔ-balɩa arɩ mahɩŋ balɩa arɩ fii sɩɩ nyɩgɛ kʋsʋɔrʋsʋŋ.
36Ŋɩɩ nɛ La TƖƖNA bʋla pɩ Mosis, 37“Bʋla pɩ Elieza, Wɩɩsʋllɩ sɩpaalaara Arɔŋ nanʋala, dɩ ʋ mʋ chaarɛ kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ nyiniŋ sɩ dii nɩalɩŋ tʋɔŋ, a kɛŋ nyɩŋ-hala-la mʋ bɩsa ta dɩ-bolii mʋa, bɛɛ wɩaa kɩalɩŋ ŋaa kɩa sɩ bɩ disiniŋ kɛnɛ. 38Paa nɩalɩŋ sɩ ŋaa wʋbɔŋ-la a sʋʋ kɩalɩŋ hɛ dɔŋɔ lɛ, a kaa libi pɩrataba a joŋo tɔ koru-la, ʋ ŋɩɩ jaŋ ŋaa chagɩlɩna a pɩ Iziral tɩŋŋaa. Ba sɩ kɛŋ kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ kɔ mɩ sɩpaaŋ a nyɩgɛ kʋsʋɔrʋsʋŋ a ŋaa Wɩɩsʋlʋŋ ŋɩɩ, ba bɩrɩmɛ kʋzɔmɔ nɛ mɩ teeŋ.”
39Ŋɩɩ nɛ Wɩɩsʋllɩ sɩpaalaara Elieza mʋ a paa ba sɩ kɛŋ kɔlɩɩŋ libi kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ a kaa libi pɩrataba dɩ ʋ kaa tɔ koru-la, 40arɩ La TƖƖNA sɩ to Mosis lɛ a dagʋ ŋɩɩ. Wɩɩŋ deeŋ jaŋ liliisi Iziral tɩŋŋaa kala, dɩ Arɔŋ doho nʋʋ dee bɩ kʋsʋɔrʋsʋŋ nyɩga mʋ La TƖƖNA sɩpaaŋ, ka dɩ nʋʋ dɔŋ ŋaa ŋɩɩ, ʋ jaŋ joŋ wɩalɩŋ tɩtɩa ʋ sɩ joŋo ŋaa Kora arɩ ʋ harɩ-tooroo lɛ a ŋaa tɩɩna lɛ.
41Taŋ sɩ pʋla, Iziral tɩŋŋaa kala gʋgʋrɩmɛ wɩaa Mosis arɩ Arɔŋ teeŋ a bʋl, “Ma kpʋ La TƖƖNA nɩaa nɛ.”
42Nɩalɩŋ sɩ bɩ Mosis arɩ Arɔŋ sɛyɛ sɩ mɩɩra chaasa lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, ba na dɩ duoŋ-bɩlɩmbaanɩŋ guu kʋ tɔ lɛbɩ-la kala, ka La TƖƖNA tʋla chaanɛ. 43Ŋɩɩ nɛ Mosis arɩ Arɔŋ mʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ sɩpaaŋ. 44La TƖƖNA bʋla pɩ Mosis, 45“Má sʋrɩsa lɩɩ nɩalɩŋ tʋɔŋ, ka dɩ mɩ kpʋ ba kala lɛɛlɛ.” Ŋɩɩ nɛ ba tuu tele chu tinteeŋ.
46Ŋɩɩ nɛ Mosis bʋla pɩ Arɔŋ, “Mʋ joŋ ŋ kʋ-la lɛ ŋ sɩ yie hɛ nyiniŋ aa nyɩgɛ kʋsʋɔrʋsʋŋ, a chaanɛ nyiŋ-halaa koru-la lɛ a hɛ, a hɛ kʋsʋɔrʋsʋŋ a ŋaa lɩma mʋ nɩalɩŋ kala teeŋ a pɩɩsɛ ba wʋbɔŋŋɔɔ ta. La Tɩɩna chaasa na baanɩŋ nɛ nɩalɩŋ nyuŋ, a joŋ nyanyal bɔmʋŋ hɛ ba lɛ, ʋ suomo kpʋkpʋba.” 47Ŋɩɩ nɛ Arɔŋ ŋaa ŋɩɩ Mosis sɩ daga, a fá mʋ jʋʋ nɩalɩŋ tʋɔŋ. Ʋ mʋa ŋɩɩ dɩ nyanyal bɔŋ-la suomo kpʋkpʋba. Ŋɩɩ nɛ Arɔŋ joŋ kʋsʋɔrʋsʋ-la a sʋl Wɩɩsʋlʋŋ a pɩɩsɛ ba wʋbɔŋŋɔɔ ta. 48Arɔŋ fa chɩŋ nɩsʋʋnʋŋ arɩ nɩweyee pɛgɛ nɛ aŋ giri nyanyal bɔŋ-la. 49Nyanyal bɔŋ-la kpʋ nɩaa bʋɩ fii arɩ banɛsɛ arɩ zɔɔ-balɩpɛ nɛ, a pɛ Kora arɩ ʋ harɩ-tooro-la sɩ bɩ La TƖƖNA niiŋ sɛyɛ lɛ. 50Nyanyal bɔŋ-la sɩ kʋ dɛrɛ, Arɔŋ mɩɩra mʋ Mosis teeŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.
Currently Selected:
NAMBABA 16: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
