NAMBABA 12

Mɩrɩam arɩ Arɔŋ lɩɩ Mosis harɩŋ

1Mosis fa jaa Kus tɩŋŋaa tolo nɛ, ŋɩɩ nɛ Mɩrɩam arɩ Arɔŋ lɩɩ Mosis harɩŋ a gʋrɩmɛ wɩaa. 2Ba sɩ, “Mosis bɩɩna La TƖƖNA to ʋ dʋndʋŋa lɛ nɛ aa bʋl wɩaa? Ʋ bɩ la-na lɛ to aa bʋl?” Ŋɩɩ nɛ La TƖƖNA nɩɩ wɩɩ-la ba sɩ bʋla.

3(Mosis sɩaa fa fɩɛla nɛ woruŋ, ʋ sɩaa nɛ fa fɩɛla a kɩɩ nʋʋkala dʋnɩa lɛ.)

4La TƖƖNA guu bʋla pɩ Mosis, Arɔŋ arɩ Mɩrɩam, “Má kala batori kɔ lɛbɩ-la lɛ mɩ sɩ yie kɔ Iziral tɩŋŋaa teeŋ.” Ŋɩɩ nɛ ba mʋ. 5La TƖƖNA to duoŋ-bɩlɩmbaanɩŋ sɩ nagɛ jebiiŋ lɛ, a kʋ tuu chɩŋ lɛbɩ-la boiŋ niiŋ, aŋ yɩrɛ Arɔŋ arɩ Mɩrɩam. Ba sɩ mʋa, 6ʋ bʋl, “Má jegile nɩɩ wɩalɩŋ mɩ sɩɩ chɛ mɩ bʋl.

Dɩ nʋʋ nɛ hɛ ma tʋɔŋ a ŋaa mɩ wʋlaabʋllʋ,

mɩ yie kɛŋ mɩ tɩtɩa dagʋ a nagɛ duosoo tʋɔŋ nɛ,

aŋ bʋl wɩaa pʋ duoso lɛ.

7Ama ŋɩɩ dee mɩ yie bʋl wɩaa mɩ tɩntɩnna Mosis teeŋ.

Mɩ laaʋ dii nɛ a joŋ mɩ nɩaa kala hɛ ʋ nɩsɩŋ lɛ.

8Mɩ dɩ ʋ-na yie chɩna chaasɛ dɔŋɔ nɛ aŋ bʋbʋl wɩaa,

mɩ yie ta wɩaa yɛrɛ nɛ a pʋ.

Mɩ bɩ namagaba ka magɛ ʋ teeŋ.

Ʋ yie na ŋɩɩ mɩ sɩ naga nɛ.

Bɛɛ nɛ saa tɩɩ ma bɩ fawʋllʋŋ fá,

aŋ lɩɩ mɩ tɩntɩnna Mosis harɩŋ a gʋrɩmɛ wɩaa ʋ teeŋ?”

9La TƖƖNA na baanɩŋ woruŋ ba nyuŋ aŋ viiri.

10Ʋ sɩ mʋa ŋɩɩ, duoŋ-bɩlɩmbaaŋ-la sɩ chɩŋ lɛbɩ-la nyuŋ ma sii. Ŋɩɩ nɛ Mɩrɩam yaraa kala guu pʋllɛ a nagɛ dayalɩma. Arɔŋ mɩɩra beŋ Mɩrɩam dɩ ʋ yalɩba. 11Ʋ bʋla pɩ Mosis, “Mɩ kʋhɩaŋ, mɩɩ sʋlʋŋ, sɩ́ la dɔgʋsʋ a tɩŋ la sɩ ŋaa nɩyaarɛ wɩɩ-la sɩ ŋaa wʋbɔŋ. 12Sɩ́ leŋe dɩ Mɩrɩam yaraa nagɛ haala sɩɩ lʋl bie dɩ ʋ sʋba, ʋ yaraa kpaa magɛ dɔŋɔ dii dɛrɛ.”

13Ŋɩɩ nɛ Mosis bunso pɩ La TƖƖNA a bʋl, “Ou, mɩ Tɩɩna Wɩa, mɩɩ sʋlʋŋ vaarɛ Mɩrɩam.”

14Ŋɩɩ nɛ La TƖƖNA bʋla pɩ Mosis, “Dɩ Mɩrɩam nyɩmma nɛ tʋ nantʋɔrʋŋ hɛ ʋ sɩaa lɛ, hɩɩsɩŋ maga dɩ ʋ diiu nɛ tapʋlaa balɩpɛ. Lɩɩsʋ ta ma dɩhɔnʋŋ tapʋlaa balɩpɛ, ka dɩ ʋ-na mɩɩra kʋ jʋʋ.” 15Ŋɩɩ nɛ ba lɩɩsɛ Mɩrɩam ta ba dɩhɔnʋŋ lɛ tapʋlaa balɩpɛ. Iziral tɩŋŋaa bɩ lee-kala sii mʋ ka tapʋlɩa-la yi, ʋ bɩra mɩɩra kʋ jʋʋ.

16Ʋ ŋɩɩ harɩŋ nɛ ba sii Hazɛrɔf lɛ a mʋ ŋmoo buguŋ Paraŋ tintee-hɩlɩŋ lɛ.

Currently Selected:

NAMBABA 12: SIS

Highlight

Copy

Compare