LEVI DOHO NƖAA 6

1La TƖƖNA bɩra bʋla pɩ Mosis, 2“Dɩ nʋʋ nɛ ŋaa wʋbɔŋ a bɩ wʋtɩtɩɩ kɛnɛ mɩ-na ma TƖƖNA teeŋ, a nyɩɛ wɩaa lɩlaa nɩaa kɩaa ba sɩ joŋo pʋ dɩ ʋ bibeŋ, aa gaa nɩaa kɩaa, aa gʋrɛ nɩaa, 3koo dɩ nʋʋ kʋŋ ma nɛ lɛlɛ dɩ ʋ naʋ a joŋ a nyɩɛ wɩaa arɩ ʋ bɩ ʋ na koo a ŋmɩɛsɛ arɩ ʋ bɩ ʋ wɩaa jɩŋ, 4dɩ nʋʋ nɩɩ ŋaa wɩaa deemba aŋ kʋ jɩŋ arɩ ba ŋaa wʋbɔmɔ nɛ, ʋ maga dɩ ʋ mɩɩra tiŋ kɩalɩŋ ʋ sɩ gaa koo kɩalɩŋ ʋ sɩ nyɩɛ wɩaa laa koo kɩalɩŋ ʋ sɩ gɩrɩma laa koo kɩalɩŋ sɩ lɛlɛ ʋ joŋ aŋ vɔŋ, 5koo wɩalɩŋ kala lɛ ʋ sɩ nyɩɛ wɩaa, aŋ ha time daŋ a magɛ ŋɩɩ tʋŋ bʋnɔŋ. Ʋ jaŋ joŋ kɩalɩŋ pɩ ba tɩŋŋaa tapʋlɩɩ-la ʋ sɩ kɛŋ ʋ cheeriŋ Wɩɩsʋlʋŋ kɩaa kʋkɔ mɩ-na ma TƖƖNA sɩpaaŋ. 6Ʋ jaŋ lɩɩsɛ pie-bele sɩ bɩ nyɔɔ kala kɛnɛ, dɩ ʋ yalɩŋ magɛ ŋɩɩ ba sɩ daga Wɩa dɩa lɛ a tiŋ cheeriŋ Wɩɩsʋlʋŋ chɩmɩŋ a kaa kʋ pɩ Wɩɩsʋllɩ sɩpaalaara dɩ ʋ laa sʋl cheeriŋ Wɩɩsʋlʋŋ. 7Wɩɩsʋllɩ sɩpaalaara jaŋ pɩɩsɛ ʋ disiniŋ ta mɩ-na ma TƖƖNA sɩpaaŋ dɩ mɩ joŋ wɩɩ-la ʋ sɩ cheye chɛʋ.”

Kʋnyɩgaa Wɩɩsʋlʋŋ

8Ŋɩɩ nɛ La TƖƖNA bɩra bʋla pɩ Mosis: 9“Bʋl wɩaa deemba pɩ Arɔŋ arɩ ʋ hambolibiisiŋ: ‘Wombiee deemba nɛ ba jaŋ to a ŋɩŋaa kʋnyɩgaa Wɩɩsʋlʋŋ. Kɩalɩŋ ba sɩ jaŋ nyɩga sʋl Wɩa jaŋ daŋ Wɩɩsʋlʋŋ koru-la nyuŋ tɩtaŋɩŋ a kaa mʋ chʋchʋɔŋ. Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii tɩtaŋɩŋ kala dɩ taŋ pʋl. 10Wɩɩsʋllɩ sɩpaalaara maga dɩ ʋ joŋ gɛrɩpɛ fʋfʋlʋŋ kpuŋkpel-kuuŋ a vɔɔ a joŋ gɛrɩpɛ fʋfʋlʋŋ gɛrɩ-duduoŋ a laala daŋ, aŋ paa kʋnyɩgɩa-la tʋɔrʋŋ a bil Wɩɩsʋlʋŋ koru-la sɛmɛ. 11Ʋ jaŋ wuri gɛrɩ-zɔmɔ-la bil aŋ paa gɛnnɩŋ dɔnsʋŋ laalɛ a paa tʋɔrʋ-la a kaa lɩɩ ba dɩhɔnʋŋ lɛ lee-la sɩ bɩ disiniŋ kɛnɛ. 12Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii a sɩ́ dɩsʋ. Chʋchʋɔ na-kala Wɩɩsʋllɩ sɩpaalaara maga dɩ ʋ hɛ daasɩŋ nɛ nyiŋ-la lɛ, a paa Wɩɩsʋlʋŋ kʋnyɩgaa arɩ nii-magɛ dɔŋɔ Wɩɩsʋlʋŋ pʋna nʋʋŋ daŋ a nyɩga pɩmɛ. 13Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii bʋa na-kala, ʋ bɩ maga dɩ ʋ dɩsɛ.

Mɩaa Wɩɩsʋlʋŋ

14Wombiee deemba nɛ ma jaŋ to a ŋɩŋaa mɩaa Wɩɩsʋlʋŋ. Arɔŋ hambolibiisi-la sɩ ŋaa Wɩɩsʋllɩ sɩpaalaaraa nɛ jaŋ kɛŋ mɩaa Wɩɩsʋlʋŋ kʋkɔ mɩ-na ma TƖƖNA sɩpaaŋ Wɩɩsʋlʋŋ koru-la teeŋ. 15Wɩɩsʋllɩ sɩpaalaara jaŋ ŋaa muŋ-zɔŋ-la arɩ nʋʋ-la arɩ kʋsʋɔrʋsʋ-la kala nɩsɩŋ sɩɩŋ mɩ-na ma TƖƖNA dɩ-diiliŋ a nyɩgɛ Wɩɩsʋlʋŋ koru-la nyuŋ. Ba sʋɔra sɩma nɛ a pɩ mɩ-na ma TƖƖNA. 16Kɩalɩŋ sɩ ka, Arɔŋ arɩ ʋ hambolibiisiŋ nɛ maga dɩ ba diiba mɩ dɩ zɔŋ-la kaala tʋɔŋ lɛbɩ-la lɛ mɩ sɩ yie kɔ Iziral tɩŋŋaa teeŋ, ʋ bɩ maga dɩ ba hɛ sɩbʋrʋŋ aŋ diiba. 17Dɩ ba nɛ joŋo wasɛ, ʋ bɩ maga dɩ ba hɛ sɩbʋrʋŋ, ba toruŋ nɛ ŋɩɩ mɩ sɩ joŋo pɩba a lɩɩ Wɩɩsʋllɩ kɩalɩŋ ba sɩ nyɩga pɩmɛ tʋɔŋ. Ba ŋaa kɩa sɩ chaasa zɔŋ nɛ, arɩ wʋbɔŋŋɔɔ joŋo chɛnɩŋ Wɩɩsʋlʋŋ arɩ cheeriŋ Wɩɩsʋlʋŋ kɩaa sɩ ŋaa kʋzɔmɔ ŋɩɩ. 18Arɔŋ doho nʋʋ na-kala sɩ ŋaa baal jaŋ wuo dii kɩaa deemba, ba kpaalɩŋ nɛ ŋɩɩ ba sɩ jaŋ vɛnɛɛ dii. Dɩ ba nɛ kɛŋ mɩaa kɔ dɩ ba ŋaa Wɩɩsʋlʋŋ a nyɩga pɩ mɩ-na ma TƖƖNA, kʋŋ na-kala sɩ digi kɩaa deemba bɩra bɩ jaŋ kɛŋ disiniŋ.’ ”

19Ŋɩɩ nɛ La TƖƖNA bɩra bʋla pɩ Mosis, 20“Wɩɩsʋllɩ kɩaa deemba nɛ Arɔŋ arɩ ʋ hambolibiisiŋ jaŋ kaa kʋ pɩ mɩ-na ma TƖƖNA tapʋlɩɩ-la ba sɩ jaŋ joŋ Wɩɩsʋllɩ nʋʋŋ tɩsɛba dɩ ba ŋaa Wɩɩsʋllɩ sɩpaalaaraa. Muŋ-zɔmʋŋ gbaŋa kpaa magɛ dɔŋɔ nɛ ba jaŋ vɛnɛ kaa sʋl mɩ-na ma TƖƖNA bʋa na-kala. Ba jaŋ kɛŋ kpaa magɛ dɔŋɔ kpaa bʋlɩa, a joŋ dɔŋɔ sʋl chʋchʋɔŋ a joŋ dɔŋɔ ma sʋl dɩdaanɩŋ. 21Ba jaŋ buu muŋ-la arɩ nʋʋŋ a hal nʋʋ-hala lɛ a kaa yɔrɩsɛ a kaa kʋ ŋaa mɩaa Wɩɩsʋlʋŋ a nyɩga pɩmɛ. Ba sʋɔra sɩma nɛ a pɩ mɩ-na ma TƖƖNA. 22Arɔŋ hambolibiisi-la tʋɔŋ, nɩɩ-la sɩ jaŋ laa ʋ nyuŋ a ŋaa Wɩɩsʋllɩ sɩpaalaarɩ-hɩaŋ nɛ maga dɩ ʋ kɛŋ kɩalɩŋ kɔ mɩ-na ma TƖƖNA sɩpaaŋ a sʋl Wɩɩsʋlɩɩ-la. Wɩɩŋ deeŋ maga dɩ ʋ chɩŋ nɛ bʋa na-kala. Wɩɩsʋlʋŋ kɩaa deemba kala maga dɩ ba nyɩgɛ nɛ a pɩmɛ. 23Dɩ Wɩɩsʋllɩ sɩpaalaara tɩtɩa nɛ ŋaa mɩaa Wɩɩsʋlɩɩ na-kala, ʋ maga dɩ ba nyɩgɛ ba kala nɛ, nʋʋkala bɩ maga dɩ ʋ diiba.”

Wʋbɔŋŋɔɔ joŋo chɛnɩŋ Wɩɩsʋlʋŋ

24Ŋɩɩ nɛ La TƖƖNA bɩra bʋla pɩ Mosis, 25“Bʋla pɩ Arɔŋ arɩ ʋ hambolibiisiŋ: ‘Wombiee deemba nɛ ba jaŋ to a ŋɩŋaa wʋbɔŋŋɔɔ joŋo chɛnɩŋ Wɩɩsʋlʋŋ. Wʋbɔŋŋɔɔ joŋo chɛnɩŋ Wɩɩsʋlʋŋ pʋna maga dɩ ba kpʋ mɩ-na ma TƖƖNA sɩpaaŋ wɩɩpɔsʋŋ nagʋa lee-la ba sɩ kpʋ kʋnyɩgaa Wɩɩsʋlʋŋ pʋna, ʋ ŋaa kʋzɔŋ nɛ woruŋ a pɩ mɩ-na ma TƖƖNA. 26Wɩɩsʋllɩ sɩpaalaara sɩ ŋaa wʋbɔŋŋɔɔ Wɩɩsʋlʋŋ deeŋ maga dɩ ʋ dii ʋ toruŋ nɛ dɩ-zɔŋ, lɛbɩ-la lɛ mɩ sɩ yie kɔ Iziral tɩŋŋaa teeŋ kaala tʋɔŋ. 27Dɩ kʋŋ na-kala nɛ digi nammɩa-la ʋ bɩra bɩ jaŋ kɛŋ disiniŋ. Dɩ ʋ chalɩŋ nɛ taa gɛrɩŋ, ʋ maga dɩ ba chɛsʋ lee-la sɩ bɩ disiniŋ kɛnɛ. 28Dɩ chʋrʋŋ nɛ ba kaa mɛ pupoi-la lɛ ba sɩ chɔ nammɩa-la, ʋ maga dɩ ba ŋmoo yɛrɛ. Dɩ ʋ nɛ ŋaa kɔlɩɩŋ pupoiŋ, ʋ maga dɩ ba wʋrʋgʋ arɩ tintiisiŋ aŋ kɛŋ lɩɩŋ yegili. 29Baal na-kala sɩ hɛ Wɩɩsʋllɩ sɩpaalaaraa doho nɩaa tʋɔŋ jaŋ wuo chaŋ nammɩa-la, bɛɛ wɩaa ʋ ŋaa kʋŋ sɩ chaasa zɔŋ nɛ. 30Ama wʋbɔŋŋɔɔ joŋo chɛnɩŋ Wɩɩsʋlʋŋ pʋna na-kala chalɩŋ ba sɩ jaŋ kaa kʋ jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ dɩ ba pɩɩsɛ nʋʋ wʋbɔmʋŋ ta, nammɩa bɩ maga dɩ ba chaŋ. Ʋ maga dɩ ba nyɩgɛ ʋ kala.

Currently Selected:

LEVI DOHO NƖAA 6: SIS

Highlight

Copy

Compare