LEVI DOHO NƖAA 7
7
Cheeriŋ Wɩɩsʋlʋŋ
1Wombiee deemba nɛ ma jaŋ to aa sʋl cheeriŋ Wɩɩsʋlʋŋ, ʋ ŋaa kʋŋ zɔmʋŋ sɩ bɩ magɩa kɛnɛ nɛ mɩ teeŋ: 2Cheeriŋ Wɩɩsʋlʋŋ pʋna maga dɩ ba kpʋʋ Wɩɩsʋlʋŋ koru-la wɩɩpɔsʋŋ nadiiŋ, lee-la ba sɩ yie kpʋ kʋnyɩgaa Wɩɩsʋlʋŋ pʋna, a joŋ ʋ chalɩŋ a mɩsɛ Wɩɩsʋlʋŋ koru-la sɛsɩŋ kala. 3Ʋ maga dɩ ba kʋɔrɛ nʋʋ-la sɩ tɔ pʋna-la tʋɔŋ kɩaa nɛ, a lɩɩsɛ dokeliŋ, 4a chaarɛ chʋchɔ-biee arɩ nʋʋ-la sɩ tɔba arɩ chʋɩŋ. 5Wɩɩsʋllɩ sɩpaalaara jaŋ jomba a nyɩgɛ Wɩɩsʋlʋŋ koru-la nyuŋ a sʋl Wɩɩsʋlʋŋ pɩ mɩ-na ma TƖƖNA, ʋ ŋaa cheeriŋ Wɩɩsʋlʋŋ nɛ. 6Wɩɩsʋllɩ sɩpaalaara doho nʋʋ na-kala sɩ ŋaa baal jaŋ wuo diiba. Ʋ maga dɩ ba diiba lee sɩ bɩ disiniŋ kɛnɛ, ba ŋaa kɩa zɔmʋŋ sɩ bɩ magɩa kɛnɛ nɛ.
7Cheeriŋ Wɩɩsʋlʋŋ arɩ wʋbɔŋŋɔɔ joŋo chɛnɩŋ Wɩɩsʋlʋŋ wombiiŋ ŋaa kʋbala nɛ. Wɩɩsʋllɩ sɩpaalaara nɛ tɩɩ pʋna-la ʋ sɩ kaa pɩɩsɛ nɩaa disiniŋ ta nammɩɩ-kaanɩŋ. 8Dɩ Wɩɩsʋllɩ sɩpaalaara nɛ kɛŋ nʋʋkala kʋnyɩgaa Wɩɩsʋlʋŋ kɔ mɩ teeŋ, Wɩɩsʋllɩ sɩpaalaara nɛ maga dɩ ʋ tɩɩ kʋnyɩgaa Wɩɩsʋlʋŋ pʋna-la teniŋ. 9Mɩaa Wɩɩsʋlɩɩ na-kala lɛ, dɩ ba joŋo wasɛ nɛ koo dɩ ba joŋo chɔ pupoiŋ lɛ koo dɩ ba joŋo hal nʋʋ-hala lɛ nɛ, Wɩɩsʋllɩ sɩpaalaara nɛ jaŋ tɩɩba. 10Mɩaa Wɩɩsʋlɩɩ na-kala lɛ, dɩ ba joŋ nʋʋŋ nɛ hɛ koo dɩ kʋnyʋʋnʋ nɛ, Arɔŋ arɩ ʋ hambolibiisiŋ nɛ jaŋ tɩɩba dɩ ba kaa kpaa a magɛ dɔŋɔ.
Nii-magɛ dɔŋɔ Wɩɩsʋlʋŋ
11Wombiee deemba nɛ ba jaŋ to aa sʋl nii-magɛ dɔŋɔ Wɩɩsʋlʋŋ aa pɩ mɩ-na ma TƖƖNA.
12Dɩ nʋʋ nɩɩ chɛ ʋ sʋl nii-magɛ dɔŋɔ Wɩɩsʋlʋŋ a lɔllɛ La TƖƖNA, ʋ jaŋ kɛŋ pʋna-la ʋ sɩ jaŋ kaa sʋl nii-magɛ dɔŋɔ Wɩɩsʋlʋŋ arɩ boroboro sɩ bɩ sɩbʋrʋŋ kɛnɛ a hɛ nʋʋŋ a wasɛ arɩ munuŋ sɩ bɩɩ nʋgʋgʋ ba sɩ bɩ sɩbʋrʋŋ hɛ, a wasɛ boroboro pɛrɛ pɛrɛ biisiŋ a ŋaa nʋʋŋ taa, arɩ munuŋ sɩ bɩɩ nʋgʋgʋ ba sɩ hɛ nʋʋŋ a hal. 13Nii-magɛ dɔŋɔ Wɩɩsʋlɩɩ-la ʋ sɩ kaa kɔ dɩ ʋ lɔllɛmɛ, ʋ jaŋ pɛ kɛŋ boroboro sɩ kɛŋ sɩbʋrʋŋ kɔ. 14Ʋ jaŋ lɩɩsɛ boroboroba-la kala kʋŋkʋŋ a hɛ dɔŋɔ a ŋaa Wɩɩsʋlʋŋ pɩ mɩ-na ma TƖƖNA. Wɩɩsʋllɩ sɩpaalaarʋ-la sɩ joŋ nii-magɛ dɔŋɔ Wɩɩsʋlʋŋ pʋna-la chalɩŋ mɩsɛ Wɩɩsʋlʋŋ koru-la nɛ tɩɩ kɩalɩŋ. 15Nii-magɛ dɔŋɔ Wɩɩsʋlʋŋ pʋna-la nammɩa maga dɩ ʋ chaŋʋ tapʋlɩɩ-la tɩtɩa ʋ sɩ sʋl Wɩɩsʋlɩɩ-la nɛ, ʋ bɩ maga dɩ ʋ chɩna chʋa.
16Dɩ ʋ Wɩɩsʋlʋŋ ŋaa niiŋ nɛ ʋ kʋ lɩɩsɛ, koo dɩ tʋɔtɔrɛ Wɩɩsʋlɩɩ nɛ, Wɩɩsʋlʋŋ kʋ-la nammɩa maga dɩ ʋ chaŋʋ tapʋlɩɩ-la ʋ sɩ sʋl Wɩɩsʋlɩɩ-la nɛ. Ama dɩ kʋŋ nɛ ka dɩ taŋ pʋl, ʋ ha jaŋ wuo chaŋ. 17Dɩ ʋ Wɩɩsʋlʋŋ kʋ-la nammɩa nɛ chʋa yi tapʋlaa batori, ʋ maga ʋ joŋo nyɩga ta. 18Dɩ ʋ nɛ chaŋ nii-magɛ dɔŋɔ Wɩɩsʋlʋŋ pʋna-la nammɩa tapʋl-tori chɛɛŋ, Wɩa bɩ sɛɩ, ʋ bɩ nɩɩ-la Wɩɩsʋlɩɩ-la ka laa, ʋ bɩ Wɩɩ-sʋl-zɔŋ ŋaa, ʋ kɛŋ disiniŋ nɛ. Nɩɩ-la sɩ chaŋ nammɩa-la jaŋ na hɛɛŋ ŋɩɩ bʋbʋɔŋ lɛ.
19Dɩ nammɩa-la nɛ digi kʋŋ na-kala sɩ kɛŋ disiniŋ, ʋ bɩ maga dɩ ma chaŋʋ, má joŋo nyɩga ta. Ama nammɩɩsɩŋ dɔnsʋŋ-na, nɩalɩŋ sɩ bɩ disiniŋ kɛnɛ jaŋ wuo chaŋ. 20Dɩ nɩɩ-la sɩ kɛŋ disiniŋ nɛ chaŋ nii-magɛ dɔŋɔ Wɩɩsʋlʋŋ nammɩa-la sɩ ŋaa mɩ-na ma TƖƖNA kʋa, ʋ maga dɩ má lɩɩsʋ ta ʋ nɩaa tʋɔŋ. 21Dɩ nʋʋ nɛ digi kʋŋ sɩ lɩɩ nuhuobiine lɛ a kɛŋ disiniŋ, koo dɩ ʋ digi pʋna koo baga kʋŋ sɩ kɛŋ disiniŋ koo kʋŋ na-kala sɩ kɛŋ disiniŋ, aŋ chaŋ nii-magɛ dɔŋɔ Wɩɩsʋlʋŋ pʋna nammɩa sɩ ŋaa mɩ-na ma TƖƖNA kʋa, ʋ maga dɩ ba lɩɩsʋ ta ʋ nɩaa tʋɔŋ.’ ”
Pʋsʋŋ nʋʋŋ arɩ chalɩŋ diiniŋ ka kɩsɛ nɛ
22Ŋɩɩ nɛ La TƖƖNA bʋla pɩ Mosis, 23“Bʋla pɩ Iziral-tɩŋŋaa: ‘Má sɩ́ nɛŋ koo piese koo bʋʋna nʋʋŋ dii. 24Dɩ pʋna nɛ sʋba koo dɩ baga kʋŋ nɛ kɛŋ pʋna pʋɔsa ta dɩ ma naʋ, ma jaŋ wuo lɩɩsɛ ʋ nʋʋŋ a kaa ŋaa wɩaa dɔnsʋŋ, ama ʋ bɩ maga dɩ ma diiu. 25Dɩ nʋʋkala nɛ dii pʋna-la ba sɩ nyɩga pɩ mɩ-na ma TƖƖNA nʋʋŋ, ʋ maga dɩ má lɩɩsʋ ta nɛ ʋ nɩaa tʋɔŋ. 26Lee na-kala ma sɩ hɛ, má pʋpɔ ma sɩ́ pʋna koo kɩŋkɛnsɩŋ tɩŋŋaa chalɩŋ dii. 27Dɩ nʋʋkala nɛ dii chalɩŋ, ʋ maga dɩ má lɩɩsʋ ta ʋ nɩaa tʋɔŋ.’ ”
Wɩɩsʋllɩ sɩpaalaaraa kpaalɩŋ
28La TƖƖNA bɩra bʋla pɩ Mosis, 29“Bʋla pɩ Iziral tɩŋŋaa: ‘Dɩ nʋʋ nɛ kɛŋ nii-magɛ dɔŋɔ Wɩɩsʋlʋŋ kʋkɔ dɩ ʋ pɩ mɩ-na ma TƖƖNA, ʋ maga dɩ ʋ lɩɩsɛ lere-la sɩ ŋaa mɩ-na ma TƖƖNA kɩaa nɛ kʋ pʋ. 30Ʋ tɩtɩa nɛ maga dɩ ʋ kori kɩalɩŋ ba sɩ jaŋ nyɩga pɩ mɩ-na ma TƖƖNA, ʋ jaŋ kɛŋ pʋna-la nʋʋŋ arɩ pʋna-la vaaŋ, a kɛŋ vaa-la je aa zaarɛ mɩ sɩpaaŋ. Ŋɩɩ ŋaa ʋ tɩtɩa Wɩɩsʋlɩɩ nɛ ʋ kaa je mɩ-na ma TƖƖNA sɩpaaŋ. 31Wɩɩsʋllɩ sɩpaalaara jaŋ joŋ nʋʋ-la a nyɩgɛ Wɩɩsʋlʋŋ koru-la nyuŋ, ka dɩ Arɔŋ arɩ ʋ hambolibiisiŋ joŋ vaa-la. 32Ma nii-magɛ dɔŋɔ Wɩɩsʋlʋŋ pʋna na-kala, má joŋ nadiiŋ huiŋ a pɩ Wɩɩsʋllɩ sɩpaalaara, ʋ toruŋ nɛ ŋɩɩ. 33Arɔŋ hambolibiisiŋ tʋɔŋ, nɩɩ-la sɩ joŋ nii-magɛ dɔŋɔ Wɩɩsʋlʋŋ pʋna-la chalɩŋ arɩ ʋ nʋʋŋ sʋl Wɩa nɛ jaŋ joŋ pʋna-la nadiiŋ huiŋ, ʋ toruŋ nɛ ŋɩɩ. 34Iziral tɩŋŋaa nii-magɛ dɔŋɔ Wɩɩsʋlʋŋ lɛ, mɩ joŋ vaa-la ba sɩ kaa je a zaarɛ La TƖƖNA sɩpaaŋ arɩ hui-la ba sɩ kaa kɔ mɩ sɩpaaŋ a pɩ Arɔŋ, Wɩɩsʋllɩ sɩpaalaara arɩ ʋ hambolibiisiŋ dɩ ba nɛ ŋaa ba toruŋ Iziral tɩŋŋaa tʋɔŋ a kaa mʋ wuu.’ ”
35A chɩŋ tapʋlɩɩ-la lɛ ba sɩ joŋ Wɩɩsʋllɩ nʋʋŋ tɩsɛ Arɔŋ arɩ ʋ hambolibiisiŋ dɩ ba ŋaa Wɩɩsʋllɩ sɩpaalaaraa, kʋnyɩgaa Wɩɩsʋlʋŋ kala lɛ ba toruŋ nɛ ŋɩɩ. 36Tapʋlɩɩ-la nɛ La TƖƖNA bʋla pɩ Iziral tɩŋŋaa arɩ ba toruŋ nɛ ŋɩɩ ba sɩ jaŋ didii a kaa mʋ wuu.
37Wombiee deemba nɛ ba jaŋ to a ŋɩŋaa kʋnyɩgaa Wɩɩsʋlʋŋ, mɩaa Wɩɩsʋlʋŋ, wʋbɔŋŋɔɔ joŋo chɛnɩŋ Wɩɩsʋlʋŋ, cheeriŋ Wɩɩsʋlʋŋ arɩ Wɩɩsʋlɩɩ-la ba sɩ yie ŋaa a lɩɩsɛ Wɩɩsʋllɩ sɩpaalaaraa arɩ nii-magɛ dɔŋɔ Wɩɩsʋlʋŋ. 38Ba nɛ La TƖƖNA dagɛ Mosis ŋɩɩ peel-la ba sɩɩ yɩrɛ Sɩnaɩ nyuŋ tintee-hɩlɩɩ-la lɛ, tapʋlɩɩ-la ʋ sɩ bʋla pɩ Iziral tɩŋŋaa dɩ ba kɛŋ Wɩɩsʋlʋŋ kɩaa kʋ pʋ.
Currently Selected:
LEVI DOHO NƖAA 7: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
