LEVI DOHO NƖAA 5

1Dɩ nʋʋ nɛ nɩɩ wɩɩ koo ʋ na wɩɩ nɛ aŋ ka ba kɛŋ wɩɩ-la mʋ sarɩya dɩ-diiliŋ, ka ʋ vɩa dɩ ʋ bʋl wʋtɩtɩɩ, ʋ ŋaa wʋbɔŋ nɛ. Wɩɩ-la bʋbʋɔŋ lɛ ʋ jaŋ na hɛɛŋ.

2Dɩ nʋʋ nɛ bɩ sɛnɛ aŋ digi kʋŋ na-kala sɩ kɛŋ disiniŋ, pʋŋ-sʋʋŋ koo baga kʋŋ koo kɩalɩŋ sɩɩ tuuri tinteeŋ, arɩ ʋ sɩ bɩ jɩŋ ma kala, ʋ tɩɩna ŋaa disiniŋ hɛ ʋ tɩtɩa lɛ nɛ, ʋ laa cheeriŋ nɛ. 3Koo dɩ ʋ nɛ digi nuhuobiine kʋŋkala sɩ kɛŋ disiniŋ aŋ bɩ jɩŋ, dɩ ʋ nɛ kʋ jɩŋ, ʋ laa cheeriŋ nɛ.

4Dɩ nʋʋ nɛ bɩ wɩaa bɩɩna woruŋ aŋ hɛ niiŋ arɩ ʋ jaŋ ŋaa wɩɩ, dɩ wɩɩ-la ŋaa wʋzɔŋ koo wʋbɔŋ koo dɩ ʋ bɩ wɩaa woruŋ bɩɩna aŋ ŋmɩɛsɛ, aŋ bɩ jɩŋ, dɩ ʋ nɛ kʋ jɩŋ arɩ ʋ fa bɩ maga dɩ ʋ ŋaa ŋɩɩ, ʋ ha laa cheeriŋ nɛ ba kʋŋkala lɛ.

5Dɩ nʋʋ nɛ ŋaa wɩaa deemba kʋŋkala chei, ʋ maga dɩ ʋ sɛɩ nɛ aŋ suri ʋ niiŋ a bʋl wɩɩ-la ʋ sɩ ŋaa chei dɩ nɩaa nɩɩ. 6A tɩŋ ʋ sɩ ŋaa wɩɩ-la chei, ʋ maga dɩ ʋ lɩɩsɛ pie-nɩɩŋ koo bʋ-nɩɩŋ a kaa kʋ ŋaa wʋbɔŋŋɔɔ Wɩɩsʋlʋŋ pɩ mɩ-na ma TƖƖNA, dɩ Wɩɩsʋllɩ sɩpaalaara pɩɩsɛ ʋ wʋbɔmʋŋ ta.

7Dɩ tɩɩna nɛ bɩ piese koo bʋʋna lɛ wuo yi, ʋ jaŋ wuo kɛŋ kokosuŋ balɩa kʋ sʋl cheeriŋ Wɩɩsʋlʋŋ pɩ mɩ-na ma TƖƖNA, a tɩŋ ʋ wʋbɔŋ-la ʋ sɩ ŋaa wɩaa. Kokomo-la dɔŋɔ jaŋ ŋaa wʋbɔŋŋɔɔ Wɩɩsʋlʋŋ kʋa, dɩ dɔŋɔ ma ŋaa kʋnyɩgaa Wɩɩsʋlʋŋ kʋa. 8Ʋ jaŋ kɛmba kaa mʋ Wɩɩsʋllɩ sɩpaalaara teeŋ, dɩ ʋ laa sɩpaaŋ joŋ dɔŋɔ sʋl wʋbɔŋŋɔɔ joŋo chɛnɩŋ Wɩɩsʋlʋŋ aŋ mɩlɩmɛ baŋŋaa bori aŋ sɩ́ leŋe dɩ nyuŋ cholli, 9aŋ kɛŋ ʋ chalɩŋ dɔnsʋŋ mɩsɛ Wɩɩsʋlʋŋ koru-la sɛsɩŋ kala, aŋ kɛŋ chal-la kʋkaanɩŋ chuoro ta Wɩɩsʋlʋŋ koru-la bʋbʋɔŋ, ʋ ŋaa wʋbɔŋŋɔɔ joŋo chɛnɩŋ Wɩɩsʋlʋŋ nɛ. 10Ʋ jaŋ joŋ koko-lɩa-la ma a to ŋɩɩ ba sɩ yie to a ŋaa kʋnyɩgaa Wɩɩsʋlʋŋ. Wɩɩsʋllɩ sɩpaalaara jaŋ ŋaa ŋɩɩ a pɩɩsɛ tɩɩna disiniŋ ta dɩ mɩ joŋ ʋ wʋbɔmʋŋ chɛʋ.

11Dɩ nɩɩ-la nɛ bɩ kokosuŋ balɩa lɛ wuo yi dɩ ʋ kaa sʋl wʋbɔŋŋɔɔ joŋo chɛnɩŋ Wɩɩsʋlɩɩ-la, ʋ jaŋ kɛŋ munuŋ sɩ bɩɩ nʋgʋgʋ gbaŋa kpaa magɛ dɔŋɔ a kaa kʋ ŋaa Wɩɩsʋlʋŋ. Ʋ bɩ maga dɩ ʋ joŋ nʋʋŋ koo kʋsʋɔrʋsʋŋ hɛ muŋ-la lɛ, bɛɛ wɩaa Wɩɩsʋlɩɩ-la ŋaa wʋbɔŋŋɔɔ joŋo chɛnɩŋ Wɩɩsʋlʋŋ nɛ, ʋ bɩ mɩaa Wɩɩsʋlʋŋ ŋaa. 12Ʋ jaŋ kaa mʋ Wɩɩsʋllɩ sɩpaalaara teeŋ dɩ ʋ ŋaa nɩsɩŋ sɩɩŋ mɩ dɩ-diiliŋ a nyɩgɛ Wɩɩsʋlʋŋ koru-la nyuŋ a pɩ mɩ-na ma TƖƖNA. Ʋ ŋaa wʋbɔŋŋɔɔ joŋo chɛnɩŋ Wɩɩsʋlʋŋ nɛ. 13Wɩɩsʋllɩ sɩpaalaara nɛ ŋaa ŋɩɩ, ʋ pɩɩsɛ nɩɩ-la wʋbɔŋ-la ʋ sɩ ŋaa ta nɛ, mɩ jaŋ joŋo chɛʋ. Muŋ-kaaŋ-la jaŋ ŋaa Wɩɩsʋllɩ sɩpaalaara toruŋ, a nagɛ mɩaa Wɩɩsʋlʋŋ muŋ-kaanɩŋ sɩ ŋaa ʋ toruŋ ŋɩɩ.’ ”

Cheeriŋ Wɩɩsʋlʋŋ

14Ŋɩɩ nɛ La TƖƖNA bɩra bʋla pɩ Mosis, 15“Dɩ nʋʋ nɛ bɩ jɩŋ aŋ bɩ kʋŋ ʋ sɩ maga dɩ ʋ time pɩ Wɩa time, ʋ maga dɩ ʋ lɩɩsɛ cheeriŋ pie-bele sɩ bɩ nyɔɔ kala kɛnɛ, a sʋl Wɩɩsʋlʋŋ pɩ mɩ-na ma TƖƖNA. Piesu-la yalɩŋ maga dɩ ʋ magɛ ŋɩɩ ma sɩ daga Wɩa dɩa lɛ. 16Wɩa time-la fa sɩ maga dɩ ʋ tiŋ ka ʋ bɩ time, ʋ jaŋ timu, aŋ ha tiŋ ʋ tʋŋ bʋnɔŋ a pɛ a kaa mʋ pɩ Wɩɩsʋllɩ sɩpaalaara. Ʋ jaŋ kɛŋ pie-bele-la a kaa mʋ ŋaa cheeriŋ Wɩɩsʋlʋŋ a pɩɩsɛ ʋ wʋbɔmʋŋ ta dɩ mɩ joŋo chɛʋ.

17Dɩ nʋʋ nɛ bɩ jɩŋ aŋ ŋaa wʋbɔŋ a chei wɩalɩŋ dɔŋɔ mɩ-na ma TƖƖNA sɩ sɩ ba sɩ́ ŋaa, ʋ laa cheeriŋ nɛ, ʋ maga dɩ ʋ na hɛɛŋ nɛ wɩɩ-la bʋbʋɔŋ lɛ. 18Ʋ jaŋ lɩɩsɛ pie-bele sɩ bɩ nyɔɔ kala kɛnɛ dɩ ʋ yalɩŋ magɛ ŋɩɩ ba sɩ daga Wɩa dɩa lɛ, a ŋaa cheeriŋ Wɩɩsʋlʋŋ. Wɩɩsʋllɩ sɩpaalaara jaŋ laa a pɩɩsɛ ʋ disiniŋ ta a tɩŋ wɩɩ-la ʋ sɩ ŋaa chei aŋ bɩ jɩŋ wɩaa, mɩ jaŋ joŋo chɛʋ. 19Ʋ ŋaa cheeriŋ Wɩɩsʋlɩɩ nɛ, ʋ ŋaa chei mɩ-na ma TƖƖNA.”

Currently Selected:

LEVI DOHO NƖAA 5: SIS

Highlight

Copy

Compare