LEVI DOHO NƖAA 4
4
Wʋbɔŋŋɔɔ joŋo chɛnɩŋ Wɩɩsʋlʋŋ
1La TƖƖNA bɩra bʋla pɩ Mosis, 2“Bʋla pɩ Iziral tɩŋŋaa: ‘Dɩ nʋʋ nɛ bɩ sɛnɛ aŋ chei mɩ niiri-la dɔŋɔ, ʋ maga dɩ ʋ to wɩaa deemba nɛ:
3Dɩ Wɩɩsʋllɩ sɩpaalaaraa kʋhɩaŋ nɛ ŋaa wʋbɔŋ a joŋ cheeriŋ hɛ ʋ nɩaa lɛ, ʋ maga dɩ ʋ kɛŋ nɛ-bel-pɔrʋŋ sɩ bɩ nyɔɔ kala kɛnɛ kaa kɔ mɩ-na ma TƖƖNA teeŋ a pɩɩsɛ ʋ wʋbɔŋ-la ta. 4Ʋ jaŋ kɛŋ nɛ-bel-bie-la kaa kɔ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ, a joŋ ʋ nɩsɩŋ daŋ nɛŋ-la nyuŋ lɛ aŋ kpʋʋ mɩ-na ma TƖƖNA sɩpaaŋ. 5Wɩɩsʋllɩ sɩpaalaaraa kʋhɩaŋ-la jaŋ ŋaa chal-la dɔnsʋŋ a kaa jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ tʋɔŋ, 6a kɛŋ ʋ neniiŋ a tagɛ chal-la mɩsɛ patɩɩsaŋ-la sɩpaaŋ naansɩɩŋ bʋlɩpɛ, kʋ-la sɩ kɛrɛ mɩ-na ma TƖƖNA dɩ-zɔŋ-la. 7Wɩɩsʋllɩ sɩpaalaaraa kʋhɩaŋ jaŋ ŋaa nɛ-bele-la chal-la taa Wɩɩsʋlʋŋ koru-la lɛ ba sɩɩ nyɩgɛ kʋsʋɔrʋsʋŋ pɩpɩmɛ nyilliŋ. Ʋ nɛ chɩŋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ tʋɔŋ ŋɩɩ, aŋ kɛŋ chal-kaaŋ-la a lɩɩ bɩsa ta Wɩɩsʋlʋŋ koru-la lɛ ba sɩ nyɩgɛ kɩaa pɩpɩmɛ bʋbʋɔŋ. Ʋ nɛ chɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ ŋɩɩ. 8Wʋbɔŋŋɔɔ joŋo chɛnɩŋ Wɩɩsʋlʋŋ nɛŋ-la ʋ sɩ kpʋa, ʋ jaŋ kʋɔrɛ nʋʋ-la kala sɩ tɔ tʋɔŋ kɩaa arɩ nʋʋ-la kala sɩ hɛ ʋ tʋɔŋ, 9a pɛ chʋchɔ-biee arɩ nʋʋ-la sɩ tɔba arɩ chʋɩŋ lɛ. 10Ʋ jaŋ nyɩgɛba kʋnyɩgaa Wɩɩsʋlʋŋ koru-la nyuŋ arɩ ʋ sɩ ŋaa ŋɩɩ nii-magɛ dɔŋɔ Wɩɩsʋlʋŋ pʋna lɛ. 11Ʋ jaŋ joŋ nɛŋ-la teniŋ, ʋ nammɩa kala, ʋ nyuŋ, ʋ naasɩŋ a pɛ ʋ tʋɔŋ kɩaa arɩ luobiee lɛ, 12a kaa lɩɩ ba dɩhɔnʋŋ lɛ lee-la sɩ bɩ disiniŋ kɛnɛ ba sɩ kɛŋ Wɩɩsʋlʋŋ kʋnyɩgaa tʋɔrʋŋ lɩɩ tɩta a hɛ nyiniŋ a nyɩgɛ.
13Dɩ Iziral tɩŋŋaa kala nɛ bɩ jɩŋ aŋ ŋaa wʋbɔŋ a chei wɩalɩŋ mɩ-na ma TƖƖNA sɩ bile dɔŋɔ, arɩ ba sɩ bɩ jɩŋ ma kala, ba ha kɛŋ cheeriŋ nɛ. 14Dɩ ba nɛ kʋ jɩŋ arɩ wɩɩ-la ba sɩ ŋaa wʋbɔŋ nɛ, ʋ maga dɩ ba kɛŋ nɛ-bele nɛ kaa kɔ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ a sʋl wʋbɔŋŋɔɔ joŋo chɛnɩŋ Wɩɩsʋlʋŋ. 15Ba tʋɔŋ nɩhɩasɩŋ jaŋ joŋ ba nɩsaa a daŋ nɛ-bele-la nyuŋ lɛ aŋ kpʋʋ mɩ-na ma TƖƖNA sɩpaaŋ. 16Wɩɩsʋllɩ sɩpaalaaraa kʋhɩaŋ jaŋ ŋaa nɛŋ-la chalɩŋ dɔnsʋŋ a kaa jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ tʋɔŋ, 17a kɛŋ ʋ neniiŋ tagɛ chal-la a mɩsɛ patɩɩsaŋ-la sɩpaaŋ naansɩɩŋ bʋlɩpɛ. 18Wɩɩsʋllɩ sɩpaalaaraa kʋhɩaŋ-la jaŋ ŋaa chal-la dɔnsʋŋ a taa Wɩɩsʋlʋŋ koru-la lɛ ba sɩ nyɩgɛ kʋsʋɔrʋsʋŋ pɩpɩmɛ nyilliŋ. Ʋ nɛ chɩŋ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ tʋɔŋ ŋɩɩ, aŋ joŋ chal kaaŋ-la a lɩɩ bɩsa ta Wɩɩsʋlʋŋ koru-la lɛ ba sɩ nyɩgɛ Wɩɩsʋlʋŋ kɩaa pɩpɩmɛ bʋbʋɔŋ. Ʋ nɛ chɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ ŋɩɩ. 19Ʋ maga dɩ ʋ kʋɔrɛ pʋna-la nʋʋŋ kala a nyɩgɛ Wɩɩsʋlʋŋ koru-la nyuŋ. 20Ʋ jaŋ joŋ nɛ-bele deeŋ a to ŋɩɩ tɩtɩa ʋ sɩ to wʋbɔŋŋɔɔ Wɩɩsʋlɩɩ-la lɛ. Dɩ Wɩɩsʋllɩ sɩpaalaara nɛ ŋaa Wɩɩsʋlʋŋ deeŋ, mɩ-na ma TƖƖNA jaŋ joŋ nɩalɩŋ kala wʋbɔŋŋɔɔ chɛba. 21Wɩɩsʋllɩ sɩpaalaara jaŋ joŋ nɛŋ-la a kaa lɩɩ ba dɩhɔnʋŋ lɛ a nyɩgɛ arɩ ʋ sɩ laa sɩpaaŋ nyɩgɛ wʋbɔŋŋɔɔ Wɩɩsʋlʋŋ ŋɩɩ. Deeŋ-na ŋaa Iziral tɩŋŋaa kala wʋbɔŋŋɔɔ joŋo chɛnɩŋ Wɩɩsʋlʋŋ kʋa nɛ.
22Dɩ Iziral tɩŋŋaa sɩpaalaarʋ ma nɛ bɩ jɩŋ aŋ chei wɩalɩŋ mɩ-na ma TƖƖNA Wɩa sɩ sɩ ba sɩ́ ŋaa dɔŋɔ, ʋ kɛŋ cheeriŋ nɛ. 23Dɩ ʋ nɛ kʋ jɩŋ arɩ wɩɩ-la ʋ sɩ ŋaa, ŋaa wʋbɔŋ nɛ, ʋ maga dɩ ʋ kɛŋ gbuŋgbogo sɩ bɩ nyɔɔ kala kɛnɛ kʋ ŋaa Wɩɩsʋlʋŋ. 24Ʋ jaŋ joŋ ʋ nɩsɩŋ daŋ gbuŋgbogo-la nyuŋ lɛ aŋ kpʋʋ mɩ-na ma TƖƖNA sɩpaaŋ lee-la ba sɩɩ nyɩgɛ Wɩɩsʋlʋŋ kɩaa, ʋ ŋaa wʋbɔŋŋɔɔ joŋo chɛnɩŋ Wɩɩsʋlɩɩ nɛ. 25Wɩɩsʋllɩ sɩpaalaara jaŋ kɛŋ ʋ neniiŋ tagɛ pʋna-la chalɩŋ a taa Wɩɩsʋlʋŋ koru-la lɛ ba sɩɩ nyɩgɛ kɩaa pɩpɩmɛ nyilliŋ, aŋ joŋ chal kaaŋ-la a bɩsa ta Wɩɩsʋlʋŋ koru-la bʋbʋɔŋ. 26Ʋ jaŋ joŋ pʋna-la nʋʋŋ kala nyɩgɛ Wɩɩsʋlʋŋ koru-la nyuŋ arɩ ba sɩɩ nyɩgɛ nii-magɛ dɔŋɔ Wɩɩsʋlʋŋ pʋna nʋʋŋ ŋɩɩ. Dɩ Wɩɩsʋllɩ sɩpaalaara nɛ ŋaa ŋ-la, ʋ pɩɩsɛ sɩpaalaarʋ-la wʋbɔmʋŋ ta nɛ, mɩ jaŋ joŋo chɛʋ.
27Dɩ ba tʋɔŋ nʋʋ ma sɩ bɩ sɩpaalaarʋ ŋaa nɛ bɩ sɛnɛ aŋ ŋaa wɩɩ a chei wɩalɩŋ mɩ-na ma TƖƖNA sɩ sɩ ba sɩ́ ŋaa dɔŋɔ, arɩ ʋ sɩ bɩ jɩŋ ma kala, ʋ ha kɛŋ cheeriŋ nɛ. 28Dɩ ʋ nɛ kʋ jɩŋ arɩ wɩɩ-la ʋ sɩ ŋaa, ŋaa wʋbɔŋ nɛ, ʋ maga dɩ ʋ kɛŋ bʋ-nɩɩŋ sɩ bɩ nyɔɔ kala kɛnɛ a kaa kʋ sʋl Wɩɩsʋlʋŋ a tɩŋ wʋbɔŋ-la ʋ sɩ ŋaa wɩaa. 29Ʋ jaŋ joŋ ʋ nɩsɩŋ daŋ bʋ-nɩɩ-la nyuŋ lɛ aŋ kpʋʋ lee-la ba sɩ nyɩgɛ Wɩɩsʋlʋŋ kɩaa pɩpɩmɛ. 30Wɩɩsʋllɩ sɩpaalaara jaŋ kɛŋ ʋ neniiŋ tagɛ pʋna-la chalɩŋ a taa Wɩɩsʋlʋŋ koru-la lɛ ba sɩ nyɩgɛ kɩaa pɩpɩmɛ nyilliŋ aŋ joŋ chal-kaaŋ-la a bɩsa ta Wɩɩsʋlʋŋ koru-la bʋbʋɔŋ. 31Ʋ jaŋ kʋɔrɛ pʋna-la nʋʋŋ arɩ ba sɩ kʋɔrɛ nii-magɛ dɔŋɔ Wɩɩsʋlʋŋ pʋna nʋʋŋ ŋɩɩ, dɩ Wɩɩsʋllɩ sɩpaalaara joŋo nyɩgɛ Wɩɩsʋlʋŋ koru-la nyuŋ. Ba sʋɔra sɩma nɛ a pɩ mɩ-na ma TƖƖNA. Dɩ Wɩɩsʋllɩ sɩpaalaara nɛ ŋaa ŋ-la, ʋ pɩɩsɛ nɩɩ-la wʋbɔmʋŋ ta nɛ, mɩ jaŋ joŋo chɛʋ.
32Dɩ piesu nɛ ʋ kaa kɔ dɩ ʋ sʋl wʋbɔŋŋɔɔ Wɩɩsʋlɩɩ-la, ʋ maga dɩ ʋ kɛŋ pie-nɩɩŋ sɩ bɩ nyɔɔ kala kɛnɛ nɛ. 33Ʋ maga dɩ ʋ kɛŋ piesu-la mʋ lee-la ba sɩ kpʋ pʋsʋŋ a nyɩga pɩpɩ Wɩa nɛ, a joŋ ʋ nɩsɩŋ daŋ piesu-la nyuŋ lɛ aŋ kpʋʋ. 34Wɩɩsʋllɩ sɩpaalaara jaŋ kɛŋ ʋ neniiŋ tagɛ wʋbɔŋŋɔɔ joŋo chɛnɩŋ Wɩɩsʋlʋŋ piesu-la chalɩŋ a taa Wɩɩsʋlʋŋ koru-la lɛ ba sɩ nyɩgɛ kɩaa pɩpɩ Wɩa nyilliŋ, aŋ joŋ chal-kaaŋ-la bɩsa ta koru-la bʋbʋɔŋ. 35Ʋ jaŋ kʋɔrɛ piesu-la nʋʋŋ kala arɩ ba sɩɩ kʋɔrɛ nii-magɛ dɔŋɔ Wɩɩsʋlʋŋ piese nʋʋŋ ŋɩɩ, a pɛ kʋnyɩgɩa-la dɔnsʋŋ sɩ laa sɩpaaŋ daŋ Wɩɩsʋlʋŋ koru-la nyuŋ a nyɩgɛ ba kala pɩ mɩ-na ma TƖƖNA. Wɩɩsʋllɩ sɩpaalaara nɛ ŋaa ŋ-la, ʋ pɩɩsɛ nɩɩ-la wʋbɔmʋŋ ta nɛ, mɩ jaŋ joŋo chɛʋ.
Currently Selected:
LEVI DOHO NƖAA 4: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
