LEVI DOHO NƖAA 3
3
Nii-magɛ dɔŋɔ Wɩɩsʋlʋŋ
1Dɩ nʋʋ nɩɩ chɛ ʋ kɛŋ nɛŋ ŋaa nii-magɛ dɔŋɔ Wɩɩsʋlʋŋ a pɩ mɩ-na ma TƖƖNA, ʋ jaŋ wuo kɛŋ bele koo nɩɩŋ sɩ bɩ nyɔɔ kala kɛnɛ a ŋaa. 2Tɩɩna maga dɩ ʋ joŋ ʋ nɩsɩŋ daŋ pʋna-la nyuŋ lɛ aŋ kpʋ pʋna-la lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisi-la sɩ ŋaa Wɩɩsʋllɩ sɩpaalaaraa jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala. 3Nii-magɛ dɔŋɔ Wɩɩsʋlɩɩ-la lɛ, ʋ maga dɩ ʋ nyɩgɛ nʋʋ-la kala sɩ tɔ pʋna-la tʋɔŋ kɩaa, 4a pɛ chʋchɔ-biee arɩ nʋʋ-la sɩ tɔba arɩ chʋɩŋ lɛ. 5Arɔŋ hambolibiisiŋ jaŋ joŋ kɩaa deemba a daŋa pɛ kʋnyɩgɩa-la dɔnsʋŋ sɩ laa sɩpaaŋ daŋ Wɩɩsʋlʋŋ koru-la nyuŋ nyiŋ-la lɛ, a nyɩgɛ ba kala. Ba sʋɔra sɩma nɛ a pɩ mɩ-na ma TƖƖNA.
6Dɩ nʋʋ nɩɩ chɛ ʋ kɛŋ piese koo bʋʋna a ŋaa nii-magɛ dɔŋɔ Wɩɩsʋlʋŋ pɩ mɩ-na ma TƖƖNA, ʋ jaŋ wuo kɛŋ bele koo nɩɩŋ sɩ bɩ nyɔɔ kala kɛnɛ a ŋaa. 7Dɩ ʋ nɩɩ chɛ ʋ kɛŋ piese ŋaa Wɩɩsʋlɩɩ-la, ʋ maga dɩ ʋ kaa kɔ mɩ-na ma TƖƖNA sɩpaaŋ nɛ, 8a joŋ nɩsɩŋ daŋ piesu-la nyuŋ lɛ aŋ kpʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisiŋ jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala. 9Nii-magɛ dɔŋɔ Wɩɩsʋlʋŋ pʋna-la ʋ sɩ kaa kɔ dɩ ʋ nyɩga pɩ mɩ-na ma TƖƖNA, ʋ maga dɩ ʋ kʋɔrɛ nʋʋ-la kala sɩ tɔ tʋɔŋ kɩaa arɩ nʋʋ-la kala sɩ hɛ ʋ tʋɔŋ, a kʋɔrɛ nʋʋ-la ma sɩ tɔ dokeliŋ, 10a pɛ chʋchɔ-biee arɩ nʋʋ-la sɩ tɔba arɩ chʋɩŋ lɛ. 11Wɩɩsʋllɩ sɩpaalaara jaŋ laaba a nyɩgɛ Wɩɩsʋlʋŋ koru-la nyuŋ, ba ŋaa kʋdiilee wɩɩ-sʋla nɛ a pɩ mɩ-na ma TƖƖNA.
12Dɩ bʋʋna nɛ ʋʋ chɛ dɩ ʋ kaa ŋaa Wɩɩsʋlɩɩ-la, ʋ maga dɩ ʋ kɛnʋ kɔ mɩ-na ma TƖƖNA sɩpaaŋ nɛ, 13a joŋ ʋ nɩsɩŋ daŋ bʋʋŋ-la nyuŋ lɛ aŋ kpʋʋ lee-la mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisiŋ jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala. 14Pʋna-la tʋɔŋ kɩaa deemba nɛ maga dɩ ʋ joŋo nyɩgɛ a pɩ mɩ-na ma TƖƖNA: nʋʋ-la kala sɩ tɔ tʋɔŋ kɩaa, 15a pɛ chʋchɔ-biee arɩ nʋʋ-la kala sɩ tɔba arɩ chʋɩŋ lɛ. 16Wɩɩsʋllɩ sɩpaalaara jaŋ laaba a nyɩgɛ Wɩɩsʋlʋŋ koru-la nyuŋ a pɩ mɩ-na ma TƖƖNA. Ba sʋɔra sɩma nɛ a pɩmɛ. Mɩ-na ma TƖƖNA nɛ tɩɩ pʋna-la ba sɩ kpʋ ŋaa Wɩɩsʋlʋŋ nʋʋŋ kala.
17Iziral tɩŋŋaa doho kala maga dɩ ba kɩkɩsɛ pʋna chalɩŋ koo nʋʋŋ nɛ ba mɩɩsɩŋ kala lɛ lee na-kala ba sɩ hɛ.’ ”
Currently Selected:
LEVI DOHO NƖAA 3: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
