LEVI DOHO NƖAA 27
27
Ŋɩɩ ma sɩ jaŋ time laa kɩalɩŋ ma sɩ joŋo pɩ La TƖƖNA
1La TƖƖNA fa bʋla pɩ Mosis, 2“Bʋla pɩ Iziral tɩŋŋaa: ‘Dɩ nʋʋ nɛ ta niiŋ arɩ ʋ jaŋ joŋ nuhuobiiŋ a hɛ mɩ-na ma TƖƖNA nɩsɩŋ lɛ, aŋ chɩchɛ dɩ ʋ lɩɩsɛ nii-la, 3dɩ nɩɩ-la nɛ ŋaa baal a yi jɩsɩŋ mara a kaa mʋ mahɩŋ batori, ʋ maga dɩ ʋ tiŋ warɩpʋla mahɩŋ balɩa arɩ fii, a magɛ ŋɩɩ ba sɩ daga Wɩa dɩa lɛ. 4Dɩ ʋ nɛ ŋaa haal, ʋ jaŋ tiŋ warɩpʋla mara arɩ fii. 5Dɩ tɩɩna nɛ ŋaa baal a chɩŋ jɩsɩŋ banɔŋ a kaa mʋ jɩsɩŋ mara, ʋ maga dɩ ʋ tiŋ warɩpʋla mara nɛ, ka dɩ ʋ nɛ ŋaa haal, ʋ maga dɩ ʋ tiŋ warɩpʋla fii. 6Dɩ tɩɩna nɛ ŋaa baal a chɩŋ chɛnɛ a kaa mʋ jɩsɩŋ banɔŋ, ʋ maga dɩ ʋ tiŋ warɩpʋla banɔŋ nɛ, ka dɩ ʋ nɛ ŋaa haal, ʋ maga dɩ ʋ tiŋ warɩpʋla batori. 7A chɩŋ jɩsɩŋ mahɩŋ batori a kaa mʋ, dɩ tɩɩna nɛ ŋaa baal, ʋ maga dɩ ʋ tiŋ warɩpʋla fii arɩ banɔŋ, ka dɩ ʋ nɛ ŋaa haal, ʋ maga dɩ ʋ tiŋ warɩpʋla fii. 8Dɩ nɩɩ-la sɩ ta nii-la nɛ ŋaa summu a bɩ jaŋ wuo na warɩpʋla-la magɛ ŋɩɩ ʋ sɩ jaŋ kaa lɩɩsɛ nii-la, ʋ maga dɩ ʋ kɛŋ nɩɩ-la ʋ sɩ kaa ta nii-la a mʋ Wɩɩsʋllɩ sɩpaalaara teeŋ dɩ ʋ dagɛ maga ŋɩɩ ʋ sɩ jaŋ wuo tiŋ.
9Dɩ pʋna sɩ bɩ kɩsɛ arɩ Wɩɩsʋlʋŋ nɛ dɩ ʋ kaa ta nii-la, pʋna-la jaŋ ŋaa mɩ-na Wɩa kʋzɔŋ. 10Ʋ bɩ maga dɩ ʋ kɛŋ pʋna-la lenni pʋna dɔŋ, kʋzɔŋ koo kʋlɔrʋ, dɩ ʋ nɛ ŋaa ŋɩɩ, ba kala balɩa jaŋ ŋaa mɩ-na ma TƖƖNA kʋzɔmɔ. 11Dɩ pʋna-la ʋ sɩ kaa ta niiŋ nɛ kɛŋ disiniŋ ba sɩ bɩ jaŋ wuo kaa sʋl Wɩɩsʋlʋŋ a pɩ mɩ-na ma TƖƖNA, ʋ maga dɩ ʋ kɛŋ pʋna-la mʋ Wɩɩsʋllɩ sɩpaalaara teeŋ. 12Ʋ nɛ jaŋ beŋ a na dɩ ʋ zɔmɔ koo ʋ bɩ zɔŋ, aŋ dagɛ ʋ yalɩŋ sɩ maga dɩ ʋ magɛ ŋɩɩ. 13Dɩ pʋna-la tɩɩna nɩɩ chɛ dɩ ʋ time laa, ʋ jaŋ tiŋ ʋ yalɩŋ, aŋ ha kɛŋ pʋna-la yalɩŋ kpaa leree banɔŋ a joŋ dɔŋɔ pɛ.
14Dɩ nʋʋ nɛ joŋ ʋ dɩa a hɛ mɩ-na ma TƖƖNA nɩsɩŋ lɛ, Wɩɩsʋllɩ sɩpaalaara jaŋ beŋ dɩa-la a na ʋ zɔmʋŋ sɩ magɛ ŋɩɩ aŋ hɛ ʋ yalɩŋ, magɛ ŋɩɩ kala ʋ sɩ daga, ʋ yalɩŋ nɛ ŋɩɩ. 15Nɩɩ-la sɩ joŋ dɩa-la hɛ mɩ nɩsɩŋ lɛ nɩɩ chɛ dɩ ʋ time laa, ʋ maga dɩ ʋ tiŋ dɩa-la yalɩŋ aŋ ha kɛŋ dɩa-la yalɩŋ kpaa leree banɔŋ a joŋ dɔŋɔ time daŋ aŋ-na laa ʋ kʋa.
16Dɩ nʋʋ nɛ chɔgɛ ʋ doho nɩaa tinteeŋ sɛmɛ dɔŋɔ hɛ mɩ-na ma TƖƖNA nɩsɩŋ lɛ, ʋ yalɩŋ maga dɩ ʋ magɛ kʋdoho-la ba sɩ jaŋ joŋo duu lee-la yalɩŋ sɩ magɛ ŋɩɩ nɛ. Mɩɩ-doho bɔtɔ yalɩŋ ŋaa warɩpʋla mahɩŋ balɩa arɩ fii nɛ. 17Dɩ jɩna-la lɛ ba sɩ joŋ kʋyɔbɔɔ pɩ ba tɩŋŋaa lɛ nɛ dɩ ʋ joŋ tintee-la hɛ mɩ nɩsɩŋ lɛ, ʋ yalɩŋ ha maga dɩ ʋ magɛ ŋɩɩ tɩtɩa nɛ. 18Dɩ jɩna-la lɛ ba sɩ joŋ kʋyɔbɔɔ pɩ ba tɩŋŋaa nɛ bala ka dɩ ʋ joŋ tintee-la hɛ mɩ nɩsɩŋ lɛ, Wɩɩsʋllɩ sɩpaalaara maga dɩ ʋ lɩɩsɛ jɩsɩ-la sɩ bala ta nɛ aŋ hɛ ʋ yalɩŋ. 19Dɩ nɩɩ-la sɩ joŋ tintee-la hɛ mɩ nɩsɩŋ lɛ nɩɩ chɛ dɩ ʋ time laa, ʋ maga dɩ ʋ tiŋ tintee-la yalɩŋ aŋ ha kɛŋ tintee-la yalɩŋ kpaa leree banɔŋ a joŋ dɔŋɔ pɛ aŋ na laa ʋ kʋa. 20Dɩ ʋ nɛ bɩ tintee-la time laa, aŋ bɩra joŋo yallɛ pɩ nʋʋ dɔŋ, ʋ bɩra bɩ jaŋ wuo time laaʋ maachie kala. 21Dɩ jɩna-la lɛ ba sɩ joŋ kʋyɔbɔɔ pɩ ba tɩŋŋaa nɛ kʋ yi, tintee-la jaŋ ŋaa mɩ-na ma TƖƖNA kʋŋ a kaa mʋ wuu, Wɩɩsʋllɩ sɩpaalaaraa nɛ jaŋ tɩɩʋ.
22Dɩ nʋʋ nɛ yɔɔ tinteeŋ a ma bɩra joŋo hɛ mɩ-na ma TƖƖNA nɩsɩŋ lɛ, 23Wɩɩsʋllɩ sɩpaalaara jaŋ chɩŋ bʋa-la lɛ nɩɩ-la sɩ yɔɔ tintee-la aŋ dɩɩsɛ jɩsɩŋ magɛ ŋɩɩ sɩ ka, ka dɩ jɩna-la lɛ ba sɩ jaŋ joŋ kʋyɔbɔɔ pɩ ba tɩŋŋaa yi aŋ hɛ ʋ yalɩŋ, dɩ nɩɩ-la timu tapʋlɩɩ-la tɩtɩa. Moribiiŋ deeŋ ŋaa mɩ-na ma TƖƖNA kʋzɔŋ nɛ. 24Dɩ jɩna-la lɛ ba sɩ jaŋ joŋ kʋyɔbɔɔ pɩ ba tɩŋŋaa nɛ kʋ yi, nɩɩ-la teeŋ ʋ sɩ yɔɔ tintee-la nɛ jaŋ laa ʋ kʋa. 25Dɩ ma nɩɩ chɛ dɩ ma hɛ kʋŋkala yalɩŋ, má hɛ dɩ ʋ magɛ ŋɩɩ ba sɩ daga Wɩa dɩa lɛ.
26Nʋʋkala bɩ jaŋ wuo joŋ piese koo bʋʋŋ koo nɛŋ sɩ lʋl ʋ bii-bumbuŋ hɛ mɩ-na ma TƖƖNA nɩsɩŋ lɛ, bɛɛ wɩaa ma paala jɩŋ arɩ ba-na ŋaa mɩ kɩaa nɛ. 27Dɩ nʋʋ nɛ kɛŋ pʋna sɩ kɛŋ disiniŋ bii-bumbuŋ kaa kɔ dɩ ʋ hɛ mɩ-na ma TƖƖNA nɩsɩŋ lɛ, ʋ jaŋ time laa a magɛ yalɩɩ-la Wɩɩsʋllɩ sɩpaalaara sɩ hɛ, aŋ ha kɛŋ yalɩɩ-la kpaa leree banɔŋ a joŋ dɔŋɔ pɛ. Dɩ ʋ nɛ bɩ jaŋ time laa, Wɩɩsʋllɩ sɩpaalaara jaŋ joŋ pʋna-la yallɛ ŋɩɩ ʋ yalɩŋ sɩ maga.
28Dɩ nʋʋ nɛ joŋ nuhuobiine koo pʋna koo ʋ doho nɩaa tinteeŋ pɩ mɩ-na ma TƖƖNA, ʋ bɩra bɩ jaŋ wuo time laa koo a joŋo yallɛ. Ʋ jaŋ ŋaa mɩ-na ma TƖƖNA kʋzɔŋ. 29Dɩ nʋʋ nɛ mɩ chaasa lɩɩsɛ dɩ ba kpʋ, nʋʋkala bɩ jaŋ wuo time laaʋ, ʋ maga dɩ ba kpʋʋ nɛ.
30Ma kʋpɛrɛɛ, mɩaa arɩ tɩɩnɛnɛɛ kala, ma jaŋ kaa kpaa leree fii a joŋ dɔŋɔ pɩ mɩ-na ma TƖƖNA. Ba ŋaa kʋzɔmɔ nɛ mɩ teeŋ. 31Dɩ nʋʋ nɩɩ chɛ dɩ ʋ mɩɩra time laa kɩalɩŋ ʋ sɩ joŋo pɩmɛ, ʋ jaŋ tiŋ ʋ yalɩŋ aŋ ha kɛŋ ʋ yalɩŋ kpaa leree banɔŋ a joŋ dɔŋɔ time daŋ. 32Ma pʋsʋŋ tʋɔŋ, pʋŋ fii tɩɩna na-kala ŋaa mɩ-na ma TƖƖNA kʋa nɛ. 33Dɩ pʋŋ fii-la nɛ ŋaa kʋzɔŋ koo kʋlɔrʋ, ʋ bɩ maga dɩ ma kaa lenni pʋna dɔŋ. Dɩ ma nɛ kaa lenni pʋna dɔŋ, ba kala balɩa jaŋ ŋaa mɩ kɩaa, ma bɩ jaŋ wuo time laa.’ ”
34Wɩalɩŋ La TƖƖNA sɩ bʋla pɩ Mosis Sɩnaɩ peel-la nyuŋ dɩ ʋ bʋla pɩ Iziral tɩŋŋaa nɛ ŋɩɩ.
Currently Selected:
LEVI DOHO NƖAA 27: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
