LEVI DOHO NƖAA 26

Woruŋ-la ma sɩ jaŋ na dɩ ma nɛ to Wɩa niiŋ

1La TƖƖNA sɩ, “Má sɩ́ kʋŋkala ŋaa a pɩ ma tɩtɩa aa kpaarɛ: tɔŋŋɔɔ, vesiŋ, koo a saa tabɩaa aa kpaarɛ. Mɩ nɛ ma TƖƖNA Wɩa.

2Má to mɩ chɛ-wiesii-la woruŋ, a zizil lee-la ma sɩ kʋʋ chʋɔlɛmɛ. Mɩ nɛ ma TƖƖNA.

3Dɩ ma nɛ fɩɛlɛ ma sɩaa aa to mɩ niiŋ arɩ wombie-la mɩ sɩ dagɛma, 4mɩ jaŋ leŋ dɩ duonuŋ nɩɩ ʋ bʋa lɛ a pɩma dɩ ma kʋdiilee arɩ ma tɩɩnɛnɛɛ wasɛ. 5Ma jaŋ ŋaa ma baga kɩaa ŋɩɩ a mʋ yi girep nɛnɛɛ tɔrʋŋ, a bɩra tɔrɛ ma girep nɛnɛɛ ma ŋɩɩ a mʋ yi kɩaa duunuŋ. Kʋdiilee jaŋ pʋrɩgɛ ma tinteeŋ lɛ, dɩ ma hɔŋ wɩɩkala bɩ jaŋ walɩmɛma.

6Mɩ jaŋ leŋ dɩ ma hɔŋ Kɛnaŋ tintee-la lɛ arɩ fɩɛlɩŋ dɩ wɩɩkala sɩ leŋe dɩ ma bɔyɛ joŋ. Mɩ jaŋ lɩɩsɛ gɩrɩŋ kʋbɔŋŋɔɔ arɩ laalɩŋ ma tinteeŋ lɛ. 7Ma jaŋ kire to ma dʋndɔŋŋɔɔ harɩŋ a kpʋba. 8Ma nɩaa banɔŋ jaŋ yuo dii nɩaa zɔlɔ, dɩ nɩaa zɔlɔ ma yuo dii nɩaa bʋɩ fii.

9Mɩ jaŋ pɛ ma lɛ dɩ ma pʋŋ, aŋ leŋ dɩ nii-la ma mɩ sɩ bile mɩ dɩ ma pɛgɛ chɩŋ. 10Ma pire jaŋ chol dɩ ma chaarɛ kʋbɩnaa aŋ hɛ kʋfalaa. 11Mɩ jaŋ hɛ ma tʋɔŋ, mɩ bɩ jaŋ lemma ta. 12Mɩ jaŋ hɛ ma tʋɔŋ a ŋaa ma Wɩa dɩ ma ma ŋaa mɩ nɩaa. 13Mɩ nɛ ma Wɩa, mɩ nɛ kɛmma kaa lɩɩ Ijipiti tinteeŋ lɛ dɩ ma sɩ́ ba yosi ŋaa. Mɩ nɛ laama ta dɩ ma tɩɩ ma tɩtɩa a sɩ́ wɩɩkala fá.”

Dɔgɩsɩna-la ma sɩ jaŋ na dɩ ma nɛ vɩa Wɩa niiŋ

14La TƖƖNA bɩra sɩ, “Dɩ ma nɛ bɩ jaŋ jegile mɩ teeŋ a to wɩalɩŋ mɩ sɩ daga, 15aŋ vɩa mɩ niiŋ wɩaa mɩ sɩ daga arɩ wombie-la mɩ sɩ bile dɩ ma tuto a chei nii-la sɩ hɛ mɩ dɩ ma pɛgɛ, 16ŋ-la nɛ mɩ jaŋ ŋaama: Mɩ jaŋ leŋ dɩ wʋlɔrʋnʋŋ jʋʋma. Mɩ jaŋ joŋ nyanyalaa sɩ bɩ daalusuŋ kɛnɛ hɛ ma lɛ, arɩ yarɩ-lɩŋŋaa sɩ jaŋ leŋ dɩ ma nyʋlɩmɛ dɩ ma yaraa kala yʋɔlɛ ŋɩɩ dɩ ma mʋ sʋʋ. Ma jaŋ duu kɩaa aŋ bɩ jaŋ dii kɩalɩŋ, bɛɛ wɩaa ma dʋndɔŋŋɔɔ nɛ jaŋ diiba. 17Mɩ jaŋ vɩama ta a leŋ dɩ ma dʋndɔŋŋɔɔ yuo diima. Nɩalɩŋ sɩ bɛrɛma nɛ jaŋ bemma. Ma jaŋ fá, ka nʋʋ bɩ maa kiri.

18Dɩ wɩaa deemba kala nɛ ŋaa ma lɛ, ka ma ha bɩ jaŋ jegile nɩɩ mɩ teeŋ, mɩ jaŋ dɔgɩsɛma a magɛ ŋɩɩ naansɩɩŋ bʋlɩpɛ, a tɩŋ ma wʋbɔŋŋɔɔ wɩaa. 19Mɩ jaŋ giri ma babii-ballɩŋ ta. Duonuŋ bɩ jaŋ nɩɩ pɩma, ma tinteeŋ jaŋ hɩl korikori. 20Ma jaŋ tɩŋ pɛɩ, ma baga kɩaa bɩ jaŋ wasɛ, ma tɩɩnɛnɛɛ ma bɩ jaŋ nɛŋ.

21Dɩ ma nɛ ha vɩamɛ a bɩ jegile nɩɩ mɩ teeŋ, mɩ jaŋ joŋ wʋlɔrʋnʋ-la mɩ fa sɩ sɩ mɩ jaŋ joŋo hɛ ma lɛ a magɛ ŋɩɩ naansɩɩŋ bʋlɩpɛ a hɛ ma lɛ, a tɩŋ ma wʋbɔŋŋɔɔ wɩaa. 22Mɩ jaŋ leŋ dɩ baga kɩaa kʋ kpʋ ma biiriŋ arɩ ma pʋsʋŋ, dɩ ma nɩaa faasa muuri, dɩ ma wombiee kala pɩŋ hoi.

23Dɩ mɩ nɛ ŋaama ŋ-la, ka dɩ ma bɩ mɩ teeŋ jegile nɩɩ, aŋ ha vɩamɛ, 24mɩ jaŋ leŋ dɩ ma na hɛɛŋ a kɩɩ ŋɩɩ naansɩɩŋ bʋlɩpɛ a tɩŋ ma wʋbɔmɔ-la wɩaa. 25Mɩ jaŋ leŋ dɩ laalɩŋ kʋ gɩrɛma a tɩŋ ma sɩ chei nii-la sɩ hɛ mɩ dɩ ma pɛgɛ. Dɩ ma nɛ fá jʋʋ ma tabalaa dɩ ma laa ma mɩɩsɩŋ, mɩ jaŋ joŋ nyanyal bɔŋŋɔɔ hɛ ma lɛ dɩ ma dʋndɔŋŋɔɔ yuo diima. 26Mɩ jaŋ leŋ dɩ kʋdiilee nyaa, dɩ ha-bala joŋ haalaa fii kʋdiilee ŋaa tabʋʋ bala lɛ. Ba jaŋ pɩɛrɛ mʋa mʋa a pɩ nʋʋkala dɩ ma dii aŋ bɩ vɔgɛ.

27Dɩ mɩ nɛ ŋaa wɩaa deemba kala ma lɛ, ka ma ha vɩa a bɩ jegilee nɩɩ mɩ teeŋ aŋ ha ŋaa wɩaa chichei mɩ tʋɔŋ, 28mɩ baanɩŋ jaŋ sii ma nyuŋ dɩ mɩ dɔgɩsɛ ma a kɩɩ ŋɩɩ naansɩɩŋ bʋlɩpɛ, a tɩŋ ma wʋbɔmɔ-la wɩaa. 29Mɩ jaŋ leŋ dɩ losuŋ faasa jʋʋma, dɩ ma gʋra kɛsɛ ma biiriŋ chɩchaŋ. 30Mɩ jaŋ chei ma vʋɩ-kpaarɛ leree arɩ korunu-la nyuŋ ma sɩɩ nyɩgɛ ma kʋsʋɔrʋsʋŋ, aŋ kpʋma a paa ma kʋsʋʋnʋŋ daŋ dɔŋɔ lɛ ma tɔmɔ-la mɩ sɩ cheye nyuŋ, aŋ vɩama ta. 31Mɩ jaŋ leŋ dɩ ma tasɩŋ pɩŋ jikpeeniŋ aŋ chei ma vʋɩyaa dɩ-kpaaraa, ma kʋnyɩgaa Wɩɩsʋlʋŋ sʋɔra bɩra bɩ jaŋ sɩma pɩmɛ. 32Mɩ jaŋ leŋ dɩ ma tinteeŋ pɩŋ jikpeeŋ dɩ ʋ ŋaa wʋkpuŋkpere a pɩ ma dʋndɔmɔ-la sɩ hɛ lee-la. 33Mɩ jaŋ leŋ dɩ laalɩŋ kirima dɩ ma fá a pɩsa jʋʋ tintee-wogusuŋ, ka ma tinteeŋ arɩ ma tasɩŋ pɩŋ jikpeeŋ. 34-35Bʋa-la kala lɛ tintee-la sɩ jaŋ pɩŋ jikpeeŋ, ʋ jaŋ wiesi jɩsɩ-la kala ʋ fa sɩ maga dɩ ʋ wiesi, ka ʋ bɩ wiese, ka dɩ ma hɛ yoŋ-baga lɛ ma dʋndɔŋŋɔɔ tinteyee lɛ.

36Ma nɩalɩŋ kala sɩ ka a hɛ ma dʋndɔŋŋɔɔ tinteyee lɛ, mɩ jaŋ joŋ fawʋllʋŋ hɛ ma lɛ, dɩ wʋbie kala nɛ ŋaa, dɩ ma bɔɩsɩŋ joŋ. Ma jaŋ fá a foro titel a nagɛ laalɩŋ sɩɩ kiri nɩaa, ka nʋʋkala bɩ maa kiri. 37Ma jaŋ fá a yigi dɔŋɔ lulo arɩ laalɩŋ nɩɩ kirima, ka nʋʋkala bɩ maa kiri. Ŋɩɩ jaŋ leŋ dɩ ma sɩ́ wuo yuo ma dʋndɔŋŋɔɔ. 38Ma jaŋ mʋ sʋʋ tintee-wogusuŋ lɛ, ma dʋndɔŋŋɔɔ tinteeŋ jaŋ diima. 39Ma nɩkaana-la sɩ bɩ sʋba ma dʋndɔŋŋɔɔ tinteeŋ lɛ, ma jaŋ hɩl ŋɩɩ a mʋ sʋʋ, a tɩŋ ma wʋbɔŋŋɔɔ arɩ ma nyɩmmaba wʋbɔŋŋɔɔ wɩaa.

40Ama ʋ dɩdɛrɩŋ, dɩ mɩ nɩaa nɛ jaŋ sɛɩ a dagɛ ba wʋbɔŋŋɔɔ arɩ ba naabalɩmaba wʋbɔŋŋɔɔ, arɩ baaŋ-siiri wɩalɩŋ ba sɩ ŋaa mɩ lɛ, a vɩa mɩ niiŋ, 41ŋɩɩ leŋ mɩ yaraa hosi ba lɛ, mɩ kiriba hɛ ba dʋndɔŋŋɔɔ tinteyee lɛ, dɩ ba nɛ leŋ ba babii-ballɩŋ aŋ kɛŋ ba tɩtɩa muuri a na hɛɛ-la sɩ maga dɩ ba na, a tɩŋ ba wʋbɔmɔ-la wɩaa, 42mɩ jaŋ liisi nii-la sɩ hɛ mɩ dɩ Jekɔb arɩ Aɩzɩk arɩ Abɩraham pɛgɛ a mʋ tɩgɛ tintee-la mɩ sɩ sɩ mɩ jaŋ joŋo pɩba lɛ. 43Tintee-la jaŋ pɩŋ jikpeeŋ a wiesi, nʋʋkala jaŋ tuo ʋ lɛ. Ʋ maga ba na hɛɛ-la sɩ maga dɩ ba na nɛ, a tɩŋ ba wʋbɔŋŋɔɔ wɩaa, bɛɛ wɩaa ba vɩa mɩ wombiee arɩ wɩalɩŋ mɩ sɩ daga nɛ. 44Arɩ ŋɩɩ kala, dɩ ba nɛ hɛ ba dʋndɔŋŋɔɔ tinteeŋ lɛ, mɩ bɩ jaŋ vɩaba ta koo a bɛrɛba a cheiba, dɩ ŋɩɩ leŋ nii-la sɩ hɛ mɩ dɩ ba pɛgɛ chei. Mɩ nɛ ba TƖƖNA Wɩa. 45Mɩ jaŋ tɩŋ ba wɩaa, a liise yi nii-la sɩ hɛ mɩ dɩ ba naabalɩmaba pɛgɛ, nɩalɩŋ mɩ sɩ kaa lɩɩ Ijipiti tinteeŋ lɛ, ka tinteyee nɩaa kala bibeŋ. Mɩ nɛ ba TƖƖNA Wɩa.”

46Wombie-la arɩ niiri-la La TƖƖNA sɩ joŋo pɩ Mosis peel-la ba sɩɩ yɩrɛ Sɩnaɩ nyuŋ dɩ ʋ joŋo dagɛ Iziral tɩŋŋaa dɩ ba tuto nɛ ŋɩɩ.

Currently Selected:

LEVI DOHO NƖAA 26: SIS

Highlight

Copy

Compare