NAMBABA 1
1
Ba dɩɩsɛ Iziral tɩŋŋaa
1Iziral tɩŋŋaa sɩ lɩɩ Ijipiti tinteeŋ lɛ jɩ-lɩamɩŋ tʋɔŋ chɛŋ-lɩamɩŋ tapʋl-bumbuŋ nɛ La TƖƖNA bʋl wɩaa pɩ Mosis, lɛbɩ-la lɛ ʋ sɩ yie kɔ Iziral tɩŋŋaa teeŋ Sɩnaɩ tintee-hɩlɩɩ-la lɛ. Ʋ sɩ, 2“Dɩɩsɛ Iziral tɩŋŋaa kala, doho doho arɩ dɩa dɩa, a ŋmʋnsɛ baal na-kala yɩrɩŋ. 3Ŋ dɩ Arɔŋ maga dɩ ma dɩɩsɛ Iziral tɩɩna na-kala sɩ ŋaa baal a yi jɩsɩŋ mara koo a kɩɩ a jaŋ wuo mʋ laalɩŋ. 4Doho na-kala kʋhɩaŋ maga dɩ ʋ pɛ ma lɛ. 5Baala-la sɩ jaŋ pɛ ma lɛ yɩraa nɛ ŋ-la:
Rubiŋ doho nɩaa tʋɔŋ, Sediu nanʋala Elizu nɛ jaŋ pɛ.
6Simioŋ doho nɩaa tʋɔŋ, Zurisadai nanʋala Sɛlʋmɩɛl nɛ jaŋ pɛ.
7Juda doho nɩaa tʋɔŋ, Amɩnadab nanʋala Nasɔŋ nɛ jaŋ pɛ.
8Ɩsaka doho nɩaa tʋɔŋ, Zʋaa nanʋala Nɛtanɛl nɛ jaŋ pɛ.
9Zebuluŋ doho nɩaa tʋɔŋ, Heloŋ nanʋala Ɛlɩab nɛ jaŋ pɛ.
10Josɛf nanʋala Efirem doho nɩaa tʋɔŋ, Amihud nanʋala Ɛlɩsama nɛ jaŋ pɛ. Josɛf nanʋala Manasɛ doho nɩaa tʋɔŋ, Pedazu nanʋala Gamalɩɛl nɛ jaŋ pɛ.
11Bɛnjamɩŋ doho nɩaa tʋɔŋ, Gidioni nanʋala Abɩdaŋ nɛ jaŋ pɛ.
12Daŋ doho nɩaa tʋɔŋ, Amɩsadaɩ nanʋala Ahieza nɛ jaŋ pɛ.
13Asa doho nɩaa tʋɔŋ, Ɔkɩraŋ nanʋala Pagɩɛl nɛ jaŋ pɛ.
14Gad doho nɩaa tʋɔŋ, Dʋɛl nanʋala Ɛlɩasaf nɛ jaŋ pɛ.
15Nafɩtalɩ doho nɩaa tʋɔŋ, Ɛnaŋ nanʋala Ahɩra nɛ jaŋ pɛ.”
16Baalaa deemba nɛ ba lɩɩsɛ Iziral tɩŋŋaa tʋɔŋ ba ŋaa ba sɩpaalaaraa. Ba nɛ ŋaa Iziral tɩŋŋaa naabalɩmaba doho tʋɔŋ nɩaa kʋhɩasɩŋ.
17Ŋɩɩ nɛ Mosis arɩ Arɔŋ, a pɛ baala-la fii arɩ balɩa ba sɩ lɩɩsɛ lɛ 18-19ba yɩrɛ Iziral tɩŋŋaa kala kʋ hilimi Sɩnaɩ tintee-hɩlɩɩ-la lɛ, chɛŋ-lɩamɩŋ tapʋl-bumbuŋ. Ba dɩɩsɛ baala-la sɩ yi jɩsɩŋ mara koo a kɩɩ kʋŋ kʋŋ a ŋmʋnsɛ ba yɩraa, doho doho arɩ dɩa dɩa, arɩ ŋɩɩ La TƖƖNA sɩ dagɛ Mosis. 20Rubiŋ doho nɩaa tʋɔŋ, Iziral hambolibii bumbuŋ, baala-la kala sɩ yi jɩsɩŋ mara koo a kɩɩ a jaŋ wuo mʋ laalɩŋ nɛ ba dɩɩsɛ kʋŋ kʋŋ, a ŋmʋnsɛ ba yɩraa, doho doho arɩ dɩa dɩa. 21Rubiŋ doho nɩaa kala fa ŋaa bʋɩ mahɩŋ balɩa arɩ balɩdʋ arɩ zɔɔ-banɔŋ nɛ.
22Simioŋ doho nɩaa tʋɔŋ baala-la kala sɩ yi jɩsɩŋ mara koo a kɩɩ, a jaŋ wuo mʋ laalɩŋ nɛ ba dɩɩsɛ kʋŋ kʋŋ, a ŋmʋnsɛ ba yɩraa, doho doho arɩ dɩa dɩa. 23Simioŋ doho nɩaa kala fa ŋaa bʋɩ mahɩŋ balɩa arɩ fii arɩ nibi arɩ zɔɔ-batori nɛ.
24Gad doho nɩaa tʋɔŋ, baala-la kala sɩ yi jɩsɩŋ mara koo a kɩɩ a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 25Gad doho nɩaa kala fa ŋaa bʋɩ mahɩŋ balɩa arɩ banɔŋ arɩ zɔɔ-balɩdʋ arɩ mahɩŋ balɩa arɩ fii nɛ. 26Juda doho nɩaa tʋɔŋ, baala-la kala sɩ yi jɩsɩŋ mara koo a kɩɩ a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 27Juda doho nɩaa kala fa ŋaa bʋɩ mahɩŋ batori arɩ fii arɩ banɛsɛ arɩ zɔɔ-balɩdʋ nɛ. 28Ɩsaka doho nɩaa tʋɔŋ, baala-la kala sɩ yi jɩsɩŋ mara koo a kɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 29Ɩsaka doho nɩaa kala fa ŋaa bʋɩ mahɩŋ balɩa arɩ fii arɩ banɛsɛ arɩ zɔɔ-banɛsɛ nɛ. 30Zebuluŋ doho nɩaa tʋɔŋ baala-la kala sɩ yi jɩsɩŋ mara koo a kɩɩ a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 31Zebuluŋ doho nɩaa kala fa ŋaa bʋɩ mahɩŋ balɩa arɩ fii arɩ balɩpɛ arɩ zɔɔ-banɛsɛ nɛ. 32Efirem, Josɛf nanʋala doho nɩaa tʋɔŋ baala-la kala sɩ yi jɩsɩŋ mara koo a kɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 33Efirem doho nɩaa kala fa ŋaa bʋɩ mahɩŋ balɩa arɩ zɔɔ-banɔŋ nɛ. 34Manasɛ ma sɩ ŋaa Josɛf nanʋala, ʋ doho nɩaa tʋɔŋ baala-la kala sɩ yi jɩsɩŋ mara koo a kɩɩ a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 35Manasɛ doho nɩaa kala fa ŋaa bʋɩ mara arɩ fii arɩ balɩa arɩ zɔɔ-balɩa nɛ. 36Bɛnjamɩŋ doho nɩaa tʋɔŋ baala-la kala sɩ yi jɩsɩŋ mara koo a kɩɩ ŋɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 37Bɛnjamɩŋ doho nɩaa kala fa ŋaa bʋɩ mara arɩ fii arɩ banɔŋ arɩ zɔɔ-banɛsɛ nɛ. 38Daŋ doho nɩaa tʋɔŋ, baala-la kala sɩ yi jɩsɩŋ mara koo a kɩɩ ŋɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 39Daŋ doho nɩaa kala fa ŋaa bʋɩ mahɩŋ batori arɩ balɩa arɩ zɔɔ-balɩpɛ nɛ. 40Asa doho nɩaa tʋɔŋ, baala-la kala sɩ yi jɩsɩŋ mara koo a kɩɩ ŋɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 41Asa doho nɩaa kala fa ŋaa bʋɩ mahɩŋ balɩa arɩ kʋbala arɩ zɔɔ-banɔŋ nɛ. 42Nafɩtalɩ doho nɩaa tʋɔŋ, baala-la kala sɩ yi jɩsɩŋ mara koo a kɩɩ ŋɩɩ, a jaŋ wuo mʋ laalɩŋ nɛ ba dɩɩsɛ, a ŋmʋnsɛ ba yɩraa doho doho arɩ dɩa dɩa. 43Nafɩtalɩ doho nɩaa kala fa ŋaa bʋɩ mahɩŋ balɩa arɩ fii arɩ batori arɩ zɔɔ-banɛsɛ nɛ. 44Iziral tɩŋŋaa baala-la Mosis arɩ Arɔŋ arɩ sɩpaalaaraa fii arɩ balɩa-la sɩ chɩŋ ba doho nɩaa nyuŋ lɛ, ba dɩɩsɛ Iziral tɩmma-la nɛ ŋɩɩ. 45Iziral tɩŋŋaa baala-la kala sɩ yi jɩsɩŋ mara koo a kɩɩ ŋɩɩ, a jaŋ wuo mʋ laalɩŋ nɛ ba dɩɩsɛ dɩa dɩa. 46Ba kala fa ŋaa nɩaa bʋɩ zɔɔ-balɩdʋ arɩ batori arɩ zɔɔ-banɔŋ arɩ mahɩŋ balɩa arɩ fii nɛ.
47Ba bɩ Levi doho nɩaa-na dɩɩsa bʋa-la lɛ ba sɩɩ dɩɩsɛ Iziral tɩŋŋaa. 48La TƖƖNA fa bʋla pɩ Mosis, 49“Sɩ́ Levi doho nɩaa dɩɩsa pɛ Iziral tɩŋŋaa lɛ. 50Ama joŋ Wɩa dɩ-zɔŋ-la tɩntɩŋŋaa hɛ ba nɩsɩŋ lɛ. Ba nɛ maga dɩ ba chʋchʋŋ Wɩa dɩ-zɔŋ-la arɩ ʋ tʋɔŋ kɩaa kala lee na-kala ma sɩɩ mʋ. Ba nɛ jaŋ hɔnɔ golli Wɩa dɩ-zɔŋ-la a bibeŋ ʋ nyuŋ. 51Bʋa na-kala, dɩ ma nɩɩ chɛ ma churi Wɩa dɩ-zɔŋ-la a kaa mʋ lee, Levi doho nɩalɩŋ nɛ maga ba churu a kaa mʋ pɛ dɩ-falɩɩ-la ma sɩɩ mʋ. Dɩ nɩwogo kala nɛ mʋ kpagɛ Wɩa dɩ-zɔŋ-la, ʋ maga ma kpʋʋ nɛ. 52Iziral doho doho-la kala maga dɩ ba ŋmoo bugoo a hɔŋ, bugu kala arɩ ba magɩlɩŋ. 53Levi doho nɩaa-na maga dɩ ba hɛ ba lɛŋŋɛɛ a golli Wɩa dɩ-zɔŋ-la nɛ, lee-la Wɩa niiriŋ daga-la sɩ hɛ, a pɔ dɩ nʋʋkala sɩ́ Wɩa dɩ-zɔŋ-la teeŋ kɔ, a ŋaa dɩ mɩ baanɩŋ sii Iziral tɩŋŋaa nyuŋ. Levi doho nɩaa nɛ maga ba bibeŋ Wɩa dɩ-zɔŋ-la.”
54Ŋɩɩ nɛ Iziral tɩŋŋaa ŋaa wɩalɩŋ kala arɩ ŋɩɩ La TƖƖNA sɩ dagɛ Mosis.
Currently Selected:
NAMBABA 1: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
