LEVI DOHO NƖAA 14

Ŋɩɩ ba sɩ jaŋ pɩɩsɛ nɩa sɩ kɛŋ nyanyalɩŋ sɩɩ chol aŋ duori disiniŋ ta

1La TƖƖNA bʋla pɩ Mosis, 2“Wɩaa deemba nɛ Wɩɩsʋllɩ sɩpaalaara jaŋ to dɩ nyanyal-cholii nɛ kɛŋ nʋʋ, ka dɩ tɩɩna duori, dɩ ba kaa kɔ ʋ teeŋ dɩ ʋ pɩɩsɛ ʋ disiniŋ ta. 3Wɩɩsʋllɩ sɩpaalaara maga ʋ lɩɩ ba dɩhɔnʋŋ lɛ nɛ a benu. Dɩ ʋ nɛ na dɩ nyanyal-cholii nɛ sɛnɛ kɛnʋ ka ʋ duori, 4Wɩɩsʋllɩ sɩpaalaara maga dɩ ʋ leŋ dɩ nɩɩ-la sɩ duoro kɛŋ kɩŋkɛnsɩŋ tɩŋŋaa balɩa sɩ bɩ disiniŋ kɛnɛ a pɛ kuolu daaŋ lɛ arɩ gɛrɩpɛ-fɩaŋ a chɔl kaku-dɩgɩlɩŋ pɛ. 5Wɩɩsʋllɩ sɩpaalaara maga ʋ leŋ dɩ ba ŋaa lɩɩŋ sɩɩ bul a hɛ pupoiŋ lɛ a kɛŋ zaara-la dɔŋɔ chugili lɩɩ-la lɛ a kpʋ. 6Ka dɩ Wɩɩsʋllɩ sɩpaalaara joŋ zaarʋ-la sɩ ka a pɛ kuolu daa-la arɩ gɛrɩpɛ-fɩaŋ arɩ kaku-dɩgɩl-la lɛ a kɛŋ ba kala yʋ chal-la arɩ lɩɩ-la. 7Ʋ jaŋ lɩɩsa mɩsa hɛ nɩɩ-la disiniŋ ʋ sɩɩ chɛ ʋ pɩɩsa ta lɛ naansɩɩŋ bʋlɩpɛ aŋ heeli arɩ ʋ bɩra bɩ disiniŋ kɛnɛ, aŋ joŋ zaarʋ-la dɔŋɔ ʋ sɩ bɩ kpʋa a kaa lɩɩ ta pɔkɔŋ nyuŋ.

8Nɩɩ-la disiniŋ ʋ sɩ pɩɩsa ta maga dɩ ʋ chɛsɛ ʋ gɛnnɩŋ a fʋŋ ʋ pʋnaa kala aŋ fo lɩɩŋ. Dɩ ʋ nɛ ŋaa ŋɩɩ, ʋ bɩra bɩ disiniŋ kɛnɛ. Ŋɩɩ harɩŋ ʋ jaŋ kʋ jʋʋ ba dɩhɔnʋŋ, ama ʋ bɩ maga ʋ jʋʋ ʋ dɩa a kaa mʋ tapʋlaa balɩpɛ. 9Tapʋl-pɛɩ-la ʋ bɩra maga ʋ fʋŋ ʋ nyuŋ, ʋ tɔŋŋɔɔ, ʋ sɩɩ-pʋnaa arɩ ʋ yaraa pʋnaa kala. Ʋ maga ʋ chɛsɛ ʋ gɛnnɩŋ a fo lɩɩŋ. Dɩ ʋ nɛ ŋaa ŋɩɩ, ʋ bɩ disiniŋ kɛnɛ.

10Tapʋl-chori chɛɛŋ ʋ maga ʋ kɛŋ pie-bel-pɔrɔɔ balɩa arɩ pie-keeŋ sɩ yi jɩna, dɩ ba kʋŋkala sɩ nyɔɔ kɛŋ, a pɛ munuŋ gbaŋa arɩ mʋa ba sɩ kɛŋ nʋʋŋ buu arɩ nʋʋŋ loŋ kpaa magɛ dɔŋɔ, dɩ ba kaa ŋaa mɩaa Wɩɩsʋlʋŋ. 11Wɩɩsʋllɩ sɩpaalaara jaŋ kɛŋ nɩɩ-la arɩ kɩalɩŋ a kaa mʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ, mɩ-na ma TƖƖNA sɩpaaŋ.

12Wɩɩsʋllɩ sɩpaalaara jaŋ joŋ pie-bel-pɔrʋ-la dɔŋɔ arɩ nʋʋŋ loŋ kpaa magɛ dɔŋɔ a sʋl cheeriŋ Wɩɩsʋlʋŋ a kaa je aa zaarɛ. Ŋɩɩ ŋaa ʋ tɩtɩa Wɩɩsʋlɩɩ ʋ kaa je mɩ-na ma TƖƖNA sɩpaaŋ. 13Ʋ maga dɩ ʋ kpʋ pie-bel-pɔrʋ-la lee-la ba sɩ vɛnɛɛ kpʋ wʋbɔŋŋɔɔ joŋo chɛnɩŋ Wɩɩsʋlʋŋ pʋsʋŋ arɩ kʋnyɩgaa Wɩɩsʋlʋŋ pʋsʋŋ. Wʋbɔŋŋɔɔ joŋo chɛnɩŋ Wɩɩsʋlʋŋ pʋna sɩ ŋaa Wɩɩsʋllɩ sɩpaalaara kʋŋ ŋɩɩ, ŋɩɩ tɩtɩa nɛ cheeriŋ Wɩɩsʋlʋŋ kʋa ma ŋaa ʋ kʋŋ. Ʋ ŋaa kʋŋ zɔmʋŋ sɩ bɩ magɩa kɛnɛ nɛ. 14Wɩɩsʋllɩ sɩpaalaara jaŋ tagɛ cheeriŋ Wɩɩsʋlʋŋ pʋna-la chalɩŋ a lagɛ nɩɩ-la disiniŋ ʋ sɩ pɩɩsa ta nadiiŋ dɩgɩlɩŋ-pɩpaaŋ arɩ ʋ nadiiŋ nenii-baalɩŋ arɩ ʋ nadiiŋ naanii-baalɩŋ. 15Wɩɩsʋllɩ sɩpaalaara jaŋ joŋ nʋʋ-la a wansa hɛ ʋ tɩtɩa nagʋa nachala lɛ, 16a kɛŋ ʋ nadiiŋ wɩa neniiŋ tagɛ nʋʋ-la sɩ hɛ ʋ nachala lɛ a kaa mɩsɛ mɩ-na ma TƖƖNA sɩpaaŋ naansɩɩŋ bʋlɩpɛ. 17Wɩɩsʋllɩ sɩpaalaara maga dɩ ʋ kɛŋ ʋ nadiiŋ wɩa-neniiŋ a tagɛ nʋʋ-la sɩ hɛ ʋ nachala lɛ a lagɛ nɩɩ-la disiniŋ ʋ sɩ pɩɩsaa ta nadiiŋ dɩgɩlɩŋ-pɩpaaŋ, a lagɛ ʋ nadiiŋ nenii-baalɩŋ arɩ ʋ nadiiŋ naanii-baalɩŋ a daŋ cheeriŋ Wɩɩsʋlʋŋ pʋna chal-la lɛ. 18Nʋʋ-la sɩ ka, Wɩɩsʋllɩ sɩpaalaara jaŋ kaa tɩsɛ nɩɩ-la disiniŋ ʋ sɩ pɩɩsaa ta nyuŋ lɛ. Ŋ-la nɛ ʋ jaŋ ŋaa a pɩɩsɛ tɩɩna disiniŋ ta mɩ-na ma TƖƖNA sɩpaaŋ.

19Wɩɩsʋllɩ sɩpaalaara jaŋ kpʋ nɩɩ-la disiniŋ ʋ sɩ pɩɩsa tɩta wʋbɔŋŋɔɔ joŋo chɛnɩŋ Wɩɩsʋlʋŋ pʋna. Ʋ ŋɩɩ harɩŋ lɛ, ʋ jaŋ kpʋ kʋnyɩgaa Wɩɩsʋlʋŋ pʋna ma, 20a ŋaa Wɩɩsʋlʋŋ koru-la nyuŋ, a pɛ mɩaa Wɩɩsʋlʋŋ lɛ a pɩɩsɛ nɩɩ-la disiniŋ ta. Dɩ ʋ nɛ ŋaa ŋɩɩ, tɩɩna bɩra bɩ disiniŋ kɛnɛ.

21Dɩ nɩɩ-la nɛ ŋaa summu a bɩ pie-bel-pɔrɔɔ balɩa arɩ pie-keeŋ sɩ yi jɩna dɩ ba kʋŋkala sɩ nyɔɔ kɛŋ lɛ wuo yi, ʋ jaŋ kɛŋ pie-bel-pɔrʋŋ kaa kʋ ŋaa cheeriŋ Wɩɩsʋlʋŋ. Wɩɩsʋllɩ sɩpaalaara jaŋ kaa je a zaarɛ. Ŋɩɩ ŋaa Wɩɩsʋlɩɩ nɛ, a pɩɩsɛ nɩɩ-la disiniŋ ta. Ʋ jaŋ ŋaa munuŋ sɩ ŋaa nʋgʋgʋ gbaŋa sɩɩŋ a hɛ nʋʋŋ a buu a pɛ nʋʋŋ loŋ kpaa magɛ dɔŋɔ lɛ a ŋaa mɩaa Wɩɩsʋlʋŋ. 22Ʋ jaŋ kɛŋ kokosuŋ balɩa ma kɔ a joŋ dɔŋɔ ŋaa wʋbɔŋŋɔɔ joŋo chɛnɩŋ Wɩɩsʋlʋŋ aŋ joŋ dɔŋɔ ma ŋaa kʋnyɩgaa Wɩɩsʋlʋŋ.

23Tapʋl-chori chɛɛŋ, ʋ maga dɩ ʋ kɛŋ kɩalɩŋ ba sɩ jaŋ kaa pɩɩsɛ ʋ disiniŋ ta kaa mʋ Wɩɩsʋllɩ sɩpaalaara teeŋ, lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ, mɩ-na ma TƖƖNA sɩpaaŋ. 24Wɩɩsʋllɩ sɩpaalaara jaŋ joŋ cheeriŋ Wɩɩsʋlʋŋ pie-bel-pɔrʋ-la a pɛ nʋʋŋ loŋ kpaa magɛ dɔŋɔ-la lɛ a kaa je a zaarɛ. Ŋɩɩ ŋaa Wɩɩsʋlɩɩ ʋ kaa je mɩ-na ma TƖƖNA sɩpaaŋ. 25Ʋ jaŋ kpʋ cheeriŋ Wɩɩsʋlʋŋ pie-bel-bie-la a tagɛ ʋ chalɩŋ dɔnsʋŋ lagɛ nɩɩ-la disiniŋ ʋ sɩ pɩɩsaa ta nadiiŋ dɩgɩlɩŋ-pɩpaaŋ, ʋ nadiiŋ nenii-baalɩŋ arɩ ʋ nadiiŋ naanii-baalɩŋ. 26Wɩɩsʋllɩ sɩpaalaara jaŋ wansɛ nʋʋ-la dɔnsʋŋ hɛ ʋ tɩtɩa nagʋa nachala lɛ, 27a kɛŋ ʋ nadiiŋ wɩa-neniiŋ tagɛ nʋʋ-la sɩ hɛ ʋ nachala lɛ a mɩsɛ mɩ-na ma TƖƖNA sɩpaaŋ naansɩɩŋ bʋlɩpɛ. 28Ʋ jaŋ tagɛ nʋʋ-la sɩ hɛ ʋ nachala lɛ a lagɛ nɩɩ-la disiniŋ ʋ sɩ pɩɩsa tɩta lere-la tɩtɩa ʋ sɩ laa sɩpaaŋ tagɛ cheeriŋ Wɩɩsʋlʋŋ pʋna chalɩŋ lagɛ. 29Nʋʋ-la kʋkaanɩŋ sɩ hɛ Wɩɩsʋllɩ sɩpaalaara nachala lɛ, ʋ maga ʋ kaa tɩsɛ nɩɩ-la disiniŋ ʋ sɩ pɩɩsa tɩta nyuŋ lɛ, a pɩɩsɛ ʋ disiniŋ ta mɩ-na ma TƖƖNA sɩpaaŋ. 30Kokosu-la balɩa nɩɩ-la doluŋ sɩ yie ʋ kaa kɔ, ʋ jaŋ joŋo sʋl Wɩɩsʋlʋŋ, 31dɩ dɔŋɔ ŋaa wʋbɔŋŋɔɔ Wɩɩsʋlʋŋ kʋa, ka dɔŋɔ ma ŋaa kʋnyɩgaa Wɩɩsʋlʋŋ kʋa, a pɛ mɩaa Wɩɩsʋlʋŋ lɛ. Dɩ Wɩɩsʋllɩ sɩpaalaara nɛ ŋaa ŋɩɩ mɩ-na ma TƖƖNA sɩpaaŋ, ʋ pɩɩsɛ nɩɩ-la disiniŋ ta nɛ.”

32Wombie-la sɩ hɛ nɩmɛ a mʋʋ tɩgɛ nɩalɩŋ sɩ kɛŋ nyanyal-choloo aŋ duori aŋ bɩ kɩalɩŋ kɛnɛ ba sɩ maga dɩ ba kaa mʋ dɩ ba pɩɩsɛ ba disiniŋ ta nɛ ŋɩɩ.

Ŋɩɩ ba sɩ jaŋ pɩɩsɛ kʋa sɩ kʋla disiniŋ ta

33La TƖƖNA bɩra bʋla pɩ Mosis arɩ Arɔŋ, 34“Dɩ ma nɛ mʋ Kɛnaŋ tinteeŋ, lee-la mɩ sɩ joŋo pɩma, dɩ ʋ ŋaa ma kʋŋ, dɩ mɩ leŋ dɩ nʋʋ dɩa nyʋ-bumbugo tintee-la lɛ, 35nɩɩ-la sɩ tɩɩ dɩa-la maga dɩ ʋ mʋ bʋla pɩ Wɩɩsʋllɩ sɩpaalaara arɩ dɩa-la naga ʋʋ nyʋ nɛ. 36Wɩɩsʋllɩ sɩpaalaara maga dɩ ʋ leŋ dɩ ba mʋ paa dɩa-la tʋɔŋ kɩaa kala kʋ lɩɩ, dɩ ʋ sɩ́ magɩla bʋl dɩa-la tʋɔŋ kɩaa ma kɛŋ disiniŋ nɛ, ka dɩ ʋ-na jʋʋ a beŋ dɩa-la. 37Dɩ Wɩɩsʋllɩ sɩpaalaara nɛ jʋʋ dɩa-la, ʋ maga dɩ ʋ beŋ dɩa-la jeeŋ nɛ, dɩ ʋ nɛ na dɩ jee-la nyʋa a nagɛ jɔgɩlɩɩŋ koo a fɩɛsɛ aŋ dii jʋjʋʋ, 38ʋ jaŋ lɩɩ dɩa-la tʋɔŋ aŋ kɛŋ boiŋ tɔ tapʋlaa balɩpɛ. 39Tapʋl-pɛɩ chɛɛŋ Wɩɩsʋllɩ sɩpaalaara maga dɩ ʋ bɩra mʋ suri dɩa-la, a na dɩ jee-la nyʋ pɛ nɛɛ. 40Dɩ ʋ nɛ nyʋ pɛ, Wɩɩsʋllɩ sɩpaalaara maga dɩ ʋ leŋ ba chaarɛ tabɩa-la sɩ nyʋa a kaa lɩɩ ba taŋ lɛ, lee sɩ kɛŋ disiniŋ a ta, 41a leŋ dɩ ba paasɛ dɩa-la tʋɔŋ kala a golli, a kɛŋ hagɩla-la lɩɩ ba taŋ lɛ, lee sɩ kɛŋ disiniŋ. 42Lere-la tabɩaa sɩ nyʋa ba chaara ta, ba jaŋ tʋɔsɛ tabɩɩ-falaa a kaa mʋ hɛ lere-la a wasa taarɛ dɩa-la kala.

43Dɩa-la tabɩaa sɩ nyʋa ba chaara ta aŋ paasɛ a taarɛ, dɩ ʋ nɛ bɩra nyʋa, 44Wɩɩsʋllɩ sɩpaalaara jaŋ jʋʋ a beŋ dɩa-la nyʋna-la, dɩ ʋ nɛ ŋaa nyʋ bɔŋ, dɩa-la kɛŋ disiniŋ nɛ. 45Wɩɩsʋllɩ sɩpaalaara jaŋ leŋ dɩ ba ŋmoo dɩa-la lo, a chaarɛ ʋ tiebiee, ʋ daasɩŋ a paa ʋ tɩarɩŋ a kaa lɩɩ ta taŋ-la harɩŋ, lee-la sɩ kɛŋ disiniŋ.

46Tapʋlaa balɩpɛ-la Wɩɩsʋllɩ sɩpaalaara sɩ kɛŋ dɩa-la tɔ, dɩ nʋʋ nɛ jʋʋ dɩa-la, ʋ jaŋ kɛŋ disiniŋ tapʋlɩɩ-la kala dɩ wɩa tuu jʋʋ. 47Dɩ nʋʋ nɛ pɩŋ dɩa-la tʋɔŋ koo dɩ ʋ nɛ dii kɩaa dɩa-la tʋɔŋ, ʋ maga dɩ ʋ chɛsɛ ʋ gɛnnɩŋ.

48Ba sɩ taarɛ dɩa-la ŋɩɩ, dɩ Wɩɩsʋllɩ sɩpaalaara nɛ na dɩ dɩa-la bɩra bɩ nyʋa, ʋ maga dɩ ʋ heeli arɩ dɩa-la bɩ disiniŋ kɛnɛ, nyʋna-la lɛlɛ nɛ. 49Dɩ ʋ nɩɩ chɛ dɩ ʋ pɩɩsɛ dɩa-la disiniŋ ta, ʋ maga dɩ ʋ kɛŋ kɩŋkɛnsɩŋ tɩŋŋaa balɩa arɩ kuolu-daaŋ arɩ gɛrɩpɛ-fɩaŋ arɩ kaku-dɩgɩlɩŋ a kaa pɩɩsɛ dɩa-la disiniŋ ta. 50Ʋ jaŋ ŋaa lɩɩŋ sɩɩ bul a hɛ pupoiŋ tʋɔŋ aŋ kɛŋ zaara-la dɔŋɔ chugili lɩɩ-la lɛ a kpʋ. 51Ʋ jaŋ joŋ kuolu daa-la arɩ kaku-dɩgɩl-la arɩ gɛrɩpɛ-fɩaŋ-la arɩ zaarʋ-la ʋ sɩ bɩ kpʋa, a kaa yuu chal-la arɩ lɩɩ-la sɩ hɛ pupoiŋ tʋɔŋ a kaa mɩsɛ dɩa-la naansɩɩŋ bʋlɩpɛ. 52Ʋ jaŋ kɛŋ zaarʋ-la chalɩŋ, lɩɩ-bulo lɩɩ-la, zaarɩ-la ʋ sɩ bɩ kpʋa, kuolu daa-la, kaku-dɩgɩl-la arɩ gɛrɩpɛ-fɩaŋ-la a kaa pɩɩsɛ dɩa-la disiniŋ ta. 53Ʋ jaŋ kɛŋ zaarʋ-la dɔŋɔ ʋ sɩ bɩ kpʋa lɩɩ ta pɔkɔŋ nyuŋ. Dɩ ʋ nɛ ŋaa ŋɩɩ, ʋ pɩɩsɛ dɩa-la disiniŋ ta nɛ, ʋ bɩra bɩ disiniŋ kɛnɛ.”

54Wombie-la ma sɩ jaŋ to a mʋʋ tɩgɛ nyanyal-choloo lɛ arɩ naawɩɩlɩŋ sɩɩ tɩsʋ, 55arɩ gɛrɩŋ sɩ kʋla koo dɩa sɩ nyʋ-bumbugo, 56koo nʋʋ lee sɩ ŋmɛrɛ arɩ nʋʋ yaraa sɩ nɛnɛ koo naawɩɩlɩŋ sɩ pʋlla lɛ nɛ ŋɩɩ, 57dɩ ba wuo jɩŋ bʋa-la lɛ kʋŋ sɩ kɛŋ disiniŋ arɩ bʋa-la lɛ ʋ sɩ bɩ disiniŋ kɛnɛ.

Wombie-la sɩ hɛ nɩmɛ a mʋʋ tɩgɛ nyanyal-choloo arɩ dɩa sɩ nyʋ-bumbugo lɛ nɛ ŋɩɩ.

Currently Selected:

LEVI DOHO NƖAA 14: SIS

Highlight

Copy

Compare