LEVI DOHO NƖAA 15

Kɩalɩŋ sɩ yie lɩɩ nʋʋ yaraa lɛ a leŋ ʋ kɛŋ disiniŋ

1La TƖƖNA bʋla pɩ Mosis arɩ Arɔŋ, 2“Má bʋl wɩaa deemba pɩ Iziral tɩŋŋaa: ‘Dɩ lɩɩŋ nɩɩ lɩɩ baal na-kala faagaa lɛ, lɩɩ-la kɛŋ disiniŋ nɛ. 3Dɩ lɩɩ-la nɩɩ lɩɩ ʋ faagaa lɛ deeŋ deeŋ koo dɩ ʋ nɛ leŋe, ʋ ha kɛŋ disiniŋ nɛ.

4Baal-la faagaa lɛ lɩɩŋ sɩɩ lɩɩ, dɩ ʋ nɛ pɩŋ bɔsɔ na-kala lɛ, bɔsɔ-la jaŋ kɛŋ disiniŋ. Kʋŋ na-kala lɛ ʋ sɩ hɔnɔ, kʋ-la ma jaŋ kɛŋ disiniŋ. 5Nʋʋ na-kala nɛ digi ʋ kʋpɩnɩŋ, ʋ maga ʋ chɛsɛ ʋ gɛnnɩŋ a fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ. 6Dɩ nʋʋkala nɛ hɔŋ kʋŋ nyuŋ baal-la sɩ hɔnɔ, ʋ maga ʋ chɛsɛ ʋ gɛnnɩŋ nɛ aŋ fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

7Dɩ nʋʋ nɛ digi nɩɩ-la lɩɩŋ sɩɩ lɩɩ ʋ faagaa lɛ, ʋ maga ʋ chɛsɛ ʋ gɛnnɩŋ a fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

8Dɩ nɩɩ-la faagaa lɛ lɩɩŋ sɩɩ lɩɩ nɛ tʋ nantʋɔrʋŋ hɛ nʋʋ sɩ bɩ disiniŋ kɛnɛ lɛ, tɩɩna jaŋ kɛŋ disiniŋ, ʋ maga dɩ ʋ fo lɩɩŋ a chɛsɛ ʋ gɛnnɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

9Kʋŋ na-kala nɩɩ-la faagaa lɛ lɩɩŋ sɩɩ lɩɩ sɩ jɩla vɩvɛŋ, kʋ-la kpasa lɛ ʋ sɩ hɔnɔ jaŋ kɛŋ disiniŋ. 10Dɩ nʋʋkala nɛ digi kɩalɩŋ nyuŋ ʋ sɩ hɔnɔ, tɩɩna jaŋ kɛŋ disiniŋ dɩ wɩa tuu jʋʋ. Dɩ nʋʋ ma nɛ paa kɩalɩŋ, ʋ maga ʋ chɛsɛ ʋ gɛnnɩŋ a fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

11Dɩ nɩɩ-la faagaa lɛ lɩɩŋ sɩɩ lɩɩ nɛ bɩ ʋ nɩsɩŋ sɔmɔ aŋ digi nʋʋ, tɩɩna maga ʋ chɛsɛ ʋ gɛnnɩŋ a fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

12Pupoi na-kala nɩɩ-la faagaa lɛ lɩɩŋ sɩɩ lɩɩ sɩ dige, ʋ maga dɩ ba ŋmoo yɛrɛ nɛ. Dɩ ʋ nɛ ŋaa daaŋ nɛ ba kaa ŋaa kʋ-la, ʋ maga dɩ ba tiisu.

13Dɩ nɩɩ-la faagaa lɛ lɩɩŋ sɩɩ lɩɩ nɛ duoro, ʋ maga ʋ gbɛrɛ tapʋlaa balɩpɛ a chɛsɛ ʋ gɛnnɩŋ aŋ ŋaa lɩɩ-bulo lɩɩŋ fo. Dɩ ʋ nɛ ŋaa ŋɩɩ, ʋ bɩra bɩ disiniŋ kɛnɛ. 14Tapʋl-chori chɛɛŋ ʋ jaŋ kɛŋ kokosuŋ balɩa mʋ mɩ-na ma TƖƖNA sɩpaaŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a joŋo pɩ Wɩɩsʋllɩ sɩpaalaara. 15Wɩɩsʋllɩ sɩpaalaara jaŋ laa a joŋ dɔŋɔ a sʋl wʋbɔŋŋɔɔ joŋo chɛnɩŋ Wɩɩsʋlʋŋ aŋ joŋ dɔŋɔ ma sʋl kʋnyɩgaa Wɩɩsʋlʋŋ pɩ mɩ-na ma TƖƖNA. Ŋ-la nɛ ʋ jaŋ ŋaa a pɩɩsɛ nɩɩ-la faagaa lɛ lɩɩŋ sɩɩ lɩɩ disiniŋ ta.

16Dɩ baal nɛ fɩɩ bafɩɩrɩŋ, ʋ maga ʋ chaasa fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ. 17Dɩ bafɩɩrɩ-la nɛ digi gɛrɩŋ koo teniŋ, ʋ maga ba joŋo chɛsɛ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ. 18Dɩ baal arɩ haal nɛ pɛ bɔsɔ aŋ sii, ʋ maga dɩ ba fo lɩɩŋ, arɩ ŋɩɩ kala ba ha jaŋ kɛŋ disiniŋ dɩ wɩa tuu jʋʋ.

19Dɩ haala nɛ hɛ tɩŋa, ʋ jaŋ kɛŋ disiniŋ tapʋlaa balɩpɛ, dɩ nʋʋkala nɛ digu, ʋ jaŋ kɛŋ disiniŋ dɩ wɩa tuu jʋʋ.

20Haal-la sɩ hɛ tɩŋa nɛ pɩŋ kʋŋ nyuŋ koo dɩ ʋ hɔnɔ nɛ, kʋ-la jaŋ kɛŋ disiniŋ. 21Dɩ nʋʋ na-kala nɛ digi ʋ kʋpɩnɩŋ, ʋ maga dɩ ʋ chɛsɛ ʋ gɛnnɩŋ nɛ a fo lɩɩŋ, arɩ ŋɩɩ kala ʋ jaŋ kɛŋ disiniŋ dɩ wɩa tuu jʋʋ. 22-23Dɩ nʋʋkala nɛ digi kʋŋ na-kala nyuŋ ʋ sɩ hɔnɔ, ʋ maga dɩ ʋ chɛsɛ ʋ gɛnnɩŋ nɛ a fo lɩɩŋ, arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

24Dɩ baal nɛ kɛŋ haal-la sɩ hɛ tɩŋa pɩŋ, ʋ jaŋ kɛŋ disiniŋ tapʋlaa balɩpɛ. Bɔsɔ na-kala lɛ baal-la sɩ pɩna jaŋ kɛŋ disiniŋ.

25Dɩ haal nɛ hɛ tɩŋa dɩ ʋ kieli bʋa-la lɛ sɩ maga dɩ ʋ dɛrɛ, koo dɩ ʋ hɛ tɩŋa bʋa-la lɛ sɩ bɩ maga dɩ ʋ hɛ, ʋ ha kɛŋ disiniŋ nɛ. 26Dɩ ʋ nɛ pɩŋ bɔsɔ kala lɛ, bɔsɔ-la kɛŋ disiniŋ nɛ. Dɩ ʋ nɛ hɔŋ kʋŋ ma kala lɛ, kʋ-la ma jaŋ kɛŋ disiniŋ. 27Nʋʋ na-kala saa sɩ digi kɩaa deemba, ʋ tɩɩna ma kɛŋ disiniŋ nɛ, ʋ maga dɩ ʋ chɛsɛ ʋ gɛnnɩŋ nɛ a fo lɩɩŋ arɩ ŋɩɩ kala ʋ ha jaŋ kɛŋ disiniŋ dɩ wɩa tuu jʋʋ.

28Dɩ ʋ tɩŋa-la nɛ dɛrɛ, ʋ maga dɩ ʋ dɩɩsɛ tapʋlaa balɩpɛ nɛ, ʋ ŋɩɩ harɩŋ ʋ bɩra bɩ disiniŋ kɛnɛ. 29Tapʋl-chori chɛɛŋ haal-la maga dɩ ʋ kɛŋ kokosuŋ balɩa kaa mʋ pɩ Wɩɩsʋllɩ sɩpaalaara lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ. 30Wɩɩsʋllɩ sɩpaalaara jaŋ joŋ dɔŋɔ a sʋl wʋbɔŋŋɔɔ joŋo chɛnɩŋ Wɩɩsʋlʋŋ a joŋ dɔŋɔ ma sʋl kʋnyɩgaa Wɩɩsʋlʋŋ. Ŋ-la nɛ Wɩɩsʋllɩ sɩpaalaara jaŋ ŋaa mɩ-na ma TƖƖNA sɩpaaŋ a pɩɩsɛ haal-la disiniŋ ta.

31Ʋ maga dɩ ŋ chagɩlɛ Iziral tɩŋŋaa dɩ ba lɩɩsɛ ba tɩtɩa kɩalɩŋ sɩ jaŋ leŋ dɩ ba kɛŋ disiniŋ lɛ, dɩ ba sɩ́ disiniŋ ŋaa hɛ lɛbɩ-la lɛ mɩ sɩ yie kɔ ma teeŋ, dɩ ŋɩɩ leŋ dɩ ba sɩ́ sʋʋ.’ ”

32Wombie-la sɩ maga baala faagaa lɛ lɩɩŋ sɩɩ lɩɩ koo baala sɩ fɩɩ bafɩɩrɩŋ chei ʋ tɩtɩa nɛ ŋɩɩ, 33arɩ haala sɩ hɛ tɩŋa koo haala sɩ hɛ tɩŋa bʋa-la lɛ sɩ bɩ maga dɩ ʋ hɛ koo baala sɩ kɛŋ haala sɩ hɛ tɩŋa pɩŋ a kɛŋ disiniŋ nɛ ŋɩɩ.

Currently Selected:

LEVI DOHO NƖAA 15: SIS

Highlight

Copy

Compare