LEVI DOHO NƖAA 13
13
Nii-la ba bile a mʋ tɩgɛ yaraa nyanyalaa sɩ jaŋ wuo chol lɛ
1La TƖƖNA bʋla pɩ Mosis arɩ Arɔŋ, 2“Dɩ nʋʋ lee nɛ ŋmɛrɛ koo a pisimi koo a pʋllɛ sɩ jaŋ wuo kʋ bɩrɩmɛ yaraa nyanyalɩɩ sɩɩ chol, ʋ maga dɩ ba kɛnʋ kaa kɔ Arɔŋ sɩ ŋaa Wɩɩsʋllɩ sɩpaalaara teeŋ koo ʋ hambolibiisiŋ dɔŋɔ ma sɩ ŋaa Wɩɩsʋllɩ sɩpaalaara. 3Wɩɩsʋllɩ sɩpaalaara maga dɩ ʋ beŋ nɩɩ-la yaraa lee-la nɛ. Dɩ pʋna-la sɩ hɛ lee-la nɛ bɩrɩmɛ kʋpʋllʋŋ ka dɩ lee-la mʋʋra tuu, ŋɩɩ na nyanyalɩɩ-la ŋaa nyanyalɩɩ sɩ jaŋ wuo chol nɛ. Dɩ Wɩɩsʋllɩ sɩpaalaara nɛ na wɩaa deemba, ʋ maga dɩ ʋ heeli arɩ nɩɩ-la kɛŋ disiniŋ nɛ. 4Dɩ lee-la sɩ ŋmɛrɛ koo a pisimi nɛ pʋlla, ka dɩ lee-la bɩ mʋʋra tuu, dɩ pʋna-la ma sɩ hɛ lee-la bɩ pʋlla, Wɩɩsʋllɩ sɩpaalaara maga dɩ ʋ pɔ dɩ tɩɩna sɩ́ nɩaa tʋɔŋ guolu tapʋlaa balɩpɛ. 5Wɩɩsʋllɩ sɩpaalaara maga dɩ ʋ bɩra benu tapʋl-pɛɩ-la chɛɛŋ. Dɩ ʋ nɛ na dɩ lee-la ha bɩ bɩrɩma koo a kiere pɛ, ʋ ha maga dɩ pɔ ʋ sɩ́ nɩaa tʋɔŋ guolu tapʋlaa balɩpɛ. 6Dɩ tapʋl-pɛɩ-la nɛ bɩra kʋ yi, ʋ maga dɩ Wɩɩsʋllɩ sɩpaalaara bɩra benu. Dɩ lee-la sɩ ŋmɛrɛ koo a pisimi nɛ fʋɔra, Wɩɩsʋllɩ sɩpaalaara maga dɩ ʋ heeli arɩ tɩɩna bɩ disiniŋ kɛnɛ, ʋ lee-la ta pisimi nɛ. Tɩɩna maga dɩ ʋ chɛsɛ ʋ gɛnnɩŋ nɛ, dɩ ʋ nɛ ŋaa ŋɩɩ, ʋ bɩ disiniŋ kɛnɛ. 7Ama dɩ Wɩɩsʋllɩ sɩpaalaara nɛ benu aŋ heeli arɩ ʋ bɩ disiniŋ kɛnɛ, ka ŋɩɩ harɩŋ dɩ tɩɩna na arɩ ʋ lee-la sɩ pisime kiere pɛ, ʋ maga dɩ ʋ bɩra kɛŋ ʋ tɩtɩa mʋ dagɛ Wɩɩsʋllɩ sɩpaalaara nɛ. 8Wɩɩsʋllɩ sɩpaalaara maga dɩ ʋ bɩra benu nɛ. Dɩ ʋ nɛ na dɩ lee-la sɩ pisime nɛ sɛnɛ kiere pɛ, ʋ maga dɩ ʋ heeli arɩ tɩɩna kɛŋ disiniŋ nɛ, nyanyalɩɩ-la ŋaa nyanyal-cholii nɛ.
9Dɩ nyanyal-cholii nɛ hɛ nʋʋ lɛ, ʋ maga dɩ ba kɛnʋ mʋ Wɩɩsʋllɩ sɩpaalaara teeŋ nɛ. 10Wɩɩsʋllɩ sɩpaalaara maga dɩ ʋ benu, dɩ ʋ nɛ na tɩɩna yaraa lee ŋmɛrɛ aŋ pʋllɛ a mirisi, ka dɩ pʋna-la sɩ hɛ lee-la ma pʋllɛ, 11ʋ ŋaa nyanyalɩɩ nɛ sɩ jaŋ dieni ʋ yaraa lɛ, Wɩɩsʋllɩ sɩpaalaara maga dɩ ʋ heeli arɩ tɩɩna kɛŋ disiniŋ nɛ. Ama ʋ bɩra bɩ maga dɩ ʋ lɩɩsʋ ta nɩaa tʋɔŋ a chɩchɛ dɩ ʋ na dɩ ʋ kɛŋ disiniŋ nɛ, bɛɛ wɩaa ʋ folo kɛŋ disiniŋ nɛ.
12Dɩ nyanyalɩɩ-la nɛ laa tɩɩna yaraa kala, 13dɩ Wɩɩsʋllɩ sɩpaalaara na dɩ ʋ yaraa kala pʋlla, ʋ maga dɩ ʋ heeli arɩ ʋ bɩ disiniŋ kɛnɛ. 14Ama bʋa-la na-kala lɛ dɩ ʋ yaraa nɛ kʋ melli, ʋ ŋaa nyanyalɩɩ sɩɩ chol nɛ. 15Dɩ Wɩɩsʋllɩ sɩpaalaara nɛ na ŋɩɩ, ʋ maga dɩ ʋ heeli arɩ tɩɩna kɛŋ disiniŋ nɛ. Ʋ kɛŋ nyanyalɩɩ sɩɩ chol nɛ. 16Dɩ nɩɩ-la yara-la sɩ melle nɛ bɩrɩma a pʋllɛ, ʋ maga dɩ tɩɩna kɛŋ ʋ tɩtɩa mʋ dagɛ Wɩɩsʋllɩ sɩpaalaara nɛ. 17Wɩɩsʋllɩ sɩpaalaara jaŋ benu, dɩ ʋ nɛ na dɩ naawɩɩla-la sɩ hɛ ʋ lɛ nɛ bɩrɩma a pʋllɛ, ʋ jaŋ heeli arɩ ʋ bɩ disiniŋ kɛnɛ.
18Dɩ mɔpʋla nɛ ŋmɛrɛ nʋʋ lɛ aŋ fɩɛlɛ, 19ka dɩ lee-la jɩgɛ a fɩɛsɛ koo a pʋllɛ, ʋ maga dɩ ʋ kɛŋ ʋ tɩtɩa mʋ dagɛ Wɩɩsʋllɩ sɩpaalaara nɛ. 20Wɩɩsʋllɩ sɩpaalaara maga dɩ ʋ benu. Dɩ ʋ nɛ na dɩ lee-la nɛ mʋʋra tuu ka dɩ pʋna-la sɩ hɛ lee-la pʋllɛ, ʋ maga dɩ Wɩɩsʋllɩ sɩpaalaara heeli arɩ tɩɩna kɛŋ disiniŋ nɛ, mɔpʋla-la ka chol nɛ. 21Dɩ Wɩɩsʋllɩ sɩpaalaara nɛ beŋ lee-la dɩ ʋ pʋnaa bɩ pʋlla, ka lee-la ma bɩ mʋʋra tuu aŋ nagɛ dɩ ʋ fʋɔra, ʋ maga dɩ ʋ pɔ tɩɩna sɩ́ nɩaa tʋɔŋ guolu tapʋlaa balɩpɛ. 22Dɩ jɩgɩ-la nɛ kiere pɛ, Wɩɩsʋllɩ sɩpaalaara maga ʋ heeli arɩ tɩɩna kɛŋ disiniŋ nɛ. Nyanyalɩɩ-la ŋaa nyanyal-cholii nɛ. 23Dɩ jɩgɩ-la nɛ bɩ jalla pɛ, Wɩɩsʋllɩ sɩpaalaara maga dɩ ʋ heeli arɩ tɩɩna bɩ disiniŋ kɛnɛ, ʋ ta ŋaa fʋfʋʋ nɛ.
24Dɩ nʋʋ yaraa nɛ folo dɩ lee-la sɩ folo pʋllɛ koo a fɩɛsɛ, 25Wɩɩsʋllɩ sɩpaalaara maga ʋ beŋ lee-la sɩ folo. Dɩ ʋ nɛ na dɩ lee-la mʋʋra tuu, ka pʋna-la sɩ hɛ lee-la pʋllɛ, nyanyal-cholii nɛ suomi dɩ-folii-la lɛ a kʋkɔ ŋɩɩ. Wɩɩsʋllɩ sɩpaalaara maga ʋ heeli arɩ tɩɩna kɛŋ disiniŋ nɛ. 26Ama dɩ Wɩɩsʋllɩ sɩpaalaara nɛ na dɩ pʋna-la sɩ hɛ lee-la nɛ bɩ pʋlla, dɩ lee-la ma bɩ mʋʋra tuu aŋ fʋɔrɛ, Wɩɩsʋllɩ sɩpaalaara maga dɩ ʋ lɩɩsʋ nɩaa tʋɔŋ nɛ tapʋlaa balɩpɛ. 27Wɩɩsʋllɩ sɩpaalaara maga ʋ bɩra beŋ tɩɩna nɛ tapʋl-pɛɩ chɛɛŋ dɩ ʋ nɛ na lee-la dɩ ʋ kiere pɛ. Ʋ maga ʋ heeli arɩ tɩɩna kɛŋ disiniŋ nɛ, nyanyal-cholii nɛ kɛnʋ. 28Ama dɩ lee-la nɛ bɩ kiere pɛ aŋ fɩɛlɛ, Wɩɩsʋllɩ sɩpaalaara maga ʋ heeli arɩ tɩɩna bɩ disiniŋ kɛnɛ. Lee-la ta ŋaa fʋfʋʋ nɛ.
29Dɩ baal koo haal nɛ kɛŋ naawɩɩlɩŋ ʋ nyuŋ lɛ koo ʋ talaŋa lɛ, 30Wɩɩsʋllɩ sɩpaalaara maga ʋ beŋ naawɩɩl-la, dɩ ʋ nɛ na lee-la dɩ ʋ mʋʋra tuu, ka dɩ pʋna-la ma sɩ hɛ lee-la gɩl, ʋ maga dɩ ʋ heeli arɩ tɩɩna kɛŋ disiniŋ nɛ. Naawɩɩ-la ŋaa dʋdɔɔ nɛ, ʋʋ chol nɛ. 31Ama dɩ Wɩɩsʋllɩ sɩpaalaara nɛ na naawɩɩl-la bɩ mʋʋra tuu, dɩ lee-la pʋnaa ma bɩ bɩrɩma, ʋ maga dɩ ʋ lɩɩsʋ nɩaa tʋɔŋ nɛ tapʋlaa balɩpɛ. 32Tapʋl-pɛɩ chɛɛŋ Wɩɩsʋllɩ sɩpaalaara maga ʋ bɩra beŋ naawɩɩl-la nɛ, dɩ ʋ nɛ na dɩ ʋ bɩ kiere pɛ a bɩ mʋʋra tuu, ka dɩ pʋna-la ma sɩ hɛ lee-la bɩ gɩla, 33ʋ maga dɩ tɩɩna fʋŋ ʋ nyuŋ koo ʋ tɔŋŋɔɔ aŋ leŋ naawɩɩl-la leriŋ. Wɩɩsʋllɩ sɩpaalaara jaŋ lɩɩsʋ nɩaa tʋɔŋ tapʋlaa balɩpɛ. 34Tapʋl-pɛɩ chɛɛŋ Wɩɩsʋllɩ sɩpaalaara maga ʋ bɩra benu nɛ. Dɩ ʋ nɛ na dɩ naawɩɩl-la bɩ kiere pɛ, lee-la ma bɩ mʋʋra tuu, Wɩɩsʋllɩ sɩpaalaara maga ʋ heeli arɩ tɩɩna bɩ disiniŋ kɛnɛ. Tɩɩna maga ʋ chɛsɛ ʋ gɛnnɩŋ, dɩ ʋ nɛ ŋaa ŋɩɩ, ʋ bɩra bɩ disiniŋ kɛnɛ. 35Ama ŋɩɩ harɩŋ lɛ, dɩ naawɩɩl-la nɛ kiere pɛ, 36Wɩɩsʋllɩ sɩpaalaara maga ʋ bɩra benu nɛ, dɩ naawɩɩl-la nɛ kiere, ʋ bɩ maga ʋ bee chɩchɛ pʋŋ-gɩlaa, ʋ maga ʋ jɩŋ arɩ tɩɩna kɛŋ disiniŋ nɛ. 37Ama Wɩɩsʋllɩ sɩpaalaara nɛ na dɩ lee-la bɩ bɩrɩma ka pʋŋ-bisiŋ nyʋ lee-la, naawɩɩl-la fɩɛla nɛ, ʋ maga ʋ heeli arɩ tɩɩna bɩ disiniŋ kɛnɛ.
38Dɩ baal koo haal yaraa nɛ lagɩsɛ kʋpʋllʋŋ, 39Wɩɩsʋllɩ sɩpaalaara maga ʋ beŋ tɩɩna lere-la sɩ lagɩsa nɛ. Dɩ ʋ nɛ na dɩ-lagɩsɩa-la bɩ chaasa pʋllɛ, ʋ maga ʋ heeli arɩ tɩɩna bɩ disiniŋ kɛnɛ, kɩalɩŋ ta lagɩsɛ nɛ.
40Dɩ baala nyuŋ nɛ puoro, ʋ bɩ disiniŋ kɛnɛ. 41Dɩ ʋ nyuŋ kala nɛ bɩ puoro, ka ʋ tile dʋndʋŋa nɛ puori, ʋ bɩ disiniŋ kɛnɛ. 42Ama dɩ dɩ-puori-la nɛ kɛŋ naawɩɩl sɩ fɩɛsa koo a pʋllɛ, nyanyal-cholii nɛ suomi tɩɩna nyuŋ koo ʋ tile lɛ ŋɩɩ. 43Wɩɩsʋllɩ sɩpaalaara maga ʋ benu nɛ. Dɩ ʋ nɛ na naawɩɩl-la sɩ hɛ ʋ nyuŋ koo ʋ tile lɛ nɛ fɩɛsa a pʋllɛ a nagɛ nyanyal-cholii, 44tɩɩna kɛŋ nyanyal-cholii-la nɛ. Wɩɩsʋllɩ sɩpaalaara maga ʋ heeli arɩ ʋ kɛŋ disiniŋ nɛ.
45Nɩɩ-la sɩ kɛŋ nyanyal-cholii-la maga ʋ laalɛ gɛrɩ-kɔsʋmɔɔ nɛ a sɩ́ ʋ nyuŋ chaasʋ aŋ kɛŋ kʋa tɔ ʋ niiŋ, aŋ bʋbʋl: ‘Mɩ kɛŋ disiniŋ nɛ! Mɩ kɛŋ disiniŋ nɛ!’ 46Bʋa-la kala lɛ nyanyal-cholii-la sɩ hɛ ʋ lɛ, ʋ kɛŋ disiniŋ nɛ. Ʋ bɩ maga dɩ ʋ guoli nɩaa tʋɔŋ, ʋ maga ʋ lɩɩ ba dɩhɔnʋŋ tʋɔŋ.
Nii-la ba sɩ bile a mʋ tɩgɛ kɩaa kʋlʋŋ lɛ
47Dɩ gɛrɩŋ nɛ kʋla, dɩ ʋ ŋaa pʋnaa gɛrɩŋ koo gɛrɩpɛ fʋfʋlʋŋ, 48dɩ gɛrɩ-yuolii nɛ koo dɩ gɛrɩ-sʋalʋŋ nɛ koo dɩ teniŋ nɛ ba kaa ŋaa kʋ-la, 49dɩ kʋl-na-la sɩ hɛ gɛrɩ-la lɛ koo teŋ-la lɛ koo gɛrɩ-sʋalɩɩ-la lɛ nɛ fɩɛsa koo dɩ ʋ ŋaa jɔgɩlɩɩŋ, ʋ ŋaa kʋŋ sɩɩ chol nɛ, ʋ maga dɩ ba kaa mʋ dagɛ Wɩɩsʋllɩ sɩpaalaara nɛ. 50Wɩɩsʋllɩ sɩpaalaara maga ʋ beŋ kʋ-la sɩ kʋla nɛ aŋ laa bil tapʋlaa balɩpɛ. 51Tapʋl-pɛɩ chɛɛŋ ʋ bɩra maga ʋ beŋ kʋ-la nɛ. Dɩ kʋl-na-la nɛ pʋŋaa pɛ gɛrɩ-la lɛ koo teŋ-la lɛ koo gɛrɩ-sʋalɩɩ-la lɛ, kʋl-na-la ŋaa kʋl-bɔŋ nɛ. Kʋ-la kɛŋ disiniŋ nɛ. 52Wɩɩsʋllɩ sɩpaalaara maga ʋ nyɩgɛ gɛrɩ-la koo kʋla na-kala lɛ kʋl-na-la sɩ hɛ, bɛɛ wɩaa kʋl-na-la ŋaa kʋl-bɔŋ nɛ.
53Ama Wɩɩsʋllɩ sɩpaalaara nɛ bene a na dɩ kʋl-na-la sɩ hɛ gɛrɩ-la lɛ koo teŋ-la lɛ koo gɛrɩ-sʋalɩɩ-la lɛ nɛ bɩ pʋŋaa pɛ, 54ʋ maga ʋ leŋ dɩ ba chɛsɛ kʋ-la nɛ, dɩ ʋ joŋo bil tapʋlaa balɩpɛ. 55Tapʋl-pɛɩ chɛɛŋ Wɩɩsʋllɩ sɩpaalaara maga ʋ bɩra beŋ kʋ-la nɛ. Dɩ kʋl-na-la nɛ bɩ bɩrɩma a bɩ pʋŋaa pɛ ma, ʋ ha kɛŋ disiniŋ nɛ. Dɩ kʋl-na-la hɛ ʋ sɩɩ-zɔŋŋɔɔ lɛ nɛ, koo sɩɩ-bɔŋŋɔɔ lɛ, ʋ maga ʋ joŋo nyɩgɛ. 56Dɩ Wɩɩsʋllɩ sɩpaalaara nɛ bɩra bene dɩ dɩ-kʋlɩɩ-la nɩɩ lɛl gɛrɩ-la lɛ koo teŋ-la lɛ koo gɛrɩ-sʋalɩɩ-la lɛ, ʋ maga dɩ ʋ kɩɛsɛ lee-la fa sɩ kʋla ta nɛ. 57Ama dɩ ʋ nɛ kɩɛsɛ lee-la ta, ka dɩ kʋ-la bɩra kʋl, ʋ maga ba joŋo nyɩgɛ. 58Dɩ ʋ nɛ chɛsɛ gɛrɩ-la koo teŋ-la koo gɛrɩ-sʋalɩɩ-la, dɩ kʋl-na-la lɛl, ʋ maga dɩ ʋ bɩra chɛsɛ nɛ, dɩ ʋ nɛ ŋaa ŋɩɩ kʋla bɩra bɩ disiniŋ kɛnɛ.”
59Wombie-la sɩ hɛ nɩmɛ a mʋʋ tɩgɛ gɛnnɩŋ koo tenniŋ sɩ kʋla lɛ aa dagɛ ŋɩɩ ba sɩ kɛŋ disiniŋ arɩ ŋɩɩ ba sɩ bɩ disiniŋ kɛnɛ nɛ ŋɩɩ.
Currently Selected:
LEVI DOHO NƖAA 13: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
