JOSUA 8
8
Iziral tɩŋŋaa chei taŋ-la ba sɩɩ yɩrɛ Aɩ
1Ŋɩɩ nɛ La TƖƖNA bʋla pɩ Josua, “Sɩ́ fawʋllʋŋ fá a sɩ́ leŋe dɩ ŋ nandaasɩŋ yʋɔrɛ. Kɛŋ laalɩyuoro-la kala dɩ ma mʋ a yuo Aɩ tabal-la. Mɩ joŋ Aɩ kuoro, ʋ nɩaa, ʋ jaŋ arɩ ʋ tinteeŋ kala a hɛ ma nɩsɩŋ lɛ nɛ. 2Má joŋ wɩɩ-la tɩtɩa ma sɩ ŋaa Jeriko arɩ ʋ kuoro lɛ a ŋaa Aɩ arɩ ʋ kuoro ma lɛ. Ama Aɩ-na lɛ, kɩalɩŋ ma sɩ jaŋ yuo laa, má paaba, a kɛsɛ ba pʋsʋŋ ma pɛ dɩ ba ŋaa ma kɩaa. Má faa taŋ-la harɩŋ a yuoba.”
3Ŋɩɩ nɛ Josua arɩ laalɩyuoro-la kala sii mʋ dɩ ba yuo Aɩ. Josua fa tʋɔsɛ nɩalɩŋ sɩ jɩŋ laalɩ-yuonuŋ woruŋ nɛ, nɩaa bʋɩ mara arɩ fii, a leŋ ba mʋ tɩtaŋɩŋ. 4Ŋ-la nɛ ʋ bʋla pɩba, “Má jegile nɩɩ woruŋ, má mʋ a faa taŋ-la jeeŋ harɩŋ. Má sɩ́ dɩ-bolii mʋ, ma kala kɛŋ ma tɩtɩa hɛ dɔŋɔ a gbɛrɛ. 5Mɩ dɩ nɩkaana-la kala jaŋ kɔ taŋ-la. Dɩ ba nɛ sie dɩ ba yuola, arɩ ba fa sɩ ŋaa ŋɩɩ, la jaŋ fá. 6Ba jaŋ kire to la harɩŋ dɩ la nyɩsa kɛmba fá a kagɛ ba jaŋ lɛ. Ba jaŋ bɩɩnɛ arɩ laa fá arɩ la fa sɩ laa sɩpaaŋ fá ŋɩɩ nɛ. Dɩ la nɛ ŋaa ŋɩɩ, 7ma jaŋ sii lee-la ma sɩ faa a jʋʋ yuo laa taŋ-la. Ma Tɩɩna Wɩa jaŋ joŋ taŋ-la hɛ ma nɩsɩŋ lɛ. 8Dɩ ma nɛ yuo dii taŋ-la, má nyɩgʋ. Má ŋaa wɩɩ-la kala La TƖƖNA sɩ daga, a to mɩ niiŋ woruŋ.”
9Ŋɩɩ nɛ Josua taba, ba mʋ lee-la ba sɩ jaŋ faa, a pɩŋ Bɛtɛl arɩ Aɩ pɛgɛ, Aɩ wɩɩjʋʋlʋŋ dɩɩrɩŋ, a gbɛrɛ. Ka Josua arɩ nɩkaana-la chʋa ba dɩhɔnʋŋ. 10Taŋ sɩ pʋla chʋchʋɔ-fɩɛla, Josua yɩrɛ ʋ laalɩyuoroo a hɛ dɔŋɔ. Ʋ dɩ Iziral tɩŋŋaa sɩpaalaaraa laa ba sɩpaaŋ baa mʋ Aɩ. 11Ʋ dɩ laalɩyuoro-la kala sɩ hɛ ʋ teeŋ sɩɩ mʋ Aɩ ŋɩɩ, ba mʋ kpagɛ taŋ-la boi-baalɩŋ, a ŋmoo buguŋ Aɩ wɩɩpɔsʋŋ nagʋa dɩɩrɩŋ, ka fuonaaŋ hɛ ba dɩ taŋ-la pɛgɛ. 12Josua fa leŋe laalɩyuoro bʋɩ banɔŋ nɛ faa Aɩ arɩ Bɛtɛl pɛgɛ, Aɩ wɩɩjʋʋlʋŋ dɩɩrɩŋ. 13Ŋɩɩ nɛ ba kɛŋ nɩalɩŋ kala kɩɩ kɩɩ, ba kɛŋ ba tɩtɩa hɛ dɔŋɔ dɩ ba yuo laalɩŋ. Dɔnsʋŋ hɛ taŋ-la wɩɩpɔsʋŋ nagʋa, ka nɩalɩŋ dɔnsʋŋ faa taŋ-la wɩɩjʋʋlʋŋ dɩɩrɩŋ. Tɩtaŋ-la Josua sii a tuu fuonaa-la.
14Aɩ kuoro sɩ na Josua arɩ ʋ nɩaa, ʋ dɩ ʋ jaŋ nɩaa kala ŋaa lɩma a sii chʋchʋɔ-fɩɛla a cheŋ Iziral tɩŋŋaa dɩ ba yuo laalɩŋ Jɔdaŋ fuo-la wɩɩjʋʋlʋŋ dɩɩrɩŋ, lee-la ba fa sɩ laa sɩpaaŋ yuo laalɩŋ. Ama ʋ fa bɩ jɩŋ arɩ nɩaa faa tabal-la harɩŋ dɩ ba yuoba. 15Ŋɩɩ nɛ Josua arɩ Iziral tɩmma-la mɩɩra fɩfá nɩalɩŋ sɩpaaŋ a nagɛ ba nɛ kiriba ba fɩfá. Ba fá a tʋʋlɛ tintee-hɩlɩŋ dɩɩrɩŋ mʋmʋ. 16Aɩ tɩŋŋaa fa yɩrɛ ba baalaa kala kʋ hɛ dɔŋɔ nɛ ba lɩɩ kire to Josua arɩ ʋ nɩaa harɩŋ. Iziral tɩŋŋaa nyɩsɛba ba fá kagɛ ba taŋ lɛ. 17Baal kala bɩ Aɩ lɛ koo Bɛtɛl lɛ ka, ba kala nɛ lɩɩ kire to Iziral tɩŋŋaa harɩŋ. Ba leŋ ba taŋ kala ta nɛ nʋʋ bɩ pɔ, ka ba lɩɩ kire to Iziral tɩmma-la harɩŋ.
18Ŋɩɩ nɛ La TƖƖNA bʋla pɩ Josua, “Kɛŋ tiŋ-la sɩ hɛ ŋ nɩsɩŋ lɛ a yɩa Aɩ dɩɩrɩŋ, mɩ jaŋ joŋ taŋ-la a hɛ ŋ nɩsɩŋ lɛ.” Ŋɩɩ nɛ Josua kɛŋ tiŋ-la a yɩa Aɩ dɩɩrɩŋ. 19Ʋ sɩ ŋaa ŋɩɩ dɛrɛ, nɩalɩŋ kala sɩ faa sii ba leree lɩma lɩma, a fá jʋʋ taŋ-la a laa ʋ kala a guu chol nyiniŋ hɛ ʋ didii.
20Aɩ tɩmma-la sɩ gɛlɛ daasɛ harɩŋ, ba na dɩ nyʋɔsʋŋ ka sii ba jaŋ lɛ. Ama ba bɩ lee-kala na ba sɩ jaŋ fá to, bɛɛ wɩaa Iziral tɩmma-la fa sɩ fá a tʋʋlɛ tintee-hɩlɩŋ mɩɩra nɛ aa chemba. 21Josua arɩ Iziral tɩmma-la kala sɩ na dɩ ba baala-la fa sɩ faa, dɩ ba laa taŋ-la a joŋ nyiniŋ hɛ nyʋɔsʋŋ sisii, ŋɩɩ nɛ ba mɩɩrɛ a yuyuo Aɩ tɩmma-la. 22Nɩalɩŋ sɩ faa a sii jʋʋ taŋ-la ma mɩɩrɛ a kʋ lɩɩ a pɛ ba nɩaa lɛ, ba golli Aɩ nɩaa kala a hɛ ba tʋtʋɔbaanɩŋ a kpʋ ba kala, ba kʋŋkala bɩ ka, nʋʋkala bɩ lɩɩ fá. 23Ama Aɩ kuoro dʋndʋŋa nɛ fa ka, ŋɩɩ nɛ ba kɛnʋ a kaa mʋ Josua teeŋ.
24Iziral tɩŋŋaa sɩ kpʋ Aɩ tɩmma-la sɩ kiriba kʋ lɩɩ tintee-hɩlɩŋ a dɛrɛ, ba kala bɩra mɩɩra jʋʋ Aɩ tʋɔŋ, a kpʋ nɩalɩŋ kala sɩ ka nɩmɛ. 25Tapʋlɩɩ-la, Aɩ tɩŋŋaa baalaa arɩ haalaa ba sɩ kpʋa ŋaa nɩaa bʋɩ fɩɩ arɩ balɩa nɛ, ba nɩaa kala nɛ ŋɩɩ. 26Josua fa kɛŋ ʋ timiŋ a yɩa Aɩ ŋɩɩ nɛ deeŋ deeŋ ka ba kpʋ nɩalɩŋ kala sɩ hɛ taŋ-la lɛ mʋ dɛrɛ. 27Ka Iziral tɩŋŋaa kɛsɛ ba pʋsʋŋ, a paa kɩalɩŋ kala ba sɩ yuo dii ba ŋaa ba kɩaa arɩ La TƖƖNA sɩ bʋl ŋɩɩ a pɩ Josua.
28Josua nyɩgɛ Aɩ kala nɛ ʋ pɩŋ jikpeeŋ a kaa kɔ jɩnɩŋ kala. 29Ka ʋ lieŋi Aɩ kuoro tɩa lɛ, a leŋ ʋ sagɛ nɩmɛ a kaa mʋ yi dɩdaanɩŋ. Wɩɩ-muluŋ sɩ jʋa, Josua ŋaa ba sori ʋ kʋsʋʋŋ tɩa-la lɛ a joŋo lo ta taŋ-la boi-baalɩŋ lɛ. Ba paa tabɩaa a chʋɔrɛ ʋ nyuŋ, tabɩa-la ha hɛ nɩmɛ arɩ jɩnɩŋ kala.
Ba wasa wulli nii-la ba sɩ bile Ɛbal peel-la lɛ
30Ŋɩɩ nɛ Josua saa Wɩɩsʋllɩ koruŋ peel-la ba sɩɩ yɩrɛ Ɛbal lɛ a pɩ La TƖƖNA Iziral tɩŋŋaa Wɩa, 31arɩ La TƖƖNA tɩntɩnna Mosis fa sɩ bʋl ŋɩɩ a pɩ Iziral tɩŋŋaa. Josua saa koru-la arɩ ŋɩɩ Mosis sɩ ŋmʋnsɛ wɩalɩŋ a hɛ teniŋ lɛ a bil dɩ baa to sɩ daga nɛ. Ʋ bɩ koru-la tabɩaa wasa ta, ʋ bɩ hɔɔŋ tɩntɩnnɩ kʋŋ ma kaa digiba. Ʋ nyuŋ nɛ ʋ nyɩgɛ kʋnyɩgaa Wɩɩsʋlʋŋ arɩ nɩɩ-magɛ-dɔŋɔ Wɩɩsʋlʋŋ kɩaa a pɩ La TƖƖNA. 32Nɩmɛ nɛ Iziral tɩŋŋaa chɩŋ a bibeŋ, ka Josua beŋ wombie-la Mosis sɩ ŋmʋnsa, a ma ŋmʋnsɛ ba tɩtɩa a hɛ tabɩaa lɛ. 33Iziral tɩŋŋaa kala, ba sɩpaalaaraa, ba tɩntɩnnɩ-hɩasɩŋ, ba sarɩya diiree arɩ nɩwogusuŋ kala sɩ hɛ ba tʋɔŋ nɛ chɩŋ Wɩa niiriŋ daga-la sɛsɩŋ balɩa, a joŋ ba sɩaa chaasɛ Levi doho Wɩɩsʋllɩ sɩpaalaaraa sɩ chʋŋ daga-la. Nɩalɩŋ kpaa magɛ dɔŋɔ chɩŋ a joŋ harɩŋ yɩa peel-la ba sɩɩ yɩrɛ Gɛrɩzɩm, kpaa magɛ dɔŋɔ ma chɩŋ a joŋ harɩŋ yɩa peel-la ba sɩɩ yɩrɛ Ɛbal, arɩ La TƖƖNA tɩntɩnna Mosis fa sɩ laa sɩpaaŋ dagɛ ŋɩɩ bʋa-la lɛ ʋ sɩɩ dagɛba ŋɩɩ ba sɩ jaŋ to a sʋl Wɩa a pɩpɩ Iziral tɩŋŋaa.
34Ʋ ŋɩɩ harɩŋ nɛ Josua karɩmɛ La TƖƖNA wombie-la kala, wɩalɩŋ nɩa sɩ jaŋ ŋaa dɩ La TƖƖNA pɛ ʋ lɛ arɩ wɩalɩŋ nɩa sɩ jaŋ ŋaa dɩ La TƖƖNA ŋmɩaŋ diiu, arɩ ŋɩɩ ba sɩ ŋmʋnsa a hɛ La TƖƖNA wombiee teŋ-la tʋɔŋ. 35Wɩalɩŋ kala Mosis fa sɩ daga, Josua bɩ ba kʋŋkala kere ta. Ba kala nɛ ʋ karɩmɛ a pɩ Iziral tɩŋŋaa, ba haalaa arɩ ba biiriŋ arɩ nɩwogusu-la kala fa sɩ hɛ ba tʋɔŋ.
Currently Selected:
JOSUA 8: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
