JOSUA 7

Ekaŋ ŋaa wʋbɔmʋŋ

1La TƖƖNA fa sɩ bʋla pɩ Iziral tɩŋŋaa dɩ ba sɩ́ kʋŋkala sɩ maga dɩ ba chei Jeriko lɛ joŋ ŋɩɩ, ba bɩ nii-la kaa tɩŋ. Ka baal kʋbala ba sɩɩ yɩrɛ Ekaŋ vɩa aŋ paa kɩalɩŋ dɔnsʋŋ. Ekaŋ nyɩmma nɛ Kaamɩ, Kaamɩ ma nyɩmma nɛ Zimiri, Zimiri ma nyɩmma nɛ Zɛra. Ba kala ŋaa Juda doho nɩaa nɛ. Ŋɩɩ nɛ La TƖƖNA na baanɩŋ Iziral tɩŋŋaa kala nyuŋ.

2Ŋɩɩ nɛ Josua tɩŋ baalaa ba lɩɩ Jeriko lɛ, a mʋ taŋ kʋbala baa yɩrɛ Aɩ, ʋ kpagɛ Bɛf Avɛŋ nɛ a hɛ Bɛtɛl wɩɩpɔsʋŋ. Ʋ sɩ, “Má mʋ a lʋara beŋ tintee-la.” Ŋɩɩ nɛ baala-la mʋ lʋara beŋ Aɩ tintee-la.

3Ba sɩ mɩɩra kɔ Josua teeŋ, ba bʋla pʋ, “Sɩ́ leŋe dɩ laalɩyuoro-la kala mʋ a yuo Aɩ tɩmma-la. Leŋ dɩ nɩaa bʋɩ balɩa koo bʋɩ batori mʋ a yuoba, bɛɛ wɩaa taŋ-la nɩaa bɩ yʋgɛ, sɩ́ leŋe dɩ nɩ-daŋ walɩmɛ ba tɩtɩa a mʋ nɩmɛ.” 4Ŋɩɩ nɛ nɩaa bʋɩ batori mʋ dɩ ba yuo Aɩ. Aɩ tɩŋŋaa kiriba ba mɩɩra fá, 5ka ba kpʋ Iziral tɩŋŋaa nɩaa mara arɩ fɩɩ arɩ balɩdʋ. Aɩ tɩmma-la chɩŋ ba taŋ boi-baalɩŋ lɛ nɛ aŋ kiriba ŋɩɩ deeŋ deeŋ a jɩl lee-la ba sɩɩ yɛrɛ tabɩaa, a kpʋ dɔnsʋŋ ba sɩ lɩɩ dundollu-la nyuŋ kʋ tutuu. Ŋɩɩ nɛ fawʋllʋŋ jʋʋ Iziral tɩmma-la ba kala kpaŋ.

6Ŋɩɩ nɛ Josua arɩ Iziral tɩŋŋaa nɩhɩasɩŋ kɛŋ ba gɛnnɩŋ kɩɛsɛ a ŋaa hagɩla bʋgɛ ba nyusuŋ ba tʋɔŋ sɩ cheye, aŋ tuu tele chu La TƖƖNA niiriŋ daga-la sɩpaaŋ a pɩŋ nɩmɛ ŋɩɩ halɩɩ Wɩa tuu jʋʋ. 7Ŋɩɩ nɛ Josua pɩɛsɛ, “Ou, La TƖƖNA Wɩɩjarɩbakɔ, bɛɛ nɛ tɩɩ ŋ kɛnla a chol Jɔdaŋ fuo-la a kɔ daha dɩ ŋ jonla hɛ Amɔrɩ tɩŋŋaa nɩsɩŋ lɛ dɩ ba kpʋla? Ŋ fa maga ŋ leŋ dɩ la hɔŋ Jɔdaŋ fuo-la cholo sɛmɛ dɔŋɔ nɛ. 8Ou La TƖƖNA, wʋbɛɛ nɛ mɩ jaŋ bʋl, na Iziral tɩŋŋaa dʋndɔŋŋɔɔ nɛ mɩɩra wuoba ŋ-la? 9Dɩ Kɛnaŋ tɩŋŋaa arɩ nɩaa dɔnsʋŋ nɛ nɩɩ wɩɩŋ deeŋ, ba jaŋ sii a kʋ gollila a kpʋ la kala dɩ la yɩrɩŋ lɛl tinteeŋ lɛ. Bɛɛ nɛ ŋ jaŋ ŋaa dɩ ŋ yɩrɩ-bal-la sɩ́ lɛl?”

10Ŋɩɩ nɛ La TƖƖNA bʋla pɩ Josua, “Sii, bɛɛ nɛ tɩɩ ŋ pɩna chu? 11Iziral tɩŋŋaa ŋaa wʋbɔŋ nɛ, a chei nii-la mɩ sɩ bile a pɩba dɩ ba to. Ba paa kɩalɩŋ dɔnsʋŋ sɩ maga dɩ ba chei nɛ, ba gaa kɩalɩŋ nɛ, aŋ nyɩɛ wɩaa, aŋ paa guoli ba kɩaa tʋɔŋ. 12Ba chei ba tɩtɩa nɛ, ŋɩɩ nɛ tɩɩ Iziral tɩŋŋaa bɩra bɩ ba dʋndɔŋŋɔɔ wuo ŋɩɩ. Mɩ bɩra bɩ jaŋ chɩŋ ma harɩŋ see dɩ ma chei kɩalɩŋ kala mɩ sɩ sɩ ma chei.

13Mʋ a pɩɩsɛ nɩalɩŋ disiniŋ ta, ka dɩ ba kɛŋ ba tɩtɩa hɛ dɔŋɔ a kɔ mɩ sɩpaaŋ chie. Mɩ-na ma TƖƖNA Iziral Wɩa kɛŋ wɩɩ nɛ dɩ mɩ bʋla pɩma. Kɩalɩŋ mɩ sɩ sɩ ma chei dɔnsʋŋ hɛ ma dʋa tʋɔŋ nɛ. Ŋɩɩ wɩaa ma bɩ jaŋ wuo yuo dii ma dʋndɔŋŋɔɔ, see dɩ ma chaarɛ kɩalɩŋ ta.

14Bʋla pɩba, chʋchʋɔŋ ba jaŋ kʋ lɩɩ doho doho. Doho-la kala mɩ-na ma TƖƖNA sɩ jaŋ lɩɩsɛ, jaŋ kʋ lɩɩ nyɩŋ-nɩa nyɩŋ-nɩa. Nyɩŋ-nɩalɩŋ mɩ-na ma TƖƖNA sɩ jaŋ lɩɩsɛ jaŋ kʋ lɩɩ dɩa dɩa. Dɩa-la ma kala mɩ-na ma TƖƖNA sɩ jaŋ lɩɩsɛ, jaŋ kʋ lɩɩ kʋŋ kʋŋ. 15Nɩɩ-la kala mɩ sɩ lɩɩsa sɩ kɛŋ kɩalɩŋ mɩ sɩ sɩ dɩ ma chei, ma jaŋ nyɩgɛ ʋ dɩ ʋ dɩa nɩaa arɩ ba kɩaa kala. Nɩɩ-la chei nii-la sɩ hɛ mɩ dɩ ma pɛgɛ nɛ, a joŋ hɩɩsɩŋ hɛ Iziral tɩŋŋaa kala lɛ.”

16Ŋɩɩ nɛ Josua sii chʋchʋɔ-fɩɛla a kɛŋ Iziral tɩŋŋaa kala kʋ lɩɩ doho doho. Ŋɩɩ nɛ La TƖƖNA lɩɩsɛ Juda doho. 17Josua bɩra kɛŋ Juda doho nɩaa kʋ lɩɩ nyɩŋ-nɩa nyɩŋ-nɩa. La TƖƖNA lɩɩsɛ Zɛra nyɩŋ nɩaa, ʋ bɩra kɛŋ Zɛra nyɩŋ-nɩalɩŋ ma kʋ lɩɩ dɩa dɩa, La TƖƖNA lɩɩsɛ Zimiri nɩaa. 18Josua leŋ Zimiri dɩa nɩaa kʋ lɩɩ kʋŋ kʋŋ, ŋɩɩ nɛ La TƖƖNA lɩɩsɛ Ekaŋ. Ekaŋ nyɩmma nɛ Kaamɩ, Kaamɩ ma nyɩmma nɛ Zimiri, Zimiri ma nyɩmma nɛ Zɛra. Ba kala ŋaa Juda doho nɩaa nɛ.

19Ŋɩɩ nɛ Josua bʋla pɩ Ekaŋ, “Mɩ bii, mɩɩ sʋlʋŋ, bʋl wʋtɩtɩɩ La TƖƖNA Iziral tɩŋŋaa Wɩa sɩpaaŋ. Dagɛ wɩɩ-la ŋ sɩ cheye pɩmɛ, sɩ́ joŋo faamɛ.”

20Ŋɩɩ nɛ Ekaŋ bʋl, “Wʋtɩtɩɩ nɛ, mɩ ŋaa wʋbɔŋ nɛ La TƖƖNA Iziral tɩŋŋaa Wɩa teeŋ. Wɩɩ-la mɩ sɩ ŋaa nɛ ŋ-la: 21Kɩalɩŋ la sɩ yuo laa tʋɔŋ, mɩ na Babɩlɔŋ tɩŋŋaa gɛrɩ-zɔŋ kʋbala nɛ a joŋ, arɩ warɩpʋla yuŋuŋ sɩ yi kilo balɩa arɩ mʋa a pɛ sɛlɩmɛ yuŋuŋ sɩ yi kilo kpaa magɛ dɔŋɔ lɛ. Kɩaa deemba nɛ mɩ na mɩ sɩɩŋ jʋʋba mɩ lʋara paa. Ba nɛ mɩ joŋo hugi mɩ lɛbɩŋ tʋɔŋ, a leŋ warɩpʋla-la hɛ bʋbʋɔŋ.”

22Ŋɩɩ nɛ Josua tɩŋ nɩaa ba fá jʋʋ lɛbɩ-la tʋɔŋ a na kɩalɩŋ dɩ ba hugi nɩmɛ, ka warɩpʋla-la hɛ bʋbʋɔŋ. 23Ŋɩɩ nɛ ba paa kɩalɩŋ kala lɛbɩ-la tʋɔŋ a kaa kʋ lɩɩ Josua arɩ Iziral tɩŋŋaa kala teeŋ, a kaa bɩsa bil La TƖƖNA sɩpaaŋ.

24Ŋɩɩ nɛ Josua arɩ Iziral tɩmma-la kɛŋ Zɛra nanʋala Ekaŋ a paa warɩpʋla-la, gɛrɩ-la arɩ sɛlɩmɛ-la a kɛsɛ ʋ hambolibiisiŋ, ʋ toloo, ʋ nɛsɩŋ, ʋ kakusuŋ arɩ ʋ piesee, a churi ʋ lɛbɩŋ arɩ kʋŋ na-kala ʋ sɩ kɛnɛ a kaa tʋʋ fuonaa kʋbala baa yɩrɛ Akɔ. 25Nɩmɛ nɛ Josua pɩɛsʋ, “Bɛɛ nɛ tɩɩ ŋ lɛrɛ hɛɛŋ deeŋ kʋ hɛ la lɛ ŋ-la? La TƖƖNA ma jaŋ leŋ dɩ ŋ na hɛɛŋ jɩnɩŋ.” Ŋɩɩ nɛ Iziral tɩŋŋaa kala paa tabɩaa a yagʋ kpʋ, a yagɛ ʋ dɩa nɩaa ma kpʋ aŋ nyɩgɛ ba dɩ ba kɩaa. 26Ŋɩɩ nɛ ba paa tabɩaa a chʋɔrɛ Ekaŋ nyuŋ, arɩ jɩnɩŋ kala tabɩa-la ha hɛ nɩmɛ. Ŋɩɩ nɛ tɩɩ ba hɛ lee-la yɩrɩŋ Akɔ fuonaaŋ. Ŋɩɩ nɛ La TƖƖNA baanɩŋ fɩɛlɛ.

Currently Selected:

JOSUA 7: SIS

Highlight

Copy

Compare