JOSUA 9

Gibioŋ tɩŋŋaa nyɩsɛ Josua

1Bʋa-la lɛ kuorie-la kala sɩ hɛ Jɔdaŋ fuo-la wɩɩjʋʋlʋŋ dɩɩrɩŋ, kɩalɩŋ sɩ hɛ dundolluŋ arɩ fuonaasɩŋ arɩ mʋgʋ-bal-la niiŋ a kɛŋ ŋɩɩ mʋ yi Lɛbanɔŋ, ba nɩa arɩ Iziral tɩŋŋaa yuo dii Jeriko arɩ Aɩ. Kuorie-la ŋaa Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa kuoroo nɛ. 2Ŋɩɩ nɛ ba kala sii kʋ pɛ dɔŋɔ dɩ ba yuo Josua arɩ Iziral tɩŋŋaa.

3Gibioŋ tɩŋŋaa sɩ nɩɩ wɩɩ-la Josua sɩ ŋaa Jeriko arɩ Aɩ lɛ, 4ba chɛ wombii dɔŋ ba sɩ jaŋ to a mʋ nyɩsʋ. Ba sii kɛsɛ kakusuŋ a chʋŋ kʋdiilee arɩ bɔtɔ kɔsʋmɔɔ arɩ sɩnɩŋ puroo sɩ kɔsɔ ba sɩ yɛrɛ yɛrɛ, a mʋ ʋ teeŋ. 5Nɩalɩŋ fa laalɛ gɛrɩ-kɔsʋmɔɔ nɛ a hɛ nɛntɛŋ-kpaarɩŋ ba sɩ yɛrɛ yɛrɛ. Boroboroba-la ma ba sɩ paa kala nɛ hɩla aŋ nyʋ. 6Ŋɩɩ nɛ ba mʋ Josua teeŋ Gɩlɩgal lɛ ba dɩhɔnʋŋ, a bʋla pɩ ʋ dɩ Iziral tɩŋŋaa, “La lɩɩ dɩ-bolii nɛ a kɔ, aa chɛla dɩ ma hɛ niiŋ pɩ dɔŋɔ.”

7Ŋɩɩ nɛ Iziral tɩŋŋaa bʋla pɩba, “Ŋ bɩ pɔ ma jʋʋ kpɩkpagɛla nɛ. Ɛɛ nɛ saa la dɩ ma jaŋ wuo hɛ niiŋ pɩ dɔŋɔ?”

8Ŋɩɩ nɛ nɩalɩŋ bʋla pɩ Josua, “La ŋaa ŋ tɩntɩnnaa nɛ.” Ŋɩɩ nɛ Josua bɩra pɩɛsɛba, “Kʋbɛɛ ba nɛ ma ŋaa, nɩɩ nɛ ma lɩɩ?”

9Ba bʋla pʋ, “Ŋ tɩntɩnnaa lɩɩ dɩ-bolii nɛ, la nɩɩ ma TƖƖNA Wɩa wɩaa nɛ a kɔ. La nɩɩ wɩalɩŋ kala ʋ fa sɩ ŋaa Ijipiti tinteeŋ lɛ nɛ, 10arɩ wɩalɩŋ kala ʋ sɩ ŋaa Amɔrɩ tɩŋŋaa kuorie-la balɩa sɩ hɛ Jɔdaŋ fuo-la wɩɩpɔsʋŋ dɩɩrɩŋ, Hɛsɩbɔŋ kuoro Sɩhɔŋ arɩ Basaŋ tinteeŋ kuoro Ɔgɩ, sɩ hɔŋ taŋ-la ba sɩɩ yɩrɛ Asɩtarɔf lɛ. 11La nɩhɩasɩŋ arɩ nɩalɩŋ kala sɩ hɛ la tinteeŋ lɛ nɛ bʋla pɩla dɩ la joŋ kʋdiilee a kaa vɛŋ wombiiŋ a kɔ ma teeŋ a bʋla pɩma, la ŋaa ma tɩntɩnnaa nɛ, má leŋ dɩ la dɩ ma hɛ niiŋ pɩ dɔŋɔ. 12Tapʋlɩɩ-la la sɩ sii paa la kɩaa dɩ la kɔ ma teeŋ, la boroboro deeŋ fa zɔmɔ nɛ, ama ma bee na lɛɛlɛ ʋ kala nɛ hɩla a nyʋ. 13Bʋa-la lɛ la sɩ hɛ sɩnɩŋ puroo deemba lɛ, ba kala fa falɩa nɛ, ama ma bee na lɛɛlɛ ba kala nɛ kɩɛsa. La gɛnnɩŋ arɩ la nɛntɛŋŋɛɛ ma kala nɛ kɔsɔ, a tɩŋ wombii-duduoŋ-la la sɩ vɛnɛ wɩaa.”

14Ŋɩɩ nɛ Iziral tɩŋŋaa bɩ La TƖƖNA pɩɛsa, aŋ laa nɩalɩŋ kʋdiilee mʋa mʋa a dii. 15Ʋ ŋɩɩ harɩŋ Josua kɛŋ Gibioŋ tɩmma-la a dii nandɔnsʋŋ a lemba, ʋ bɩ ba wɩɩkala ŋaa. Iziral tɩŋŋaa nɩhɩasɩŋ ma hɛ niiŋ pɩ nɩalɩŋ arɩ ba bɩ jaŋ ŋaaba wʋbɔŋ kala.

16Ba dɩ Gibioŋ tɩmma-la fa sɩ hɛ niiŋ pɩ dɔŋɔ ŋɩɩ, ʋ tapʋlaa batori chɛɛŋ nɛ Iziral tɩŋŋaa nɩɩ arɩ nɩalɩŋ jʋʋ a kpɩkpagɛba nɛ. 17Ŋɩɩ nɛ Iziral tɩŋŋaa ma sii vɛŋ tapʋlaa batori a mʋ na tasɩ-la nɩalɩŋ sɩ lɩa. Tasɩ-la nɛ ŋ-la: Gibioŋ, Kɛfɩra, Bɛɛrɔf arɩ Kɩrɩaf Jɩarɩm. 18Ba kɛŋ La TƖƖNA Iziral tɩŋŋaa Wɩa yɩrɩŋ nɛ a kaa hɛ niiŋ a pɩ nɩalɩŋ arɩ ba bɩ jaŋ ŋaa ba wʋbɔŋ kala, ŋɩɩ wɩaa ba bɩ ba wɩɩkala ŋaa. Ŋɩɩ nɛ Iziral tɩmma-la kala gʋrɩmɛ wɩaa ba sɩpaalaaraa teeŋ. 19Ŋɩɩ nɛ sɩpaalaara-la bʋla pɩ nɩalɩŋ, “La kɛŋ La TƖƖNA Iziral tɩŋŋaa Wɩa yɩrɩŋ nɛ a hɛ niiŋ pɩba, ŋɩɩ wɩaa la bɩ ba wɩɩkala wuo ŋaa. 20La maga dɩ la leŋ dɩ ba kɛŋ mɩɩsɩŋ nɛ. Dɩ la nɛ chei nii-la sɩ hɛ la dɩ ba pɛgɛ, La TƖƖNA jaŋ na baanɩŋ la nyuŋ a dɔgɩsɛla. 21La bɩ jaŋ kpʋba, ama ba nɛ jaŋ ŋaa nɩalɩŋ sɩ jaŋ kikeri la daasɩŋ, aŋ ŋaa lɩɩŋ ma a pɩpɩla.” Wɩɩ-la sɩpaalaara-la fa sɩ vʋʋra nɛ ŋɩɩ.

22Ŋɩɩ nɛ Josua yɩrɛ Gibioŋ tɩmma-la a pɩɛsɛba, “Bɛɛ nɛ tɩɩ ma nyɩsɛla arɩ ma lɩɩ dɩ-bolii nɛ, a see ma jʋʋ a kpɩkpagɛla nɛ? 23Lɛɛlɛ La TƖƖNA ŋmɩaŋ diima nɛ. Ma nɛ jaŋ ŋaa nɩalɩŋ sɩ jaŋ keri daasɩŋ a chʋŋ lɩɩŋ a kaa mʋmʋ mɩ Wɩa dɩa a kaa mʋ wuu.”

24Ŋɩɩ nɛ ba bʋla pɩ Josua, “La ŋaa ŋɩɩ, bɛɛ wɩaa la nɩɩ ŋɩɩ ma TƖƖNA Wɩa sɩ bʋla pɩ ʋ tɩntɩnna Mosis arɩ ʋ jaŋ joŋ tintee-la kala a pɩma, aŋ kpʋ nɩalɩŋ kala sɩ hɛ tintee-la lɛ nɛ. Fawʋllʋŋ fa kɛnla nɛ, ŋɩɩ nɛ tɩɩ la tɩŋ la mɩɩsɩŋ wɩaa a ŋaa ŋɩɩ. 25La hɛ ŋ nɩsɩŋ lɛ nɛ lɛɛlɛ. Ŋaala wɩɩ-la-kala ŋ sɩ cho.”

26Ŋɩɩ nɛ Josua laaba ta Iziral tɩŋŋaa nɩsɩŋ lɛ, ba bɩ ba kpʋa. 27Tapʋlɩɩ-la nɛ Josua leŋ Gibioŋ tɩmma-la ŋaa nɩalɩŋ sɩ jaŋ kikeri daasɩŋ aŋ ŋaa lɩɩŋ pɩpɩ Iziral tɩŋŋaa aŋ pɛ ŋaa jʋjʋʋ La TƖƖNA Wɩɩsʋlʋŋ koru-la sɩ hɛ, lee-la La TƖƖNA sɩ jaŋ lɩɩsɛ lɛ. Ba tɩntɩmɩŋ nɛ ŋɩɩ arɩ jɩnɩŋ kala.

Currently Selected:

JOSUA 9: SIS

Highlight

Copy

Compare