JOSUA 20
20
Tasɩ-la ba sɩ jaŋ fá mʋ yuori
1Ŋɩɩ nɛ La TƖƖNA fa bʋla pɩ Josua: 2“Bʋla pɩ Iziral tɩŋŋaa dɩ ba lɩɩsɛ tasɩ-la ba sɩ jaŋ fá mʋ a yuyuori arɩ mɩ sɩ dagɛ Mosis ŋɩɩ, 3dɩ nʋʋ nɛ bɩ sɛnɛ aŋ kpʋ ʋ dɔŋɔ, ʋ jaŋ wuo fá mʋ a yuori taŋ-la, dɩ nɩɩ-la ʋ sɩ kpʋa naambii sɩ́ ŋɩɩ chɩmɩŋ joŋo tiŋ ʋ lɛ.
4Dɩ ʋ nɛ fá a mʋ tasɩŋ deemba kʋŋ, ʋ maga dɩ ʋ chɩŋ taŋ-la boi-baalɩŋ lɛ nɛ, taŋ-la nɩhɩasɩŋ sɩpaaŋ aŋ bʋl wɩɩ-la kala sɩ ŋaa a pɩba. Ba nɛ jaŋ laaʋ, a pʋ leriŋ dɩ ʋ hɛ ba tʋɔŋ. 5Dɩ nɩɩ-la sɩ sʋba naaŋ-bile sɩɩ chɛ dɩ ʋ joŋ ŋɩɩ chɩmɩŋ timu lɛ nɛ kiri ʋ harɩŋ a kɔ, ʋ bɩ maga dɩ ba joŋu pa, bɛɛ wɩaa ʋ bɩ sɛnɛ aŋ kpʋ nɩɩ-la naambie, ʋ bɩ ʋ dʋndɔŋ ŋaa. 6Ʋ maga dɩ ʋ hɛ taŋ-la lɛ nɛ deeŋ deeŋ a mʋ yi tapʋlɩɩ-la ba sɩ jaŋ kɛnʋ kaa lɩɩ nɩalɩŋ sɩ yie hilimi sɩpaaŋ dɩ ba diiu sarɩya. Dɩ ʋ nɛ bɩ wɩɩ cheye, ʋ jaŋ hɛ taŋ-la lɛ a kaa mʋ yi bʋa-la lɛ Wɩɩsʋllɩ sɩpaalaaraa kʋhɩaŋ sɩ jaŋ sʋʋ. Ʋ ŋɩɩ harɩŋ ʋ jaŋ wuo mɩɩra mʋ ʋ jaŋ, a jʋjʋʋ ʋ tɩtɩa dɩa, lee-la ʋ fa sɩ lɩɩ fá.”
7Ŋɩɩ nɛ ba lɩɩsɛ Kɛdɛs sɩ hɛ Galilii tinteeŋ lɛ, a hɛ Nafɩtalɩ tintee-la peelee sɩ yʋga lɛ, a bɩra lɩɩsɛ Sɛkɛm ma sɩ hɛ Efirem tintee-la peelee sɩ yʋga lɛ arɩ Kɩrɩaf Aba (ʋ nɛ ha Hɛbʋrɔŋ) a hɛ Juda tintee-la peelee sɩ yʋga lɛ. 8Jɔdaŋ fuo-la wɩɩpɔsʋŋ dɩɩrɩŋ Jeriko wɩɩpɔsʋŋ ma, ba lɩɩsɛ Bɛza sɩ hɛ tintee-hɩlɩɩ-la sɩ pɩŋ Rubiŋ doho nɩaa tinteeŋ lɛ nɛ. Gad doho nɩaa tinteeŋ ma lɛ, ba lɩɩsɛ Ramɔf sɩ hɛ Gɩlɩad lɛ nɛ. Manasɛ doho nɩaa tinteeŋ ma lɛ, ba lɩɩsɛ Golaŋ sɩ hɛ Basaŋ tinteeŋ lɛ nɛ. 9Dɩ Iziral tɩɩna koo dɩ nɩwogusu-la sɩ hɛ ba tʋɔŋ kʋŋ nɛ bɩ sɛnɛ aŋ kpʋ ʋ dɔŋɔ, ʋ jaŋ wuo fá mʋ yuori tasɩŋ deemba ba sɩ lɩɩsa dɔŋɔ, dɩ nɩɩ-la ʋ sɩ kpʋa naambile sɩɩ chɛ dɩ ʋ joŋ ŋɩɩ chɩmɩŋ tiŋ ʋ lɛ sɩ́ ʋ kpʋ. Ka dɩ ʋ wuo hɛ nɩmɛ a mʋ yi tapʋlɩɩ-la ʋ sɩ jaŋ chɩŋ nɩalɩŋ sɩ yie hilimi sɩpaaŋ dɩ ba diiu sarɩya.
Currently Selected:
JOSUA 20: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
