JOSUA 19

Tinteeŋ kpaal-la Simioŋ sɩ laa

1Ba fa sɩ tɔnsɔ ŋɩɩ, Simioŋ doho nyɩŋ-nɩaa ma nɛ ŋaa lɩamɩŋ a joŋ ba kpaalɩŋ. Ba tinteeŋ hɛ Juda tinteeŋ tʋɔŋ nɛ. 2Ba tasɩŋ nɛ ŋ-la: Bɛɛsɩba, Sɛba, Molada, 3Haza Sʋal, Bala, Ɛzɛm, 4Ɛlɩtɔlad, Bɛtʋl, Hɔma, 5Zɩkɩlag, Bɛf Maakabɔf, Haza Susa, 6Bɛf Labʋɔf arɩ Saruheŋ. Ba ŋaa tabalaa fii arɩ batori nɛ arɩ ba tabiisiŋ sɩ golliba. 7Tasɩ-la dɔnsʋŋ ma nɛ Aɩŋ, Rɩmɔŋ, Ɛta arɩ Asaŋ. Ba ŋaa tabalaa banɛsɛ nɛ arɩ ba tabiisiŋ. 8Tabiisi-la sɩ golliba kɛŋ ŋɩɩ nɛ deeŋ deeŋ a mʋ yi Baalaf Bɛɛ. (Lee-la yɩrɩŋ nɛ ha Rama a hɛ Nɛgɛf tinteeŋ lɛ.) Simioŋ doho nyɩŋ-nɩa nyɩŋ-nɩa fa sɩ laa tintee-la ʋ ŋaa ba kʋŋ nɛ ŋɩɩ. 9Juda tinteeŋ nɛ ba fa keri pɩ Simioŋ doho nɩaa ʋ ŋaa ba kʋŋ, bɛɛ wɩaa Juda doho nɩaa tinteeŋ fa yʋga a kɩɩ ŋɩɩ ba sɩɩ chɛ nɛ. Ŋɩɩ nɛ tɩɩ Simioŋ doho nɩaa laa ba tinteeŋ kpaalɩŋ ʋ hɛ Juda tinteeŋ tʋɔŋ ŋɩɩ.

Tinteeŋ kpaal-la Zebuluŋ sɩ laa

10Ba fa sɩ tɔnsɔ ŋɩɩ, Zebuluŋ doho nyɩŋ-nɩaa ma nɛ dii tori a joŋ kpaalɩŋ. Ba tintee-la ba fa sɩ laa ʋ ŋaa ba kʋŋ pɩŋ ŋɩɩ nɛ a mʋ yi Sarid, 11a joŋo mʋ wɩɩjʋʋlʋŋ dɩɩrɩŋ a mʋ yi Marala, a mʋ yagɛ taŋ-la ba sɩɩ yɩrɛ Dabɛsɛf lɛ, aŋ kɛŋ ŋɩɩ mʋ to fuo-bie-la sɩ kpagɛ Jokiniam. 12Ʋ nɛ bɩra gʋra Sarid lɛ a mʋ wɩɩpɔsʋŋ dɩɩrɩŋ a mʋ Kɩsɩlɔf Tabɔ tinteeŋ, a joŋ ŋɩɩ mʋ Dabɛraf a kaa jɩl Jafɩa. 13Ʋ nɛ ha chɩŋ nɩmɛ a to wɩɩpɔsʋŋ dɩɩrɩŋ a mʋ Gaf Hefa arɩ Ɛf Kazɩŋ, a kʋ lɩɩ Rimoŋ aŋ bɩra gʋrɛ, a tʋʋlɛ Nɩa. 14Nɩmɛ nɛ bʋa-la chɩŋ aŋ gollo mʋ wɩɩpɔsʋŋ nagʋa dɩɩrɩŋ a mʋ yi Hanatɔŋ, a mʋ dɛrɛ Ifita Ɛl fuonaa-la lɛ. 15Tasɩ-la sɩ pɛ nɛ ŋaa: Kataf, Nahalal, Sɩmɩrɔŋ, Idala arɩ Bɛtɩlɛhɛm. Ba ŋaa tabalaa fii arɩ balɩa nɛ arɩ ba tabiisiŋ.

16Tabalaa deemba arɩ ba tabiisiŋ kala, Zebuluŋ doho nyɩŋ-nɩa nyɩŋ-nɩa nɛ tɩɩba.

Tinteeŋ kpaal-la Ɩsaka sɩ laa

17Ba fa sɩ tɔnsɔ ŋɩɩ, Ɩsaka doho nyɩŋ-nɩa nyɩŋ-nɩa ma nɛ dii nɛsɩmɩŋ a joŋ kpaalɩŋ. 18Ba tinteeŋ bʋa nɛ tasɩŋ deemba: Jɛzɩrɛl, Kɛsʋlɔf, Sunem, 19Hafarem, Sioŋ, Anaharaf, 20Rabɩf, Kisioŋ, Ɛbɛs, 21Rɛmɛf, Ɛŋ Ganɩm, Ɛŋ Hada arɩ Bɛf Pazis. 22Tintee-la bʋa mʋ yagɛ Tabɔ, Sahazuma arɩ Bɛf Sɛmɛs lɛ nɛ, a mʋ dɛrɛ Jɔdaŋ fuo-la lɛ. Ba ŋaa tabalaa fii arɩ balɩdʋ nɛ a pɛ ba tabiisiŋ lɛ. 23Tabalaa deemba arɩ ba tabiisiŋ kala, Ɩsaka doho nyɩŋ-nɩa nyɩŋ-nɩa nɛ tɩɩba.

Kpaal-la Asa sɩ laa

24Ba fa sɩ tɔnsɔ ŋɩɩ Asa doho nyɩŋ-nɩa nyɩŋ-nɩa ma nɛ dii nɔmʋŋ a joŋ kpaalɩŋ. 25Ba tinteeŋ bʋa nɛ tasɩŋ deemba: Hɛlɩkaf, Hali, Bɛtɛŋ, Akɩsaf 26Alamɛlɛk, Amad arɩ Mɩsal. Ʋ wɩɩjʋʋlʋŋ dɩɩrɩŋ mʋ a yagɛ Kamɛl arɩ Sɩhɔ Lɩbɩnaf lɛ nɛ. 27Ʋ nɛ ha mɩɩra to wɩɩpɔsʋŋ dɩɩrɩŋ a tʋʋlɛ Bɛf Dagɔŋ a mʋ yagɛ Zebuluŋ arɩ Ifita Ɛl fuonaa-la lɛ, aŋ to wɩɩpɔsʋŋ nagʋa dɩɩrɩŋ a mʋ yi Bɛf Ɛmɛk arɩ Nɛyɩl a kiele mʋ Kabʋl sɩ hɛ nagʋa. 28Bʋa-la bɩra to Abɩdɔŋ, Rehob, Hamɔŋ arɩ Kana, a joŋ ŋɩɩ deeŋ deeŋ a mʋ yi Sɩdɔŋ balɩŋ. 29Ŋɩɩ nɛ bʋa-la bɩra gɛbɛ a tʋʋlɛ Rama a joŋ ŋɩɩ a mʋ yi Taaya tabal-la ba sɩ saa kɛrɛ golli aŋ gʋrɛ a tʋʋlɛ Hosa a kʋ lɩɩ dɛrɛ Mediterenia mʋgʋ-bal-la lɛ. Tasɩ-la dɔnsʋŋ ma nɛ Mahalab arɩ Akɩzɩb, 30Uma, Afɛk arɩ Rehob tinteeŋ. Ba ŋaa tabalaa mara arɩ balɩa nɛ a pɛ ba tabiisiŋ lɛ. 31Tabalaa deemba arɩ ba tabiisiŋ kala, Asa doho nyɩŋ-nɩaa nɛ tɩɩba.

Tinteeŋ kpaal-la Nafɩtalɩ sɩ laa

32Ba fa sɩ tɔnsɔ ŋɩɩ, Nafɩtalɩ doho nyɩŋ-nɩa nyɩŋ-nɩa ma nɛ dii dʋmʋŋ a joŋ kpaalɩŋ. 33Ba tinteeŋ bʋa nɛ a lɩɩ Hɛlɛf arɩ tɩɩ-bala-la sɩ hɛ Zaananim lɛ, a kiele mʋ Adamɩ Nɛkɛb arɩ Jabɩnɛɛl a mʋ to Lakʋm a mʋ dɛrɛ Jɔdaŋ fuo-la lɛ. 34Ʋ bʋa-la nɛ ha joŋo mʋ wɩɩjʋʋlʋŋ dɩɩrɩŋ a to Azɩnɔf Tabɔ ŋɩɩ a kʋ lɩɩ Hukok. Ʋ nɛ mʋ yagɛ Zebuluŋ lɛ wɩɩpɔsʋŋ nadiiŋ dɩɩrɩŋ, ka Asa ma hɛ wɩɩjʋʋlʋŋ dɩɩrɩŋ, Jɔdaŋ fuo-la ma hɛ wɩɩpɔsʋŋ dɩɩrɩŋ. 35Tabala-la ba sɩ saa kɛrɩsɩŋ a golli nɛ ŋaa: Zadim, Zɛɛ, Hamaf, Rakaf, Kɛnɛrɛf, 36Adama, Rama, Hazɔ, 37Kɛdɛs, Ɛdɩrɛ, Ɛn Hazɔ, 38Ɩrɔŋ, Mɩgɩdal Ɛl, Horem, Bɛf Anaf arɩ Bɛf Sɛmɛs. Ba tabalaa ŋaa fii arɩ nibi nɛ arɩ ba tabiisiŋ.

39Tabalaa deemba arɩ ba tabiisiŋ kala, Nafɩtalɩ doho nyɩŋ-nɩaa nɛ tɩɩba.

Tinteeŋ kpaal-la Daŋ sɩ laa

40Ba sɩ tɔnsɔ ŋɩɩ, Daŋ doho nyɩŋ-nɩa nyɩŋ-nɩa ma nɛ dii pɛɛmɩŋ a joŋ ba kpaalɩŋ. 41Ba tintee-la ba sɩ laa tasɩŋ nɛ ŋ-la: Zora, Ɛsɩtɔl, Ɛɛ Sɛmɛs, 42Saalabɩŋ, Aɩjalɔŋ, Ɩfɩla, 43Ɛlɔŋ, Tɩmɩna, Ɛkʋrɔŋ, 44Ɛlɩtɛkɛ, Gɩbɛtɔŋ, Baalaf, 45Jahud, Bɛnɛ Bɛrak, Gaf Rɩmɔŋ, 46Me Jaakɔŋ arɩ Rakɔŋ arɩ lee-la kala sɩ golli Jɔpa. 47(Daŋ doho nɩaa sɩ jaŋ ŋaa ŋɩɩ a laa ba tinteeŋ dɩ ʋ ŋaa ba kʋŋ, ʋ ŋɩɩ fa ŋaa wʋhaa nɛ woruŋ a pɩba. Ŋɩɩ nɛ ba mʋ a yuo Lɛsɛm tɩŋŋaa a kpʋba, aŋ laa ba tinteeŋ a hɔŋ. Ba sɩ hɔŋ Lɛsɛm lɛ, ŋɩɩ nɛ ba joŋ ba naabalɩma Daŋ yɩrɩŋ a hɛ pɩ lee-la.)

48Tabalaa deemba arɩ ba tabiisiŋ kala, Daŋ doho nɩaa nyɩŋ-nɩaa nɛ tɩɩba.

Tinteeŋ kpaal-la Josua sɩ laa

49Bʋa-la lɛ Iziral tɩŋŋaa sɩ kɛŋ tintee-la a kpaa dɛrɛ, ba pɩ Nuŋ nanʋala Josua ma tinteeŋ nɛ ba tʋɔŋ, ʋ ŋaa ʋ kʋŋ, 50arɩ La TƖƖNA fa sɩ dagɛ ŋɩɩ. Josua fa sɩ pɩɛsa a chɩchɛ taŋ-la nɛ ba joŋo pʋ. Taŋ-la yɩrɩŋ nɛ Tɩmɩnaf Sɛra a hɛ Efirem tintee-la peelee sɩ yʋga lɛ. Ŋɩɩ nɛ ʋ wasa saa taŋ-la aŋ hɔŋ nɩmɛ.

51Tintee-la Elieza sɩ ŋaa Wɩɩsʋllɩ sɩpaalaara arɩ Josua, Nuŋ nanʋala arɩ Iziral tɩŋŋaa nyɩŋ-nɩaa nɩhɩasɩŋ fa sɩ tɔnsɔ Sɩlɔ lɛ La TƖƖNA sɩpaaŋ lɛbɩ-la lɛ ʋ sɩ yie kɔ Iziral tɩŋŋaa teeŋ boiŋ niiŋ a kaa kpaaba nɛ ŋɩɩ. Ŋɩɩ ba fa sɩ to a kɛŋ tintee-la kpaa nɛ ŋɩɩ.

Currently Selected:

JOSUA 19: SIS

Highlight

Copy

Compare