JOSUA 21

Levi doho nɩaa tasɩŋ

1Tapʋlɩɩ kʋbala Levi doho nɩaa sɩpaalaaraa sii mʋ Elieza sɩ ŋaa Wɩɩsʋllɩ sɩpaalaara arɩ Nuŋ nanʋala Josua arɩ Iziral doho doho-la sɩpaalaaraa teeŋ. 2Ba fá mʋ ba teeŋ Sɩlɔ sɩ hɛ Kɛnaŋ lɛ nɛ, a bʋla pɩba, “La TƖƖNA fa to Mosis lɛ a bʋl arɩ ma pɩla tasɩŋ nɛ dɩ la jʋjʋʋ, arɩ la pʋsʋŋ dɩ-diilee.” 3Ŋɩɩ nɛ Iziral tɩŋŋaa to La TƖƖNA fa sɩ dagɛ ŋɩɩ, a joŋ tasɩŋ dɔnsʋŋ ba tinteeŋ kpaalɩŋ tʋɔŋ a pɩ Levi doho nɩaa arɩ lere-la ba pʋsʋŋ sɩ jaŋ didii.

4Kohaf doho nyɩŋ-nɩa nɛ, ba laa sɩpaaŋ kpaa tasɩŋ pa. Ba fa joŋ tasɩŋ fii arɩ batori nɛ a pɩ Levi doho nɩalɩŋ sɩ ŋaa Arɔŋ Wɩɩsʋllɩ sɩpaalaara doho nɩaa. Juda, Simioŋ arɩ Bɛnjamɩŋ doho nɩaa tinteeŋ lɛ nɛ ba joŋ tasɩ-la a pɩba. 5Kohaf doho nɩkaana-la, ba fa joŋ tasɩŋ fii nɛ a pɩba, a lɩɩ Efirem doho nɩaa, Daŋ doho nɩaa arɩ Manasɛ doho nɩaa kpaa magɛ dɔŋɔ-la sɩ hɛ wɩɩjʋʋlʋŋ dɩɩrɩŋ tinteeŋ lɛ.

6Gɛsɔŋ doho nɩaa ma, ba fa joŋ tasɩŋ fii arɩ batori nɛ a pɩba. Ɩsaka doho nɩaa, Asa doho nɩaa, Nafɩtalɩ doho nɩaa arɩ Manasɛ doho nɩaa kpaa magɛ dɔŋɔ-la sɩ hɛ Basaŋ lɛ, ba tinteeŋ lɛ nɛ ba pɩba tasɩ-la. 7Mɛrarɩ doho nyɩŋ-nɩaa ma laa tasɩŋ fii arɩ balɩa nɛ, a lɩɩ Rubiŋ doho, Gad doho nɩaa arɩ Zebuluŋ doho nɩaa tinteeŋ lɛ.

8Ŋɩɩ nɛ Iziral tɩŋŋaa sɩ joŋ tasɩ-la a pɩ Levi doho nɩaa arɩ lere-la ba pʋsʋŋ sɩ jaŋ didii, arɩ La TƖƖNA sɩ to Mosis lɛ a dagɛ ŋɩɩ. 9Juda arɩ Simioŋ doho nɩaa tinteeŋ lɛ, ba sɩ joŋ tasɩ-la a pɩ Levi doho nɩaa yɩraa nɛ ŋ-la. 10(Ba fa joŋ tasɩŋ deemba a pɩ Arɔŋ doho nɩalɩŋ sɩ ŋaa Levi doho nɩalɩŋ a lɩɩ Kohaf nyɩŋ-nɩaa tʋɔŋ, bɛɛ wɩaa ba sɩ tɔnsɔ, ba nɛ dii bumbuŋ.)

11Ba fa joŋ Kɩrɩaf Aba nɛ a pɩba (ʋ nɛ ha Hɛbʋrɔŋ) a pɛ lere-la ba pʋsʋŋ sɩ jaŋ didii. Ʋ hɛ Juda tintee-la peelee sɩ yʋga lɛ nɛ. (Anakɩ naabalɩma nɛ fa Aba.) 12Ba fa joŋ ŋmaŋkaanɩ-la arɩ tabiisi-la sɩ gollo a pɩ Jefuni nanʋala Kalɩb nɛ ba ŋaa ʋ kɩaa.

13Arɔŋ sɩ ŋaa Wɩɩsʋllɩ sɩpaalaara doho nɩaa ma, ba fa joŋ tasɩŋ deemba nɛ pɩba: Hɛbʋrɔŋ (ʋ ŋaa taŋ nʋʋ sɩ jaŋ fá mʋ yuori nɛ dɩ ʋ nɛ bɩ sɛnɛ aŋ kpʋ ʋ dɔŋɔ) arɩ Libina 14Jatɛ, Ɛsɩtɛmʋa, 15Holoŋ, Dɛbɩ, 16Ayɩŋ, Juta arɩ Bɛf Sɛmɛs, arɩ lere-la ba pʋsʋŋ sɩ jaŋ didii. Tasɩ-la ŋaa nibi nɛ ba lɩɩsɛ Juda arɩ Simioŋ doho nɩaa tinteeŋ lɛ a pɩba. 17Bɛnjamɩŋ doho ma tinteeŋ lɛ, ba fa joŋ tasɩŋ deemba nɛ a pɩba: Gibioŋ, Geba, 18Anatɔf arɩ Alɩmɔŋ arɩ lere-la ba pʋsʋŋ sɩ jaŋ didii. Ba ŋaa tasɩŋ banɛsɛ nɛ. 19Tasɩ-la kala ba sɩ joŋo pɩ Arɔŋ doho Wɩɩsʋllɩ sɩpaalaaraa fa ŋaa fii arɩ batori nɛ arɩ lere-la ba pʋsʋŋ sɩ jaŋ didii. 20Kohaf nyɩŋ-nɩaa nɩkaana-la sɩ ŋaa Levi doho nɩaa, Efirem doho nɩaa tinteeŋ lɛ nɛ ba pɩba tasɩŋ. 21Efirem tintee-la peelee sɩ yʋga lɛ, tasɩŋ deemba nɛ ba fa joŋo pɩba: Sɛkɛm (ʋ ŋaa taŋ nʋʋ sɩ jaŋ fá mʋ yuori nɛ dɩ ʋ nɛ bɩ sɛnɛ aŋ kpʋ nʋʋ), arɩ Gɛza 22Kibizim arɩ Bɛf Horoŋ. Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 23Daŋ doho nɩaa ma tinteeŋ lɛ, ba pɩba tasɩŋ deemba nɛ: Ɛlɩtɛkɛ, Gɩbɛtɔŋ, 24Aɩjalɔŋ arɩ Gaf Rimoŋ. Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 25Manasɛ doho nɩaa kpaa magɛ dɔŋɔ-la ma tinteeŋ sɩ hɛ wɩɩjʋʋlʋŋ dɩɩrɩŋ lɛ, ba pɩba Taanak arɩ Gaf Rimoŋ. Ba ŋaa tasɩŋ balɩa nɛ arɩ lere-la ba pʋsʋŋ sɩ jaŋ didii. 26Tabalaa deemba fii arɩ lere-la ba pʋsʋŋ sɩ jaŋ didii, ba joŋo pɩ Kohaf nyɩŋ-nɩaa nɩkaanaa nɛ.

27Levi nyɩŋ-nɩa sɩ ŋaa Gɛsɔŋ tɩŋŋaa ma, tasɩŋ deemba nɛ ba joŋo pɩba: Manasɛ doho nɩaa kpaa magɛ dɔŋɔ-la sɩ hɛ wɩɩpɔsʋŋ dɩɩrɩŋ tinteeŋ lɛ, ba pɩba Golaŋ sɩ hɛ Basaŋ tinteeŋ nɛ (ʋ ŋaa taŋ nʋʋ sɩ jaŋ fá mʋ yuori nɛ dɩ ʋ nɛ bɩ sɛnɛ aŋ kpʋ ʋ dɔŋɔ), arɩ Bɛ Ɛsɩtara. Ba ŋaa tasɩŋ balɩa nɛ arɩ lere-la ba pʋsʋŋ sɩ jaŋ didii. 28Ɩsaka doho nɩaa ma tinteeŋ lɛ ba pɩba Kisioŋ, Dabɛraf, 29Jamʋf arɩ Ɛn Ganɩm nɛ: Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 30Asa doho nɩaa tinteeŋ ma lɛ ba pɩba Mɩsal, Abɩdɔŋ, 31Hɛlɩkaf arɩ Rehob nɛ. Ba ma ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 32Nafɩtalɩ doho nɩaa ma tinteeŋ lɛ, ba pɩba Kɛdɛs sɩ hɛ Galilii tinteeŋ lɛ nɛ (ʋ ŋaa taŋ nʋʋ sɩ jaŋ fá mʋ yuori nɛ dɩ ʋ nɛ bɩ sɛnɛ aŋ kpʋ ʋ dɔŋɔ), arɩ Hamɔf Doo arɩ Kaataŋ. Ba ŋaa tasɩŋ batori nɛ arɩ lere-la ba pʋsʋŋ sɩ jaŋ didii. 33Tasɩ-la kala ba fa sɩ joŋo pɩ Gɛsɔŋ doho nɩaa ŋaa fii arɩ batori nɛ arɩ lere-la ba pʋsʋŋ sɩ jaŋ didii. 34Mɛrarɩ doho nɩaa ma (Levi doho nɩaa nɩkaana-la), Zebuluŋ doho nɩaa tinteeŋ lɛ nɛ ba pɩba Jokiniam arɩ Kaata, 35Dimina arɩ Nahalal. Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 36Rubiŋ doho nɩaa ma tinteeŋ lɛ ba pɩba Bɛza, Jahas 37Kɛdɛmɔf arɩ Mɛfaaf nɛ. Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii. 38Gad doho nɩaa ma tinteeŋ lɛ, ba lɩɩsɛ Ramɔf sɩ hɛ Gɩlɩad lɛ nɛ (ʋ ŋaa taŋ nʋʋ sɩ jaŋ fá mʋ yuori nɛ dɩ ʋ nɛ bɩ sɛnɛ aŋ kpʋ ʋ dɔŋɔ), arɩ Mahanem, 39Hɛsɩbɔŋ arɩ Jaza. Ba ŋaa tasɩŋ banɛsɛ nɛ arɩ lere-la ba pʋsʋŋ sɩ jaŋ didii.

40Tasɩ-la kala ba fa sɩ joŋo pɩ Mɛrarɩ tɩŋŋaa nyɩŋ-nɩa sɩ ŋaa Levi doho nɩaa nɩkaanaa ŋaa fii arɩ balɩa nɛ. 41Tasɩ-la kala ba fa sɩ joŋo pɩ Levi doho nɩaa, Iziral tɩŋŋaa tinteeŋ lɛ, ba ŋaa mahɩŋ balɩa arɩ chori nɛ arɩ lere-la ba pʋsʋŋ sɩ jaŋ didii. 42Tasɩ-la kʋŋkala lɛ, pʋsʋŋ dɩ-diiliŋ hɛ nɩmɛ nɛ a gollu. 43La TƖƖNA joŋ tintee-la kala ʋ fa sɩ hɛ niiŋ a pɩ Iziral tɩŋŋaa naabalɩmaba, arɩ ʋ jaŋ joŋo pɩba dɩ ʋ ŋaa ba kʋŋ pɩba nɛ. Ba hɔŋ nɩmɛ. 44La TƖƖNA fa pɩ Iziral tɩŋŋaa wiese nɛ sɛmɛ na-kala, arɩ ʋ fa sɩ hɛ niiŋ ŋɩɩ a pɩ ba naabalɩmaba. Ba dʋndɔŋ-kala fa bɩ wuo yuo diiba. La TƖƖNA joŋ ba dʋndɔŋŋɔɔ kala a hɛ ba nɩsɩŋ lɛ nɛ ba wuoba. 45La TƖƖNA fa sɩ hɛ niiŋ arɩ ʋ jaŋ ŋaa wʋzɔmɔ-la kala a pɩ Iziral tɩŋŋaa, ba kala nɛ ʋ ŋaa, ba kʋbala ma bɩ birige.

Currently Selected:

JOSUA 21: SIS

Highlight

Copy

Compare