JOSUA 13

Tintee-la Iziral tɩŋŋaa ha sɩ maga ba yuo laa

1Josua fa hɩɛsa nɛ woruŋ, ka La TƖƖNA bʋla pʋ, “Ŋ hɩɛsa ma nɛ, ama tinteeŋ ha yʋga ŋ sɩ maga ŋ yuo a laa. 2Tintee-la ha sɩ ka nɛ ŋ-la: Fɩlɩsɩtɩa tɩŋŋaa arɩ Gesu tɩŋŋaa tinteeŋ kala, 3a chɩŋ Sɩhɔ fuoŋ sɩ hɛ Ijipiti wɩɩpɔsʋŋ a kɛŋ ŋɩɩ a mʋ yi Ɛkʋrɔŋ tinteeŋ sɩ hɛ wɩɩpɔsʋŋ nagʋa dɩɩrɩŋ, lee-la kala sɩ ŋaa Kɛnaŋ tɩŋŋaa tinteeŋ (Fɩlɩsɩtɩa tɩŋŋaa kuoroo banɔŋ sɩɩ beŋ tintee-la kala. Ba hɔŋ Gaza, Asɩdɔd, Asɩkɛlɔŋ, Gaf arɩ Ɛkʋrɔŋ a kɛŋ Ava tɩŋŋaa tinteeŋ pɛ), 4a bɩra chɩŋ Kɛnaŋ tinteeŋ wɩɩpɔsʋŋ nadiiŋ dɩɩrɩŋ kala, a kaa mʋ yi Ara sɩ hɛ Sidonia tinteeŋ, a joŋ ŋɩɩ a mʋ Afɛk sɩ hɛ Amɔrɩ tɩŋŋaa tinteeŋ bʋa, 5Gɛbal tɩŋŋaa tinteeŋ arɩ Lɛbanɔŋ tinteeŋ kala ŋɩɩ a kaa mʋ wɩɩpɔsʋŋ dɩɩrɩŋ, a chɩŋ Baal Gad sɩ hɛ Hɛmɔŋ peel-la wɩɩpɔsʋŋ nadiiŋ, a mʋʋ yi Lebo Hamaf.

6Nɩalɩŋ kala sɩ hɔŋ peelee nyuŋ, a chɩŋ Lɛbanɔŋ tinteeŋ a kaa mʋ yi Mɩsɩrɛfɔf Meem, ba kala ŋaa Sidonia tɩmma nɛ. Mɩ-na tɩtɩa nɛ jaŋ kiriba ta Iziral tɩŋŋaa sɩpaaŋ. Tinteeŋ deeŋ nɛ, ŋ jaŋ kaa kpaa Iziral tɩŋŋaa arɩ mɩ sɩ dagɩŋ ŋɩɩ, dɩ ʋ ŋaa ba kʋŋ. 7Kɛnʋ a kpaa pɩ Iziral do-kaana-la nibi arɩ Manasɛ doho kpaa magɛ dɔŋɔ-la, dɩ ʋ ŋaa ba kʋŋ.”

Ba kɛŋ Jɔdaŋ fuo-la wɩɩpɔsʋŋ dɩɩrɩŋ tinteeŋ kpaa

8Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la kʋkaanaa, La TƖƖNA tɩntɩnna Mosis fa laa sɩpaaŋ a joŋ Jɔdaŋ fuo-la wɩɩpɔsʋŋ dɩɩrɩŋ tintee-la nɛ pɩba, ʋ ŋaa ba kʋŋ.

9Ba tinteeŋ bʋa nɛ, a chɩŋ Arʋa sɩ hɛ Anɔf fuonaa-la niiŋ, a kɛŋ taŋ-la sɩ hɛ fuonaa-la tʋtʋɔbaanɩŋ, a pɛ Mediba tintee-taalɩsɩ-la kala lɛ a mʋ yi Dɩbɔŋ, 10arɩ tasɩ-la kala Amɔrɩ tɩŋŋaa kuoro Sɩhɔŋ fa sɩ hɛ Hɛsɩbɔŋ lɛ sɩɩ beŋ, a kɛŋ ŋɩɩ kaa mʋ yi ʋ dɩ Amɔŋ tɩŋŋaa tinteeŋ bʋa, 11a bɩra kɛŋ Gɩlɩad tinteeŋ ŋɩɩ a kaa mʋ yi Gesu arɩ Maaka tɩŋŋaa tinteeŋ, a chɩŋ peel-la ba sɩɩ yɩrɛ Hɛmɔŋ leriŋ kala arɩ Basaŋ tinteeŋ kala a kɛŋ ŋɩɩ a mʋ yi taŋ-la ba sɩɩ yɩrɛ Salɛka, 12a kɛŋ Basaŋ kuoro Ɔgɩ fa sɩɩ beŋ tintee-la pɛ. Ɔgɩ nɛ fa ŋaa Refem tɩmma-la dɔŋɔ sɩ ka. Ʋ fa hɔŋ tasɩ-la ba sɩɩ yɩrɛ Asɩtarɔf arɩ Ɛdɩrɛ lɛ nɛ. Mosis nɛ fa yuo dii nɩalɩŋ, aŋ laa ba tintee-la. 13Ama Iziral tɩŋŋaa fa bɩ Gesu arɩ Maaka tɩŋŋaa-na kire, arɩ jɩnɩŋ kala ba-na ha hɛ Iziral tɩŋŋaa tʋɔŋ.

14Mosis fa bɩ tintee kala kpaa pɩ Levi doho nɩaa-na, bɛɛ wɩaa ba kpaalɩŋ nɛ Wɩɩsʋlʋŋ kɩalɩŋ Iziral tɩŋŋaa sɩ yie nyɩgɛ a pɩpɩ La TƖƖNA, Iziral tɩŋŋaa Wɩa, arɩ ʋ sɩ hɛ niiŋ ŋɩɩ a pɩba. 15Tintee-la Mosis fa sɩ joŋo pɩ Rubiŋ doho nɩaa nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la:

16Ba tinteeŋ bʋa nɛ, a chɩŋ Arʋa sɩ hɛ Anɔŋ fuonaa-la niiŋ, a bɩra chɩŋ taŋ-la sɩ hɛ fuonaa-la tʋtʋɔbaanɩŋ, arɩ tintee-taalɩsɩ-la kala ŋɩɩ a kaa mʋ yi taŋ-la ba sɩɩ yɩrɛ Mediba, 17a to ŋɩɩ mʋ Hɛsɩbɔŋ tasɩ-la kala sɩ hɛ tintee-taalɩsɩ-la lɛ a kɛŋ Dɩbɔŋ, Bamɔf Baal, Bɛf Baal Mioŋ, 18Jahas, Kɛdɛmɔf, Mɛfaaf, 19Kɩrɩatam, Sɩbɩma, a pɛ Zɛrɛf Sahaa sɩ chɩŋ dundolo-la sɩ hɛ fuonaa-la lɛ, 20a kɛŋ Bɛf Pio arɩ Pɩsɩga peel-la lere-la sɩ chulloo tuu, arɩ Bɛf Jasɩmɔf, 21a pɛ tasɩ-la kala sɩ hɛ tintee-taalɩsɩ-la lɛ, arɩ Amɔrɩ tɩŋŋaa kuoro Sɩhɔŋ sɩ hɔŋ Hɛsɩbɔŋ lɛ tinteeŋ kala. Mosis nɛ fa yuo dii ʋ dɩ Midiaŋ tɩŋŋaa sɩpaalaaraa deemba kala: Ɛvɩ, Rɛkɛm, Zuu, Huu arɩ Reba. Ba kala fa ŋaa sɩpaalaaraa nɛ a pɛ kuoro Sɩhɔŋ lɛ a bibeŋ tintee-la. 22Nɩalɩŋ Iziral tɩŋŋaa sɩ kpʋa laalɩŋ lɛ, ba kpʋ Bioo nanʋala Balam ma nɛ, ʋ fa ŋaa vʋgʋrʋ nɛ. 23Rubiŋ doho nɩaa tinteeŋ wɩɩjʋʋlʋŋ dɩɩrɩŋ bʋa nɛ Jɔdaŋ fuo-la niiŋ. Tabalaa arɩ tabiisiŋ deemba kala nɛ ba joŋo pɩ Rubiŋ doho nɩaa nyɩŋ-nɩa nyɩŋ-nɩa, ʋ ŋaa ba kʋŋ. 24Tintee-la sɛmɛ dɔŋɔ ma Mosis fa sɩ joŋo pɩ Gad doho nɩaa nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la: 25Ba tintee-la bʋa nɛ a chɩŋ Jaza tinteeŋ arɩ tasɩ-la sɩ hɛ Gɩlɩad lɛ arɩ Amɔŋ tinteeŋ kpaa magɛ dɔŋɔ lɛ, a kɛŋ ŋɩɩ mʋ yi Arʋa sɩ hɛ Raba wɩɩpɔsʋŋ dɩɩrɩŋ, 26a bɩra chɩŋ Hɛsɩbɔŋ lɛ a kaa mʋ Ramaf-Mɩzɩpa arɩ Bɛtɔnɩŋ, a bɩra lɩɩ Mahanem lɛ a kaa mʋ yi Dɛbɩ tinteeŋ, 27a bɩra chɩŋ Jɔdaŋ fuonaa-la lɛ, a kɛŋ Bɛf Haram, Bɛf Nɩmɩra, Sʋkɔf arɩ Zafɔŋ, a pɛ Hɛsɩbɔŋ kuoro Sɩhɔŋ tintee-kaanɩŋ lɛ. Ba tintee-la bʋa pɩŋ Jɔdaŋ fuo-la wɩɩpɔsʋŋ nɛ, a kɛŋ ŋɩɩ mʋ yi Galilii mʋgʋ-bal-la sɩ hɛ wɩɩpɔsʋŋ nagʋa dɩɩrɩŋ. 28Tabala-la arɩ tabiisiŋ deemba kala nɛ ba joŋo pɩ Gad doho nɩaa nyɩŋ-nɩa nyɩŋ-nɩa, ʋ ŋaa ba kʋŋ. 29Tintee-la sɛmɛ dɔŋɔ ma Mosis ha sɩ joŋo pɩ Manasɛ doho nɩaa kpaa magɛ dɔŋɔ-la nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la:

30Ba tinteeŋ bʋa nɛ, a chɩŋ Mahanem a kɛŋ Basaŋ tinteeŋ lere-la kala kuoro Ɔgɩ fa sɩɩ beŋ, arɩ lere-la kala Jaa doho nɩaa fa sɩ hɔnɔ Basaŋ tinteeŋ lɛ, tasɩ-la ŋaa mahɩŋ batori nɛ, 31a kɛŋ Gɩlɩad tinteeŋ kpaa magɛ dɔŋɔ-la, arɩ Asɩtarɔf arɩ Ɛdɩrɛ (fa sɩ ŋaa kuoro Ɔgɩ tinteeŋ tabalaa Basaŋ lɛ). Lee-la ba sɩ joŋo pɩ Manasɛ nanʋala Makɩɩ doho nɩaa kpaa magɛ dɔŋɔ nyɩŋ-nɩa nyɩŋ-nɩa nɛ ŋɩɩ.

32Ŋɩɩ Mosis sɩ kɛŋ Jeriko arɩ Jɔdaŋ fuo-la wɩɩpɔsʋŋ tinteeŋ kpaa nɛ ŋɩɩ. Bʋa-la lɛ dɩ ʋ hɛ Mʋab tintee-taala-la lɛ. 33Mosis bɩ tintee kala kpaa a pɩ Levi doho nɩaa ʋ ŋaa ba kʋŋ. Levi doho nɩaa kpaalɩŋ nɛ ŋaa kɩalɩŋ Iziral tɩŋŋaa sɩ kaa kʋ ŋaa Wɩɩsʋlʋŋ a pɩ ba TƖƖNA Wɩa arɩ ʋ sɩ hɛ niiŋ ŋɩɩ a pɩba.

Currently Selected:

JOSUA 13: SIS

Highlight

Copy

Compare