JOSUA 14

Ba kpaa Jɔdaŋ fuo-la wɩɩjʋʋlʋŋ dɩɩrɩŋ tinteeŋ

1Kɛnaŋ tintee-la lɛ, leree deemba nɛ ba kaa kpaa a pɩ Iziral tɩŋŋaa ʋ ŋaa ba kɩaa. Elieza sɩ ŋaa Wɩɩsʋllɩ sɩpaalaara arɩ Nuŋ nanʋala Josua arɩ Iziral tɩŋŋaa doho doho-la sɩpaalaaraa nɛ fa kaa kpaa a pɩba. 2La TƖƖNA fa bʋla pɩ Mosis dɩ ba tɔnsɛ nɛ a kɛŋ Jɔdaŋ fuo-la wɩɩjʋʋlʋŋ dɩɩrɩŋ tintee-la a kpaa pɩ Iziral doho doho nibi arɩ kpaa magɛ dɔŋɔ-la. 3Mosis fa laa sɩpaaŋ joŋ Jɔdaŋ fuo-la wɩɩpɔsʋŋ dɩɩrɩŋ tinteeŋ a pɩ ba doho doho balɩa arɩ kpaa magɛ dɔŋɔ nɛ, ʋ ŋaa ba kʋŋ. Ama ʋ bɩ tintee kala joŋo pɩ Levi doho nɩaa-na, ʋ ŋaa ba kʋŋ. 4Josɛf biiriŋ kʋ ŋaa doho doho balɩa nɛ, ba nɛ Manasɛ arɩ Efirem. Levi doho nɩaa bɩ tintee kala laa ʋ ŋaa ba kʋŋ, tasɩ-la ba sɩ jaŋ jʋjʋʋ dʋndʋŋa nɛ Mosis fa joŋo pɩba arɩ lere-la ba pʋsʋŋ sɩ jaŋ didii. 5Iziral tɩŋŋaa kpaa tintee-la arɩ La TƖƖNA fa sɩ dagɛ Mosis ŋɩɩ nɛ.

Ba joŋ Hɛbʋrɔŋ tinteeŋ pɩ Kalɩb

6Tapʋlɩɩ kʋbala Juda doho nɩaa dɔnsʋŋ sii mʋ Josua teeŋ Gɩlɩgal lɛ. Ŋɩɩ nɛ Jefuni nanʋala Kalɩb, Keni tɩɩna-la pɩɛsɛ Josua, “Ŋ liise yi wɩɩ-la La TƖƖNA sɩ bʋla pɩ ʋ tɩntɩnna Mosis a mʋ tɩgɛ mɩ dɩ ŋ lɛ lee-la ba sɩɩ yɩrɛ Kadɛs Banɩa lɛɛ? 7Mɩ fa ŋaa jɩsɩŋ mahɩŋ balɩa nɛ, ka Mosis La TƖƖNA tɩntɩnnʋ-la tɩmmɛ, mɩ lɩɩ Kadɛs Banɩa lɛ a mʋ lʋara beŋ tintee-la. Ŋɩɩ nɛ mɩ mɩɩra kʋ bʋl wʋtɩtɩɩ-la mɩ sɩ na a pʋ. 8Ama mɩ dɩ mɩ naambiiri-la sɩ mʋa, ba mɩɩra kɔ a joŋ fawʋllʋŋ a hɛ nɩalɩŋ lɛ. Mɩ-na to mɩ Tɩɩna Wɩa arɩ mɩ tʋɔŋ kala nɛ. 9Ŋɩɩ nɛ Mosis hɛ niiŋ a bʋl tapʋlɩɩ-la, arɩ tintee-la mɩ sɩ joŋ mɩ naaŋ a nʋɔsɛ jaŋ ŋaa mɩ dɩ mɩ biiriŋ kʋŋ a kaa mʋ wuu, bɛɛ wɩaa mɩ to mɩ Tɩɩna Wɩa arɩ mɩ tʋɔŋ kala nɛ.

10La TƖƖNA fa sɩ bʋl ŋɩɩ a pɩ Mosis, a chɩŋ ŋɩɩ lɛ a kaa kɔ, ʋ ha leŋe mɩ hɛ nɩmɛ jɩsɩŋ mahɩŋ balɩa arɩ banɔŋ nɛ. Bʋa-la lɛ dɩ Iziral tɩŋŋaa ka baarɛ tintee-hɩlɩŋ tʋɔŋ. Lɛɛlɛ, mɩ jɩsɩŋ mahɩŋ banɛsɛ arɩ banɔŋ tʋɔŋ nɛ mɩ hɛ ŋ-la. 11Mɩ ha dolie nɛ a nagɛ bʋa-la lɛ Mosis fa sɩ tɩmmɛ. Mɩ ha kɛŋ doluŋ a nagɛ mɩ bumbuŋ-la nɛ, mɩ ha jaŋ wuo mʋ laalɩŋ. 12Lɛɛlɛ, joŋ tintee-la peelee sɩ yʋga a pɩmɛ arɩ La TƖƖNA fa sɩ bʋl ŋɩɩ pɩmɛ tapʋlɩɩ-la. Ŋ ma tɩtɩa nɩɩ ŋɩɩ Anakɩ tɩŋŋaa nɩwaayiile-la sɩ hɛ lee-la sɩ dolie nɛ. Ba tasɩ-la fa ŋaa tabalaa nɛ, ba saa kɛrɛ a golli ba kala. Ama dɩ La TƖƖNA nɛ pɛ mɩ lɛ, mɩ jaŋ yuo kiriba arɩ ʋ sɩ bʋl ŋɩɩ.”

13Ŋɩɩ nɛ Josua sʋl Wɩa a pɩ Jefuni nanʋala Kalɩb, aŋ joŋ taŋ-la ba sɩɩ yɩrɛ Hɛbʋrɔŋ a pʋ, ʋ ŋaa ʋ kʋŋ. 14Hɛbʋrɔŋ ha ŋaa Jefuni nanʋala Kalɩb sɩ ŋaa Keni tɩɩna-la kʋŋ nɛ, arɩ jɩnɩŋ kala, bɛɛ wɩaa ʋ to La TƖƖNA Iziral tɩŋŋaa Wɩa arɩ tʋɔŋ kala nɛ. 15(Hɛbʋrɔŋ yɩrɩŋ nɛ fa Kɩrɩaf Aaba. Nɩwaayiile-la ba sɩɩ yɩrɛ Anakɩ baal kʋbala yɩrɩŋ nɛ ʋ fa joŋo hɛ pɩ taŋ-la, ʋ fa ŋaa nɩduo nɛ ba tʋɔŋ.) Ŋɩɩ harɩŋ lɛ nɛ tintee-la wiesi laalɩŋ lɛ.

Currently Selected:

JOSUA 14: SIS

Highlight

Copy

Compare