JOSUA 12

Kuorie-la Mosis arɩ Iziral tɩŋŋaa sɩ yuo dii

1Kuorie-la Mosis arɩ Iziral tɩŋŋaa laalɩyuoroo fa sɩ yuo a dii aŋ laa ba tinteeŋ Jɔdaŋ fuo-la wɩɩpɔsʋŋ, a chɩŋ Anɔŋ fuonaa-la lɛ a kaa mʋ peel-la ba sɩɩ yɩrɛ Hɛmɔŋ sɩ hɛ wɩɩpɔsʋŋ, a pɛ Araba wɩɩpɔsʋŋ kala nɛ ŋ-la: 2Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ nɛ faa beŋ tintee-la kala sɩ chɩŋ Arʋa sɩ hɛ Anɔŋ fuonaa-la niiŋ, a kaa mʋ fuonaa-la tʋtʋɔbaanɩŋ a kɛŋ ŋɩɩ mʋ yi Jabɔk fuo-la. Ba dɩ Amɔŋ tɩŋŋaa bʋa nɛ ŋɩɩ a kɛŋ Gɩlɩad tinteeŋ kpaa magɛ dɔŋɔ pɛ. 3Ʋ nɛ haa beŋ Araba wɩɩpɔsʋŋ dɩɩrɩŋ ma, a chɩŋ Galilii mʋga-la lɛ a kɛŋ ŋɩɩ mʋ yi Araba mʋga-la (Mʋgʋ-sʋʋŋ) a pɛ Bɛŋ Jɛsɩmɔf lɛ, arɩ ŋ sɩɩ mʋ wɩɩpɔsʋŋ nadiiŋ, Pɩsɩga dundolluŋ lere-la sɩ chulloo tuu. 4Ba yuo dii Basaŋ kuoro Ɔgɩ ma nɛ, ʋ nɛ fa ŋaa Refem tɩmma-la dɔŋɔ sɩ ka, ʋ fa hɔŋ Asɩtarɔf arɩ Ɛdɩrɛ lɛ nɛ. 5Ʋ nɛ faa beŋ Hɛmɔŋ peel-la, Salɛka arɩ Basaŋ tinteeŋ kala a kaa mʋ yi Gesu tɩŋŋaa arɩ Maaka tinteeŋ bʋa, a saa pɛ Gɩlɩad tinteeŋ kpaa magɛ dɔŋɔ lɛ a kaa mʋ yi Hɛsɩbɔŋ kuoro Sɩhɔŋ tinteeŋ bʋa.

6Mosis, La TƖƖNA tɩntɩnnʋ-la, arɩ Iziral tɩŋŋaa laalɩyuoroo nɛ fa yuo dii kuoroo deemba balɩa. Ŋɩɩ nɛ Mosis, La TƖƖNA tɩntɩnna joŋ ba tinteeŋ a pɩ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la ʋ ŋaa ba kʋŋ.

7Kuorie-la Josua arɩ Iziral tɩŋŋaa laalɩyuoroo sɩ yuo dii a laa ba tinteeŋ ma ba fa hɔŋ Jɔdaŋ fuo-la wɩɩjʋʋlʋŋ nɛ, a chɩŋ Baal Gad lɛ a kaa mʋ Lɛbanɔŋ fuonaaŋ, a kɛŋ ŋɩɩ mʋ yi Halak peeliŋ a kɛŋ ŋɩɩ a tutuu Sɛɛ. Tinteeŋ deeŋ kala nɛ Josua kaa kpaa pɩ Iziral doho doho-la. Doho kala kɛŋ ʋ lee: 8Tintee-la peelee sɩ yʋga, wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ, Araba, peele-la lere-la sɩ chullo tutuu, tintee-hɩlɩŋ arɩ Nɛgɛf. Tinteyee deemba kala ŋaa Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteeŋ nɛ. 9Kuorusu-la Iziral tɩŋŋaa laalɩyuoroo sɩ yuo dii nɛ ŋ-la: Jeriko kuoro, Aɩ sɩ kpagɛ Bɛtɛl, ʋ kuoro, 10Jerusalɛm kuoro, Hɛbʋrɔŋ kuoro, 11Jamʋf kuoro, Lakɩs kuoro, 12Ɛgɩlɔŋ kuoro, Gɛza kuoro, 13Dɛbɩ kuoro, Gɛda kuoro, 14Hɔma kuoro, Arad kuoro, 15Lɩbɩna kuoro, Adulam kuoro, 16Makɛda kuoro, Bɛtɛl kuoro, 17Tapʋa kuoro, Hefa kuoro, 18Afɛk kuoro, Lasarɔŋ kuoro, 19Madɔŋ kuoro, Hazɔ kuoro, 20Sɩmɩrɔŋ Mɩrɔŋ kuoro, Akɩsaf kuoro, 21Taanak kuoro, Megido kuoro, 22Kɛdɛs kuoro, Jokiniam sɩ hɛ Kamɛl tinteeŋ lɛ kuoro, 23Doo sɩ hɛ Nafɔf tinteeŋ lɛ kuoro arɩ Goyim sɩ hɛ Gɩlɩgal tinteeŋ lɛ kuoro, 24arɩ Tɩza kuoro. Kuoro-la kala ŋaa mara arɩ fɩɩ arɩ kʋbala nɛ.

Currently Selected:

JOSUA 12: SIS

Highlight

Copy

Compare