SƖPAALAARAA 4
4
Iziral tɩŋŋaa sɩpaalaara Debora
1Ehud sɩ sʋba harɩŋ, Iziral tɩŋŋaa bɩra ŋaa wʋbɔŋ La TƖƖNA teeŋ. 2Ŋɩɩ nɛ La TƖƖNA leŋ Kɛnaŋ tɩŋŋaa kuoro Jabɩŋ sɩ hɛ Hazɔ lɛ aŋ bibemba yuo dii Iziral nɩaa. Ʋ laalɩyuoroo nɩhɩaŋ ma nɛ fa ŋaa Sɩsɛra a hɛ taŋ-la ba sɩɩ yɩrɛ Harɔsɛf Hagoyim lɛ. 3A tɩŋ Jabɩŋ fa sɩ kɛŋ hɔɔŋ janɩŋ torukoba zɔlɔ nibi, ʋ chaasa dɔgɩsɛ Iziral tɩŋŋaa woruŋ jɩsɩŋ mara, ba yele pɩ La TƖƖNA dɩ ʋ pɛ ba lɛ.
4Lapɩdɔf haala Debora sɩ ŋaa Wɩa wʋlaabʋllʋ nɛ fa ŋaa Iziral tɩŋŋaa sɩpaalaara bʋa-la lɛ. 5Debora fa yie hɔŋ ʋ tɩtɩa abɛ tɩa kʋbala bʋbʋɔŋ nɛ, Rama arɩ Bɛtɛl pɛgɛ, Efirem tintee-la peelee sɩ yʋga lɛ. Iziral tɩŋŋaa fa yie kɛŋ ba kaalɛrɛba kɔ ʋ teeŋ nɩmɛ, ʋ jɩma pɩpɩba. 6Ŋɩɩ nɛ ʋ tɩma yɩrɛ Abɩnʋam nanʋala Barak sɩ lɩɩ Kɛdɛs sɩ hɛ Nafɩtalɩ tinteeŋ lɛ, ʋ kɔ ʋ bʋla pʋ, “La TƖƖNA Iziral tɩŋŋaa Wɩa sɩ, ‘Mʋ tʋɔsɛ nɩaa bʋɩ fii Nafɩtalɩ arɩ Zebuluŋ doho nɩaa tʋɔŋ a laa ba sɩpaaŋ dɩ ma mʋ peel-la ba sɩɩ yɩrɛ Tabɔ. 7Mɩ jaŋ nyɩsɛ Sɩsɛra sɩ ŋaa Jabɩŋ laalɩyuoroo kʋhɩaŋ arɩ ʋ laalɩŋ janɩŋ torukoba arɩ ʋ laalɩyuoroo dɩ ba kɔ Kɩsɔŋ fuoŋ, a jomba hɛ ŋ nɩsɩŋ lɛ.’ ”
8Barak bʋla pʋ, “Dɩ ŋ nɛ jaŋ to mɩ harɩŋ mʋ, mɩ jaŋ mʋ, ama dɩ ŋ nɛ bɩ jaŋ to mɩ harɩŋ, mɩ ma bɩ jaŋ mʋ.”
9Debora bʋl, “Ʋ zɔmɔ, mɩ jaŋ mʋ. Ama ŋɩɩ ŋ sɩ jaŋ yuo dii Sɩsɛra, yɩrɩ-la bɩ jaŋ ŋaa ŋ kʋŋ, bɛɛ wɩaa La TƖƖNA nɩɩ chɛ dɩ ʋ joŋu a hɛ haala nɩsɩŋ lɛ.” Ŋɩɩ nɛ Debora sii ʋ dɩ Barak mʋ Kɛdɛs. 10Barak yɩrɛ Zebuluŋ doho nɩaa laalɩyuoroo arɩ Nafɩtalɩ doho nɩaa laalɩyuoroo ba mʋ taŋ-la ba sɩɩ yɩrɛ Kɛdɛs. Nɩaa bʋɩ fii nɛ fa to ʋ harɩŋ a mʋ, Debora ma to mʋ.
11Bʋa deeŋ lɛ dɩ Hɛba, Keni tɩɩna kʋbala sɩ ŋaa Hobab doho nʋʋ, a ŋaa Mosis ma bajene, lɩɩsɛ ʋ tɩtɩa Keni tɩŋŋaa tʋɔŋ a mʋ hɛ ʋ lɛbɩŋ a hɔŋ tɩɩ-bal kʋbala bʋbʋɔŋ, Zaananim lɛ a kpagɛ Kɛdɛs. 12Ba sɩ bʋla pɩ Sɩsɛra arɩ Abɩnʋam nanʋala Barak jɩla hɔŋ peel-la ba sɩɩ yɩrɛ Tabɔ lɛ nɛ, 13Sɩsɛra sii kɛŋ ʋ hɔɔŋ janɩŋ torukoba-la zɔlɔ nibi arɩ ʋ laalɩyuoroo kala, ba lɩɩ Harɔsɛf Hagoyim lɛ a mʋ Kɩsɔŋ fuo-la.
14Ŋɩɩ nɛ Debora bʋla pɩ Barak, “Jɩnɩŋ La TƖƖNA joŋ Sɩsɛra a hɛ ŋ nɩsɩŋ lɛ nɛ, ŋɩɩ wɩaa mʋ! La TƖƖNA paala laa ŋ sɩpaaŋ a mʋ nɛ dɩ ʋ yuou pɩŋ.” Barak sii peel-la ba sɩɩ yɩrɛ Tabɔ nyuŋ a tuu, ʋ laalɩyuoroo bʋɩ fii ma to ʋ harɩŋ. 15Barak sɩ mʋa a yuyuo laal-la, La TƖƖNA leŋ Sɩsɛra arɩ ʋ nɩalɩŋ sɩ kɛŋ laalɩŋ janɩŋ torukoba-la vɩvɛŋ arɩ ʋ laalɩyuoroo wɩɩkala vʋgʋmɛ. Fawʋllʋŋ kɛŋ ba kʋŋkala a tɩŋ Barak arɩ ʋ laalɩyuoroo wɩaa. Sɩsɛra fɩla tuu ʋ jaaba toruko lɛ, a fá. 16Barak laalɩyuoroo kire to Sɩsɛra janɩŋ torukoba arɩ ʋ laalɩyuoroo harɩŋ a mʋ yi taŋ-la ba sɩɩ yɩrɛ Harɔsɛf Hagoyim, a kpʋ Sɩsɛra laalɩyuoroo kala, kʋbala ma bɩ ka.
17Sɩsɛra dʋndʋŋa nɛ wuo foro fá, a mʋ jʋʋ Keni tɩŋŋaa Hɛba haala Jaɛl lɛbɩŋ, bɛɛ wɩaa Hazɔ kuoro Jabɩŋ arɩ Hɛba dɩa nɩaa fa ŋaa sɩma nɛ. 18Jaɛl lɩɩ cheŋ Sɩsɛra a bʋla pʋ, “Mɩ nɩhɩaŋ kʋ jʋʋ, sɩ́ fawʋllʋŋ fá.” Ŋɩɩ nɛ ʋ mʋ jʋʋ ʋ lɛbɩŋ. Ʋ kɛŋ gɛrɩŋ pilime tɔʋ. 19Sɩsɛra bʋl, “Lɩɩ-nyʋasʋŋ kɛmmɛ nɛ, pɩmɛ lɩɩŋ mʋa dɩ mɩ nyʋa.” Jaɛl kɛŋ nɛ-yɩlɩŋ sɩ hɛ puruŋ tʋɔŋ niiŋ kaa puri a wɛnsɛ pʋ ʋ nyʋa, ka ʋ bɩra kɛŋ gɛrɩŋ pilime tɔʋ. 20Sɩsɛra bʋla pɩ Jaɛl, “Chɩŋ lɛbɩ-la boiŋ niiŋ, dɩ nʋʋkala kʋʋ bal a pɩɛsɩŋ, ‘Nʋʋ hɛ daha?’ Bʋl, ‘Aɩ.’ ”
21Dɩ lɔlʋŋ fa kɛŋ Sɩsɛra woruŋ ʋ faasa pɩŋ doŋ. Hɛba haala Jaɛl sii joŋ lɛbɩŋ daa-pɛ-bie arɩ hama a kaa lʋara mʋ ŋmoo hɛ Sɩsɛra nyuŋ lɛ a tuu kɛŋ tinteeŋ, ʋ sʋʋ.
22Barak sɩ kiri Sɩsɛra libe kʋkɔ, Jaɛl lɩɩ mʋ chemu a bʋl, “Kɔ dɩ mɩ dagɩŋ baal-la ŋ sɩ gɔllɔ chɩchɛ.” Ŋɩɩ nɛ ʋ to ʋ harɩŋ ba jʋʋ dɩ Sɩsɛra nɛ, ba joŋ lɛbɩŋ daa-pɛ-bie ŋmoo hɛ ʋ nyuŋ lɛ ʋ sʋʋ pɩŋ ŋɩɩ.
23Tapʋlɩɩ-la Wɩa leŋe Iziral tɩŋŋaa yuo dii Kɛnaŋ kuoro Jabɩŋ nɛ. 24Iziral tɩŋŋaa doluŋ fa pʋŋa pɩpɛ nɛ ba yuo Jabɩŋ ŋɩɩ a mʋ kpʋʋ.
Currently Selected:
SƖPAALAARAA 4: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014