SƖPAALAARAA 5
5
Yɩɩl-la Debora sɩ yɩa
1Tapʋlɩɩ-la nɛ Debora arɩ Abɩnʋam nanʋala Barak yɩɩ yɩɩlɩŋ deeŋ:
2“Má dɛnnɛ La TƖƖNA!
Iziral sɩpaalaaraa kɔ nɛ a laa sɩpaaŋ,
nɩalɩŋ ma sɛɩ a to ba harɩŋ.
3Kuoroo arɩ sɩpaalaaraa, má jegile nɩɩ.
Mɩ jaŋ yɩɩ yɩɩlɩŋ a du kɩaa
a dɛnnɛ La TƖƖNA Iziral tɩŋŋaa Wɩa.
4La TƖƖNA, bʋa-la lɛ ŋ sɩ lɩɩ Sɛɛ peel-la leriŋ,
lee-la Ɛdɔm tɩŋŋaa sɩ hɔnɔ,
tinteeŋ fa zigile nɛ,
duonuŋ lɔgɔ jaasɛ.
5Peelee fa jigise nɛ La TƖƖNA sɩpaaŋ,
peel-la ba sɩɩ yɩrɛ Sɩnaɩ ma jigisi Iziral tɩŋŋaa Wɩa sɩpaaŋ.
6Anaf nanʋala Samɩga mɩɩsɩŋ bʋa lɛ
arɩ Jaɛl ma mɩɩsɩŋ bʋa lɛ,
wɛŋ-vɛnnɛɛ fa vɩa womporuŋ ta nɛ,
aŋ vɩvɛŋ wɛŋ-biisiŋ lɛ.
7Tabiisiŋ nɩaa fa bɩra bɩ ba bagɩsɩŋ lɛ wuo tɩŋ,
a kaa mʋ yi bʋa-la lɛ mɩ-na Debora
sɩ sii chɩna pɔ Iziral nɩaa a nagɛ ba naaŋ.
8Iziral tɩŋŋaa sɩ kʋʋ to vesiŋ,
laalɩŋ kʋ jʋʋba nɛ.
Iziral nɩaa bʋɩ mahɩŋ balɩa tʋɔŋ,
hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ
koo timiŋ kʋbala ma fa tuo ba teeŋ.
9Mɩɩ dɛnnɛ La TƖƖNA,
mɩ tʋɔŋ tɔrɛ Iziral laalɩyuoroo sɩpaalaara-la nyuŋ
arɩ laalɩyuoro-la sɩ sɛyɛ a kɛŋ ba tɩtɩa kʋ lɩɩ dɩ ba yuo laalɩŋ.
10Má nɩalɩŋ sɩ kpɩɛrɛ kaku-pʋllʋŋ
a jɩla hɔŋ kaku-kpasɩnɩŋ nyuŋ,
arɩ ma nɩalɩŋ sɩɩ vɛŋ naasɩŋ lɛ,
11má jegile nɩɩ yɩɩla-la fuo-tuuroo sɩɩ yɩɩ vilee leree.
La TƖƖNA tʋɔpʋl wʋŋaalɩa-la wɩaa nɛ ba bʋbʋl ŋɩɩ,
a bɩra bʋl ʋ laalɩyuoro-la sɩ hɛ Iziral ma lɛ tʋɔpʋl wʋŋaalaa wɩaa.
Ŋɩɩ nɛ La TƖƖNA nɩaa sii tuu taŋ-la boi-baalaa a bʋl,
12‘Sii, sii, Debora! Sii, sii ta yɩɩlɩŋ!
Sii, Ahɩnʋam nanʋala Barak,
yuo kɛsɛ la dʋndɔŋŋɔɔ.’
13Ŋɩɩ nɛ nɩkaana-la mɩɩra kɔ ba sɩpaalaaraa teeŋ,
La TƖƖNA nɩalɩŋ mɩɩra kɔ mɩ teeŋ nɛ
arɩ nɩduoruŋ a ŋaa siri dɩ ba yuo.
14Dɔnsʋŋ lɩɩ Efirem nɛ a kɔ,
lee-la Amalɛk tɩŋŋaa fa sɩ hɔnɔ.
Bɛnjamɩŋ doho nɩaa ma fa kɔ nɛ.
Laalɩyuoroo sɩpaalaaraa ma fa lɩɩ Makɩɩ nɛ a kʋ tuu.
Tɩntɩnnɩ-hɩasɩŋ ma lɩɩ Zebuluŋ kɔ.
15Ɩsaka doho sɩpaalaaraa fa hɛ Debora arɩ Barak teeŋ nɛ,
a to ʋ harɩŋ tuu fuonaaŋ.
Ama Rubiŋ doho nɩaa-na fa ha bɩ jɩŋ wɩɩ-la tʋɔŋ ba sɩ hɛ.
16Rubiŋ doho nɩaa, bɛɛ nɛ tɩɩ ma ha hɛ ma pie-dɩɩsɩŋ leree?
Maa chɛ dɩ ma nɩɩ ŋɩɩ pie-daaraa
sɩ fʋʋla yɩyɩrɛ ba piesee nɛ koo?
Rubiŋ doho nɩaa-na fa ha bɩ jɩŋ wɩɩ-la tʋɔŋ ba sɩ hɛ.
17Gɩlɩad nɩaa hɔŋ Jɔdaŋ fuoŋ cholo wɩɩpɔsʋŋ nɛ.
Daŋ doho nɩaa, bɛɛ nɛ tɩɩ ma-na ha hɛ lɩɩŋ daborusuŋ lɛ?
Asa doho nɩaa ma hɔnɔ ta jɩa nɛ fuoŋ niiŋ,
a hɛ lɩɩŋ niiŋ.
18Ama Zebuluŋ arɩ Nafɩtalɩ nɩaa
joŋ ba mɩɩsɩŋ a yɔɔ sʋʋŋ nɛ laalɩŋ lɛ.
19Taanak lɛ, Kɛnaŋ kuoroo kɔ nɛ,
ba yuo laalɩŋ a kpagɛ Mɛgɩdɔ lɩɩ-la leriŋ.
Ama ba bɩ wuo paa hɔɔ-pʋla koo kʋŋkala.
20Chɛnwʋlaa faa vɛŋ wɩa-nyuŋ nɛ
aŋ yuyuo Sɩsɛra.
21Fuo-jɩna-la ba sɩɩ yɩrɛ Kɩsɔŋ,
pɛllɛ paa Sɩsɛra nɩaa viiri nɛ.
Mɩ jaŋ vɛŋ, a vɛŋ arɩ doluŋ.
22Ŋɩɩ nɛ ʋ janɩŋ fɩfɩl a yɩyagɛ tinteeŋ arɩ ba naasɩŋ.
23La TƖƖNA tɩndaara bʋl,
‘Kalɩba hɛ Mɛrɔzɩ nɩaa lɛ,
kalɩba hɛ ba lɛ woruŋ, bɛɛ wɩaa,
ba bɩ kʋ pɛ La TƖƖNA lɛ dɩ ʋ yuo dii ʋ dʋndɔmɔ-la sɩ dolie.’
24Má zil Keni tɩŋŋaa Hɛba haala Jaɛl.
Haala-la kala sɩɩ jʋʋ lɛŋŋɛɛ,
ba tʋɔŋ má zilu a kɩɩ ba kala.
25Sɩsɛra fa sʋl lɩɩŋ nɛ ʋ teeŋ,
ʋ ŋaa nɛ-yɩlɩŋ pʋ,
ʋ fa ŋaa nɛyɩl-dɩndɛrɩŋ nɛ a hɛ nɩbalaa gbaŋa lɛ a pʋ.
26Ʋ joŋ lɛbɩŋ daa-pɛ-bie nɛ,
aŋ kɛŋ nadiiŋ ma joŋ hama.
Daa-pɛ-bie-la nɛ ʋ joŋo ŋmoo pɛ Sɩsɛra nyuŋ lɛ,
ʋ nyu-kuŋkogulo yɛrɛ.
27Sɩsɛra nyaga sii kpirimi,
aŋ tele pɩŋ nɩmɛ, a sʋʋ Jaɛl naasɩŋ bʋbʋɔŋ.
28Sɩsɛra naaŋ to tokoro a nyilimi,
a ŋmoo niiŋ a bʋl,
‘Bɛɛ nɛ tɩɩ ʋ dieni ʋ bɩ kɔ?
Bɛɛ nɛ tɩɩ ʋ didieni, ka la bɩ janɩŋ torukoba dɔmɔ ka nɩɩ?’
29Ʋ dɩ haala-la sɩ jɩŋ wɩaa kala bʋbʋl wʋbala, 30‘Kapo ba yuo dii kɩaa nɛ aa chɛ ba kaa kpaa dɔŋɔ,
dɩ baal kala na hantolibie koo hantolibiisiŋ balɩa,
dɩ Sɩsɛra ma na gɛrɩ-zɔmɔ-la ba sɩ yuo dii.
Ka dɩ mɩ ma laa gɛrɩ-zɔmɔ-la kala ba sɩ sʋa.’
31La TƖƖNA, a leŋ dɩ ŋ dʋndɔŋŋɔɔ kala sʋʋ a nagɛ Sɩsɛra,
aŋ leŋ dɩ nɩalɩŋ sɩ choŋ chaanɛ a nagɛ wɩɩpɔsʋŋ.”
Ŋɩɩ nɛ Iziral tɩŋŋaa hɔŋ tintee-la lɛ arɩ fɩɛlɩŋ jɩsɩŋ mahɩŋ balɩa.
Currently Selected:
SƖPAALAARAA 5: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014