SƖPAALAARAA 3
3
1Tinteyee deemba nɛ La TƖƖNA leŋ dɩ ʋ kaa magɩsɛ Iziral tɩmma-la sɩ bɩ laal-la kala ba sɩ yuo Kɛnaŋ lɛ kʋŋkala na. 2Ʋ ŋaa wɩɩŋ deeŋ dɩ ʋ dagɛ ba doho nɩalɩŋ sɩ bɩ laalɩŋ wɩaa jɩŋ nɛ. 3Tinteye-la ʋ sɩ leŋe nɛ ŋ-la: Fɩlɩsɩtɩa tinteeŋ sɩpaalaaraa banɔŋ, Kɛnaŋ tɩŋŋaa kala, Sɩdɔŋ tɩŋŋaa arɩ Hivi tɩmma-la sɩ hɛ Lɛbanɔŋ peelee leriŋ, a chɩŋ peel-la ba sɩɩ yɩrɛ Baal Hɛmɔŋ a kaa mʋ Lebo Hamaf. 4Ʋ lemba dɩ ʋ kɛmba magɩsɛ Iziral tɩŋŋaa a na ba jaŋ to niiri-la ʋ sɩ to Mosis lɛ a bile pɩ ba naabalɩmaba nɛɛ.
5Iziral tɩŋŋaa fa hɔŋ nɩaa deemba tʋɔŋ nɛ: Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa. 6Ba faa jaa nɩaa deemba toloo nɛ, nɩalɩŋ ma jɩjaa ba toloo, ka ba pɛ kpʋkpaarɛ nɩalɩŋ vesiŋ.
Iziral tɩŋŋaa sɩpaalaara Ofiniel
7Ŋɩɩ nɛ Iziral tɩŋŋaa ŋaa wʋbɔŋ La TƖƖNA teeŋ, ba yʋ La TƖƖNA wɩaa aŋ tuto vesi-la ba sɩɩ yɩrɛ Baal arɩ Asɩra. 8La TƖƖNA baanɩŋ sii Iziral tɩŋŋaa nyuŋ, ʋ jomba hɛ Aram Naharem tɩŋŋaa kuoru kʋbala ba sɩɩ yɩrɛ Kusaŋ-Risatem nɩsɩŋ lɛ. Iziral tɩŋŋaa fa hɛ kuoro deeŋ nɩsɩŋ lɛ jɩsɩŋ chori nɛ. 9Ŋɩɩ nɛ Iziral tɩŋŋaa yele pɩ La TƖƖNA dɩ ʋ pɛ ba lɛ. Ʋ lɩɩsɛ Kenas nanʋala Ofiniel ʋ laaba ta. Kenas fa ŋaa Kalɩb ŋaana nɛ. 10Wɩa Dɩma kʋ jʋʋ Ofiniel ʋ ŋaa Iziral tɩŋŋaa sɩpaalaarʋ a kɛmba mʋ laalɩŋ. La TƖƖNA joŋ Aram kuoro Kusaŋ-Risatem a hɛ Ofiniel nɩsɩŋ lɛ ʋ yuo diiu. 11Ŋɩɩ nɛ tintee-la fɩɛlɛ yuosuŋ lɛ jɩsɩŋ mahɩŋ balɩa a mʋ yi bʋa-la lɛ Ofiniel sɩ sʋba.
Iziral tɩŋŋaa sɩpaalaara Ehud
12Iziral tɩŋŋaa bɩra ŋaa wʋbɔŋ kʋbala La TƖƖNA teeŋ. A tɩŋ wʋbɔŋ-la wɩaa, La TƖƖNA leŋ Mʋab kuoro Ɛgɩlɔŋ kɛŋ doluŋ a kɩɩ Iziral tɩŋŋaa. 13Ŋɩɩ nɛ Ɛgɩlɔŋ yɩrɛ Amɔŋ tɩŋŋaa arɩ Amalɛk tɩŋŋaa ba kʋ pɛ ʋ lɛ ba yuo dii Iziral tɩŋŋaa a laa Jeriko, abɛ tɩɩsɩŋ taŋ-la. 14Ŋɩɩ nɛ Iziral tɩŋŋaa hɛ Mʋab tɩŋŋaa kuoro Ɛgɩlɔŋ nɩsɩŋ lɛ jɩsɩŋ fii arɩ chori.
15Iziral tɩŋŋaa bɩra yele pɩ La TƖƖNA dɩ ʋ pɛ ba lɛ. Ʋ pɩba nʋʋ sɩ jaŋ laaba ta. Ehud nɛ ʋ fa lɩɩsa pɩba. Ehud fa ŋaa gɛlɛ tɩɩna nɛ. Ʋ nyɩmma nɛ fa Gɛra a ŋaa Bɛnjamɩŋ doho nʋʋ. Ŋɩɩ nɛ Iziral tɩŋŋaa tɩŋ Ehud dɩ ʋ kɛŋ kɩaa mʋ tiŋ lampoo pɩ Mʋab kuoro Ɛgɩlɔŋ. 16Ehud fa libi tokobiiŋ sɩ kɛŋ niiriŋ balɩa nɛ. Ʋ duomuŋ ŋaa naakieliŋ kpaa magɛ dɔŋɔ. Ʋ joŋo vɔɔ mɛrɛ ʋ nadiiŋ naapuiŋ lɛ, gɛrɩŋ bʋbʋɔŋ. 17Ŋɩɩ nɛ ʋ kɛŋ lampoo kɩalɩŋ mʋ time pɩ Mʋab kuoro Ɛgɩlɔŋ. Ɛgɩlɔŋ fa ŋaa nʋʋ sɩ kɛŋ yaraa nɛ woruŋ. 18Ehud sɩ kɛŋ kɩalɩŋ mʋ pʋ dɛrɛ, ʋ leŋ baala-la sɩ chʋŋ kɩalɩŋ mʋ mɩɩra kʋkɔ dɩa. 19Ka ʋ chɩŋ lee-la tɔŋŋɔɔ sɩ hɛ, a kpagɛ Gɩlɩgal, a mɩɩra mʋ Ɛgɩlɔŋ teeŋ a bʋla pʋ, “Kuoro, mɩ kɛŋ wɩɩ nɛ sɩ maga mɩ lʋara bʋla pɩŋ.” Ŋɩɩ nɛ kuoru-la bʋla pɩ ʋ tɩntɩnnaa, “Má sii aŋ leŋ la dʋndʋŋa.” Ŋɩɩ nɛ ba kala sii lɩɩ.
20Ehud mʋ ʋ teeŋ dɩ ʋ dʋndʋŋa hɔŋ ʋ lusuŋ nyuŋ dɩa sɩ fɩɛla tʋɔŋ a bʋl, “Mɩ kɛŋ tɩndaarɩ nɛ sɩ lɩɩ Wɩa teeŋ dɩ mɩ bʋla pɩŋ.” Ŋɩɩ nɛ kuoru-la sii chɩŋ. 21Ehud kɛŋ nagʋa lɛrɛ tʋʋrɛ tokobii-la sɩ mɛrɛ ʋ nadiiŋ naapuiŋ, a tɔɔ kuoru-la luoruŋ lɛ. 22Tokobii-la kala jʋʋ baal-la luoruŋ, a lɩɩ luri ʋ harɩŋ. Ehud bɩ tokobii-la lɛrɛ lɩɩsɛ, nʋʋŋ tɔ tokobii-la kala. 23Ŋɩɩ nɛ Ehud kʋ lɩɩ dɩa-la tʋɔŋ aŋ kɛŋ boiŋ niiri-la tɔ a kaa yagɛ.
24Ʋ sɩ mʋa harɩŋ, kuoru-la tɩntɩnnaa kɔ, dɩ lusuŋ nyuŋ dɩa-la borusuŋ yaga. Ba bʋl, “Ʋ naga ʋ jʋʋ sɩpaaŋ dɩa-la dɩ ʋ togili nɛ.” 25Ba gbɛrɛ a dieni a lɔl, ama ʋ ha sɩ bɩ dɩa-la borusuŋ kʋŋkala suro, ba joŋ boribiiŋ a suri. Ba suro dɩ ba nɩhɩaŋ tele pɩŋ tinteeŋ a sʋʋ.
26Bʋa-la lɛ ba gbɛrɛ ŋɩɩ, ka Ehud fa viiri. Ʋ mʋ a kieli tɔmɔ-la leriŋ a fá mʋ taŋ-la ba sɩɩ yɩrɛ Sɛɩra. 27Ʋ sɩ mʋ yi nɩmɛ, ʋ ŋmʋʋ banyile Efirem tintee-la peelee sɩ yʋga lɛ a yɩrɛ Iziral tɩŋŋaa dɩ ba mʋ yuo laalɩŋ. Ŋɩɩ nɛ ʋ laa ba sɩpaaŋ a lɩɩ dundolo-la nyuŋ kʋ tuu.
28Ʋ bʋla pɩba, “Má to mɩ harɩŋ, La TƖƖNA joŋ Mʋab tɩŋŋaa sɩ ŋaa ma dʋndɔmɔ a hɛ ma nɩsɩŋ lɛ nɛ.” Ŋɩɩ nɛ ba to ʋ harɩŋ tuu a laa lere-la kala Mʋab tɩŋŋaa fa sɩ jaŋ to a chol Jɔdaŋ fuo-la, ba bɩ leŋe ba nɩbala ma chol. 29Bʋa-la lɛ ba kpʋ Mʋab tɩŋŋaa a yi nɩaa bʋɩ fii, nɩalɩŋ kala ŋaa nɩduori nɛ, ba bɩ leŋe ba kʋŋkala fori. 30Tapʋlɩɩ-la Iziral tɩŋŋaa yuo dii Mʋab tɩŋŋaa nɛ, ŋɩɩ nɛ tintee-la fɩɛlɛ laalɩŋ lɛ jɩsɩŋ mahɩŋ banɛsɛ.
Iziral sɩpaalaara Samɩga
31Sɩpaalaarʋ-la ma sɩ kɔ Ehud harɩŋ nɛ Samɩga, Anaf nanʋala. Ʋ ma laa Iziral tɩŋŋaa ta nɛ. Ʋ kɛŋ nɛ-daarɩ-daaŋ a kpʋ Fɩlɩsɩtɩa tɩŋŋaa zɔɔ-balɩdʋ nɛ.
Currently Selected:
SƖPAALAARAA 3: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
