SƖPAALAARAA 2

Wɩa tɩndaara mʋ Bokim

1Ŋɩɩ nɛ Wɩa tɩndaara lɩɩ Gɩlɩgal lɛ a mʋ Bokim a bʋla pɩ Iziral tɩŋŋaa, “Mɩ kɛmma lɩɩ Ijipiti tinteeŋ lɛ nɛ, a kɛmma kaa mʋ tintee-la mɩ sɩ hɛ niiŋ arɩ mɩ jaŋ joŋo pɩ ma naabalɩmaba. Mɩ sɩ, ‘Mɩ bɩ jaŋ kɔ dɩ mɩ leŋe dɩ niiŋ deeŋ birigi. 2Má ma bɩ maga dɩ ma leŋ ma dɩ nɩalɩŋ sɩ hɛ tinteeŋ deeŋ lɛ pɛ nii kala. Ʋ maga dɩ ma chei ba vʋɩyaa korunuŋ kala.’ Ama ma bɩ mɩ niiŋ lɛ to. Bɛɛ nɛ tɩɩ ma ŋaa ŋɩɩ? 3Lɛɛlɛ mɩ bʋlaa pɩma, mɩ bɩ jaŋ kiri nɩalɩŋ ta ma sɩpaaŋ. Ba jaŋ nagɛ sɔsʋŋ ma yaraa lɛ, dɩ ba vesiŋ ma nagɛ bɛrɛ a kɩkɛsɛma.”

4Wɩa tɩndaarʋ-la sɩ bʋl wɩaa deemba a pɩ Iziral tɩŋŋaa, ba kala faasa ŋmoo niiŋ. 5Ŋɩɩ nɛ ba hɛ lee-la yɩrɩŋ Bokim (ʋ bʋbʋɔŋ nɛ nɩaa sɩɩ yel). Ŋɩɩ nɛ ba kpʋ pʋsʋŋ a ŋaa Wɩɩsʋlʋŋ pɩ La TƖƖNA nɩmɛ.

Iziral tɩŋŋaa vɩa Wɩa niiŋ, ba yuo diiba

6Josua sɩ ta Iziral tɩŋŋaa ba viiri, ba kʋŋkala mʋ dɩ ʋ laa ʋ tinteeŋ kpaalɩŋ. 7Josua mɩɩsɩŋ kala lɛ, Iziral tɩŋŋaa to La TƖƖNA nɛ woruŋ. Ʋ sʋʋŋ harɩŋ ma, nɩhɩasɩ-la kala sɩ hɛ ba mɩɩsɩŋ lɛ a na wɩalɩŋ La TƖƖNA sɩ ŋaa pɩ Iziral tɩŋŋaa, ba mɩɩsɩŋ kala lɛ Iziral tɩŋŋaa ha to Wɩa nɛ.

8Ŋɩɩ nɛ La TƖƖNA tɩntɩnna, Nuŋ nanʋala Josua sʋʋ, dɩ ʋ ŋaa jɩsɩŋ zɔlɔ arɩ fii. 9Ba joŋu hugi ʋ tɩtɩa tinteeŋ lɛ, Tɩmɩnaf Sɛra lɛ, a hɛ Efirem tintee-la peelee sɩ yʋga lɛ, peel-la ba sɩɩ yɩrɛ Gaas a hɛ wɩɩpɔsʋŋ nagʋa.

10Doho deeŋ nɩaa kala sɩ kʋ sʋʋ dɛrɛ, do-falɩɩ ma bɩra sii, a bɩ La TƖƖNA jɩŋ, a bɩ wɩalɩŋ ʋ sɩ ŋaa pɩ Iziral tɩŋŋaa ma jɩŋ. 11Ŋɩɩ nɛ Iziral tɩŋŋaa ŋaa wʋbɔŋ La TƖƖNA teeŋ a kpʋkpaarɛ vesi-la ba sɩɩ yɩrɛ Baal. 12Ba vɩa La TƖƖNA nɛ, ba naabalɩmaba Wɩa sɩ kɛmba kaa kʋ lɩɩ Ijipiti tinteeŋ lɛ, aŋ kpʋkpaarɛ nɩalɩŋ sɩ golliba vesiŋ. Ba ŋaa La TƖƖNA baanɩŋ sii nɛ, 13bɛɛ wɩaa ba vɩaʋ nɛ aŋ kpʋkpaarɛ vesi-la ba sɩɩ yɩrɛ Baal arɩ Asɩtɔrɛf. 14La TƖƖNA sɩ na baanɩŋ Iziral tɩŋŋaa nyuŋ ŋɩɩ, ʋ jomba hɛ laalɩyuoroo nɩsɩŋ lɛ, ba yuoba a paa ba kɩaa kala. Ʋ jomba hɛ ba dʋndɔmɔ-la kala sɩ golliba nɩsɩŋ lɛ nɛ, nɩalɩŋ nɩsɩŋ lɛ ba sɩ bɩ wuo fori. 15Bʋa na-kala dɩ Iziral tɩŋŋaa nɛ mʋa dɩ ba yuo laalɩŋ, La TƖƖNA yie leŋ ba yuo diiba nɛ, arɩ ŋɩɩ ʋ fa sɩ ŋmɩɛsa pɩba. Bʋa-la lɛ, ba chaasa hɛ hɛɛŋ tʋɔŋ nɛ woruŋ.

16Ŋɩɩ nɛ La TƖƖNA lɩɩsɛ sɩpaalaaraa pɩ Iziral tɩŋŋaa, ba laaba ta laalɩyuoro-la sɩ yuo didiiba nɩsɩŋ lɛ. 17Ama Iziral tɩŋŋaa vɩa dɩ ba to sɩpaalaara-la niiŋ, aŋ ha joŋ ba tɩtɩa a hɛ vesiŋ lɛ a kpʋkpaarɛba. Doho deeŋ nɩaa-na fa bɩ ba nyɩmmaba naga, ba nyɩmmaba fa sɩɩ to La TƖƖNA niiŋ wɩaa ŋɩɩ. Ba-na guu vɩa ba kala nɛ. 18Bʋa na-kala dɩ La TƖƖNA nɛ lɩɩsɛ sɩpaalaara pɩba, ʋ yie chɩŋ sɩpaa-laarʋ-la harɩŋ nɛ, a lɩɩsɛ Iziral tɩŋŋaa ba dʋndɔŋŋɔɔ nɩsɩŋ lɛ sɩpaa-laarʋ-la mɩɩsɩŋ kala lɛ. Bʋa na-kala dɩ ba dʋndɔŋŋɔɔ nɛ dɔgɩsɛba dɩ ba na hɛɛŋ a yele pʋ, ʋ yie fá ba nenige nɛ a laaba ta. 19Ama dɩ sɩpaa-laarʋ-la nɛ sʋba, nɩalɩŋ yie bɩra vɩa La TƖƖNA nɛ aŋ mʋʋ to wombie-la sɩ bɔmɔ kɩɩ wombie-la ba nyɩmmaba fa sɩɩ to, a tuto vesiŋ a kpʋkpaarɛba. Ba vɩa dɩ ba joŋ ba wʋbɔmɔ-la arɩ ba nyu-duo-la a ta nɛ.

20Ŋɩɩ wɩaa, La TƖƖNA chaasa na baanɩŋ Iziral tɩŋŋaa nyuŋ a bʋl, “A tɩŋ tinteeŋ deeŋ nɩaa sɩ chei nii-la mɩ sɩ hɛ mɩ dɩ ba naabalɩmaba pɛgɛ, a bɩ jegile nɩɩ mɩ teeŋ, 21tinteye-la Josua sɩ bɩ kire aŋ sʋʋ, mɩ bɩra bɩ jaŋ kiriba ta ba sɩpaaŋ. 22Mɩ jaŋ kɛŋ tinteye-la a magɩsɛ Iziral tɩŋŋaa, a na dɩ ba jaŋ to mɩ wombiiŋ arɩ ba naabalɩmaba sɩ to ŋɩɩ koo ba bɩ jaŋ to.” 23La TƖƖNA fa leŋe tinteye-la ka nɛ, ʋ bɩ ba-na joŋo hɛ Josua nɩsɩŋ lɛ ʋ kiriba ta bala.

Currently Selected:

SƖPAALAARAA 2: SIS

Highlight

Copy

Compare