SƖPAALAARAA 1
1
Iziral tɩŋŋaa yuo Kɛnaŋ tɩŋŋaa nɩkaana-la
1Josua sɩ sʋba harɩŋ, ŋɩɩ nɛ Iziral tɩŋŋaa pɩɛsɛ La TƖƖNA, “Do bɛɛ nɩaa nɛ maga dɩ ba laa sɩpaaŋ a mʋ yuo Kɛnaŋ tɩmma-la?”
2La TƖƖNA bʋl, “Juda doho nɩaa nɛ maga ba mʋ, mɩ joŋ tintee-la hɛ ba nɩsɩŋ lɛ nɛ.”
3Ŋɩɩ nɛ Juda doho nɩaa bʋla pɩ ba naambiiriŋ Simioŋ doho nɩaa, “Má kʋ pɛ la lɛ dɩ la mʋ tintee-la ba sɩ kere pɩla a yuo Kɛnaŋ tɩmma-la. La ma jaŋ pɛ ma lɛ dɩ ma yuo laa ma tinteeŋ.” Ŋɩɩ nɛ Simioŋ doho nɩaa pɛ ba lɛ ba mʋ.
4Juda doho nɩaa arɩ Simioŋ tɩŋŋaa sɩ mʋ yuo Kɛnaŋ tɩŋŋaa arɩ Pɛrɛs tɩŋŋaa, La TƖƖNA jomba hɛ ba nɩsɩŋ lɛ, ba kpʋ nɩaa bʋɩ fii taŋ-la ba sɩɩ yɩrɛ Bɛzɛk lɛ. 5Nɩmɛ nɛ ba na Bɛzɛk kuoro a yuou, a yuo dii Kɛnaŋ arɩ Pɛrɛs tɩŋŋaa. 6Ŋɩɩ nɛ Bɛzɛk kuoro fá, ama ba kire kɛnʋ a keri ʋ nenii-baalaa arɩ ʋ naanii-baalaa.
7Bɛzɛk kuoro bʋl, “Mɩ keri kuoroo mahɩŋ batori arɩ fii nenii-baalaa arɩ naanii-baalaa nɛ, ka ba gbiene paa kʋdii-munoo mɩ teebʋl bʋbʋɔŋ. Lɛɛlɛ Wɩa joŋ wɩɩ-la mɩ sɩ ŋaa ba lɛ chɩmɩŋ nɛ a tiŋ mɩ lɛ.” Ŋɩɩ nɛ ba kɛnʋ kaa mʋ Jerusalɛm, ʋ sʋʋ nɩmɛ.
8Juda doho nɩaa bɩra mʋ yuo Jerusalɛm ma, a yuo diiu. Ŋɩɩ nɛ ba kpʋ taŋ-la nɩaa aŋ nyɩgɛ taŋ-la.
9Ŋɩɩ harɩŋ, Juda doho nɩaa bɩra mʋ dɩ ba yuo Kɛnaŋ tɩmma-la sɩ hɛ tintee-la peelee sɩ yʋga lɛ, arɩ nɩalɩŋ sɩ hɔŋ wɩɩpɔsʋŋ nadiiŋ dɩɩrɩŋ arɩ nɩalɩŋ sɩ hɔŋ dundollu-la sɩ hɛ peelee bʋbʋɔŋ wɩɩjʋʋlʋŋ dɩɩrɩŋ. 10Ŋɩɩ nɛ ba mʋ Kɛnaŋ tɩmma-la fa sɩ hɛ taŋ-la ba sɩɩ yɩrɛ Hɛbʋrɔŋ lɛ (Hɛbʋrɔŋ yɩrɩŋ nɛ fa Kɩrɩaf Aba), a yuo dii doho doho deemba: Sɛsaɩ, Ahɩmaŋ arɩ Talɩmaɩ.
11Ba bɩra lɩɩ nɩmɛ a mʋ nɩalɩŋ ma sɩ hɛ taŋ-la ba sɩɩ yɩrɛ Debi lɛ (Debi yɩrɩŋ nɛ fa Kɩrɩaf Sɛfa). 12Ŋɩɩ nɛ Kalɩb bʋl, “Mɩ jaŋ joŋ mɩ tolo Akɩsa a pɩ baal-la sɩ jaŋ yuo dii Kɩrɩaf Sɛfa a kɛsɛ ʋ nɩaa dɩ ʋ jaa.” 13Ŋɩɩ nɛ Kalɩb ŋaana Kɛnas, ʋ nanʋala Ofiniel yuo dii taŋ-la. Kalɩb joŋ tolo-la a pʋ ʋ jaa.
14Ba sɩ jaa dɔŋɔ dɛrɛ, ŋɩɩ harɩŋ lɛ nɛ Ofiniel hɛ ʋ haala dɩ ʋ pɩɛsɛ ʋ nyɩmma Kalɩb a laa tinteeŋ. Ŋɩɩ nɛ tolo-la sii jɩl kakumo mʋ dɩ ʋ na ʋ nyɩmma. Ʋ sɩ mʋa a tuu ʋ kakumo nyuŋ, Kalɩb pɩɛsʋ, “Bɛɛ kʋŋ nɛ ŋ chɩchɛ?”
15Ŋɩɩ nɛ tolo-la bʋl, “Chaasa pɛ mɩ lɛ. Ŋ laa sɩpaaŋ pɩmɛ tinteeŋ nɛ Nɛgɛf lɛ, ka lɩɩŋ tuo nɩmɛ. Pɩmɛ lee-la sɩ kɛŋ lɩɩ-bulo ma.” Ŋɩɩ nɛ Kalɩb joŋ lɩɩ-bulo-la sɩ hɛ taŋ-la nyuŋ arɩ bʋbʋɔŋ kala a pʋ.
16Mosis hɩɩlɩ-baala fa ŋaa Keni tɩɩna nɛ. Ʋ doho nɩaa lɩɩ Jeriko, taŋ-la ba sɩɩ yɩrɛ abɛ tɩɩsɩŋ taŋ, a to Juda doho nɩaa harɩŋ, ba mʋ Juda doho nɩaa tintee-hɩlɩŋ sɩ hɛ Nɛgɛf lɛ, a kpagɛ Arad a hɔŋ nɩmɛ.
17Juda doho nɩaa ma pɛ ba naambiiriŋ Simioŋ doho nɩaa lɛ ba mʋ yuo Kɛnaŋ tɩmma-la sɩ hɛ taŋ-la ba sɩɩ yɩrɛ Zɛfaf lɛ, a chei ʋ kala. Ŋɩɩ nɛ ba kɛŋ lee-la yɩyɩrɛ Hɔma. (Yɩrɩ-la bʋbʋɔŋ nɛ leriŋ ba sɩ cheye.) 18Juda doho nɩaa yuo laa tasɩŋ deemba ma nɛ arɩ ba tinteyee: Gaza, Asɩkɛlɔŋ arɩ Ɛkʋrɔŋ.
19La TƖƖNA fa chɩŋ Juda doho nɩaa harɩŋ nɛ, ŋɩɩ nɛ ba yuo laa tintee-la peelee sɩ yʋga. Ama ba fa bɩ wuo kiri nɩalɩŋ-na sɩ hɛ tintee-taalɩ-la lɛ, bɛɛ wɩaa nɩalɩŋ fa kɛŋ laalɩŋ janɩŋ torukoba ba sɩ kɛŋ hɔɔnʋŋ ŋaa nɛ. 20Mosis fa sɩ hɛ niiŋ pɩ Kalɩb, arɩ ʋ jaŋ joŋ Hɛbʋrɔŋ tinteeŋ a pʋ, ŋɩɩ nɛ ba joŋo pʋ. Ʋ kiri Anakɩ doho nɩaa nɩwaayiile-la nyɩŋ-nɩaa batori. 21Ama Bɛnjamɩŋ doho nɩaa-na bɩ wuo kiri Jebus tɩmma-la sɩ hɛ Jerusalɛm lɛ. Arɩ jɩnɩŋ kala, Jebus tɩŋŋaa ha hɛ Bɛnjamɩŋ doho nɩaa tʋɔŋ nɛ.
22Josɛf doho nɩaa ma mʋ yuo taŋ-la ba sɩɩ yɩrɛ Bɛtɛl. La TƖƖNA pɛ ba lɛ ba yuo dii. 23Ba sɩ tɩŋ nɩaa dɩ ba mʋ lʋara beŋ Bɛtɛl (Bɛtɛl yɩrɩŋ nɛ fa Lus), 24nɩalɩŋ mʋ na baal kʋbala dɩ ʋ lɩɩ taŋ-la tʋɔŋ kʋʋ lɩɩ. Ba bʋla pʋ, “Dagɛla ŋɩɩ la sɩ jaŋ to a jʋʋ taŋ deeŋ tʋɔŋ, ka dɩ la sɩ́ŋ wɩɩkala ŋaa.” 25Ŋɩɩ nɛ baal-la dagɛba, ba jʋʋ taŋ-la tʋɔŋ a kpʋ taŋ-la nɩaa, aŋ leŋ baal-la sɩ dagɛba wombiiŋ arɩ ʋ dɩa nɩaa kala. 26Ŋɩɩ nɛ baal-la lɩɩ nɩmɛ a mʋ Hiti tɩŋŋaa tinteeŋ, a saa taŋ nɩmɛ a hɛ ʋ yɩrɩŋ Lus. Taŋ-la yɩrɩŋ nɛ ha ŋɩɩ arɩ jɩnɩŋ kala.
27Manasɛ doho nɩaa-na bɩ tasɩŋ deemba arɩ tabiisi-la sɩ golliba nɩaa kire: Bɛf Saŋ, Taanak, Doo, Ɩbɩlɩam, Megido arɩ tabiisi-la sɩ golliba, bɛɛ wɩaa Kɛnaŋ tɩmma-la chaasa kɛŋ ba tʋɔŋ nɛ dɩ ba hɔŋ tintee-la lɛ. 28Iziral tɩŋŋaa sɩ kʋ kɛŋ doluŋ, ba fʋgɛ Kɛnaŋ tɩmma-la hɛ, ba tɩtɩŋ yoŋ tɩntɩŋŋaa. Ama ba bɩ Kɛnaŋ tɩmma-la kala kire ba lɩɩ tintee-la lɛ. 29Efirem doho nɩaa ma bɩ Kɛnaŋ tɩmma-la sɩ hɛ Geza lɛ kire, ama ba lemba nɛ ba guoli ba tʋɔŋ. 30Zebuluŋ doho nɩaa ma bɩ Kɛnaŋ tɩmma-la sɩ hɛ Kɩtɩrɔŋ arɩ Nahalɔl lɛ kire, ba lemba nɛ ba guoli ba tʋɔŋ, ama ba fʋgɛba nɛ ba tɩŋ tɩntɩŋŋaa pɩpɩba. 31Asa doho nɩaa ma bɩ Kɛnaŋ tɩŋŋaa sɩ hɛ tasɩŋ deemba lɛ kire: Ako, Sɩdɔŋ, Alab, Akɩzɩb, Heliba, Afɛk arɩ Rehob. 32Asa doho nɩaa sɩ bɩ ba kire ŋɩɩ, ba dɩ Kɛnaŋ tɩmma-la sɩ tɩɩ tintee-la kala hɔŋ nɩmɛ. 33Nafɩtalɩ doho nɩaa ma bɩ nɩalɩŋ sɩ hɛ tasɩŋ deemba lɛ kire: Bɛf Sɛmɛs arɩ Bɛf Anaf. Ba leŋ Kɛnaŋ tɩmma-la fa sɩ tɩɩ tintee-la nɛ, ba dɩ ba kala hɔŋ. Ama ba fʋgɛba nɛ ba tɩŋ tɩntɩŋŋaa a pɩpɩba. 34Amɔrɩ tɩŋŋaa kɛrɛ Daŋ doho nɩaa-na a hɛ tintee-la peelee sɩ yʋga lɛ nɛ, a pɔ dɩ ba sɩ́ kʋ tuu tintee-taala-la leriŋ. 35Amɔrɩ tɩmma-la fa chaasa kɛŋ ba tʋɔŋ nɛ dɩ ba hɔŋ peel-la ba sɩɩ yɩrɛ Hɛrɩs lɛ, arɩ lere-la ba sɩɩ yɩrɛ Aɩjalɔŋ arɩ Saalɩbɩm. Ama Efirem arɩ Manasɛ doho nɩaa doluŋ sɩ kʋ pʋŋa pɛ, ba fʋgɛ Amɔrɩ tɩmma-la ma hɛ ba tɩŋ tɩntɩŋŋaa pɩpɩba. 36Amɔrɩ tɩŋŋaa tinteeŋ bʋa nɛ fa wombii-bie-la sɩ to peelee tʋɔŋ, baa yɩrɛ Nʋɔmʋŋ wombii-bie, a to ŋɩɩ mʋ taŋ-la ba sɩɩ yɩrɛ Sɛla a kiele mʋ.
Currently Selected:
SƖPAALAARAA 1: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
