SƖPAALAARAA 16

1Tapʋlɩɩ kʋbala nɛ Samɩsɩŋ sii mʋ taŋ-la ba sɩɩ yɩrɛ Gaza, a na hachɔrʋŋ kʋbala, a jʋʋ chʋa ʋ dɩa lɛ ba pɛ bɔsɔ. 2Ŋɩɩ nɛ Gaza tɩŋŋaa nɩɩ arɩ Samɩsɩŋ hɛ ba taŋ tʋɔŋ. Ba sii mʋ ba taŋ boi-baalɩŋ lɛ a gbɛrʋ tɩtaŋ-la kala. Tɩtaŋ-la kala ba bɩ lee-kala mʋa. Ba sɩ, “Chie chʋchʋɔ-fɩɛla la jaŋ kpʋʋ.”

3Ama Samɩsɩŋ pɩŋ lee-la ŋɩɩ halɩɩ taŋ mʋ siesi. Ʋ sii mʋ a kɛŋ taŋ-la boi-baalaa borusuŋ arɩ ba daasɩŋ balɩa kala churo paa baasɛ, a kaa mʋ bil dundolo kʋbala nyuŋ sɩ chaasɛ Hɛbʋrɔŋ.

Samɩsɩŋ arɩ haal-la ba sɩɩ yɩrɛ Delaɩla

4Wɩɩŋ deeŋ harɩŋ lɛ, Samɩsɩŋ na haal kʋbala sɩ hɛ Sɔrɛk fuonaaŋ lɛ, a chou woruŋ. Haal-la yɩrɩŋ nɛ Delaɩla. 5Fɩlɩsɩtɩa tɩŋŋaa kuoroo mʋ a bʋla pɩ haal-la, “Nyɩsɛ Samɩsɩŋ dɩ ʋ dagɩŋ ŋɩɩ ʋ sɩ ŋaa a faasa kɛŋ doluŋ arɩ ŋɩɩ la sɩ jaŋ wuo to a kɛnʋ vɔɔ a laa ʋ doluŋ. Dɩ ŋ nɛ ŋaa ŋɩɩ, la kʋŋkala jaŋ pɩŋ warɩpʋla bʋɩ arɩ zɔlɔ.”

6Ŋɩɩ nɛ Delaɩla bʋla pɩ Samɩsɩŋ, “Dagɛmɛ ŋɩɩ ŋ sɩ ŋaa a faasa kɛŋ doluŋ arɩ ŋɩɩ nʋʋ sɩ jaŋ to a kɛnɩŋ vɔɔ a laa ŋ doluŋ.” 7Samɩsɩŋ bʋla pʋ, “Dɩ nʋʋ nɛ kɛŋ teŋ-bii-laarɩŋ balɩpɛ a vɔɔmɛ, mɩ jaŋ pʋgʋmɛ a nagɛ nʋʋ dɔŋ kala.”

8Ŋɩɩ nɛ Fɩlɩsɩtɩa tɩŋŋaa kuorusu-la kɛŋ teŋ-bii-laarɩŋ balɩpɛ kʋ pɩ haal-la, ʋ laa vɔɔ Samɩsɩŋ. 9Ka baalaa faa dɩa tʋɔŋ. Ŋɩɩ nɛ ʋ yɩrɛ, “Samɩsɩŋ, Fɩlɩsɩtɩa tɩŋŋaa nɩɩ kɔ ŋ lɛ.” Ŋɩɩ nɛ Samɩsɩŋ kɛŋ teŋ-bie-la kɛrɛ a nagɛ nyiniŋ sɩ yie digi gɛrɩ-ŋmɛnɩŋ ʋ kɛrɛ ŋɩɩ. Ba fa bɩ wuo jɩŋ ʋ dol-la bʋbʋɔŋ. 10Ŋɩɩ nɛ Delaɩla bʋla pɩ Samɩsɩŋ, “Ŋ jommi mɩ ŋaa nɩyaarɩ nɛ, ŋ nyɩnyɩsɛmɛ. Lɛɛlɛ, dagɛmɛ ŋɩɩ nʋʋ sɩ jaŋ to a wuo vɔbʋŋ.” 11Ŋɩɩ nɛ Samɩsɩŋ bɩra bʋl, “Dɩ nʋʋ nɛ kɛŋ ŋmɛŋ-falaa ba ha sɩ bɩ kaa vɔɔ kɩaa aŋ ka a chaasa vɔɔmɛ woruŋ, mɩ jaŋ pʋgʋmɛ a nagɛ nʋʋ dɔŋ kala.” 12Delaɩla kɛŋ ŋmɛŋ-falaa a vɔbʋ. Ka baalaa bɩra jʋʋ faa dɩa tʋɔŋ. Ʋ bɩra yɩrɛ, “Samɩsɩŋ, Fɩlɩsɩtɩa tɩŋŋaa nɩɩ kɔ ŋ lɛ.” Samɩsɩŋ bɩra kɛŋ ŋmɛŋ-falɩa-la ma sɩ vɔɔ ʋ nɩsaa kɛrɛ a nagɛ gɛrɩ-ŋmɛnɩŋ.

13Delaɩla bʋla pɩ Samɩsɩŋ, “Ŋ ha jommi mɩ ŋaa nɩyaarɩ nɛ, ŋ nyɩnyɩsɛmɛ. Dagɛmɛ ŋɩɩ nʋʋ sɩ jaŋ wuo to a vɔbʋŋ.” Ʋ bʋl, “Dɩ ŋ nɛ kɛŋ mɩ nyu-pʋŋ gulimo-la balɩpɛ sɩ hɛ mɩ nyuŋ lɛ, a kaa hɛ kʋ-la ba sɩ kaa yuo gɛrɩpɛɛŋ lɛ, a yuo ʋ dɩ ʋ gɛrɩ-ŋmɛsɩ-la kala hɛ dɔŋɔ lɛ a kaa mɩlɩmɛ dɩ ba jʋʋ dɔŋɔ lɛ, a kɛŋ pini chɛbɛ kɛŋ, mɩ jaŋ pʋgʋmɛ a nagɛ nʋʋ dɔŋ kala.” Ŋɩɩ nɛ Samɩsɩŋ pɩŋ doŋ, Delaɩla kɛŋ nyu-pʋna-la balɩpɛ sɩ hɛ ʋ nyuŋ lɛ, a yuo ba dɩ gɛrɩ-ŋmɛsɩ-la kala sɩ hɛ gɛrɩpɛ-yuori-daaŋ lɛ a hɛ dɔŋɔ, 14a lɛrɛ hɛ ʋ jʋʋ dɔŋɔ lɛ, a kɛŋ pini chɛbɛ kɛŋ. Ŋɩɩ nɛ aŋ bɩra yɩrʋ, “Samɩsɩŋ, Fɩlɩsɩtɩa tɩŋŋaa nɩɩ kɔ ŋ lɛ.” Ʋ hirige sii doŋ lɛ, a kɛŋ ʋ nyu-pʋnaa lɛrɛ fuosi gɛrɩpɛ-yuori daa-la arɩ ŋmɛsɩ-la kala lɛ.

15Ŋɩɩ nɛ tolo-la pɩɛsʋ, “Ɛɛ nɛ ŋ jaŋ bʋl ŋ chomi nɛ, aŋ kɛŋ wɩaa fɩfaamɛ? Naansɩɩŋ butori nɛ ŋ-la, ŋ sɩ jommi mɩ ŋaa nɩyaarɩ ŋ nyɩsɛmɛ, aŋ ha bɩ ŋ dol-la bʋbʋɔŋ daga pɩmɛ.” 16Ʋ sɩ pɛsɛ ʋ lɛ ŋɩɩ a bʋbʋl ʋ teeŋ tapʋlɩɩ kala, ʋ mɩɩsɩŋ paala mɩɩra fɩɩ.

17Ʋ walɩma ka aŋ bʋl wʋtɩtɩɩ a pɩ tolo-la. Ʋ sɩ, “Ba sɩ lʋlmɛ kala, nyu-fʋna ha bɩ mɩ nyuŋ lɛ dige, bɛɛ wɩaa ba joŋ mɩ hɛ Wɩa nɩsɩŋ lɛ nɛ mɩ ŋaa Nazarɩ tɩɩna, dɩ ba nɛ fʋŋ mɩ nyuŋ, mɩ doluŋ jaŋ lɩɩ dɩ mɩ pʋgʋmɛ a nagɛ nʋʋ dɔŋ kala.”

18Delaɩla sɩ na dɩ Samɩsɩŋ bʋl wʋtɩtɩɩ a pʋ, ʋ tɩŋ ba mʋ bʋla pɩ Fɩlɩsɩtɩa tɩŋŋaa kuorusu-la, “Má bɩra mɩɩra kɔ, ʋ bʋl wʋtɩtɩɩ-la sɩ hɛ nɩmɛ kala pɩmɛ nɛ.” Ŋɩɩ nɛ Fɩlɩsɩtɩa tɩŋŋaa kuorusu-la bɩra mɩɩra kɔ a kori warɩpʋla-la. 19Delaɩla kɛŋ Samɩsɩŋ hɛ naasɩŋ nyuŋ ʋ pɩŋ doŋ, ʋ yɩrɛ nʋʋ dɔŋ ʋ kʋ fʋŋ nyu-pʋŋ-gulumo-la balɩpɛ sɩ hɛ Samɩsɩŋ nyuŋ lɛ a laa ʋ doluŋ, ka ʋ pʋgʋmɛ.

20Ŋɩɩ nɛ aŋ yɩrɛ, “Samɩsɩŋ, Fɩlɩsɩtɩa tɩŋŋaa nɩɩ kɔ ŋ lɛ.” Ʋ sii doŋ lɛ a bɩɩnɛ ʋ tʋɔŋ lɛ arɩ ʋ jaŋ lɩɩ a nagɛ ʋ sɩ vɛnɛɛ lɩɩ ŋɩɩ a pigise laa ʋ tɩtɩa. Ama ʋ fa bɩ jɩŋ arɩ La TƖƖNA leŋu nɛ.

21Ŋɩɩ nɛ Fɩlɩsɩtɩa tɩmma-la kɛnʋ, a kɔrɩgɔ chaarɛ ʋ sɩaa aŋ kɛnʋ mʋ tɔ dɩa taŋ-la ba sɩɩ yɩrɛ Gaza lɛ, a kɛŋ kɔlɩɩŋ chɔrʋmɔɔ vɔbʋ aŋ leŋ ʋ nʋnɔŋ munuŋ dansarɩka-la lɛ. 22Ama ba sɩ fʋŋ ʋ nyu-pʋna-la ŋɩɩ, ba bɩra suomo wʋwaa.

Samɩsɩŋ sʋba

23Bʋa kʋbala lɛ, Fɩlɩsɩtɩa tɩŋŋaa kuorusu-la kʋ hilimi dɩ ba chaasa kpaarɛ ba vene-la ba sɩɩ yɩrɛ Daagɔŋ aŋ pɛ gbieli. Ŋɩɩ nɛ ba bʋl, “La vene Daagɔŋ nɛ joŋ la dʋndɔmɔ Samɩsɩŋ a hɛ la nɩsɩŋ lɛ.”

24-25Ba tʋɔŋ sɩ faasa tɔrɛ, ba kpɩa goŋ, “Má kɛŋ Samɩsɩŋ a kʋ lɩɩ dɩ ʋ gbiele pɩla.” Ŋɩɩ nɛ ba yɩrɛ Samɩsɩŋ ʋ kʋ lɩɩ dansarɩka lɛ a gbiele pɩba. Nɩalɩŋ sɩ na Samɩsɩŋ, ba dɛnnɛ ba vene a bʋl, “La vene nɛ joŋ la dʋndɔmɔ Samɩsɩŋ a hɛ la nɩsɩŋ lɛ, nɩɩ-la sɩ chei la tinteeŋ aŋ kpʋ la nɩaa ma a yʋgɛ.” Ba fa leŋe Samɩsɩŋ chɩŋ jebiee pɛgɛ nɛ. 26Ŋɩɩ nɛ Samɩsɩŋ bʋla pɩ tɩntɩnnʋ-la sɩ kɛŋ ʋ nɩsɩŋ lɛ, “Kɛmmɛ kaa mʋ dɩ mɩ laara na jebie-la sɩ chagɛ dɩa-la kɩɩ, mɩɩ chɛ mɩ yelliba nɛ.” 27Bʋa deeŋ lɛ dɩ dɩa-la kala suo arɩ baalaa arɩ haalaa. Fɩlɩsɩtɩa tɩŋŋaa kuoroo kala fa hɛ nɩmɛ. Lusuŋ nyuŋ ma baalaa arɩ haalaa fa yi bʋɩ batori a bibeŋ Samɩsɩŋ fa sɩɩ gbielu.

28Ŋɩɩ nɛ Samɩsɩŋ sʋl La TƖƖNA a bʋl, “Ou, mɩ TƖƖNA Wɩɩjarɩbakɔ, liisi mɩ wɩaa. Wɩa, mɩɩ sʋlʋŋ, bɩra pɩmɛ doluŋ bala dɩ mɩ wuo ŋmoo Fɩlɩsɩtɩa tɩŋŋaa deemba bɩra, a tiŋ mɩ sɩaa chɩmɩŋ.” 29Ŋɩɩ nɛ Samɩsɩŋ laara mʋ yi jebie-la balɩa sɩ chɩŋ dɩa-la tʋtʋɔbaanɩŋ a chagɛ dɩa-la kɩɩ, a kɛŋ ʋ nadiiŋ kɛŋ dɔŋɔ, a kɛŋ ʋ nagʋa ma a kɛŋ dɔŋɔ, 30aŋ bʋl, “Leŋ mɩ dɩ Fɩlɩsɩtɩa tɩŋŋaa deemba kala sʋʋ.” Ŋɩɩ nɛ aŋ yigi jebie-la arɩ ʋ doluŋ kala. Dɩa-la tele tɔ Fɩlɩsɩtɩa tɩŋŋaa kuoroo arɩ nɩalɩŋ kala sɩ hɛ nɩmɛ. Bʋa deeŋ lɛ Samɩsɩŋ sɩ sʋba, ʋ kpʋ nɩaa a kɩɩ bʋa-la lɛ ʋ fa sɩ weye.

31Ŋɩɩ nɛ ʋ naambiiriŋ arɩ ʋ nyɩmma dɩa nɩaa kala sii mʋ Gaza a laa ʋ kʋsʋʋŋ kaa kɔ dɩa. Ba hugu ʋ nyɩmma Manʋa bʋa sɩ hɛ tasɩ-la ba sɩɩ yɩrɛ Zora arɩ Ɛsɩtɔl pɛgɛ nɛ. Ʋ fa laa Iziral tɩŋŋaa sɩpaaŋ jɩsɩŋ mara nɛ.

Currently Selected:

SƖPAALAARAA 16: SIS

Highlight

Copy

Compare