SƖPAALAARAA 17
17
Mɩka tɔŋŋɔɔ
1Baal kʋbala nɛ fa hɛ Efirem tintee-la peelee sɩ yʋga lɛ baa yɩrɛ Mɩka. 2Ʋ bʋla pɩ ʋ naaŋ, “Ŋ warɩpʋla bʋɩ arɩ zɔlɔ-la ba sɩ joŋo mɩ nɩɩ dɩ ŋ ŋmɩɛsa, ba hɛ mɩ teeŋ, mɩ nɛ joŋo.” Ŋɩɩ nɛ ʋ naaŋ bʋl, “La TƖƖNA jaŋ pɛ ŋ lɛ mɩ bii.” 3Ʋ sɩ joŋ warɩpʋla-la bʋɩ arɩ zɔlɔ pɩ ʋ naaŋ, ʋ naaŋ bʋl, “Mɩ chaasa joŋ warɩpʋla-la a hɩhɛ La TƖƖNA nɩsɩŋ lɛ nɛ dɩ mɩ nanʋala kaa saa tɔmʋŋ. Mɩ jaŋ mɩɩra joŋo pɩŋ mɩ bii,” aŋ joŋo pʋ. 4Ŋɩɩ nɛ bile bɩra joŋ warɩpʋla-la a pɩ ʋ naaŋ. Ʋ laa a lɩɩsɛ zɔɔ-balɩa a pɩ libire ʋ kɛŋ daaŋ saa tɔmʋŋ a kɛŋ hɔpʋla taara tɔ. Ba kaa jʋʋ bil Mɩka dɩa lɛ. 5Mɩka fa kɛŋ lee nɛ a kpʋkpaarɛ vʋɩyaa. Ŋɩɩ nɛ ʋ yɛrɛ gɛrɩ-laala-daŋɩŋ, a mɛ tɔŋŋɔɔ a lɩɩsɛ ʋ bie dɔŋɔ ʋ kpʋkpaarɛ tɔmɔ-la. 6Bʋa-la lɛ Iziral tinteeŋ fa bɩ kuoro kɛnɛ. Nʋʋkala faa ŋaa wɩɩ-la ʋ sɩ cho nɛ. 7Bʋa-la tɩtɩa lɛ dɩ Levi doho nɩaa bapʋɔsɛ bie kʋbala fa hɛ nɩmɛ. Ʋ hɛ Bɛtɩlɛhɛm sɩ hɛ Juda tinteeŋ lɛ, a jʋjʋʋ Juda nyɩŋ-nɩaa tʋɔŋ. 8Ŋɩɩ nɛ ʋ lɩɩ nɩmɛ a gɔllɔ chɩchɛ leriŋ dɩ ʋ hɔŋ. Ʋ sɩɩ gɔllɛ ŋɩɩ, ʋ kɔ Mɩka dɩa sɩ hɛ Efirem tintee-la peelee sɩ yʋga lɛ. 9Mɩka pɩɛsʋ, “Nɩɩ nɛ ŋ lɩɩ?” Ʋ bʋl, “Mɩ ŋaa Levi doho nʋʋ nɛ a lɩɩ Bɛtɩlɛhɛm sɩ hɛ Juda lɛ. Leriŋ nɛ mɩ gɔllɔ chɩchɛ dɩ mɩ hɔŋ.” 10Ŋɩɩ nɛ Mɩka bʋla pʋ, “Hɔŋ mɩ teeŋ a ŋaa nɩɩ-la sɩ jaŋ chɩchagɩlɛmɛ arɩ nɩɩ-la sɩ jaŋ kpʋkpaarɛ mɩ tɔŋŋɔɔ. Jɩna kala mɩ jaŋ pɩŋ warɩpʋla fii, a pɩŋ gɛnnɩŋ arɩ kʋdiilee ma.” 11Levi doho nɩɩ-la sɛɩ dɩ ʋ hɔŋ ʋ teeŋ. Mɩka fa joŋ bapʋɔsɩ-bie-la ʋ nagɛ ʋ biiriŋ dɔŋɔ nɛ. 12Ŋɩɩ nɛ Mɩka laa Levi doho nɩɩ-la bil ʋ dɩa lɛ, a leŋ ʋ kpʋkpaarɛ ʋ tɔŋŋɔɔ. 13Mɩka bʋl, “Lɛɛlɛ mɩ jɩma La TƖƖNA tʋɔŋ jaŋ tɔrɛ mɩ nyuŋ, a tɩŋ Levi doho nɩaa bapʋɔsɛ bie deeŋ sɩ ŋaa nɩɩ-la sɩɩ kpaarɛ mɩ tɔŋŋɔɔ.”
Currently Selected:
SƖPAALAARAA 17: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
