SƖPAALAARAA 15

Samɩsɩŋ joŋ ʋ baanɩŋ fɩɩsɛ Fɩlɩsɩtɩa tɩŋŋaa lɛ

1Bʋa-la lɛ ba sɩɩ kʋŋ mɛmpɛba, Samɩsɩŋ sii kɛŋ bʋ-pɔrʋ-bie mʋ dɩ ʋ na ʋ haala. Ʋ sɩ mʋa, ʋ bʋla pɩ tolo-la nyɩmma, “Mɩɩ chɛ dɩ mɩ jʋʋ mɩ haala dɩa nɛ.” Ama, tolo-la nyɩmma bɩ sɛyɛ ʋ jʋʋ, 2aŋ bʋla pɩ Samɩsɩŋ, “Mɩ-na bɩɩna ŋ chaasa bɛrɛ tolo-la nɛ, ŋɩɩ nɛ mɩ joŋu pɩ ŋ nandɔŋɔ. Ama ʋ ŋaana hɛ nɩmɛ a zɔmɔ kɩɩʋ. Ŋ jaŋ wuo mɩɩra jaaʋ.”

3Samɩsɩŋ bʋl, “Bʋa deeŋ lɛ dɩ mɩ nɛ ŋaa wʋbɔŋ Fɩlɩsɩtɩa tɩŋŋaa lɛ ma, mɩ bɩ wɩɩ cheye.” 4Ŋɩɩ nɛ ʋ lɩɩ kɛsɛ jolluŋ zɔɔ-batori a kɛŋ balɩa na-kala bʋbʋɔ-dosuŋ vɔɔ mɛrɛ dɔŋɔ, aŋ paa tʋʋ-diiri-kapɩlaa vɔɔ mɛrɛ bʋbʋɔ-dosu-la lɛ, 5a chol nyiniŋ hɛ kapɩla-la lɛ aŋ kiri jollu-la ta ba jʋʋ Fɩlɩsɩtɩa tɩŋŋaa bagɩsɩŋ tʋɔŋ, lee-la mɛmpɛ sɩ bɩɩ chɩŋ a magɛ kʋmʋŋ. Ʋ ŋaa ŋɩɩ nɛ a nyɩgɛ Fɩlɩsɩtɩa tɩŋŋaa mɛmpɛ-la ba sɩ ta bil arɩ kɩalɩŋ kala sɩ chɩna ba dii. Ba girep tɩɩsɩŋ bagɩsɩŋ arɩ Olif tɩɩsɩŋ ma kala dii.

6Fɩlɩsɩtɩa tɩmma-la pɩɛsɛ, “Kʋbɛɛ nɛ ŋaa wɩɩŋ deeŋ?” Ba bʋla pɩba, “Samɩsɩŋ nɛ ŋaa ŋɩɩ, a tɩŋ ʋ hɩɩlɩ-baala Tɩmɩna tɩɩna-la sɩ joŋ ʋ haala pɩ ʋ nandɔŋɔ.” Ŋɩɩ nɛ Fɩlɩsɩtɩa tɩŋŋaa sii mʋ nyɩgɛ haal-la ʋ sʋʋ aŋ nyɩgɛ ʋ nyɩmma arɩ ʋ dɩa nɩaa kala. 7Samɩsɩŋ bʋla pɩba, “Má sɩ folo ŋaa wɩɩŋ deeŋ mɩ lɛ, mɩ bɩ jaŋ lemma da, mɩ jaŋ joŋ mɩ baanɩŋ a fɩɩsɛ ma lɛ.” 8Ʋ chaasa yuoba, a kpʋba yʋgɛ woruŋ. Ŋɩɩ nɛ aŋ sii tuu taŋ-la ba sɩɩ yɩrɛ Ɛtam a hɛ ʋ bʋbʋa lɛ.

9Fɩlɩsɩtɩa tɩŋŋaa ma sii a mʋ ŋmoo buguŋ Juda tinteeŋ lɛ, a jɛrɛ su lee-kala a kpagɛ taŋ kʋbala ba sɩɩ yɩrɛ Lehi. 10Ŋɩɩ nɛ Juda tɩŋŋaa pɩɛsɛba, “Bɛɛ nɛ tɩɩ ma kɔ dɩ ma yuola?” Ba bʋl, “La kɔ dɩ la yuo kɛŋ Samɩsɩŋ nɛ, a ŋaaʋ ŋɩɩ ʋ sɩ ŋaa la lɛ.”

11Ŋɩɩ nɛ laalɩyuoroo bʋɩ batori sii Juda tinteeŋ lɛ a mʋ bʋbʋa-la sɩ hɛ Ɛtam lɛ a pɩɛsɛ Samɩsɩŋ, “Ŋ bɩ jɩŋ arɩ Fɩlɩsɩtɩa tɩŋŋaa nɛ kɛŋ doluŋ la lɛɛ? Bɛɛ nɛ ŋ ŋaa la lɛ ŋ-la?” Samɩsɩŋ bʋl, “Wɩalɩŋ ba sɩ ŋaa mɩ lɛ nɛ mɩ ma joŋo ŋaa ba lɛ ŋɩɩ.” 12Laalɩyuoro-la bʋla pʋ, “La kɔ dɩ la vɔbʋŋ nɛ a kaa mʋ pɩ Fɩlɩsɩtɩa tɩŋŋaa.” Samɩsɩŋ sɩ, “Má ŋmɩɛsa pɩmɛ arɩ ma tɩtɩa dee bɩ jaŋ kpʋmɛ.”

13Laalɩyuoro-la bʋl, “La sɛyɛ nɛ, la jaŋ vɔbʋŋ a kaa mʋ pɩba, ama la-na bɩ jaŋ kpʋŋ.” Ŋɩɩ nɛ ba vɔbʋ arɩ ŋmɛŋ-falaa balɩa, a kɛnʋ kaa lɩɩ bʋbʋa-la lɛ. 14Ba sɩ kʋ yi Lehi, Fɩlɩsɩtɩa tɩŋŋaa chaasʋ a kʋkɔ aŋ ŋɩŋaa goŋ. La TƖƖNA Dɩma kʋ jʋʋ Samɩsɩŋ a pʋ doluŋ. Ŋmɛsɩ-la sɩ vɔɔ ʋ nɩsaa lɛ, guu nagɛ bɔɔŋ vɔɔlɔ, ʋ kaa kɛrɛ ta. 15Ŋɩɩ nɛ Samɩsɩŋ na kakumo talaŋa haŋgbeliŋ dɩ ʋ pɩna, ʋ joŋ a kpʋ Fɩlɩsɩtɩa tɩmma-la bʋɩ.

16Ŋɩɩ nɛ aŋ bʋl, “Kakumo talaŋa haŋgbeliŋ nɛ mɩ kaa kpʋ nɩaa bʋɩ. Kakumo talaŋa haŋgbeliŋ nɛ mɩ kaa kpʋba chʋɔrɛ.” 17Ʋ sɩ bʋl ŋɩɩ dɛrɛ, ʋ joŋ haŋgbel-la a yuo ta. Ba kɛŋ lee-la a yɩyɩrɛ Rama Lehi. (Rama Lehi bʋbʋɔŋ nɛ kakumo talaŋa haŋgbeliŋ dundolo.)

18Ŋɩɩ nɛ lɩɩnyʋasʋŋ faasa kɛŋ Samɩsɩŋ, ʋ ŋmoo niiŋ a pɩ La TƖƖNA, “Ŋ leŋe mɩ-na ŋ tɩntɩnna yuo dii nɛ woruŋ. Mɩɩ sʋlʋŋ, sɩ́ leŋe dɩ lɩɩnyʋasʋŋ kpʋmɛ dɩ nɩaa deemba sɩ bɩŋ ka to kɛmmɛ.” 19Ŋɩɩ nɛ Wɩa suri lɩɩ-bulo Lehi lɛ. Lɩɩŋ bulo lɩɩ, Samɩsɩŋ nyʋa a bɩra kɛŋ doluŋ. Ŋɩɩ nɛ ba kɛŋ lɩɩ-bulo-la a yɩyɩrɛ Ɛŋ-Hakori, arɩ jɩnɩŋ kala ʋ ha hɛ Lehi lɛ. 20Samɩsɩŋ laa Iziral tɩŋŋaa sɩpaaŋ jɩsɩŋ mara nɛ, bʋa-la lɛ Fɩlɩsɩtɩa tɩŋŋaa sɩ kɛŋ doluŋ Iziral tɩŋŋaa nyuŋ.

Currently Selected:

SƖPAALAARAA 15: SIS

Highlight

Copy

Compare