Galiisia Nɩaa 6

Má ŋaa wʋzɔŋŋɔɔ a pɩ nʋʋkala

1Mɩ naambiiri, dɩ ma dɔŋɔ nɛ ŋaa wʋbɔŋ, ma nɩalɩŋ sɩɩ to Wɩa Dɩŋ-zɔmʋŋ niiŋ lɛ, má dagʋ ŋɩɩ ʋ sɩ jaŋ to a lɩɩ ʋ wʋbɔmʋŋ lɛ. Má chagɩlʋ, a sɩ́ ʋ lɛ kpɩa. Dɩ ma nɩɩ ŋaa ŋɩɩ, má kɛŋ ma tɩtɩa woruŋ, dɩ Sɩtaanɩ sɩ́ wuo nyɩsɛ ma ma, dɩ ma ŋaa wʋbɔŋ. 2Dɩ ma kʋŋ nɛ jʋʋ wɩɩ, má pɛ ʋ lɛ. Dɩ ma nɩɩ ŋaa ŋɩɩ, maa to Kirisito niiŋ nɛ. 3Dɩ nʋʋ nɛ bɩɩna arɩ ʋ ŋaa nʋʋ nɛ, aŋ bɩ nʋʋ ŋaa, ʋʋ nyɩsɛ ʋ tɩtɩa nɛ. 4Nʋʋkala maga ʋ beŋ ʋ tɩtɩa wʋŋaalaa lɛ a na dɩ ba tʋʋla nɛ koo ba bɩ tʋʋla. Dɩ ba nɛ tʋʋla, ʋ jaŋ wuo bigisi ʋ tɩtɩa lɛ a tɩŋ ʋ wʋŋaalɩa-la wɩaa, aŋ sɩ́ ʋ tɩtɩa kaa magɩsɛ ʋ dɔnsʋŋ tɩŋŋaa, 5bɛɛ wɩaa nʋʋkala maga dɩ ʋ chʋŋ ʋ tɩtɩa chʋga nɛ.

6Nɩɩ-la ba sɩɩ dagɛ Wɩa niiŋ wɩaa, dɩ ʋ nɛ kɛŋ kʋŋkala, ʋ maga dɩ ʋ ŋaa pɩ nɩɩ-la sɩɩ dagʋ nɛ.

7Má sɩ́ ma tɩtɩa nyɩsʋ. Nʋʋkala bɩ Wɩa wuo mɔŋ. Kʋ-la ŋ sɩ duo, ʋ tɩtɩa nɛ ŋ jaŋ kʋŋ. 8Dɩ nʋʋkala nɛ to ʋ tʋɔtɔrɛ wʋŋaalaa harɩŋ, ʋ wʋŋaalɩa-la lɛ nɛ Wɩa jaŋ to a dɔgɩsʋ. Ama dɩ nʋʋ nɛ to Wɩa Dɩŋ-zɔŋ-la niiŋ, Wɩa jaŋ joŋ mɩɩsɩ-la sɩ bɩ dɛrɛ a timu. 9Ŋɩɩ wɩaa, má sɩ́ leŋe dɩ la lɔl wʋzɔŋŋɔɔ ŋaanɩŋ lɛ. Dɩ la nɛ ŋaa wʋzɔŋŋɔɔ a lɔl aŋ nyalɩmɛ, dɩ bʋa-la nɛ yie, Wɩa jaŋ tinla. 10Ŋɩɩ wɩaa, dɩ la nɛ wuolo, la ŋɩŋaa wʋzɔŋŋɔɔ nʋʋkala lɛ, a wasa nyaŋ la dɩ nɩalɩŋ kala sɩ laa Wɩa wɩaa dii a ŋaa kʋbala.

Chagɩlɩŋ arɩ Chʋɔlaa

11Ma na mɩ ŋmʋnsʋŋ sɩ barɩma ŋɩɩ. Mɩ tɩtɩa nɩsɩŋ nɛ mɩ kaa ŋmʋnsɛ teniŋ deeŋ a pɩpɩma. 12Nɩalɩŋ sɩɩ chɛ dɩ ba dagɛ ba tɩtɩa lɛ arɩ baa to Juu tɩŋŋaa wombiiŋ, ba nɩɩ fʋgɛma dɩ ma keri ma penee. Ba laa dii arɩ Kirisito sʋʋ daagɛsɛ nyuŋ ba wɩaa nɛ. Ama ba bɩ chɛ dɩ nɩaa to ŋɩɩ lɛ a dɔgɩsɛba. 13Nɩalɩŋ tɩtɩa sɩ keri ba penee, ba bɩ wɩalɩŋ Mosis fa sɩ bile ka to. Baa chɛ dɩ ma keri ma penee dɩ ba wuo bibigisi ba tɩtɩa lɛ arɩ ma maa to Juu tɩŋŋaa wombii-la nɛ.

14Ama mɩ-na, mɩ jaŋ bigisi mɩ tɩtɩa lɛ arɩ La Tɩɩna Yesu Kirisito sɩ sʋʋ daagɛsɛ-la nyuŋ dʋndʋŋa wɩaa. A tɩŋ ʋ sɩ sʋʋ ŋɩɩ, dʋnɩa wɩaa nagɛ wʋsʋʋnɩ nɛ mɩ teeŋ, mɩ ma nagɛ nɩsʋʋ dʋnɩa wɩaa teeŋ. 15Ʋ bɩ wɩɩ kɛnɛ dɩ la keri la penee koo dɩ la bɩ kere. Wɩɩ-la sɩ ŋaa sɩɩfɩaŋ wɩɩ nɛ, dɩ la bɩrɩmɛ a kɛŋ mɩɩ-falɩɩ-la.

16Nɩalɩŋ kala sɩ to wɩɩŋ deeŋ, Wɩa jaŋ fá ba nenige a leŋ dɩ ba hɔŋ arɩ yarɩfɩɛlaa, ba dɩ Wɩa nɩaa kala. Ba nɛ ŋaa Iziral tɩŋŋaa tɩtɩa Wɩa teeŋ. 17A lɩɩ jɩnɩŋ a kaa mʋmʋ, nʋʋkala bɩra sɩ́ mɩ walɩmʋ. Fʋfʋʋnʋ-la mɩ sɩ kɛnɛ mɩ yaraa lɛ, ba nɩɩ dagʋ arɩ mɩ ŋaa Yesu nʋʋ nɛ.

18Mɩ naambiiri, La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ yarɩfɩɛlaa. Amɩɩ.

Currently Selected:

Galiisia Nɩaa 6: SIS

Highlight

Copy

Compare