Galiisia Nɩaa 1

1Mɩ-na Pɔɔl sɩ ŋaa Yesu Kirisito nanzɔɔ nɛ ŋmʋnsɛ teniŋ deeŋ aa pɩ ma nɩalɩŋ sɩ laa Yesu wɩaa dii aa hilimi Galiisia tinteeŋ lɛ. Yesu Kirisito arɩ ʋ Nyɩmma Wɩa sɩ chɩsʋ sʋʋŋ lɛ nɛ lɩɩsɛmɛ a tɩmmɛ, nuhuobiinee dee bɩ mɩ lɩɩsa. 2Mɩ dɩ la naambiiri-la sɩ hɛ daha nɩɩ chʋɔlɛma.

3La Nyɩmma Wɩa arɩ La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ yarɩfɩɛlaa. 4Yesu Kirisito joŋ ʋ tɩtɩa pa nɛ ba kpʋʋ a tɩŋ la wʋbɔŋŋɔɔ wɩaa, dɩ ʋ lɩɩsɛla wʋbɔmɔ-la sɩ hɛ dʋnɩa deeŋ lɛ lɛɛlɛ. Ʋ to la Nyɩmma Wɩa tʋɔtɔrʋŋ lɛ nɛ a ŋaa ŋɩɩ pɩla. 5Wɩa yɩrɩŋ jaŋ yɩrɛ lɛɛlɛ a kaa mʋ wuu. Amɩɩ.

Wɩa wombii dɔŋ bɩra tuo

6Ʋ kperimi nɛ ma sɩ bɩ diene aŋ vɩa nɩɩ-la sɩ yɩrɛma Kirisito lahɔrɩmɔ lɛ, aŋ bɩra tuto wombii-wogo. 7Wʋtɩtɩɩ nɛ, Wɩa wombii dɔŋ kala bɩra tuo a pɛ kʋ-la la sɩ dagɛma lɛ. Mɩ bʋl wɩɩŋ deeŋ, bɛɛ wɩaa nɩaa yʋga a hɛ nɩmɛ aa walɩmɛma a chɩchɛ dɩ ba kɛŋ Kirisito wʋzɔmɔ-la kaa bɩrɩmɛ. 8Ama dɩ la-na, koo dɩ Wɩa tɩndaarʋ nɛ lɩɩ Wɩa-jaŋ a kʋ bʋl wʋwogusi, a kɛŋ Kirisito wʋzɔmɔ-la la sɩ bʋla pɩma kaa bɩrɩmɛ, Wɩa jaŋ dɔgɩsɛ tɩɩna a kaa mʋ wuu. 9La laa sɩpaaŋ bʋl wɩɩŋ deeŋ nɛ, aŋ bɩra bʋbʋl ʋ tɩtɩa lɛɛlɛ ŋ-la. Dɩ nʋʋkala nɛ bʋl wombii-wogo wɩaa pɩma, a lɩɩ wɩalɩŋ ma sɩ laa dii harɩŋ lɛ, Wɩa jaŋ dɔgɩsɛ tɩɩna a kaa mʋ wuu.

10Ma bɩɩna arɩ mɩ bʋl wɩɩŋ deeŋ a chɩchɛ dɩ mɩ laa yɩrɩŋ nɩaa teeŋ nɛɛ? Wɩa teeŋ nɛ mɩ chɩchɛ mɩ laa yɩrɩŋ. Ma bɩɩna mɩɩ chɛ dɩ nɩaa nɛ zizilmii? Dɩ mɩ nɛ faa chɛ dɩ nɩaa zizilmi, mɩ fa bɩ jaŋ ŋaa Kirisito tɩntɩnnʋ.

Pɔɔl daga ŋɩɩ Yesu Kirisito sɩ yɩrʋ dɩ ʋ kʋ ŋaa ʋ nanzɔɔ

11Mɩ naambiiriŋ, má leŋ dɩ mɩ bʋl wɩɩŋ deeŋ pɩma: Kirisito wʋzɔmɔ-la mɩ sɩ bʋla pɩma bɩ nuhuobiine teeŋ lɩa. 12Nuhuobiinee dee bɩ joŋo pɩmɛ, nuhuobiinee dee bɩ mɩ daga. Ama Yesu Kirisito nɛ joŋ wɩalɩŋ dagɛmɛ. 13Ma nɩɩ ŋɩɩ mɩ fa sɩ naga bʋa-la lɛ mɩ sɩɩ to Juu tɩŋŋaa Wɩɩ-chʋɔlʋŋ wombiiŋ nɛ. Ma nɩɩ ŋɩɩ mɩ fa sɩ to naasɩŋ a dɔgɩsɛ nɩalɩŋ sɩ laa Yesu wɩaa dii aa hilimi nɛ. Mɩ ŋaa mɩ kukeri kala nɛ dɩ mɩ chei ba tɩntɩŋŋaa. 14La Juu tɩŋŋaa Wɩɩ-chʋɔlʋŋ wombiiŋ lɛ, mɩ nɛ fa jɩŋ wɩaa kɩɩ mɩ dɔnsʋŋ tɩŋŋaa jesiŋ kala. Mɩ fa joŋ mɩ nyuŋ kala a hɛ la naabarɩŋ wombiiŋ lɛ nɛ. 15Ama ka dɩ ba-na lʋlmɛ, Wɩa lɩɩsɛmɛ nɛ dɩ mɩ tɩma pʋ. Ʋ lahɔrɩmɔ lɛ nɛ ʋ ŋaa ŋɩɩ mɩ lɛ. 16Ʋ tʋɔtɔrʋŋ lɛ nɛ ʋ dagɛmɛ ʋ Bie Yesu Kirisito, dɩ mɩ wuo bʋl ʋ wʋzɔmɔ-la a pɩ nɩalɩŋ sɩ bɩ Juu tɩŋŋaa ŋaa. Ʋ sɩ ŋaa ŋɩɩ, mɩ bɩ nʋʋkala teeŋ mʋa dɩ ʋ dagɛmɛ. 17Mɩ bɩ Jerusalɛm ma mʋa dɩ mɩ na nɩalɩŋ sɩ laa sɩpaaŋ ŋaa Wɩa nanzɔɔba mɩ lɛ. Ama mɩ guu mʋ tintee-la ba sɩɩ yɩrɛ Arebia nɛ, a lɩɩ nɩmɛ a mɩɩra mʋ tabal-la ba sɩɩ yɩrɛ Damasɩkʋs.

18Jɩsɩŋ batori harɩŋ nɛ, mɩ mʋ Jerusalɛm dɩ mɩ na Pɩɩta, nɩɩ-la ba sɩ kaa yɩrɛ Kɩɩfas. Mɩ sɩ mʋ nɩmɛ, mɩ hɔŋ ʋ teeŋ tapʋlaa fii arɩ banɔŋ nɛ. 19Mɩ sɩ hɔŋ nɩmɛ, mɩ bɩ Yesu nanzɔɔ kala na see Jeems, La Tɩɩna Yesu ŋaana. 20Wɩalɩŋ mɩ sɩ ŋmʋnsaa pɩma, Wɩa jɩma ba ŋaa wʋtɩtɩɩba nɛ. Mɩ bɩ nyɩɛ. 21Ŋɩɩ nɛ mɩ sii Jerusalɛm lɛ, a mʋ Siiria arɩ Siliisia tinteeŋ. 22Bʋa deeŋ kala lɛ nɩalɩŋ sɩ laa Yesu wɩaa dii aa hilimi Judiya tinteeŋ lɛ, ba fa ha bɩ mɩ jɩŋ. 23Ba ta nɩɩ nɩaa sɩɩ bʋl mɩ wɩaa nɛ, “Nɩɩ-la fa sɩ to naasɩŋ a dʋdɔgɩsɛla nɛ lɛɛlɛ bʋl Wɩa wʋzɔmɔ-la wɩaa ʋ fa sɩɩ chɛ dɩ ʋ chei.” 24Ba dɛnnɛ Wɩa woruŋ a tɩŋ mɩ wɩaa.

Currently Selected:

Galiisia Nɩaa 1: SIS

Highlight

Copy

Compare