MOSIS KƐŊ IZIRAL TƖŊŊAA LƖƖ 35

Chɛ-wiesii-la wombiee

1Mosis sii yɩrɛ Iziral tɩŋŋaa kala hɛ dɔŋɔ a bʋla pɩba, “Wɩaa deemba nɛ La TƖƖNA dagɛ dɩ ma ŋaa: 2Tapʋlaa balɩdʋ nɛ ma jaŋ tɩtɩŋ ma tɩntɩŋŋaa. Ama chɛ-pɛɩ chɛɛŋ ŋaa tapʋl-zɔŋ nɛ a pɩma, a ŋaa chɛ-wiesii a pɩ La TƖƖNA ma. Dɩ nʋʋkala nɛ tɩŋ tɩntɩŋŋaa chɛɛ-la, ʋ maga dɩ ma kpʋʋ nɛ. 3Ma pɔ má sɩ́ nyiniŋ hɛ ma dɩhɔnʋŋ kala chɛ-wiesii-la chɛɛŋ.”

Kɩalɩŋ ba sɩ jaŋ kaa ŋaa Wɩa dɩ-zɔŋ-la

4Ŋɩɩ nɛ Mosis bʋla pɩ Iziral tɩŋŋaa kala, “Wɩɩŋ deeŋ nɛ La TƖƖNA dagɛ, ʋ sɩ: 5Ma dʋa tʋɔŋ, má lɩɩsɛ dɔnsʋŋ a kaa kʋ ŋaa Wɩɩsʋlʋŋ pɩ mɩ-na ma TƖƖNA. Nɩɩ-la kala sɩ cho dɩ ʋ ŋaa Wɩɩsʋlɩɩ-la, ʋ jaŋ wuo kɛŋ sɛlɩmɛ, hɔpʋla, kɔlɩɩŋ, 6ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ, gɛrɩpɛ fʋfʋlʋŋ, bʋ-pʋnaa, 7pie-bel tenniŋ ba sɩ hɛ biriŋ ʋ fɩɛsɛ arɩ lɩɩ-nɛŋ tenniŋ arɩ sɔjaamɩŋ daaŋ, 8chaanaa nʋʋŋ, arɩ tegisi-la ba sɩ jaŋ kaa ŋaa Wɩɩsʋllɩ nʋʋŋ arɩ tegisi-la ba sɩ jaŋ kaa ŋaa kʋsʋɔrʋsʋŋ sʋɔra sɩ sɩma, 9tabɩɩ-tʋlaa ba sɩɩ yɩrɛ ɔnɩs arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ.

10Jɩma tɩŋŋaa kala sɩ hɛ ma tʋɔŋ maga dɩ ba kɔ a ŋaa wɩalɩŋ kala mɩ-na ma TƖƖNA sɩ daga: 11Wɩa dɩ-zɔŋ-la arɩ gɛrɩpɛyɛ-la sɩ jaŋ tɔʋ, arɩ tenni-la sɩ jaŋ tɔ ʋ nyuŋ, ʋ jolluŋ, ʋ daapɛsɩŋ, ʋ daa-gɛsɛɛ, ʋ daa-doloo arɩ hɔɔtaalɩ-la nyuŋ daapɛsɩ-la sɩ jaŋ chɩŋ, 12Wɩa niiriŋ daga arɩ daaterigeba arɩ ʋ nii-tɔlɔ, arɩ patɩɩsaŋ-la sɩ kɛrʋ, 13teebʋl-la arɩ ʋ daaterigeba arɩ ʋ nyuŋ tɩntɩnnɩ kɩaa arɩ kʋdiile-la sɩɩ chɩŋ La TƖƖNA sɩpaaŋ, 14chaaŋ daaŋ, arɩ ʋ nyuŋ tɩntɩnnɩ kɩaa arɩ chaana-la arɩ ba nʋʋŋ, 15koru-la nyuŋ ba sɩɩ nyɩgɛ kʋsʋɔrʋsʋŋ arɩ ʋ daaterigeba arɩ Wɩɩsʋllɩ nʋʋŋ arɩ kʋsʋɔrʋsʋŋ sʋɔra sɩ sɩma arɩ patɩɩsaŋ-la sɩ jaŋ tɔ Wɩa dɩ-zɔŋ-la boiŋ niiŋ, 16kʋnyɩgaa Wɩɩsʋlʋŋ koruŋ arɩ kʋ-la ba sɩ kɛŋ kɔlɩɩŋ ŋaa ʋ kɛŋ bʋɔsʋŋ a nagɛ nanchɛbɩrɩ kʋa a tagɩlɛ ʋ tʋɔŋ, ʋ daaterigeba arɩ ʋ nyuŋ tɩntɩnnɩ kɩaa, kɔlɩɩŋ taasɩ-gbaŋ-bal-la arɩ kʋ-la nyuŋ ʋ sɩ chɩna, 17patɩɩsamba-la ba sɩ kaa kɛrɛ golli lɛbɩ-la lɛ La TƖƖNA sɩ yie kɔ Iziral tɩŋŋaa teeŋ arɩ ʋ daapɛsɩŋ arɩ ʋ hɔ-taalɩsɩŋ, a pɛ lɩga-la boiŋ niiŋ patɩɩsaŋ lɛ, 18Wɩa dɩ-zɔŋ-la daapɛ-biisiŋ, arɩ daapɛsɩ-la lɛ lɩga-la patɩɩsaŋ ŋmɛsɩŋ sɩ jaŋ vɔɔ, 19gɛnnɩ-la ba sɩ laala tɩtɩŋ Wɩa tɩntɩŋŋaa, kɩalɩŋ Arɔŋ sɩ jaŋ laalɛ a ŋaa Wɩɩsʋllɩ sɩpaalaara arɩ kɩalɩŋ ʋ hambolibiisiŋ sɩ jaŋ laalɛ a tɩtɩŋ Wɩɩsʋllɩ sɩpaalaaraa tɩntɩŋŋaa.”

20Ŋɩɩ nɛ Iziral tɩŋŋaa kala sii Mosis sɩpaaŋ a viiri. 21Ba sɩ mɩɩra kɔ, nɩalɩŋ tʋɔbɩɩnaa sɩ suo, arɩ nɩɩ-la na kala sɩ kɛŋ tʋɔpʋla suomo kɛŋ Wɩɩsʋllɩ kɩaa kʋʋ pɩ La TƖƖNA, dɩ ba laa kaa ŋaa lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, aŋ pɛ kaa tɩŋ ʋ tɩntɩŋŋaa aŋ pɛ kaa yɛrɛ Wɩa tɩntɩŋŋaa gɛnnɩ-la sɩ kɛŋ yɩrɩŋ ma. 22Baalaa arɩ haala-la kala tʋɔbɩɩnaa sɩ suo kɛŋ sɛlɩmɛ kpɩɛraa deemba kɔ: dɩgɩlɩŋ-kpɛnsɩŋ, banzɔlɔba, nanjɔlɔba, nenii-pɩraa arɩ kɩalɩŋ dɔnsʋŋ ba sɩ kaa kpɩɛrɛ ba tɩtɩa. Nʋʋkala kɛŋ ʋ kɩaa kʋ ŋaa Wɩɩsʋlʋŋ a pɩ La TƖƖNA. 23Nɩalɩŋ kala sɩ kɛŋ ŋmɛŋ-diibelimbine, koo ŋmɛŋ-vachalɩŋ koo ŋmɛŋ-fɩaŋ koo gɛrɩpɛ fʋfʋlʋŋ, koo bʋ-pʋnaa, pie-bel tenniŋ ba sɩ hɛ biriŋ ba fɩɛsɛ koo lɩɩ-nɛŋ tenniŋ kaa kɔ. 24Nɩalɩŋ kala sɩ kɛŋ hɔpʋla koo kɔlɩɩŋ kaa kʋ ŋaa Wɩɩsʋlʋŋ a pɩ La TƖƖNA. Nɩalɩŋ ma sɩ kɛŋ sɔjaamɩŋ daasɩŋ ba sɩ jaŋ wuo kaa tɩŋ tɩntɩmɩɩ-la ma kaa kɔ. 25Haala-la ma kala sɩ jɩŋ gɛrɩ-ŋmɛnɩŋ koo gɛnnɩŋ yuonuŋ ma kɛŋ ŋmɛŋ-diibelimbine koo ŋmɛŋ-vachalɩŋ koo ŋmɛŋ-fɩaŋ koo gɛrɩpɛ fʋfʋlʋŋ kaa kʋ pɩ La TƖƖNA. 26Haala-la dɔnsʋŋ ma kala tʋɔbɩɩnaa sɩ suo aŋ kɛŋ jɩma kɛŋ bʋ-pʋnaa ŋaa gɛnnɩŋ. 27Sɩpaalaara-la ma kɛŋ tabɩɩ-tʋlaa ba sɩɩ yɩrɛ ɔnɩs, arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ kɔ. 28Ba pɛ kɛŋ tegisiŋ dɔnsʋŋ arɩ nʋʋŋ ba sɩ jaŋ kaa nyɩgɛ chaanaa arɩ tegisiŋ ba sɩ jaŋ kaa ŋaa Wɩɩsʋllɩ nʋʋŋ arɩ kʋsʋɔrʋsʋŋ sʋɔra sɩ sɩma kaa kɔ. 29Iziral tɩŋŋaa baalaa arɩ haala-la kala tʋɔbɩɩnaa sɩ suo kɛŋ tʋɔtɔrɛ Wɩɩsʋlʋŋ kɩaa kʋ pɩ La TƖƖNA, dɩ Mosis laa a kaa tɩŋ tɩntɩmɩɩ-la La TƖƖNA sɩ dagʋ.

Bɛzalɛl arɩ Oholiab

30Ŋɩɩ nɛ Mosis bʋla pɩ Iziral tɩŋŋaa, “Má bee na, La TƖƖNA lɩɩsɛ Uri nanʋala Bɛzalɛl nɛ, Huu sɩ ŋaa Juda doho nʋʋ nihiŋ. 31Ʋ joŋ ʋ Dɩma hɛ ʋ lɛ nɛ ʋ kɛŋ jɩma, doluŋ arɩ wʋjɩmɩŋ a jɩŋ nɩsɩŋ tɩntɩŋŋaa kala tɩmɩŋ, 32dɩ ʋ wuo kɛŋ jɩma-la a kɛŋ sɛlɩmɛ, hɔpʋla arɩ kɔlɩɩŋ a kaa libi kɩaa, 33dɩ ʋ jɩŋ tabɩaa yɛrɩŋ arɩ ba kaa tɩmɩŋ, a jɩŋ daasɩŋ tɩntɩŋŋaa a wuo tɩŋ gɔgɔ tɩntɩmɩɩ kala. 34La TƖƖNA joŋ nɩaa dagɩŋ jɩma a pɩ Bɛzalɛl arɩ Oholiab nɛ. Oholiab nyɩmma nɛ Ahɩsama a ŋaa Daŋ doho nʋʋ. 35Ʋ joŋ wʋjɩmɩŋ pɩba nɛ ba jɩŋ nɩsɩŋ tɩntɩmɩɩ kala, a jɩŋ ŋmɛŋ-mʋɔlaa, ŋmɛŋ-vachalɩŋ, ŋmɛŋ-fɩɛsɩŋ arɩ gɛrɩpɛ-fʋfʋlaa yuonuŋ wɩɩkala, dɩ ba nɛ ŋaa gɔgɔ wɩɩkala nɩhɩasɩŋ.

Currently Selected:

MOSIS KƐŊ IZIRAL TƖŊŊAA LƖƖ 35: SIS

Highlight

Copy

Compare