MOSIS KƐŊ IZIRAL TƖŊŊAA LƖƖ 34
34
Wɩa niiriŋ tabɩɩ-taalɩ falaa
1Ŋɩɩ nɛ La TƖƖNA bʋla pɩ Mosis, “Yɛrɛ lɩɩsɛ tabɩɩ-taalaa balɩa dɩ ba nagɛ bumbuŋ kɩalɩŋ ŋ sɩ joŋo lo yɛrɛ, mɩ jaŋ tuuri wɩalɩŋ tɩtɩa fa sɩ hɛ bumbuŋ kɩalɩŋ lɛ a hɛ ba lɛ. 2Ŋaa siri chʋchʋɔŋ a kʋ jɩl peel-la ba sɩɩ yɩrɛ Sɩnaɩ nyuŋ, a kɛŋ ŋ tɩtɩa kɔ mɩ teeŋ nɩmɛ. 3Nʋʋkala bɩ maga dɩ ʋ to ŋ harɩŋ kɔ koo nʋʋkala paala bɩ maga dɩ ʋ kʋ jɩl peel-la nyuŋ. Pʋsʋŋ ma paala bɩ maga dɩ ba kɔ peel-la bʋbʋɔŋ a dii yaŋ.”
4Ŋɩɩ nɛ Mosis yɛrɛ lɩɩsɛ tabɩɩ-taalɩa-la balɩa ba nagɛ bumbuŋ kɩalɩŋ. Ʋ koriba a kaa jɩl peel-la nyuŋ chʋchʋɔ-fɩɛla arɩ La TƖƖNA sɩ dagʋ ŋɩɩ. 5Ŋɩɩ nɛ La TƖƖNA to duoŋ-bɩlɩmbaanɩŋ lɛ a kʋ tuu ʋ teeŋ peel-la nyuŋ aŋ heeli dɩ ʋ yɩrɩŋ nɛ “La TƖƖNA.” 6Ŋɩɩ nɛ ʋ to Mosis sɩpaaŋ bal aŋ bʋl, “Mɩ nɛ ma TƖƖNA, mɩ nɛ ma TƖƖNA, mɩ nɛ ŋaa Wɩa-la sɩɩ fá nɩaa nenige. Mɩ nɛ ŋaa Wɩa-la nɩaa sɩ jaŋ wuo jʋʋ mɩ lahɔrɩmɔ, mɩ baanɩŋ bɩ lɩma lɩma ka sii, a cho nɩaa kɩŋkɛŋ a kɛŋ wʋtɩtɩɩ, 7a cho nɩaa arɩ ba doho doho bʋɩba, a joŋ nɩaa wʋbɔŋŋɔɔ arɩ ba wʋcheelee aa chɛba. Ama mɩ bɩ nɩalɩŋ sɩ ŋaa wɩaa chei ka leŋ pɛɩ, mɩ yie dɔgɩsɛ biiriŋ arɩ ba ma biiriŋ arɩ biiri-la ma nihee a tɩŋ ba nyɩmmaba wʋbɔŋŋɔɔ wɩaa.”
8Ŋɩɩ nɛ Mosis guu tuu kpirimi aŋ chʋɔlɛ La TƖƖNA. 9Ʋ sɩ, “Ou mɩ Tɩɩna, dɩ ŋ tʋɔŋ nɛ tɔrɛ mɩ nyuŋ, mɩɩ sʋlʋŋ laa la sɩpaaŋ a kɛnla mʋ. Nɩalɩŋ ŋaa tʋɔ-dol tɩmma nɛ. Ama joŋ la wʋbɔŋŋɔɔ arɩ la wʋcheelee chɛla, aŋ jonla dɩ la ŋaa ŋ nɩaa.”
10Ŋɩɩ nɛ La TƖƖNA bʋl, “Mɩɩ bil niiŋ nɛ mɩ dɩŋ pɛgɛ. Ŋ nɩaa kala sɩpaaŋ, mɩ jaŋ ŋaa wʋmagɩlaa ha sɩ bɩ ŋaa aŋ ka tintee kala lɛ koo dʋnɩa kala lɛ. Ma dɩ nɩalɩŋ sɩɩ jʋʋ jaŋ na ŋɩɩ mɩ-na ma TƖƖNA sɩ jaŋ to ŋ lɛ a tɩŋ tɩntɩŋ-duoruŋ. 11Ma to wɩalɩŋ mɩ sɩ dagɩŋ jɩnɩŋ, mɩ jaŋ kiri Amɔrɩ tɩŋŋaa, Kɛnaŋ tɩŋŋaa, Hiti tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa ta ma teeŋ. 12Má pʋpɔ ma dɩ nɩalɩŋ sɩ hɛ tintee-la lɛ ma sɩɩ mʋ sɩ́ nii pɛ. Dɩ ma nɛ ŋaa ŋɩɩ, ba jaŋ to ŋɩɩ lɛ a bɛrɛ kɛmma. 13Ama má giri ba vʋɩyaa korunuŋ a yɛrɛ ba tɔŋŋɔɔ tabɩa-la aŋ pɛ keri ba vene-la ba sɩɩ yɩrɛ Asɩra daasɩ-la lo. 14Má pʋpɔ dɩ ma sɩ́ vene kala zil. Mɩ-na ma TƖƖNA yɩrɩŋ nɛ yarɩ-bieri Tɩɩna, mɩ bɩ hadɔrʋŋ ka chɛ.
15Má pʋpɔ ma dɩ nɩalɩŋ sɩ hɛ tintee-la lɛ sɩ́ nii kala pɛ, dɩ ŋɩɩ dee, dɩ ba nɛ ŋaa ba wʋchɔrʋmɔɔ a kpʋ pʋsʋŋ pɩpɩ ba tɔŋŋɔɔ a dɩdɛnnɛba, ba jaŋ yɩrɛma dɩ ma kʋ pɛ dii ba kʋdiile-la. 16Dɩ ma nɛ jaa ba toloo dɔnsʋŋ ma, a pɩ ma biiriŋ, tolie-la jaŋ ŋaa ba wʋchɔrʋmɔ-la a lɛrɛ ma biiriŋ dɩ ba ma mʋ a tuto ba tɔmɔ-la.
17Má pʋpɔ ma sɩ́ hɔɔŋ kaa libi tɔŋ-kala a pɩ ma tɩtɩa.
18Má gbigbieli gbiele-la ma sɩ yie dii boroboro sɩ bɩ sɩbʋrʋŋ kɛnɛ. Tapʋlaa balɩpɛ ma jaŋ dii boroboro sɩ bɩ sɩbʋrʋŋ kɛnɛ arɩ mɩ sɩ dagɩŋ ŋɩɩ. Ma ŋɩŋaa wɩɩŋ deeŋ chɛnɛ-la ba sɩɩ yɩrɛ Abib tʋɔŋ, bɛɛ wɩaa ʋ tʋɔŋ nɛ ma lɩɩ Ijipiti tinteeŋ lɛ.
19Ma hambolibii bumbumba kala jaŋ ŋaa mɩ kɩaa, a pɛ ma pʋŋ doho na-kala bii-bumbuŋ sɩ ŋaa bele lɛ. 20Má kɛŋ pie-bie a time laa ma kakumo kala bii-bumbumba. Ama dɩ ma nɛ bɩ time laa, ŋɩɩ-na see ma kɛŋ ʋ baŋŋaa mɩlɩma bori. Má time laa ma hambolibii bumbumba kala.
Nʋʋkala bɩ maga dɩ ʋ kɔ mɩ teeŋ arɩ na-hɩllɩŋ.
21Ma jaŋ tɩŋ ma tɩntɩŋŋaa tapʋlaa balɩdʋ, ama tapʋl-pɛɛmɩŋ chɛɛŋ ʋ maga dɩ ma wiesi, dɩ ʋ nɛ paala ŋaa pɛrɩŋ bʋa lɛ koo kɩaa ŋaanɩŋ bʋa lɛ ma.
22Má gbigbieli gbiele-la ma sɩ yie kʋŋ ma baga mɛmpɛ-falaa aa gbieli, arɩ gbiele-la ma sɩ yie gbieli jɩna dɩdɛrɩŋ dɩ ma nɛ ŋaa ma baga kɩaa dɛrɛ. 23Jɩna tʋɔŋ ʋ maga dɩ Iziral tɩŋŋaa baalaa kala kɔ mɩ-na ma TƖƖNA Wɩɩjarɩbakɔ sɩpaaŋ naansɩɩŋ butori, mɩ nɛ ŋaa Iziral tɩŋŋaa Wɩa. 24Mɩ jaŋ kiri tinteyee ta ma sɩpaaŋ aŋ kɛŋ ma tinteeŋ jallɛ. Nʋʋkala bɩ jaŋ wuo gɩrɩma laaʋ, dɩ ma nɩɩ kɔ mɩ-na ma TƖƖNA Wɩa sɩpaaŋ jɩna na-kala naansɩɩŋ butori.
25Dɩ ma nɛ kpʋ pʋna-kala a chɩchɛ dɩ ma joŋ chalɩŋ pɩmɛ, má pɔ dɩ ma sɩ́ kʋdiil na-kala sɩ kɛŋ sɩbʋrʋŋ pɛ kaa kɔ. Má sɩ́ leŋe dɩɩsɩŋ kiele bal gbiele kʋdiilee chɩna chʋa.
26Má kɛŋ ma baga kʋfalaa sɩ zɔmɔ woruŋ a kaa kʋ pɩ mɩ-na ma TƖƖNA Wɩa. Ma pɔ má sɩ́ bʋʋ-bie koo pie-bie chɔ ʋ naaŋ yɩlɩŋ lɛ.”
27Ŋɩɩ nɛ La TƖƖNA bʋla pɩ Mosis, “Ŋmʋnsɛ wɩaa deemba bil, bɛɛ wɩaa ba nɛ mɩ kaa bil niiŋ mɩ dɩŋ arɩ Iziral tɩŋŋaa pɛgɛ.” 28Mosis fa hɛ La TƖƖNA teeŋ wɩɩhɛyɛ arɩ tɩtaŋɩŋ tapʋlaa mahɩŋ balɩa nɛ. Ʋ bɩ kʋŋ die ʋ bɩ lɩɩ ma nyʋa. Ŋɩɩ nɛ ʋ tuuri wɩalɩŋ Wɩa sɩ kaa bil nii-la ʋ dɩ ba pɛgɛ a hɛ tabɩɩ-taalɩa-la lɛ, Wɩa sɩ bil niiri-la fii.
Mosis sɩaa ka tʋl
29Mosis sɩ lɩɩ peel-la ba sɩɩ yɩrɛ Sɩnaɩ nyuŋ kʋ tuu a kori tabɩɩ-taalɩa-la balɩa, ʋ fa bɩ jɩŋ dɩ ʋ sɩaa ka tʋl nɛ a tɩŋ ʋ dɩ La TƖƖNA sɩ bʋl wɩaa ŋɩɩ. 30Arɔŋ arɩ Iziral tɩŋŋaa kala sɩ na Mosis sɩaa ka tʋl ŋɩɩ, fawʋllʋŋ kɛmba, ba bɩ chɛ dɩ ba kpagʋ. 31Ŋɩɩ nɛ Mosis yɩrɛba, Arɔŋ arɩ nɩalɩŋ sɩpaalaaraa mɩɩra kɔ Mosis teeŋ, ʋ bʋl wɩaa pɩba. 32Ŋɩɩ harɩŋ nɛ Iziral tɩŋŋaa kala kɔ ʋ teeŋ ʋ dagɛba niiri-la kala La TƖƖNA sɩ joŋo pʋ Sɩnaɩ peel-la nyuŋ.
33Mosis sɩ bʋl wɩalɩŋ pɩba dɛrɛ, ʋ joŋ nyu-bɛlɛ a tɔ ʋ sɩaa. 34Ama bʋa na-kala dɩ ʋ nɩɩ mʋ La TƖƖNA sɩpaaŋ dɩ ba bʋl wɩaa, ʋ yie kɛŋ nyu-bɛlɛ-la suri nɛ, see dɩ ʋ bɩra kʋ lɩɩ. Ʋ sɩ yie kʋ lɩɩ a bʋl wɩalɩŋ La TƖƖNA sɩ bʋla pʋ a pɩ Iziral tɩŋŋaa, 35ba yie na arɩ ʋ sɩaa ka tʋl. Mosis yie bɩra joŋ nyu-bɛlɛ-la a tɔ ʋ sɩaa, see dɩ ʋʋ chɛ ʋ mʋ La TƖƖNA sɩpaaŋ ʋ kaa suri.
Currently Selected:
MOSIS KƐŊ IZIRAL TƖŊŊAA LƖƖ 34: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
